+971 50 7554105
ತುಮ್ಚ್ಯಾ ಗಮನಾಕ್:

4  -  ಕುಟ್ಮಾಚೆಂ ಗೀತ್

ಬರಯ್ಣಾರಾ ವಿಶಿಂ ಜಾಣಾ ಜಾ...

  • ಸ್ಟೇನ್ ಅಗೇರಾ, ಮುಲ್ಕಿ
    ಪಾಟ್ಲ್ಯಾ 40 ವರ್ಸಾಂ ಪಾಸುನ್ ಕೊಂಕ್ಣೆಂತ್ ಮ್ಹಟ್ವ್ಯೊ ಕಾಣಿಯೊ, ಕಾದಂಬರಿ, ಹಾಸ್ಯ್ ಬರ್ಪಾಂ ಆನಿ ನಾಟಕ್ ಬರವ್ನ್ ಆಸ್ಚೊ ಸ್ಟೇನ್ ಅಗೇರಾ ಗಾಂವಾನ್ ಮುಲ್ಕಿಚೊ, ಆತಾಂ ಕುಟ್ಮಾಸಾಂಗಾತಾ ದುಬಾಂಯ್ತ್ ವಸ್ತಿ ಕರುನ್ ಆಸಾ. ದಾಯ್ಜಿ ದುಬಾಯ್ - ಎಮಿರೆತಾಂತ್ಲ್ಯಾ ಕೊಂಕ್ಣಿ ಬರವ್ಪ್ಯಾಂಚೊ ಎಕ್ತಾರ್ ಹಾಚೊ ಕಾರ್ಯಾಳ್ ಸಾಂದೊ ಮಾತ್ ನ್ಹಯ್, ದೋನ್ ಆವ್ಧೆಂಕ್ ಸಂಚಾಲಕ್ ಜಾವ್ನ್ ತಾಣೆ ವಾವ್ರ್ ದಿಲಾ. ಪ್ರಸ್ತುತ್ ದಾಯ್ಜಿವಲ್ಡ್ ಡೊಟ್ ಕೊಮ್ ಹ್ಯಾ ಅಂತರ್ಜಾಳಿಚೊ ಮಿಡ್ಲ್ ಈಸ್ಟ್ ಪ್ರಾಂತ್ಯಾಚೊ ವ್ಹೆವಾರ್ ಸಾಂಬಾಳುನ್ ಆಸಾ.
    1975 ಇಸ್ವೆಂತ್ ತಾಚಿ ಪಯ್ಲಿ ಮ್ಹಟ್ವಿ ಕಾಣಿ 'ಆಮ್ಚಿ ಕಥಾ' ರಾಕ್ಣೊ ಪತ್ರಾರ್, ಫಾ| ಮಾರ್ಕ್ ವಾಲ್ಡರ್ ಸಂಪಾದಕ್ ಆಸ್ತಾನಾ ಪರ್ಗಟ್ ಜಾಲಿ ಆನಿ ಆಜ್ ಮೆರೆನ್ 300 ವಯ್ರ್ ಮ್ಹಟ್ವ್ಯೊ ಕಾಣಿಯೊ ತಾಣೆ ಬರಯ್ಲ್ಯಾತ್. ತಾಚ್ಯಾ 'ಬದ್ಲಾನಾತ್ಲೊ ಗಾಂವ್' ಕಾದಂಬರೆಕ್ ಗೊಂಯ್ಚಿ ಭಾಶಾಮಂಡಳ್ ಪ್ರಶಸ್ತಿ, 'ನಾಲಿಸಾಯ್' ಕಾದಂಬರೆಕ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ, 'ತಾಂಬ್ಡಿ ಮಿರ್ಸಾಂಗ್' ಕಾಣಿಯೆ ಬುಕಾಕ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ಆನಿ ದಾಯ್ಜ್ ಅಂತರ್ಜಾಳಿ ಥಾವ್ನ್ 2008 ವ್ಯಾ ವರ್ಸಾಚೊ ಕಾಣಿಯೆಗಾರ್ ಪ್ರಶಸ್ತಿ - ಅಶೆಂ ಪುರಸ್ಕಾರ್ ಲಾಬ್ಲ್ಯಾತ್. ಕೊಂಕ್ಣಿ ಕುಟಾಮ್ ಬಾಹ್ರೇಯ್ನ್ ಪ್ರಶಸ್ತಿ 2011 ಆನಿ ದಾಯ್ಜಿ ದುಬಾಯ್ ಸಾಹಿತ್ಯ್ ಪ್ರಶಸ್ತಿ 2014 ಹಾಕಾ ಲಾಭ್ಲ್ಯಾತ್.
    ಮಟ್ವ್ಯೊ ಕಾಣ್ಯೊ, ಕಾದಂಬರಿ ಶೆತಾಂತ್, ಸ್ಟೇನ್ ಅಗೇರಾ, ಏಕ್ ಫಾಮಾದ್ ನಾಂವ್. ಸಭಾರ್ ನವೆ ಲೇಖಕ್, ಸ್ಟೇನ್ ಅಗೇರಾಚೆಂ ಸಾಹಿತ್ಯ್ ಅಧ್ಯಯನ್ ರೂಪಾರ್ ವಾಚುನ್, ಜಿಕೊನ್ ಧರ್ತಾತ್.
90.0
User Rating

ತುಜಾ ಕುಟ್ಮಾಕ್ ತುಮ್ಚೆಂಚ್ ಮ್ಹಣ್ಚೆಂ ಏಕ್ ಪ್ರತ್ಯೇಕ್ ಗೀತ್ ಆಸಾ? ಹ್ಯಾ ವಿಶಿಂ ತುಮಿ ಚಿಂತುನ್ ಪಳೆಂವ್ಚೆಂ ಅತೀ ಗರ್ಜೆಚೆಂ. ಹಾಂವೆ ಸಾಂಗ್ಚೆಂ ತರ್ ಹರ್ಯೆಕಾ ಕುಟ್ಮಾನ್ ಸಾಧ್ಯ್ ತರ್ ಅಪ್ಲೆಂಚ್ ಏಕ್ ಗೀತ್ ರಚಿಜಾಯ್. ಹಾಚಿ ಅವಶ್ಯಕತಾ ಕಿತೆಂ ಮ್ಹಣ್ ತುಮಿ ವಿಚಾರ್ಚೆಂ ಸಹಜ್. ಮ್ಹಜೆಲಾಗಿಂ ಹ್ಯಾ ಸವಾಲಾಕ್‍ಯಿ ಜಾಪ್ ಆಸಾ.

ಆಜ್‍ಕಾಲ್ ಟಿವಿಚಾ ಖಂಚಾಯಿ ಚಾನೆಲಾಕ್ ವೊಚ್, ಪದಾಂಚೊ ಸ್ಪರ್ಧೊ ಚಲ್ತಾ.  ಸೊನಿ ಟಿವಿಚೆರ್ 'ಇಂಡಿಯನ್ ಐಡಲ್' ತರ್, ಸ್ಟಾರ್ ಚಾನೆಲಾಂತ್ 'ವೊಯ್ಸ್  ಒಫ್  ಇಂಡಿಯಾ' ಆನಿ 'ಝಿ' ಟಿವಿಚೆರ್ ಆನ್ಯೇಕ್ ಪದಾಂಚೊ ಸ್ಪರ್ಧೊ. ಸ್ಪರ್ಧಿಕಾಂನಿ ಜಿಕಾಜಾಯ್ ತರ್ ತುರಂತ್ ಎಸ್ಸೆಮೆಸ್ಸ್ ಕರಾ ಮ್ಹಣೊನ್ ಕಾರ್ಯ್‌ನಿರ್ವಾಹಕ್ ಮಾಗ್ತಾತ್. ಎಸ್ಸೆಮೆಸ್ಸ್ ಕರ್ತಾನಾ ಧಾಡ್‍ಲ್ಲ್ಯಾಕ್ ಕಿತ್ಲೆಂ ಲುಕ್ಸಾಣ್ ಆನಿ ಚಾನೆಲಾಕ್ ಕಿತ್ಲೊ ಫಾಯ್ದೊ ಮ್ಹಣ್ ಕೋಣ್‍ಂಚ್ ಸಾಂಗಾನಾಂತ್. ಹೊ ವೆಗ್ಳೊ ವಿಷಯ್. ವಿಷಯಾ ಭಾಯ್ರ್ ವೆಚೆಂ ನಾಕಾ. ಆಮಿ ಪದಾಂ-ಗೀತಾಚಾ ಮಹತ್ವಾ ವಿಶಿಂ ಉಲವ್ನ್ ಆಸ್‍ಲ್ಲ್ಯಾಂವ್-ಮೂ? ಹೆಂ ಪಾವಾನಾತ್ಲ್ಯಾಕ್ ಆನ್ಯೇಕಾ ಚಾನೆಲಾನ್ 'ಬಾತ್-ರೂಮ್' ಗಾವ್ಪ್ಯಾಂಚೊ ಸ್ಪರ್ಧೊ ದವರ್ಲಾ ಮ್ಹಣೊನ್ ತಿಳ್ಸೊಣಿ ಆಯ್ಲ್ಯಾ. 

ನ್ಹಾಣ್ಯೆಂತ್ಲೊ ಗಾವ್ಪಿ? ಆದಿಂ ಹಾಂವ್‍ಯಿಂ ಗಾಯ್ತೊಲೊಂ. ಮಜೊಚ್ ತಾಳೊ ಜಾಯ್ತಿಂ ವರ್ಸಾಂ ಆಯ್ಕೊನ್ ವಿರಾರ್ ಜಾವ್ನ್ ಹಾಂವೆ ನ್ಹಾಣ್ಯೆಂತ್ ಗಾಂವ್ಚೆಂ ಸೊಡ್ಲಾಂ. ಸ್ಪರ್ಧ್ಯಾಕ್ ಪ್ರವೇಶ್ ಕರ್ಯಾಂ ಮ್ಹಳ್ಯಾರ್ ಪ್ರಾಕ್ಟಿಸ್ ನಾ, ಮಾತ್ರ್ ನಯ್ ಜಾಯ್ತೆಂ ಭೆಂ ಧೊಸ್ತಾ. ಭಿರಾಂತೆಕ್ ಕಾರಣಾಂ ಆಸಾತ್.

ಬಾತ್-ರೂಮ್ ಸಿಂಗರ್ ಸ್ಪಧ್ಯಾಂತ್ ಸ್ಪರ್ಧಿಕಾಂಕ್ ಬಾತ್-ರೂಮ್ ನೆಸಾಣ್, ಮಳ್ಯಾರ್ ನೆಸಾಣ್ ನಾಸ್ತಾನಾ ಪದಾಂ ಗಾಂವ್ಕ್ ಕಡ್ಡಾಯ್ ಕೆಲೆಂ ತರ್ ಸ್ಪರ್ಧಿಕಾಂಚಿ ಕಿತೆಂ ಗತ್? ಸ್ಪರ್ಧಿಕಾಂಚಿ ಅವಸ್ಥಾ ಸೊಡ್, ದೆಕ್ತೆಲ್ಯಾಂಕ್ ಕೊಣೆ ಸಾಂಬಾಳ್ಚೆಂ! ಆನ್ಯೇಕಾ ದ್ರಷ್ಟೆನ್ ನ್ಹೆಸೊನ್ ಪದಾಂ ಗಾಂವ್ಕ್ ಪರ್ವಣ್ಗಿ ದಿಲಿ ತರ್ ತಾಳ್ಯಾಂತ್ (ಸುರ್ ಕೆದಾಳಾಯಿ ಗರ್ಜ್ ಮ್ಹಣ್ತಾ ಬೆಸುರಾ ಅನ್ನುಮಲ್ಲಿಕ್. ಆಮ್ಚೆ ಮಂಗ್ಳುರಾಂತ್ ಸುರ್ ಜಾಯ್ತಿ ಮೆಳ್ತಾ!) ಭೊಗಾಪ್ ಕಶೆಂ ಹಾಡ್ಚೆಂ? ಬಾತ್‍ರೂಮಾಂತ್ ವಿಣ್ಗೊ ಜಾವ್ನ್ ಉದ್ಕಾ ಚಲನಾ ದ್ವಾರಿಂ ಮೆಳ್ಚಿ ಸ್ಪೂರ್ಥ್ ವೇದಿರ್ ಕಶೆಂ ಮೆಳೊಂಕ್ ಸಾಧ್ಯ್? ಚಿಂತುಂಕ್ ಗೆಲ್ಯಾರ್ ಜಾಯ್ತೆಂ ಆಸಾ.

ಟಿವಿ ಚಾನೆಲಾಂಚಾ ಪದಾಂ ಸ್ಪರ್ಧ್ಯಾಂಕ್, ನಾಣ್ಯೆಂತ್ಲ್ಯಾ ಗಾವ್ಪಿ ಮುಖಾಬ್ಲಾಕ್ ಆನಿ ಕುಟ್ಮಾಚಾ ಗೀತಾಕ್ ಕಿತೆಂ ಗಾಂಚ್ ಮ್ಹಣ್ ತುಮಿ ವಿಚಾರ್ತಾತ್ ಮ್ಹಣ್ ಹಾಂವ್ ಜಾಣಾ ಆಸಾಂ. ವಿಚಾರುಂಕ್ ತುಮ್ಕಾಂ ಸಂಪೂರ್ಣ್ ಹಕ್ಕ್ ಆಸಾ. ಸತ್ ಸಾಂಗ್ಚೆಂ ತರ್ ಕಿತೆಂಚ್ ಸಂಬಂಧ್ ನಾ. ಹಾಂವ್ ಪಾಟೊ ಚುಕೊನ್ ಭಾಯ್ರ್ ಗೆಲ್ಲೊಂ. ಆತಾಂ ಪರತ್ ಪಾಟ್ಯಾಕ್ ಯೇವ್ನ್ ಪಾವ್ಲೊಂ ಆನಿ ಹ್ಯಾ ಅವಸ್ವರಾಚೊ ವಿಷಯ್ ವಿಸ್ರಾಲೊನಾ ತಾಕಾ ದೆವಾಚೊ ಉಪ್ಕಾರ್ ಮಣಾಜಾಯ್.

ಕುಟ್ಮಾ ಗೀತ್?

ತುಮಿ ಧರ್ಮೆಂದ್ರಾಚೆಂ 'ಯಾದೊಂಕಿ ಬಾರಾತ್' ಮ್ಹಣ್ಚೆಂ ಪರ್ನೆಂ ಪಿಂತುರ್ ಪಳೆಯ್ಲಾಂ? ಪಳೆಂವ್ಕ್ ನಾ ತರ್ ದೆಕ್ಚೆಂ ಅವಶ್ಯ್. ಚಲನ್‍ಚಿತ್ರ್ ಆರಂಭ್ ಜಾತಾನಾ 'ಯಾದೊಂಕಿ ಬಾರಾತ್.... ದಿಲ್ ಕೆ ದ್ವಾರೆ..' ಮ್ಹಣ್ ಸಗ್ಳೆಂ ಕುಟಾಮ್ ಸಾಂಗಾತಾ ಗಾಯ್ತಾ. ವಿಲನಾಚೆ ಹಾತಿಂ ಭುರ್ಗ್ಯಾಂಚಾ ಆವಯಿ ಬಾಪಯ್ಚಿ ಖುನ್ ಜಾತಾಚ್ ತೇಗ್ ಲ್ಹಾನ್ ಭಾವ್ ವಿ-ವಿಂಗಡ್ ಜಾತಾತ್. ವೀಸ್ ವರ್ಸಾಂ ಅಗೋಚರ್ ಜಿಯೆತಾತ್. ಉಪ್ರಾಂತ್ ಪರತ್ ಸಾಂಗಾತಾ ಕಶೆಂ ಜಾತಾತ್? ಕಶೆಂ ಎಕಾಮೆಕಾಚಿ ವಳಕ್ ಧರ್ತಾತ್? ತಿತ್ಲೆಂಯಿ ಕಳಾನಾ ತುಮ್ಕಾಂ, ಪೊದ್ ತಾಂಕಾಂ ವಳಕ್ ಧರುಂಕ್ ಕುಮಕ್ ಕರ್ತಾ. ಬೊರೆಂ ಜಾಲೆಂ ತೇಗಾಂಯ್ಕಿ ಪದಾಚೊ ಉಡಾಸ್ ಉರ್ತಾ, ನಾ ತರ್ ಸಾಯ್ಬಾ ಭೊಗೊಸ್, ವಿಸ್ರಾಲ್ಲ್ಯಾಚಿ ಗತ್ ಜಾತಾ ಆಸ್‍ಲ್ಲಿ. ತುಮಿ ಅಮಿತಾಭ್ ಬಚ್ಚನಾಚೆಂ 'ಲಾವಾರಿಸ್' ಖಂಡಿತ್ ದೆಕ್ಲಾಂ ಆಸ್ತೆಲೆಂ. ಕಾಜಾರಾ ಪಯ್ಲೆಂ ಜಲ್ಮೊನ್ ಅನಾಥ್ ಜಾಲ್ಲ್ಯಾ ಬಚ್ಚನಾಚಿ ವಳಕ್ ತಾಚೊ ಬಾಪಯಿ ಕಶೆಂ ಧರ್ತಾ? ಪರತ್ ಗರ್ಜೆಕ್ ಪಾವ್ತಾ ಪೊದ್. 'ಮೆರೆ ಅಂಗನೆಮೆಂ ತುಮಾರಾ ಕ್ಯಾ ಕಾಮ್ ಹೈ' ಮಣ್ಚಾ ಪೊದಾಚಿ ಲಾಯ್ನ್ ವ್ಹಡ್ ಜಾಲ್ಲ್ಯಾ ಪುತಾಕ್ ಚುಕ್ತಾನಾ ಬಾಪಯಿ ಮಜತ್ ದಿತಾ. ಬಚ್ಚನ್ ಪೊಟಾಂತ್ ಆಸ್ತಾನಾ ತಾಚೆ ಆವಯ್ನ್ ತೆಂ ಪೊದ್ ಶಿಕಂವ್ಕ್ ನಾತ್‍ಲ್ಲೆಂ ತರ್ ಬಾವ್ಡ್ಯಾಕ್ ಬಾಪಯಿ ಮೆಳ್ತಾ ನಾತ್‍ಲ್ಲೊ! ದೆವಾಚಿಂ ಮಾಹಿಮಾಂ ಪಳೆ.

ಕುಟ್ಮಾಚಾ ಗೀತಾ ದ್ವಾರಿಂ ಹೊಗ್ಡಾಯಿಲ್ಲ್ಯಾ ಕುಟ್ಮಾ ಸಾಂದ್ಯಾಂಕ್ ಸಾಂಗಾತಾ ಕರ್ಚೆಂ ಜಾಯ್ತೆಂ ಪಿಂತುರಾಂನಿ ದಾಕಯ್ಲಾಂ. 'ಮೇರಿ ಜಂಗ್' ಅಸಲೆಂಚ್ ಆನ್ಯೇಕ್ ಪಿಂತುರ್. 'ಜಿಂದಗಿ ಹರ್ ಕದಮ್ ಏಕ್ ನಯ್ಹಿ ಜಂಗ್ ಹೆ...' ಮಣ್ಚೆಂ ಪೊದ್ ಗಿರೀಶ್ ಕಾರ್ನಾಡ್ ಆಪ್ಲೆ ಕುಟ್ಮಾಕ್ ಶಿಕಯ್ತಾ. ಉಪ್ರಾಂತ್ ಕರುಂಕ್ ನಾತ್‍ಲ್ಲ್ಯಾ ಅಪ್ರಾಧಾಚೆರ್ ಗಿರೀಶ್ ಕಾರ್ನಾಡಾಕ್ ಫಾಶಿ ಜಾತಾ ಆನಿ ಉಬ್ಜಾಲ್ಲ್ಯಾ ಆಘಾತಾ ದ್ವಾರಿಂ ತಾಚಿ ಬಾಯ್ಲ್ ನೂತನ್ ತಿಚೊ ಉಡಾಸ್ ಹೊಗ್ಡಾಯ್ತಾ. ಹಾಯ್ ಕಿತ್ಲ್ಯಾ ಕಠೋರ್ ವಿಧಿ! ಪಿಕ್ಚರಾಚಾ ಕ್ಲೈಮಾಕ್ಸಾಂತ್ ಕಥಾ ನಾಯಕ್ ಅನಿಲ್ ಕಪೂರ್ ಬಾಪಯ್ಚೆಂ ಪೊದ್ ಪರತ್ ಗಾಯ್ತಾನಾ ಆವಯ್ಚೊ ವಿಸ್ರಾಲ್ಲೊ ಉಡಾಸ್ ಪಾಟಿಂ ಯೆತಾ. ಚಿಂತುನ್ ಪಳೆಯಾ ಬಾಪಯ್ನ್ ಬಾಯ್ಲೆ-ಭುಗ್ಯಾಂಕ್ ತೆಂ ಪೊದ್ ಶಿಕಂವ್ಕ್ ನಾತ್‍ಲ್ಲೆಂ ತರ್ ತಿಚೊ ಉಡಾಸ್ ಪಾಟಿಂ ಯೆಂವ್ಚೊ ಸಂಭವ್‍ಚ್ ನಾತ್‍ಲ್ಲೊ!

ಭಾಗಿ ತೆಂ ಕುಟಾಮ್ ಕುಟ್ಮಾ ಗೀತಾಚೆಂ ಬೆಸಾಂವ್ ಆಸ್‍ಲ್ಲೆಂ!

ಪಾವಾನಾತ್‌ಲ್ಲ್ಯಾಕ್ ಆಯ್ಲೆವಾರ್ ಸೊನಿ ಟಿವಿಚೆರ್ ಏಕ್ ಹಿಂದಿ ಧಾರಾವಾಹಿ ದೆಕ್ಚೆಂ ಭಾಗ್ ಮಾಕಾ ಫಾವೊ ಜಾಲೆಂ. ಹ್ಯಾ ಟಿವಿ ಧಾರಾವಾಹಿಂತ್ ಭುರ್ಗಿಂ ಲ್ಹಾನ್ ಆಸ್ತಾನಾ ನಪಂಯ್ಚ್ ಜಾಲ್ಲೊ ಬಾಪಯ್, ಭುರ್ಗಿಂ ವ್ಹಡ್ ಜಾತಾಚ್ ಏಕಾ ವಿಚಿತ್ರ್ ಸಂಘಟನಾಂತ್ ಜಿಣಿ ತಾಂಕಾಂ ಸಾಂಗಾತಾ ಹಾಡ್ತಾ. ಹ್ಯಾ ಸಂಘಟನಾ ಸಂದಭಿಂ ಭುರ್ಗ್ಯಾಂಕ್ ಬಾಪಯ್ಚಿ ವಳಕ್ ಕಶಿ ಮೆಳ್ತಾ ಮ್ಹಣ್ ತುಮಿ ಜಾಣಾಂತ್? ಕರೆಕ್ಟ್... ಆತಾಂ ಜಾಲ್ಯಾರ್ ತುಮಿ ಸಾರ್ಕೆಂ ಚಿಂತ್ಲೆಂ. 'ಮೇರಿ ಜಂಗ್' ಚಲನ್ ಚಿತ್ರಾಚೆಂ 'ಜಿಂದಗಿ ಹರ್ ಕದಮ್ ಏಕ್ ನಯ್ಹಿ ಜಂಗ್ ಹೆ...' ತಾಂಚೆ ಉಪ್ಕಾರಾಕ್ ಯೆತಾ. ಬಹುಶಾ ಭುರ್ಗಿಂ ಲ್ಹಾನ್ ಆಸ್ತಾನಾ ತಾಂಕಾಂ ಘೆವ್ನ್ ಬಾಪಯ್ 'ಮೇರಿ ಜಂಗ್' ಪಳೆಂವ್ಕ್ ಗೆಲ್ಲೊ ದಿಸ್ತಾ. ತೆಂ ಜಾಯ್ತೆ ವರ್ಸಾಂ ಉಪ್ರಾಂತ್ ಗರ್ಜೆಕ್ ಪಡ್ಲೆಂ. ಬೊರೆಂ ಜಾಲೆಂ ಕುಟ್ಮಾ ಭಾಯ್ಲ್ಯಾ ಖಂಚಾಯಿ ವ್ಯಕ್ತಿನ್ ಹೆಂ ಪೊದ್ ತಾಂಚೆ ಸವೆಂ ಗಾಯ್ಲೆಂ ನಾ. ನಾತರ್ ನವಿ ಘುಸ್ಪಡ್ ಉದೆತಾ ಆಸ್‍ಲ್ಲಿ!

ಆತಾಂ ತರೀ ಹರ್ಯೆಕಾ ಫಾಮಿಲಿಕ್ ಫೆಮಿಲಿ ದಾಕ್ತೆರ್ ಆಸ್‍ಲ್ಲ್ಯಾ ಪರಿಂ ಏಕ್ ಫೆಮಿಲಿ ಸೊಂಗ್ ಗರ್ಜ್ ಮ್ಹಣ್ ತುಮಿ ಪಾತ್ಯೆತಾತ್ ಯಾ ನಾ? 

ಚಿಂತುನ್ ಪಳೆಯಾ ತುಮಿ ಲ್ಹಾನ್ ಆಸ್ತಾನಾ ಯಾ ತುಮ್ಚಿ ಭುರ್ಗಿಂ ಕಾರ್ಕೊಳ್ ಫಿರ್ಗಜ್ ಫೆಸ್ತಾಚಾ ಸಾಂತೆಂತ್ ವಿಂಗಡ್ ಜಾಲಿಂ. ವ್ಹಡ್ ಜಾತಾಚ್ ವಳಕ್ ಕಶಿ ಧರ್ಚಿ? ವಿಂಗಡ್ ಜಾಲ್ಲ್ಯಾ ಎಕ್ಲ್ಯಾ ದೋಗಾಂಕ್ 'ಇಂಡಿಯನ್ ಐಡಲ್' ಯಾ 'ಸ್ಟಾರ್ ವೋಯ್ಸ್ ಆಫ್ ಇಂಡಿಯಾ'೦ತ್ ಗಾಂವ್ಚೆಂ ಭಾಗ್ ಫಾವೊ ಜಾಲೆಂ ಆನಿ ತಾಣೆ ಕುಟ್ಮಾ ಗೀತ್ ಗಾಯ್ಲೆಂ ತರ್ ಚುಕೊನ್ ಗೆಲ್ಲ್ಯಾ ಬಾಕಿಚಾಂಕ್ ಪರತ್ ಎಕ್ವಟೊಂಕ್ ಸಲೀಸ್ ಜಾತೆಲೆಂ-ಗಿ ನಾ? ಟಿವಿಚೆರ್ ಚುಕೊನ್ ಗೆಲ್ಲೊ ಭಾವ್ ಯಾ ಭಯ್ಣ್ ಕುಟ್ಮಾ ಗೀತ್ ಗಾಯ್ತಾನಾ ಆಮ್ಕಾಂ ಕಿತೆಂ ಭೊಗಾನಾಕಾ. ಭೊಗ್ಣಾಚಾ ಉಮಾಳ್ಯಾಚೊ ಕಾಟ್ ತುಟ್ತಾನಾ ಸಾಂಬಾಳ್ಚೆಂ ಅವಶ್ಯ್, ಉಡಾಸ್ ದವರಾ.

ಕುಟ್ಮಾಚೆಂ ಗೀತ್ ಕಂತಾರ್ ಜಾವ್ನ್ ಉಪ್ಯೋಗ್ ಕೆಲ್ಯಾರ್ ಕಶೆಂ? ಕಂತಾರಾಂಕ್ ಮ್ಹಳ್ಯಾರ್ ಭಕ್ತಿಕ್ ಗೀತಾಂಕ್ ಮನ್ಶಾಚೆಂ ಮನ್ ಉತ್ತೇಜಿತ್ ಕರ್ಚಿ ಅಪ್ಲಿಚ್ ಏಕ್ ಸಕತ್ ಆಸಾ. ಆಮ್ಚೊ ಏಕ್ಲೊ ಪಯ್ಶಿಲೊ ಸೆಜಾರಿ ಆದಿಂ ಗಾಂವಾಂತ್ ಸದಾಂ ಸುಶೆಗಾತ್ ಪಿಯೊನ್ ಸಾಂಜೆರ್ ಬಾಯ್ಲ್ ಭುರ್ಗ್ಯಾಂಕ್ ಮಾನ್ ಯೆಟುನ್ 'ಪಾಪಿಯಾ ನಿರ್ಭಾಗ್ಯಾ, ಪಾಪ್ ನಾ ಸಾಂಡ್ಶಿ, ಸಾಸಾಣಾಚಾ ಸಾಸಾಣ್ ಪಾಪಿಯಾ.....' ಮಣ್ಚೆಂ ಕಂತಾರ್ ಹರ್ಯೆಕಾ ಸಾಂಜೆರ್ ಗಡಂಗಾ ಥಾವ್ನ್ ಪಾಟಿಂ ಯೇವ್ನ್ ಖಳಾನಾಸ್ತಾನಾ ಗಾಯ್ತಾಲೊ. ತಾಚೆ ವಾಂಟ್ಯಾಕ್ ತೆಂಚ್ ತಾಚೆಂ ಫೆಮಿಲಿ ಸೊಂಗ್. ಗಾಂವಾಂತ್ ಜಾಯ್ತೆ ಘರಾಂನಿ ಆಮೊರಿ ತೇರ್ಸ್ ಅಕೇರ್ ಜಾತಾನಾ ಕಂತಾರ್ ಸಾಂಗ್ಚಿ ರಿವಾಜ್ ಆಸಾ. ಗಾಂವಾಂತ್ ಆಮ್ಚಾ ಘರಾ ಹಿ ಸಂಪ್ರದಾಯ್ ಆದಿಂ ಆಸ್‍ಲ್ಲಿ ಆನಿ ಆತಾಂಯಿ ಆಸಾ. ಮಜಾ ಮಾಮ್ಮಿಚೆಂ ಅತೀ ಪಸಂದೆಚೆಂ ಕಂತಾರ್ 'ರಾಕೊಣ್ ಭಡ್ವ್ಯಾ ಮಜಾ, ಸರ್ಗಾ ವಯ್ಲ್ಯಾ ಆಂಜಾ.....' ಆಯ್ಕೊನ್ ಆಯ್ಕೊನ್ ಅಕ್ರೀಸ್ತಾಂವ್ ಸೆಜಾರ್ಚಾಂಚಾ ಜೀಬೆರ್ ಸಮೇತ್ ಖೆಳೊಂಕ್ ಲಾಗ್‍ಲ್ಲೆಂ.

ಹಾಂವ್ ಲ್ಹಾನ್ ಆಸ್ತಾನಾ ಭಾಯ್ರ್ ಪಡ್‍ಲ್ಲೊ ತರ್ ವ್ಹಡ್ ಜಾತಚ್ 'ರಾಕೊಣ್ ಭಡ್ವ್ಯಾ ಮಜಾ ಸರ್ಗಾ ವಯ್ಲ್ಯಾ ಆಂಜಾ.....' ಮ್ಹಣ್ ಗಾವ್ನ್ ಅಪ್ಲ್ಯಾಂಚಿ ವಳಕ್ ಸೊಧುನ್ ಘರಾಂ ಘರಾಂನಿ ಭಂವ್ತೊಂ ಆಸ್‍ಲ್ಲೊಂ. ಪಿಕ್ಚರಾಂಚಾ ಕಾಣ್ಯೆಂನಿ ಏಕ್ ಮತ್ಲಬ್ ಮಾತ್ರ್ ಮಾಕಾ ಸಮ್ಜಾನಾ. ಹೆಂ ಫೆಮಿಲಿ ಪೊದ್ ಗಾವ್ನ್ ಅಪ್ಲ್ಯಾಂಚಿ ವಳಕ್ ಪಾರ್ಕುಂಕ್ ವ್ಹಡ್ ಜಾತಾ ಪರ್ಯಾಂತ್ ಕಿತ್ಯಾಕ್ ರಾಕಾಜಾಯ್? ಲ್ಹಾನ್ ಆಸ್ತಾನಾಂಚ್ ಕಿತ್ಯಾಕ್ ಪೊದ್ ಗಾವ್ನ್ ವಳಕ್ ಕರವ್ನ್ ಅಂತ್ಯ್ ಹಾಡುಂಕ್ ನಜೊ?

ಆದಿಂ ಹಾಂವ್ ಲ್ಹಾನ್ ಆಸ್ತಾನಾ ಆಮ್ಚಾ ಘರಾ 'ಬಿಲ್ಲಿ' ನಾಂವಾಚೆಂ ಏಕ್ ಮಾಜಾರ್ ಜಾಯ್ತೆಂ ವರ್ಸಾಂ ಜಿಯೆಲ್ಲೆಂ. ಹ್ಯಾ ಮಾಜ್ರಾಕ್ 'ಜರ್ಲೆ' ಆನಿ 'ಉಂದಿರ್' ಮಳ್ಯಾರ್ ಕಾಂಟಾಳೊ. ಮಾಸ್ ಮಾಸ್ಳೆಚೆಂ ಜೆವಾಣ್ ಮಳ್ಯಾರ್ ವಿಶೇಸ್ ಆನಂದ್. ಜೆವ್ಣಾಚಾ ವೆಳಾರ್ ತೆಂ ಘರಾ ಭಿತರ್ ಹಾಜಾರ್. ಬಾಕಿಚಾ ವೆಳಾರ್ ಏಕಾ ಪರ್ದೇಶಿ ಬೊಕುಲಾ ಸಂಗಿಂ ತಾಕಾ ಈಷ್ಟಾಗತ್. ಬೊಕುಲಾ ಸಂಗಿಂ ತಾಚಿ ಚಂಗಾಯಿ ತುಟೊಂವ್ಕ್ ಆಮಿ ಭುರ್ಗ್ಯಾಂನಿ ಕೆಲ್ಲೆಂ ಹರ್ಯೆಕ್ ಪ್ರಯತನ್ ನಿರ್ಫಳ್ ಜಾಲ್ಲೆಂ. ರೋಮಿಯೊ-ಜುಲಿಯೆಟ್ ಆನಿ ಲೈಲಾ ಮಜ್ನುಚೊ ಮೋಗ್ ತಾಂಚೊ. ಪುಣ್ ಜೆವ್ಣಾಚಾ ವೇಳಾರ್ ಮಾತ್ರ್ ಆಪ್ಲ್ಯಾ ಬೊಯ್-ಫ್ರೆಂಡಾಕ್ ಪಯ್ಸ್ ಕರ್ನ್ ತೆಂ ಕುಟ್ಮಾ ಭಿತರ್ಲ್ಯಾ ಜೆವ್ಣಾಕ್ ಪ್ರತ್ಯಕ್ಷ್ ಜಾತಾಲೆಂ.

ಜೆವ್ಣಾಚೊ ವೇಳ್ ಕಸೊ ಮಾಜ್ರಾಕ್ ಕಳಿತ್? ಹಾಚಿ ಜಾಪ್ ಮಾಜ್ರಾಲಾಗಿಂ ಆಸ್‍ಲ್ಲಿ. 

ಥೊಡೆ ಪಾವ್ಟಿಂ ಬೊಕುಲಾ ಸಂಗಿಂ ಬೊಲ್ಯಾಂನಿ ಲಿಪೊನ್ ವೇಳ್ ಪಾಶಾರ್ ಜಾತಾನಾ ಮಾಜಾರ್ ಆಮ್ಚಿ ಖಬರ್ ವಿಸ್ರಾತಾಲೆಂ. ಪುಣ್ ತೇರ್ಸ್ ಆರಂಭ್ ಜಾವ್ನ್ ಅಕ್ರೇಕ್ 'ರಾಕೊಣ್ ಭಡ್ವ್ಯಾ ಮಜಾ, ಸರ್ಗಾ ವಯ್ಲ್ಯಾ ಆಂಜಾ....' ಮಣ್ಚೊ ಆವಾಜ್ ಪರಿಸರಾಂತ್ ಪ್ರಸಾರ್ ಜಾತಾನಾ 'ಮ್ಯಾಂವ್.. ಮ್ಯಾಂವ್' ಮ್ಹಣ್ ಧಾಂವೊನ್ ಧಾಂವೊನ್ ಯೆತಾಲೆಂ. 'ಮೊಗಾಳ್ ಪುತ್ರಾ ಸವೆಂ..' ಮ್ಹಣೊನ್ ಆಕೇರ್ ಕರ್ಚ್ಯಾ ಭಿತರ್ ಆಮ್ಕಾಂ ಮಾಜ್ರಾಚೊ ಸ್ವರ್ ಸ್ಪಷ್ಟ್ ಆಯ್ಕಾತಾಲೊ. ತೇರ್ಸ್ ಅಕೇರ್ ಜಾಲ್ಲೆ ಫರಾ ಆಮ್ಚಾ ಘರಾ ಜೆವ್ಣಾಚಿ ತಯಾರಾಯ್ ಚಲ್ತಾ ಆನಿ ಪೊಟ್ ಭರುಂಕ್ ಹೊ ಸಮರ್ಪಕ್ ಸಂದ್ರಾಪ್ ಮ್ಹಣ್ ಮಾಜಾರ್ ಖಚಿತ್ ಜಾಣಾಸ್‍ಲ್ಲೆಂ. ಮಳ್ಯಾರ್ ಆಮ್ಚಾ ಬಿಲ್ಲಿಕ್ ಸಮೇತ್ ಕುಟ್ಮಾ ಗೀತಾಚಿ ಖರಿ ಪರಿಚಯ್ ಆಸ್‍ಲ್ಲಿ.

ಫಕತ್ ಏಕಾ ದೀಸಾ ಸಾಂಜೆರ್ ತೇರ್ಸ್ ಸಂಪೊನ್ ಕುಟ್ಮಾ ಗೀತ್ ಗಾಯ್ತಾನಾ ಸಮೇತ್ ತೆಂ ಆಯ್ಲೆಂನಾ. ಆಮ್ಚಾ ಕಾಳ್ಜಾಂನಿ ಆಕಾಂತ್ ಭರ್ಲೊ. ತಾಚೆ ಉಪ್ರಾಂತ್ ಆಮ್ಚೆಂ ಬಿಲ್ಲಿ ಕೆದಿಂಕ್‍ಚ್ ಪಾಟಿಂ ಆಯ್ಲೆಂನಾ. ಪರ್ದೇಶಿ ಬೊಕುಲಾ ಸಂಗಿಂ ಕುಟ್ಮಾಚೆಂ ಗೀತ್ ವಿಸ್ರೊನ್ ಪಲಾಯನ್ ಜಾಲೆಂ ಮ್ಹಣ್ ಚಿಂತಿನಾಕಾತ್. ಪೊಸುಲ್ಲ್ಯಾ ಕುಟ್ಮಾಕ್ ಆನಿ ಕುಟ್ಮಾ ಗೀತಾಕ್ ವಿಸ್ರೊಂಚಾ ಸೈಂಭಾಚೆಂ ಮಾಜಾರ್ ತೆಂ ನಯ್. ಬಸ್ಸಾಚಾ ರೋದಾಂ ಪಂದಾಕ್ ಸಾಂಪ್ಡೊನ್ ಪಾಪ್ ಬಿಲ್ಲಿಚೆಂ ಸಂಸಾರಿ ಪಯ್ಣ್ ಅಕೇರ್ ಜಾಲೆಂ.

ಪದಾಂಚಿ ನೈಟ್ ಪ್ರೇಕ್ಷಕ್ ಟೈಟ್? : 

ಎಕಾ ಪ್ರಖ್ಯಾತ್ ಗಾವ್ಪ್ಯಾಚಿ ನೈಟ್ ಏಕಾ ಗಾಂವಾಂತ್ ವ್ಯವಸ್ಥಿತ್ ಕೆಲ್ಲಿ. ಲೋಕಾಚಾ ಕಾಳ್ಜಾಂ ಪರ್ಯಾಂತ್ ಪಾವೊಂಕ್ ಗಾವ್ಪ್ಯಾನ್ ಅಪ್ಲ್ಯಾ ಆವಯಿ-ಬಾಪಯ್ನ್ ಶಿಕಯಿಲ್ಲಿಂ ಕುಟ್ಮಾ ಗೀತ್ ಸಂಗೀತ್ ಸಾಂಜೆಚೆಂ ಪಯ್ಲೆಂ ಪೊದ್ ಜಾವ್ನ್ ಗಾಯ್ತಾಂ ಮ್ಹಣ್ ಲೊಕಾಕ್ ಕಳಯ್ಲೆಂ. ಲೊಕಾನ್ ಚೀತ್ ದೀವ್ನ್ ಪೊದ್ ಆಯ್ಕಾಲೆಂ. ಪೊದ್ ಅಕೇರ್ ಜಾಲ್ಲೆ ಫರಾ 'ವನ್ಸ್ ಮೋರ್, ವನ್ಸ್ ಮೋರ್' ಮ್ಹಣ್ಚಿ ಪ್ರೇಕ್ಷಕಾಂಚಿ ಬೊಬಾಟ್ ಗಾವ್ಪ್ಯಾಕ್ ಆಯ್ಕಾಲಿ. ತಾಚೆಂ ಫೆಮಿಲಿ ಸೊಂಗ್ ಲೊಕಾಚಾ ಕಾಳಿಜ್ ಸ್ಪರ್ಶ್ ಕರುಂಕ್ ಸಕ್ಲೆಂ ಮ್ಹಣ್ ಚಿಂತುನ್ ಗಾವ್ಪ್ಯಾಚಾ ದೊಳ್ಯಾಂನಿ ಸಂತೊಸಾಚಿಂ ದುಕಾಂ ಉದೆಲಿಂ. ತಾಣೆ ತೆಂಚ್ ಪೊದ್ ಪರತ್ ಗಾಯ್ಲೆಂ. ಪರತ್ 'ವನ್ಸ್ ಮೋರ್' ಮ್ಹಣ್ ಪ್ರೇಕ್ಷಕಾಂನಿ ಬೊಬ್ ಮಾರ್ಲಿ. ಆತಾಂ ಉಪಾವ್ ನಾಸ್ತಾನಾ ಏಕ್‍ಚ್ ಪೊದ್ ತಿಸ್ರೆ ಪಾವ್ಟಿಂ ತಾಣೆ ಲೊಕಾ ಹುಜ್ರಿಂ ಪ್ರದರ್ಶಿತ್ ಕೆಲೆಂ.

ಪರತ್ ಲೊಕಾನ್ 'ವನ್ಸ್ ಮೋರ್' ಮ್ಹಣ್ ತಾಳಿಯೊ ಮಾರ್ಲ್ಯೊ.

'ನೈಟ್ ಆಜೂನ್ ಸಾರ್ಕೆಂ ಆರಂಭ್ ಜಾಂವ್ಕ್ ನಾ, ಲೋಕ್ ಮ್ಹಾಕಾ ಏಕಾ ಪೊದಾ ಥಾವ್ನ್ ವನ್ಸ್ ಮೋರ್ ಮ್ಹಣೊನ್ ಮುಕಾರ್ ವಚೊಂಕ್ ಸೊಡಿನಾ. ಸಕ್ಕಡ್ ಪ್ರೇಕ್ಷಕ್ ಸೊರೊ ಪಿಯೊನ್ ಟೈಟ್ ಜಾವ್ನ್ ಹೊಲಾಕ್ ಆಯ್ಲ್ಯಾತ್ ಆಸ್ತೆಲೆ.' ಗಾವ್ಪ್ಯಾಕ್ ದುಬಾವ್ ಆಯ್ಲೊ.

''ದಯಾ ಕರ್ನ್ ಮ್ಹಾಕಾ ಆಯ್ಕಾಯಾ.'' ಗಾವ್ಪ್ಯಾನ್ ಲೊಕಾ ಲಾಗಿಂ ವಿನಂತಿ ಕೆಲಿ. ''ಹಾಂವೆ ಮ್ಹಜೆಂ ಕುಟ್ಮಾ ಗೀತ್ ತೀನ್ ಪಾವ್ಟಿಂ ಗಾಯ್ಲೆಂ. ತುಮ್ಕಾಂ ತೆಂ ಪೊದ್ ಮನೋರಂಜನ್ ದೀಂವ್ಕ್ ಸಕ್ಲೆಂ ಮ್ಹಣ್ ತುಮಿ 'ವನ್ಸ್ ಮೋರ್' ಮ್ಹಣ್ ವಿನಂತಿ ಕೆಲ್ಲ್ಯಾ ವರ್ವಿಂ ಮ್ಹಾಕಾ ಖಚಿತ್ ಜಾಲೆಂ. ಮಜೆ ಲಾಗಿಂ ಹೆರ್ ಜಾಯ್ತಿಂ ಪೊದಾಂ ಆಸಾತ್. ತುಮ್ಚಿ ಅನುಮತಿ ತರ್ ಹಾಂವೆ ದುಸ್ರಿಂ ಪೊದಾಂ ಗಾವ್ನ್ ತುಮ್ಕಾಂ ಮನೋರಂಜನ್ ದಿವ್ಯೆತ್-ಗಿ?''

ಹೊಲಾಂತ್ ಘಡಿಭರ್ ಶೆಳೆಂ ಮೌನ್. ಉಪ್ರಾಂತ್ ಪ್ರೇಕ್ಷಕಾಂ ಮಧ್ಲೊ ಎಕ್ಲೊ ಉಟ್ಲೊ.

''ಗರ್ಜ್ ನಾ.'' ಪ್ರೇಕ್ಷಕಾನ್ ತ್ರಾಣ್ ಆರಾವ್ನ್ ತಾಳೊ ಕಾಡ್ಲೊ. ''ತುಂವೆ ದುಸ್ರಿಂ ಪೊದಾಂ ಸಾಂಗ್ಚಿ ಬಿಲ್ಕುಲ್ ಗರ್ಜ್ ನಾ.''

''ಕಿತ್ಯಾಕ್?'' ಗಾವ್ಪಿ ಭಾವುಕ್ ಜಾಲೊ. ''ಕಿತ್ಯಾಕ್ ತ್ಯಾ ಏಕಾ ಪೊದಾಚೆರ್ ತುಮ್ಕಾಂ ತಿತ್ಲೊಯಿ ಮೋಗ್?''

''ಕೆದೊಳ್ ಪರ್ಯಾಂತ್ ತುಂ ತುಜೆಂ ಪಯ್ಲೆಂ ಪೊದ್ ಚುಕಿ ನಾಸ್ತಾನಾ ಗಾಂವ್ಕ್ ಶಿಕ್ತಾಯಿ, ತವಳ್ ಪರ್ಯಾಂತ್ ತುಂವೆಂ ದುಸ್ರಿಂ ಪೊದಾಂ ಗಾವ್ನ್ ಆಮ್ಕಾಂ ವಿರಾರ್ ಕರ್ಚಿ ಅವಶ್ಯಕತಾ ನಾ!'' ಪ್ರೇಕ್ಷಕ್ ಸ್ಪಷ್ಟ್ ಸ್ವರಾನ್ ಮ್ಹಣಾಲೊ.!

Tags:  Stan Agaiera, Mulki, Konkani Writer, Family Song, Konkani, Mangalore, Mangalorean, Mother Tongue

3 Comments.

  1. Deric Lewis, Kundapur
    Stan sir, super. Keep writing.
  2. Veena Dsouza, Chennai
    ಬೊರೆಂ ಲಾಗ್ಲೆಂ. ತುಜೊ ದೊಳೊ ಆನಿಕೀ ವಾಂಕ್ಡೊ ಜಾಂವ್ದಿ ಆನಿ ಬೊರಿಂ ಬೊರಿಂ ಹಾಸ್ಯ್ ಲೇಖನಾಂ ಪ್ರಕಟ್ ಜಾಂವ್ದಿತ್ ಮ್ಹಣ್ ಆಶೆತಾಂ.
  3. Robert Lewis, Sharjah
    Welcome Stan sir. I like your articles and humours very very much.

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE