+971 50 7554105
ತುಮ್ಚ್ಯಾ ಗಮನಾಕ್:

ಲಾರ್  -  ಲ್ಯಾನ್ಸಿ ಪಿಂಟೊ ನಾಯಕ್

ಬರಯ್ಣಾರಾ ವಿಶಿಂ ಜಾಣಾ ಜಾ...

90.0
User Rating

"ಮಾಮ್ಮಿsss"
ಇಸ್ಕೊಲಾ ಥಾವ್ನ್ ಧಾಂವೊನ್ ಆಯಿಲ್ಲೆಂ ಶಯ್ಲಾ ಬ್ಯಾಗ್ ಸೊಫ಼ಾಚೆರ್ ಉಡೊವ್ನ್ ಆವಯ್ಕ್ ಸೊಧ್ಚಾಕ್ ಖಿಳಂಚ್ ಮಾರ್‍ಲಿ.

"ಶಯ್ಲಾ?! ಕಿತೆಂ ಜಾಲೆಂ?!" ರಾಂದ್ಚಾ ಕುಡಾ ಥಾವ್ನ್ ಆಕಾಂತೂನ್ ಜಾಪ್ ದಿಲಿ ಶಾಲೆಟಾನ್. "ಮಾಮ್ಮಿ!!" ಏಕ್ದಮ್ ರಡ್ಕುರೆಂ ಜಾವ್ನ್ ಭಿಂಯಾನ್ ಥರ್ತರೊನ್ ಧಾಂವೊನ್ ಆವಯ್ಕ್ ಪೊಟ್ಲುನ್ ಧರಿಲಾಗ್ಲೆಂ ಶಯ್ಲಾ.

"ಪುತಾ, ಕಿತೆಂ ಜಾಲೆಂ?! ಅರೇರೇ ತುಜೆಂ ಆಂಗ್ ಪೆಟ್ತಾ?!! ತುಕಾ ತಾಪ್ ಯೆತಾ ಕಸೊ?! ಕಿತೆಂ ಜಾಲೆಂ?!" ಸಗ್ಳೆಂ ಗಡ್ಬಡೊನ್ ಗೆಲೆಂ ಶಾಲೆಟ್. ಸಗ್ಳ್ಯಾನಿಂ ತಾಚೊ ಹಾತ್ ಚರಯ್ಲೊ. ಕಪಲಾಕ್, ಗೊಮ್ಟ್ಯಾಕ್, ಹರ್‍ಧ್ಯಾಕ್, ಪಾಟಿಕ್. ಶೈಲಾಚೆಂ ಆಂಗ್ ಸಗ್ಳೆಂ ಕಠೀಣ್ ಹುನ್ ಲಾಗ್ತಾಲೆಂ.

ಎಕ್ಲೆಂಚ್ ಧುವ್ ತೆಂ! ನೆಂಟೆ, ಮಾಸೂಮ್, ಧಾ ವರ್‍ಸಾಂಚೆಂ.. ತಾಚೆಂ ಸರ್‍ವಸ್ವ್ ತೆಂ ಜಾವ್ನಾಸ್‌ಲ್ಲೆಂ. ಶಾಲೆಟ್ ಭಿಂಯೆಲೆಂ ಕಠೀಣ್ ತಾಪಾನ್ ಕಿತೇಂಯ್ ಜಾಲೆಂ ತರ್?!? ರೋಶನಾಕ್ ಆಪಂವ್ಚೆಂ ಬರೆಂ ದಿಸ್ಲೆಂ ತಾಕಾ.. "ಭಾಂಗಾರಾ, ತುಕಾ ಕಠೀಣ್ ತಾಪ್ ಆಸಾ.. ಕಸೊ?! ಕಿತೆಂ ಜಾಲೆಂ?! ಹಾಂವ್ ಡ್ಯಾಡಿಕ್ ಫ಼ೋನ್ ಕರ್‍ನ್ ಆಪಯ್ತಾಂ.." "ಮಾಮ್ಮಿsss ನಾಕಾ.. ನಾಕಾ... ನಾಕಾ...." ಶಯ್ಲಾನ್ ಬೊಭಾಟ್ ಮಾರ್‍ಲಿ. ಆನಿ ನಿಮಾಣೆಂ ಬೊಭಾಟ್ ಕ್ಶೀಣ್ ಜಾವ್ನ್ ಯೆತಾನಾ ತಾಚೆಂ ಕುಡಿಚೆಂ ಸಮತೋಲನ್ ಚುಕ್ಲೆಂ ಆನಿಂ ಮತ್ ಚುಕೊನ್ ಸಕ್ಲಾ ಗಳ್ಳೆಂ.

ತೆಂ ನಿಸ್ತೇಜ್ ಜಾಲೆಂ.. ಅಚಲ್ ಜಾಲೆಂ, ಸ್ಥಬ್ದ್ ಜಾಲೆಂ, ಶಾಲೆಟ್ ಸಗ್ಳೆಂಚ್ ಘಾಬರ್‍ಲೆಂ. "ಜೆಜು!... ಮ್ಹಾಕಾ ಪಾವ್" ಆಕಾಂತಾಂತ್ ಆಕ್ಲಾಸಿ ಉಲೊ ಭಾಯ್ರ್ ಆಯ್ಲೊ. ಕಿತೆಂ ಕರ್‍ಚೆಂ ತಾಕಾ ಸಮ್ಜಾಲೆಂ ನಾ ಪಾಟಾಪಾಟ್ ತಾಕಾ ಉಕ್ಲುನ್ ವಾರ್‍ಯಾಕ್ ಸೊಫ಼ಾರ್ ನಿದಾವ್ನ್ ತೊಂಡಾಕ್ ಉದಾಕ್ ಶಿಂಪ್ಡಾಯ್ಲೆಂ. "ಶಯ್ಲಾ.. ಮುನ್ನಿ... ಭಾಂಗಾರಾ.." ನಾನಾತ್ಯಾ ನಾಂವಾನಿ ಉಲೊ ಕರ್‍ನ್ ಜಾಗಂವ್ಚೆಂ ಪ್ರಯತ್ನ್ ಕೆಲೆಂ.

ಶಾಲೆಟ್ ಸಗ್ಳೆಂ ಕಂಗಾಲ್ ಜಾಲೆಂ. ಆವಯ್ ತೆಂ, ತಾಚೆಂ ಕಾಳಿಜ್ ಮುದ್ಗಲೆಂ, ಹಾತ್ ಪಾಂಯ್ ಕಾಂಪೊಂಕ್ ಲಾಗ್ಲೆ. ಶಿಂತಿದ್ ಕಾಮ್ ಕರಿನಾ ಜಾಲೆಂ. ಕರ್‍ಚೆಂ ಕಿತೆಂ?! ಆನಿ ಕಿತೆಂ ಜಾಲೆಂ?! ತೆಂ ತಾಕಾ ಸಮ್ಜಾಲೆಂ ನಾ! ಸಂದಿಗ್ದ್ ಪರಿಸ್ತಿತೆಂತ್ ಏಕ್ ಬೀಗ್ ಉಗ್ತೆಂ ಕರುಂ ಹಜಾರ್ ಚಾವಿಯಾಂಚೊ ಘೊಸ್ ದಿಲ್ಲೆಪರಿಂ ತೆಂ ಬಾಂದ್ಪಾಸಾಂತ್ ಶಿರ್‍ಕಾಲೆಂ. ಸಟ್ಟ್ ಕರ್‍ನ್ ಪಯ್ಲೆಂ ರೋಶನಾಕ್ ತಿಳ್ಸುಂಚೆಂ ಕಾಮ್ ಕರುಂಕ್ ಫ಼ೋನ್ ಘುಂವ್ಡಾಯ್ಲೆಂ.

ಸಂಪರ್‍ಕ್ ಮೆಳ್ತಚ್ ತೆಂ ಬೊಭಾಟ್ಲೆಂ!? "ರೋಶನ್ ವೆಗಿಂ ಘರಾ ಯೆ.. ಆಮ್ಚ್ಯಾ ಮುನ್ನಿಕ್ ಕಿತೆಂ ಜಾಲಾಂ ಗೊತ್ತುನಾಂ.. ತೆಂ ಮತಿರ್ ನಾಂ.. ಮ್ಹಜೆ ಹಾತ್ ಪಾಂಯ್ ಕಾಂಪ್ತಾತ್.. ಮತ್ ಪಿಶಿ ಜಾಲ್ಯಾ.. ವೆಗಿಂ ಯೇ.." ಶಾಲೆಟ್ ರಡೊನ್ ರಡೊನ್ ಹುಸ್ಕಾರೊನ್, ಗಡ್ಬಡೊನ್ ಸಾಂಗೊನ್೦ಚ್ ಗೆಲೆಂ. "ಶಾಲೆಟ್ ಪ್ಲೀಜ್ ಥಂಡ್ ಜಾ.. ಆಮ್ಚ್ಯಾ ಮುನ್ನಿಕ್ ಕಾಂಯ್ ಜಾಂವ್ಚೆಂ ನಾಂ... ಹಾಂವ್ ಆತಾಂಚ್ ಭಾಯ್ರ್ ಸರ್‍ತಾಂ... ಧಯ್ರ್ ಘೆ" ರೋಶನಾನ್ ಸೊಸ್ಣಿಕಾಯೆನ್ ಥಂಡ್ ಮತಿಂತ್ ಪರಿಸ್ಥಿತಿ ಘೆವ್ನ್ ಭಾಯ್ಲೆಕ್ ಸಮಧಾನ್ ಕೆಲೆಂ.. "ರೋಶಿ ತುಂ ಯೇ.. ಮ್ಹಾಕಾ ಧಯ್ರ್ ಪಾಂವಾನಾಂ.. ಮ್ಹಾಕಾ ಭ್ಯೆಂ ದಿಸ್ತಾ.. ಮುನ್ನಿಕ್ ಕಿತೆಂಯ್ ಜಾಯ್ ಜಾಲ್ಯಾರ್ ಹಾಂವ್ ಮೊರ್‍ತಾಂ ಖಂಡಿತ್.." ಪರತ್ ಹುಸ್ಕಾರೊನ್ ಸಿಂತಿಮೆಂತಾಳ್ ಜಾವ್ನ್ ಸಾಂಗಾಲಾಗ್ಲೆಂ ಶಾಲೆಟ್. "ಶಾಲೆಟ್ ಪ್ಲೀಜ್.. ತುಂ ತುಕಾಚ್ ಸಾಂಬಾಳ್.. ಹಾಂವ್ ಆಯ್ಲೊಂ ಬಾಯ್" ಕರ್‍ನ್ ಫ಼ೋನ್ ಸಕ್ಲಾ ದವರ್‍ಚೆಂ ರೋಶನಾನ್. ಶಾಲೆಟಾನ್ ಶಯ್ಲಾಕ್ ವಾರೆಂ ಘಾಲೆಂ, ಆಂಗ್ ಪುಸ್ಲೆಂ, ಹಾಲಯ್ಲೆಂ, ಉದಾಕ್ ಮಾರ್‍ನ್ ಸನಿನ್ ಕರ್‍ಚೆಂ ಪ್ರಯತ್ನ್ ಕೆಲೆಂ.

ಸರ್‍ವ್ ಸಾಂತಾಂ ಭಕ್ತಾಂಕ್, ಸರ್‍ಗಾ ವಯ್ಲ್ಯಾ ಆಂಜಾಕೊರಾಂಕ್ ಉಲೊ ಮಾರ್‍ಲೊ.. ರಡ್ಲೆಂ..!! ತಿತ್ಲ್ಯಾರ್ ಕಶೇಂಯ್ ಶಯ್ಲಾನ್ ದೊಳೆ ಉಗ್ತೆ ಕೆಲೆ. ಸಗ್ಳೆಂ ಆಂಗ್ ತಾಚೆಂ ಕಾಂಪ್ತಾಲೆಂ. "ಬಾಳಾ ಕಿತೆಂ ಜಾಲೆಂ?!.. ಮುನ್ನಿ ಕಶೆಂ ಆಸಾಯ್ ಪುತಾ..?! ಶಯ್ಲಾ..?! ವಯ್ರ್ ವಯ್ರ್ ಉಲಯ್ಲೆಂ ಶಾಲೆಟ್.

"ಮಾಮ್ಮಿ.." ವಳೂ ಪಿಂರ್‍ಗಾಲೆಂ ಶಯ್ಲಾ. "ಪುತಾ ಕಿತೆಂ ಜಾತಾ?!" ಶಾಲೆಟಾನ್ ಶಯ್ಲಾಚೊ ತಾಳು, ಕೇಸ್ ಪೊಶೆಲೆ, ಹಾತ್ ಘಟ್ಟ್ ಧರ್‍ಲೆ. "ಮಾಮ್ಮಿ.. ಹಾಂವ್ ಖಂಯ್ ಆಸಾಂ?!" ವಳೂ ಕುಡ್ಕ್ಯಾ ಕುಡ್ಕ್ಯಾ ಉತ್ರಾಂನಿ ತೆಂ ಪಿಂರ್‍ಗವ್ನ್ ವಿಚಾರಿಲಾಗ್ಲೆಂ.

"ಪುತಾsss.. ತುಂ ಘರಾ ಆಸಾಯ್?! ಮ್ಹಜೆಂ ಸರ್‍ಶಿಂ ಆಸಾಯ್.." "ಪುಣ್ ಡ್ಯಾಡಿ?!?" ಎಕಾಚ್ಚ್ ಫ಼ರಾಂ ಶಾಲೆಟಾಚಿಂ ಉತ್ರಾಂ ಕಾತ್ರುನ್ ವಿಚಾರ್‍ಲೆನ್ ಶಯ್ಲಾನ್. ಶಾಲೆಟಾಕ್ ಭಿರಾಂತ್ ದಿಸ್ಲಿ! ಡ್ಯಾಡಿ ಅಫ಼ಿಸಾ ಥಾವ್ನ್ ಯೆತಾನಾ ವೇಳ್ ಜಾತಾ ಮ್ಹಣ್ ಜಾಣಾಂ ಆಸ್‌ಲ್ಲೆಂ. ತರೀ ಕಿತ್ಯಾಕ್ ತಸೆಂ ವಿಚಾರ್‍ಲೆಂ?! ಶಾಲೆಟಾಕ್ ಮಿಸ್ತೆರ್‌ಚ್ ಭೊಗ್ಲೆಂ. ತರೀ ಸಯ್ರಾಣ್ ಸಾಂಭಾಳ್ಳೆಂ "ಡ್ಯಾಡಿ ಅತ್ತಾಂ ಯೆತಲೊ.. ಭಿಂಯೆನಾಕಾ. ತಾಕಾ ಖಬಾರ್ ದಿಲಿ ತುಂ ಹುಶಾರ್ ನಾಂ ಮ್ಹಣ್. ತೊ ಆತ್ತಾಂಚ್ ಭಾಯ್ರ್ ಸರ್‍ನ್ ಯೆತಾಂ ಮ್ಹಣಾಲೊ.." "........." ಶಯ್ಲಾನ್ ಕಿತೆಂಚ್ ಪ್ರತಿಕ್ರಿಯಾ ದಾಖಯ್ಲಿನಾ.

ಶಾಲೆಟ್ ದೊಡ್ತ್ಯಾ ಬಾಂದ್ಪಾಸಾಂತ್ ಪಡ್ಲೆಂ. "ಕಿತೆಂ ಜಾಲೆಂ ಪುತಾ?!" ಕುಟ್ಟುನ್ ವಿಚಾರುಂಕ್ ಪಳಯ್ಲೆಂ ಶಾಲೆಟಾನ್! ತರೀ ಶಯ್ಲಾ ಉಲಯ್ಲೆಂ ನಾ ಕಸಲಿಗೀ ತಾಂಡ್ ವೋಡ್ ತಾಚಾ ನೆಂಟ್ಯಾ ವದನಾಕ್ ಝಳ್ಕಾತಾಲಿಂ, ಕಸಲಿಗೀ ಮಾನಸಿಕ್ ಪುರಾಸಣ್, ಆಗಾಧ್ ದಖೊ ತಾಚೆಂ ವದನ್ ಧರ್ ಧರ್ ಮ್ಹಣ್ ಉಕ್ಲುನ್ ಸಾಂಗ್ತೆಲೆಂ ಘಡ್ಯೆಡ್ಯೆ ದೀರ್ಘ್ ಸ್ವಾಸ್ ತೆಂ ಸೆಂವ್ತಾಲೆಂ. ಆಂಗ್ ಸಗ್ಳೆಂ ಕಠೀಣ್ ತಾಪಾನ್ ಹುನ್ ಜಾಲ್ಲೆಂ.

ತಿತ್ಲ್ಯಾರ್ ಆಂವ್ಸರಾನ್ ರೋಶನ್ ಆಯ್ಲೊ. "ಕಿತೆಂ ಜಾಲೆಂ ಶಯ್ಲಾಕ್?!" ಏಕ್ ಘಡಿ ಶಾಲೆಟಾಕ್ ಆನಿ ಆಪ್ಲ್ಯಾ ಧುವೆಚೆರ್ ದೀಶ್ಟ್ ಘಾಲಿ. "ಮುನ್ನು, ಕಿತೆಂ ಜಾಲೆಂ ತುಕಾ?! ಅರೆರೇ ಕಠೀಣ್ ತಾಪ್ ಯೆತಾ ತಾಕಾ.." ಆಂಗ್ ಆಪ್ಡುನ್ ಸಾಂಗಾಲಾಗ್ಲೊ ರೋಶನ್. ಶಯ್ಲಾ ಉಲಯ್ಲೆಂ ನಾಂ.. ಉಗ್ತೆ ಕೆಲ್ಲೆ ದೊಳೆ ಪುರಾಸಣೆನ್ ದುಃಖಿನ್ ಮ್ಹಳ್ಳೆಪರಿಂ ಬಂದ್ ಕೆಲೆ.

"ಶಾಲೆಟ್, ಭಾಯ್ರ್ ಸರ್ ಆಮಿಂ ಆಸ್ಪತ್ರೆಕ್ ವೊರ್‍ಯಾಂ ರೋಶನಾನ್ ಸಾಂಗ್ಲೆಂ ಪಾಟಾಪಾಟ್ ರೋಶನ್ ದೋನ್ ತೀನ್ ಫ಼ೊನಾಂ ಕರ್‍ಚಾ ಭಿತರ್ ಶಾಲೆಟ್ ತಯಾರ್ ಜಾಲೆಂ. ತಿಂ ತೆಗಾಂಯ್ ತುರಂತ್ ಆಸ್ಪತ್ರೆಕ್ ವೆಚಾ ವಾಟೆರ್ ಚಮ್ಕಾಲಿಂ.

ಲಾಂಬ್ ಪರಿಕ್ಶಾ ಕೆಲ್ಲ್ಯಾ ಉಪ್ರಾಂತ್ ದಾಕ್ತೆರಾನ್ ನೀಳ್ ಸ್ವಾಸ್ ಸೊಡ್ಲೊ. ಆನಿ ರೋಶನಾಕ್ ಆನಿ ಶಾಲೆಟಾಕ್ ಭೆಟ್ಲೊ ಮ್ಹಡಾ ಆತುರಾಯೆನ್. ಉಮೆದಿನ್ ತಿಂ ದೊಗಾಂಯ್ ದಾಕ್ತೆರಾಚಾ ಉತ್ರಾಂಕ್ ಆಯ್ಕೊಂಕ್ ತಯಾರ್ ಜಾಲ್ಲ್ಯಾ ಲಾಗ್ಸಿಲ್ಯಾ ಮನ್ಶಾಪರಿಂ.

"ಕಿತೆಂ ಗಜಾಲ್ ಡಾ|ರಫ಼ಾಯಲ್?!?" ಆತುರಾಯ್ ತಡ್ವೊನ್ ಜಾಯ್ನಾನೆ ರೋಶನಾನ್ ವಿಚಾರ್‍ಲೆಂ. "ಹುಂ!.." ಏಕ್ ದೀರ್ಘ್ ಸುಸ್ಕಾರ್ ಸೊಡ್ಲೊ ಕಸಲ್ಯಾಗೀ ಚುಕಿದಾರಾಕ್ ಪೊಲಿಸ್ ಇನ್ಸ್‌ಪೆಕ್ಟರಾನ್ ಪಳೆಂವ್ಚಾಪರಿಂ ಏಕ್ ನದರ್ ದೊಗಾಂಯ್ಚೆರ್ ವಯ್ರ್ ಥಾವ್ನ್ ಸಕ್ಲಾ ಪರ್‍ಯಾಂತ್ ಘಾಲಿ. "ತುಮ್ಚಾ ಮಧೆಂ ಕಿತೇಂಯ್ ಮನಸ್ಥಾಪ್ ಆಸಾಗೀ ಮಿಸ್ಟರ್ ಆನಿ ಮಿಸ್ಸೆಸ್ ಡಿಲೀಮಾ?!" ಶೀದಾ ಸವಾಲ್ ವಿಚಾರ್‍ಲೆಂ ಡಾ|ರಫ಼ಾಯೆಲಾನ್.

"ಡಾಕ್ಟರ್!.." ಹೆಂ ತುಮಿಂ ಕಿತೆಂ ವಿಚಾರ್‍ತಾತ್?! ಆಮ್ಚೆಂ ಬಾಳ್ ಶಯ್ಲಾ ಕಶೆಂ ಆಸಾ?!" ಕಠೀಣ್ ಬೆಜಾರಾಯೆನ್ ತೋಂಡ್ ಹಿಂವಾಳೊನ್ ವಿಚಾರ್‍ಲೆಂ ರೋಶನಾನ್. "ಮಿಸ್ಟರ್ ಡಿಲೀಮಾ.. ತುಮ್ಚಿಂ ಧುವ್ ಶಯ್ಲಾ ಕಸಲ್ಯಾಗೀ ಮಾನಸಿಕ್ ದಕ್ಯಾಕ್ ವೊಳಗ್ ಜಾವ್ನ್ ಭಿಂಯೆಲಾಂ. ಕಠೀಣ್ ತಾಪಾನ್‌ಯ್ ತೆಂ ಭಿಂಯೆಲ್ಲೆಂಪರಿಂ ಕಿತೆಂಗೀ ಮ್ಹಣ್ತಾ. ತುಮ್ಚೆಂ ಘರ್‍ಚೆಂ.. ಐ ಮೀನ್ ತೂ ಸೇ ತುಮ್ಚೆಂ ಭಿತರ್‍ಲೆಂ ವಾತಾವರಣ್ ತಾಕಾ ಅಸಲ್ಯಾ ದಖ್ಯಾಕ್ ಕಾರಾಣ್‌ಗೀ ಮ್ಹಣ್ ಜಾಂವ್ಚಿ ಗರ್ಜ್ ಮ್ಹಾಕಾ ದಿಸ್ತಾ. ತುಕಾ ಡ್ರಿಂಕ್ಸಾಚಿ ಸವಯ್ ಆಸಾಗೀ?!" ರೋಶನಾನ್ ಅಪ್ರಾಧ್ಯಾಪರಿಂ ತಕ್ಲಿ ಪಂದಾ ಘಾಲ್ತಾನಾ ಶಾಲೆಟಾನ್ ಪರಿಸ್ಥಿತಿ ಸಾಂಭಾಳ್ಳಿ.

"ತಶೆಂ ವಿಶೇಷ್ ನಾಂ ಡಾಕ್ಟರ್.. ಪಿಯೆತಾ.. ಪುಣ್ ಹಳ್ಟಾರ್ ಮಾತ್ರ್..!!" ಶಾಲೆಟಾನ್ ರೋಶನಾಚಾ ಬಾವ್ಳ್ಯಾಕ್ ದರ್ನ್ ಸಾಂಗ್ಲೆಂ. "ಪಿಯೆಲ್ಲ್ಯಾ ಉಪ್ರಾಂತ್ ಕಶೆಂ ನೇಚರ್ ಆಸ್ತಾ?! ಉಚಾಂಬಳಿತ್ ವಾ ಆರ್‍ಗಾಂಟ್..? ಬೆಸ್ಟಾಂವ್ಚೆಂ ಜೋರ್ ಕರ್‍ಚೆಂ..?" ಡಾಕ್ತೆರಾನ್ ದುಭಾವ್ ವೊಂಕ್ಲೊ. "ಛೆ! ಛೆ! ನಾಂ ಹಾಬಾ.. ಹಾಂವ್ ಜಸ್ಟ್ ಸೋಶಿಯಲ್ ಡ್ರಿಂಕ್ಸ್ ಘೆಂವ್ಚಾ ಫ಼ಂಕ್ತಿಂತ್ಲೊ ಮನಿಸ್, ಕೆದ್ನಾಂಯ್ ಚಡ್ ಜಾಲ್ಲೆಂ ನಾ... ಆನಿಂ ಶಯ್ಲಾಕ್ ಮ್ಹಜೆವರ್‍ವಿಂ ಕಿತೆಂಚ್ ದುಃಖ್‌ಲ್ಲೆಂ ನಾಂ..." "ಆನಿ ಜೋರ್ ಕೆಲ್ಯಾರೀ ಝಗಡ್ಲ್ಯಾರೀ ಮ್ಹಜೆಲಾಗಿಂ ಮಾತ್ರ್.. ಧುವೆಲಾಗಿಂ ಬಾರಿ ಮೊಗಾನ್ ಆನಿಂ ಕೊಂಡಾಟೊ ತಾಕಾ. ಧುವೆ ಬಗಾರ್ ತಾಕಾ ಜಾಯ್ನಾಂ.." ಶಾಲೆಟಾನ್ ಬರೊ ಸಪೋರ್ಟ್ ದಿಲೊ.

"ಬರೆಂ! ತುಮಿಂ ಖಂತ್ ಕರಿನಾಕಾತ್. ತೆಂ ಮಾನಸಿಕ್ ದಖ್ಯಾಂತ್ಲೆಂ ಭಾಯ್ರ್ ಆಯ್ಲ್ಯಾ ಶಿವಾಯ್ ಸಾರ್‍ಕೆಂ ಜಾಂವ್ಚೆಪರಿಂ ನಾ. ತಾಚೆಂ ಮೂಳ್ ಸೊದ್ಚೆಂ ಆನಿಂ ಪಿಡಾ ಮುಳಾ ಸಮೇತ್ ಕಾಡ್ನ್ ಉಡಂವ್ಚಿ ಗರ್ಜ್. ತೆಂ ಅಜೂನ್ ನೆಂಟೆ ಬಾಳ್.." ಡಾ|ರಫ಼ಾಯೆಲಾನ್ ಸಾಂಗ್ತಾನಾಂ ರೋಶನ್ ಆನಿ ಶಾಲೆಟ್ ನಿಜಾಯ್ಕೀ ಘಾಬರ್‍ಲಿಂ. ಪರಿಸ್ಥಿತಿ ತಾಣಿಂ ಚಿಂತ್‌ಲ್ಲ್ಯಾಕೀ ಚಡಿತ್ ಭಿಗಡ್ಲ್ಯಾಪರಿಂ ತಾಂಕಾಂ ಭೊಗ್ಲೆಂ. ಡಾ|ರಫ಼ಾಯಲಾನ್ ತಾಂಕಾ ಸಮಧಾನ್ ಕರುಂಕ್ ಪಳಯ್ಲೆಂ. ತರೀ ತಾಚೆಂ ಭಿತರ್‍ಲೆಂ ಸಮಧಾನ್ ಭಾಯ್ಲ್ಯಾನ್ ಖಂಯ್‌ಗೀ ಉಭೊನ್ ಗೆಲ್ಲೆಂ.

ಹಾಪ್ತೊಭರ್ ತಾಪಾನ್ ಖಟ್ಲ್ಯಾರ್ ಆಸ್‌ಲ್ಲ್ಯಾ ಶಯ್ಲಾಕ್ ಪಳೆಂವ್ಕ್ ಕಾಳಿಜ್‌ಚ್ಚ್ ಭೆಸಾಂ ಜಾಲ್ಲ್ಯಾಪರಿಂ ಭೊಗ್ತಾಲೆಂ. ಬಾಪುಯ್ ರೋಶನ್ ಇತ್ಲ್ಯಾ ಮೊಗಾನ್ ಶಯ್ಲಾಲಾಗಿಂ ಉಲಯ್ತಾಲೊ ತರೀ ತಾಚಿ ಪ್ರತಿಕ್ರಿಯಾ ಪಯ್ಲೆಂಚಾ ಪರಿಂ ನಾತ್‌ಲ್ಲಿ. ಕಸಲಿಗೀ ಶಯ್ಲಾ ಥಂಯ್ ತಾಣೆ ಚೂಕ್ ಕೆಲ್ಯಾ ಆಪ್ರಾಧ್ ಕೆಲ್ಯಾ ಮ್ಹಳ್ಳ್ಯಾ ಭಾವನಾಂನಿಂ ತೆಂ ಪಳೆತಾಲೆಂ. ಶಾಲೆಟ್ ತೆಂ ಉಮ್ಯಾ ವಯ್ರ್ ಉಮೆ ದೀಂವ್ನ್ ತಾಕಾ ವಿಚಾರ್‍ತಾನಾ, ಕೆದ್ನಾ ಕೆದ್ನಾ ಸಾಂಗ್ತಾಲೆಂ. "ಮಾಮ್ಮಿ ಮ್ಹಾಕಾ ಭ್ಯೆಂ ದಿಸ್ತಾ.. ಮ್ಹಾಕಾ ಭ್ಯೆಂ ದಿಸ್ತಾ.." ಮ್ಹಣ್ ಹುಸ್ಕಾರ್‍ತಾಲೆಂ ಆನಿ ತಾಚಿ ಮತ್ ಚುಕ್ತಾಲಿ.

ಶಯ್ಲಾಚೆಂ ಬಾಪಾಯ್ ಥಂಯ್ ವರ್‍ತನ್ ಶಾಲೆಟಾಕ್ ವಿಚಿತ್ರ್ ದಿಸ್ತಾಲೆಂ. ರೋಶನ್ ಮನಿಸ್ ಬರೊ, ಶಯ್ಲಾಚೊ ಬರೊ ಮೋಗ್ ಕರ್‍ತಾಲೊ. ತಾಚೊ ಬಿಜ್‌ನೆಸ್ ಸಂಸಾರ್‌ಚ್ ವಿಚಿತ್ರ್! ಕೆದ್ನಾಂ ಕೆದ್ನಾಂ ಶಾಲೆಟಾಚೆರ್ ಚಿಡ್ತಾಲೊ ಝಗಡ್ತಾಲೊ, ಪುರ್‍ಪುರ್ತಾಲೊ. ಉಪ್ರಾಂತ್ ಸಾರ್‍ಕೊ ಜಾತಾಲೊ. ಬಾಪಾಯ್ಕ್ ರಾಗ್ ಯೆತಾನಾ ಶಯ್ಲಾ ಶೀದಾ ಭಿಂಯಾನ್ ಕುಡಾ ಭಿತರ್ ಲಿಪ್ತಾಲೆಂ ಆನಿಂ ತಾಚ್ಯಾ ಖಟ್ಲ್ಯಾರ್ ವೊಮ್ತೆಂಚ್ ಪಡ್ತಾಲೆಂ.

ಬಾಪಾಯ್ನ್ ಆವಯ್‌ಕಡೆ ಝಗ್ಡೆಂ ಕರ್‍ಚೆಂ ತಾಕಾ ಪಸಂದ್ ನಾತ್‌ಲ್ಲೆಂ. ತಾಚಿ ಆವಯ್ ಕೆದ್ನಾಂಯ್ ಘರಾ ಆಸ್‌ಲ್ಯಾನ್ ಕಠೀಣ್ ತಾಚೊ ತೆಂ ಮೋಗ್ ಕರ್‍ತಾಲೆಂ. ಆನಿಂ ಆವಯ್ ಶಾಲೆಟ್‌ಯ್ ಬರೊ ಕೊಂಡಾಟೊ ಕರ್‍ತಾಲೆಂ. ದಾಕ್ತೆರಾಚಾ ಹಿಶಾರ್‍ಯಾಖಾಲ್ ಜಾವ್ನ್ ಆಸ್ಪತ್ರೆಂತ್ ಶಯ್ಲಾಕಡೆ ಬರ್‍ಯಾ ಸೊಸ್ಣಿಕಾಯೆನ್ ದೊಗಾಂಯ್ ಬರ್‍ಯಾ ಮೊಗಾನ್ ಉಲಯ್ತಾಲಿಂ. ಹಾಸ್ತಾಲಿಂ.. ಸಮ್ಜಾಯ್ತಾಲಿಂ. ತೆದ್ನಾಂ ರೋಶನಾಚೊ ಆನಿ ಶಾಲೆಟಾಚೊ ಹಾತ್ ಸಾಂಗಾತಾ ಘೆಂವ್ನ್ ಆಪ್ಲ್ಯಾ ಹರ್‍ಧ್ಯಾರ್ ದವರ್ತಾಲೆಂ. ಧಾ ದೀಸ್ ಪಾಶಾರ್ ಜಾತಾನಾ ಶಯ್ಲಾಚಿ ಭಲಾಯ್ಕಿ ಸಾಧಾರಣ್ ಸಾಮಾನ್ಯ್ ಜಾಲಿ. ತ್ಯಾ ಎಕಾ ದಿಸಾ ಡಾಕ್ತೆರಾನ್ ಶಾಲೆಟಾಕ್ ಆನಿ ರೋಶನಾಕ್ ಶಯ್ಲಾಚಾ ಕುಡಾಕ್ ಯೇಂವ್ಕ್ ಆಡ್ವಾರ್‍ಲೆಂ ಆನಿ ಎಕ್ಸುರೊ ಬಸೊನ್ ಹಾಸೊನ್ ಉಲಂವ್ಕ್ ಲಾಗ್ಲೊ. "ಹಾಯ್ ಶಯ್ಲಾ.. ಕಶೆಂ ಆಸಾಯ್ ತುಂ?!" "ಬರಿಂ ಆಸಾಂ ಡಾಕ್ಟರ್ ಅಂಕಲ್ ಥ್ಯಾಂಕ್ಯೂ" ಶಯ್ಲಾನ್ ಜಾಪ್ ದಿಲಿ.

"ಗುಡ್! ಆತಾಂ ತುಕಾ ಭ್ಯೆಂ ದಿಸ್ತಾಗೀ?!" "....." ತಾಣೆಂ ಜಾಪ್ ದಿಲಿನಾ.

"ತುಂ ವ್ಹಡ್ ಜಾಲಾಂಯ್... ಮಾಮ್ಮಿ ಡ್ಯಾಡಿ ಕಿತ್ಲೊ ತುಜೊ ಮೋಗ್ ಕರ್‍ತಾತ್.. ಕಿತ್ಲೆಂ ಪಸಂದ್ ಕರ್‍ತಾತ್ ತುಂ ಕಿತ್ಲೆಂ ಲಕ್ಕಿ ಬುರ್‍ಗೆಂ.." ಡಾ|ರಫ಼ಾಯಲಾನ್ ಗಾಲಾಕ್ ಚಿಮ್ಟೊ ಕಾಡ್ಲೊ. "ಆನಿ ತುಕಾ ಇಸ್ಕೊಲಾಕ್ ವಚೊಂಕ್ ಆಸಾ... ಕೋಣ್ ತುಜೆಂ ಕ್ಲೋಜ್ ಫ಼್ರೆಂಡ್ ಬಾಳಾ?!!" ಬಾರಿ ಮೊಗಾನ್ ವಿಚಾರ್‍ಲೆಂ ಡಾ|ರಫ಼ಾಯಲಾನ್. ಶಯ್ಲಾಚಾ ದೊಳ್ಯಾಂ ಥಾವ್ನ್ ಅಪಾಪಿಂ ದುಃಖಾಂ ಭರ್‍ಲಿಂ. "ಮಾಮ್ಮಿ sss " ಪರತ್ ಜೊರಾನ್ ರಡಾಲಾಗ್ಲೆಂ ಶಯ್ಲಾ. "ಅಯ್ಯೊಯ್ಯೊ ರಡಾನಾಕಾ... ಮಾಮ್ಮಿ ಆಸಾ.. ಆಸಾ...?!" ತುಜೆಂ ಫ಼್ರೆಂಡ್ ತುಕಾ ಪಸಂದ್ ನಾಂಗೀ?! ಕಿತ್ಯಾಕ್ ರಡ್ತಾಯ್?!" "ಡಾಕ್ಟರ್ ಅಂಕಲ್.. ಮ್ಹಾಕಾ ಭ್ಯೆಂ ದಿಸ್ತಾ!" ಹುಸ್ಕಾರ್‍ನ್ ಸಾಂಗಾಲಾಗ್ಲೆಂ ಶಯ್ಲಾ. "ಕಿತ್ಯಾಕ್ ಬಾಳಾ?!" ಫ಼್ರೆಂಡ್ ತುಕಾ ಮಾರ್‍ತಾಗೀ?!" "ಮಾರಿನಾ.. ಪುಣ್ ತೆಂ..!!" ಪರತ್ ವ್ಹಡ್ಲ್ಯಾನ್ ರಡಾಲಾಗ್ಲೆಂ. 

ಡಾ|ರಫ಼ಾಯಲಾನ್ ಧಾ ಮಿನುಟಾಂ ಶಯ್ಲಾಕ್ ಸಮ್ಜಾವ್ನ್ ಸಮಧಾನ್ ಕರುಂಕ್ ಜಾಯ್ ಪಡ್ಲಿ. ಉಪ್ರಾಂತ್ ವಳೂ ತಾಚೆಂ ಕಾಳಿಜ್ ಜಿಕೊಂಕ್ ಸಗ್ಳಿ ಗಜಾಲ್ ತೊ ಜಾಣಾಂ ಜಾಲೊ. ಆನಿಂ ಮೂಳ್ ಕಾರಣ್ ತಾಣೆಂ ಸೊಧುನ್ ಕಾಡ್ಲೆಂ.

ಭಲಾಯ್ಕಿ ಬರಿ ಜಾಲ್ಲ್ಯಾ ಉಪ್ರಾಂತ್ ಪಯ್ಲ್ಯಾ ದಿಸಾ ಇಸ್ಕೊಲಾಕ್ ವಚೊನ್ ಪಾಟಿಂ ಆಯಿಲ್ಲ್ಯಾ ಶಯ್ಲಾಚಾ ವದನಾರ್ ಗಂಡಾಂತರ್ ಆಯಿಲ್ಲ್ಯಾಪರಿಂ ಖುಣಾಂ ದಿಸ್ತಾಲಿಂ. ತೆಂ ಸಗ್ಳೆಂ ಶೆರ್‍ಮೆಂವ್ನ್ ಗೆಲ್ಲೆಂ.. ಅಕ್ಲಾಸಿ ಜಾಲ್ಲೆಂ. ಶಾಲೆಟಾಕ್ ಪರತ್ ಭಿರಾಂತ್ ದಿಸೊಂಕ್ ಲಾಗ್ಲಿ. ಮೊಗಾನ್ ಬ್ಯಾಗ್ ಘೆವ್ನ್ ಪೊಟ್ಲುನ್ ಧರ್‍ನ್ ಪೊಶೆಲೆಂ. ಮೊಗಾನ್ ದೋನ್ ತೀನ್ ಕೀಸ್ ದೀವ್ನ್ ತಾಚಾ ಸುಂದರ್ ನೆಣ್ತ್ಯಾ ವದನಾ ವಯ್ರ್ ಆವಯ್ಚಾ ಮೊಗಾಚೊ ಹಾತ್ ಭಂವ್ಡಾಯ್ಲೊ ಶಾಲೆಟಾನ್. "ಕಿತೆಂ ಜಾಲೆಂ ಪುತಾ?!" ಭೋವ್ ನಮ್ರತೆನ್ ವಿಚಾರ್‍ಲೆಂ ಶಾಲೆಟಾನ್. "ಮಾಮ್ಮಿ ಸತ್ತ್ ಸಾಂಗ್.. ತಲಾಕ್ ಮ್ಹಳ್ಯಾರ್ ಕಿತೆಂ?!" ಶಾಲೆಟ್ ಗುಸ್ಪಡ್ಲೆಂ. ತಾಕಾ ಸಾರ್‍ಕೆಂ ಸಮ್ಜಾಲೆಂನಾ.

ತೆಂ ಹಾಸೊನ್ ಧುವೆಕ್ ಖುಶಿ ಕರುಂಕ್ ಪ್ರಯತ್ನ್ ಕರಿಲಾಗ್ಲೆಂ. "ತಲಕ್ ಮ್ಹಳ್ಯಾರ್ ಕೊಂಬ್ಯೆಚೆಂ ದಾಕ್ಟೆಂ ಪೀಲ್, ತರ್‍ನಿ ತರ್‍ನಿ ಲಾನ್ ಕೊಂಬಿ" "ಬೆಷ್ಟೆಂ!" ಎಕ್‌ಚ್ಚ್‌ಫ಼ರಾಂ ಚಾಳ್ವಳೆಂ ಶಯ್ಲಾ. "...." ಶಾಲೆಟ್ ಭಿಂಯೆಲೆಂ. ದೊಳೆ ವಾಠಾರುನ್ ಫ಼ಟಿಂ ಮಾರ್‍ತಾಯ್ ಮ್ಹಳ್ಲ್ಯಾ ಬೆಷ್ಟಾವ್ಣೆಕ್ ತಯಾರ್ ಜಾಲ್ಲ್ಯಾ ಶಯ್ಲಾಕ್ ತಾಣೆಂ ಪಳಯ್ಲೆಂ.

"ಕಿತ್ಯಾಕ್ ತಶೆಂ ಮ್ಹಣ್ತಾಯ್?! ಮ್ಹಾಕಾ ಗೊತ್ತು ಆಸಾ, ದೆಖುನ್ ಭ್ಯೆಂ ದಿಸ್ತಾ" ಪಯ್ಲೆವ್ಟಿಂ ಸ್ವಶ್ಟ್ ಸಾಂಗಾಲಾಗ್ಲೆಂ ಶಯ್ಲಾ. "ಕಿತೆಂ ಗೊತ್ತು ಆಸಾ ಸಾಂಗ್ ಪಳೆಯಾಂ, ಬರೇ ಭಾಂಗಾರ್ ಬುರ್‍ಗೆಂ ಮ್ಹಜೆಂ ತುಂ" "ಮಾಮ್ಮಿ, ಮ್ಹಜೆಂ ಫ಼್ರೆಂಡ್ ಜಮೀಲಾ, ಆಜ್ ಇಸ್ಕೊಲಾಕ್ ಯೇಂವ್ಕ್ ನಾ, ಕಿತ್ಯಾಕ್ ಗೊತ್ತಾಸಾಗೀ?!" "ನಾಂ, ಕಿತ್ಯಾಕ್?!" ಶಾಲೆಟಾಚಿ ಆತುರಾಯ್ ವಾಡ್ಲಿ.

"ತಾಚ್ಯಾ ಡ್ಯಾಡಿನ್ ರಾಗಾನ್ ತಾಚ್ಯಾ ಮಾಮ್ಮಿಕ್ ತಲಾಕ್ ತಲಾಕ್ ತಲಾಕ್ ಮ್ಹಳ್ಳೆಂ ಖಂಯ್, ಆನಿ ತಾಂಚೊ ಸಂಬಂಧ್ ತುಟ್ಲೊ ಖಂಯ್, ಆನಿಂ ತಾಚಿ ಮಾಮ್ಮಿ ಡ್ಯಾಡಿ ಸಾಂಗಾತಾ ರಾವೊಂಕ್ ಜಾಯ್ನಾಂ ಮ್ಹಣ್ ರಡ್ತೆಲೆಂ.. ಆನಿ ಸಾಂಗ್ತೆಲೆಂ, ಪಾಪ್.. ತಾಕಾ ಕೋಣ್ ಗತ್ ಮಾಮ್ಮಿ?!!" "ಆಮ್ಚೊ ಡ್ಯಾಡಿಯೀ ತುಜೆಲಾಗಿಂ ಝಗಡ್ತಾ. ಆನಿಂ ತಾಣೆಂಯಿ ತಲಾಕ್ ತಲಾಕ್ ತಲಾಕ್ ಮ್ಹಳ್ಯಾರ್ ಆಮ್ಕಾಂ ಡ್ಯಾಡಿ ನಾಂಮೂ?! ಮಾಘಿರ್ ಆಮಿಂ ಕಿತೆಂ ಕರ್‍ಚೆಂ?!" ಶಯ್ಲಾ ಗಳ್ಗಳ್ಯಾನ್ ರಡಾಲಾಗ್ಲೆಂ.

ಶಾಲೆಟಾಕ್ ಡಾಕ್ಟೆರಾಚೆ ಆದೇಶ್ ಆನಿಂ ನೀಜ್ ಸಂಗತ್ ಆತಾಂ ಸಮ್ಜಾಲಿ. "ತುಂ ಫ಼ಿಕಿರ್ ಕರ್‍ನಾಕಾ ತಸೆಂ ಕಾಂಯ್ ಡ್ಯಾಡಿ ಮ್ಹಣಾನಾ...! ಆನಿಂ ಆಮಿಂ ಕ್ರೀಸ್ತಾಂವಾಂ ತಸಲ್ಯೊ ಸಂಗ್ತಿ ಆಮ್ಕಾಂ ಲಾಗು ಜಾಯ್ನಾಂತ್..." ಭುಲಾಂವ್ಕ್ ಪುಸ್ಲಾವ್ನ್ ಸಮಧಾನ್ ಕೆಲೆಂ ಶಯ್ಲಾಕ್.

ತ್ಯಾ ರಾತಿಂ ಶಾಲೆಟ್ ಆನಿಂ ರೋಶನ್ ಮಸ್ತ್ ಎಕಾಮೆಕಾ ವಿಚಾರ್ ವಿನಿಮಯ್ ಕರ್‍ನ್ ನಿಮಾಣೆಂ ಶಯ್ಲಾಚಾ ಬೆಡ್ಡಾ ಸರ್‍ಶಿನ್ ಗೆಲಿಂ. "ಶಯ್ಲಾ" ರೋಶನಾನ್ ಉಲೊ ಕೆಲೊ. "ಡಾಡಾ.. ಕಿತೆಂ ಜಾಲೆಂ?!" "ಶಯ್ಲಾ.. ಹಾಂವ್ ತುಕಾ ಪ್ರೋಮಿಸ್ ಕರ್ತಾಂ ಆನಿಂ ಹ್ಯಾ ಉಪ್ರಾಂತ್ ಸೊರೊ ಪಿಯೆನಾ ಆನಿಂ ಮಾಮ್ಮಿಕಡೆ ಝಗ್ಡೆಂ ಕರಿನಾ. ತುಂ ಟೆನ್ಶನ್ ಘೆನಾಕಾ ಜಾಯ್ತ್‌ಗೀ?!" "ಮಾಮ್ಮಿಕ್‌ಯ್ ಪ್ರೋಮಿಸ್ ಕರ್" "ಬರೆಂ" ರೋಶನಾನ್ ಶಾಲೆಟಾಚೊ ಹಾತ್ ಧರ್‍ಲೊ. "ಪ್ರೋಮಿಸ್... ಹ್ಯಾ ಉಪ್ರಾಂತ್ ತುಮಿಂ ಮ್ಹಜಿಂಚ್.. ಐ ಲವ್ ಯೂ" ರೋಶನಾನ್ ಶಾಲೆಟಾಕ್ ಆನಿಂ ಶಯ್ಲಾಕ್ ಎಕೇಕ್ ಕೀಸ್ ದಿತಾನಾ ತಾಂಚಾ ವದನಾರ್ ಸೊರ್‍ಯಾಚೊ ಪ್ರಕಾಶ್ ಉಜ್ವಾಡೊಂಕ್ ಲಾಗ್ಲೊ. 

ಆನಿಂ ಕಾಳ್ಜಾಂತ್ ಧಾದೊಸ್ಕಾಯೆಚೆಂ ಲಾರ್ ಆಪ್ಟಾಲೆಂ. ಶಯ್ಲಾ ಸಗ್ಳೆಂಚ್ ಬದ್ಲಾಲೆಂ. ಬುರ್‍ಗ್ಯಾಂಚಾ ಪಿಡೆಕ್ ವ್ಹಡಿಲಾಂಯ್ ಕಾರಣಾಂ ಆಸ್ತಾತ್ ನ್ಹಂಯ್‌ಗೀ?! ಕಸಲಿಂ ಲಾರಾಂ ಆಮಿಂ ಆಪ್ಟಾಯ್ತಾಂವ್?!

Tags:  Lancy Pinto Nayak, Konkani Story, Konkani, Mangalore, Mangalorean, Mother Tongue

4 Comment/s.

  1. Roshan Dalmeida, Udupi
    ವ್ಹಾವ್... ಕೊಂಕ್ಣೆಂತ್ಲೆಂ ಥೊಡೆ ಉತ್ತೀಮ್ ಕಾಣ್ಯೊ ವಾಚುನ್ ಭಾರಿ ಖುಶಿ ಜಾಲಿ. ಎಕಾ ಪ್ರಾಸ್ ಏಕ್ ಬೊರಿ ಆಸಾ.
  2. Rekha, Brahmavara
    ಬೊರಿ ಆಸ್ಸ್
  3. Naveen, Brahmavara
    ಬೋವ್ ಆಪುರ್ಬಾಯೆಚ್ಯೊ ಕಾಣ್ಯೊ... ಸರ್ವ್ ಬರಯ್ಣಾರಾಂಕ್ ಆನಿ ವಲ್ಲಿ ಕ್ವಾಡ್ರಸಾಕ್ ಹೊಗ್ಳಿಕ್ ಫಾವೊ.
  4. fr. joesph Vaz svd, indore
    ಬೊರೀ ಕಾಣಿಂ ಮಾಕಾಂ ಬಾರೀ ರುಚ್ಲಿ. ತುಜಾ ಕಾಣಿಂಯೆಂತ್ ಸತಾಚಿ ಝಳಕ್ ದಿಸ್ತಾ. ಹಾಂವ್ ತುಕಾ ಬೊರ್ಂ ಮಾಗ್ತಾಂ. ಮುಕಾರ್ ಅಸಲ್ಯೊ ಕಾಣ್ಯೊಂ ವಾಚುಂಕ್ ಮೆಳೊಂದಿತ್. ಬಾಪ್ ಜುಜೆ ವಾಸ್ ಎಸ್. ವಿ.ಡಿ. ಇಂದೋರ್ ಮ.ಪ್ರ.

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE