+971 50 7554105
ತುಮ್ಚ್ಯಾ ಗಮನಾಕ್:

33  -  ಮನಿಸ್, ಕಿತ್ಯಾಕ್ ಮೊರೊಂಕ್ ರಾಕ್ತಾತ್?

ಬರಯ್ಣಾರಾ ವಿಶಿಂ ಜಾಣಾ ಜಾ...

'ಮೆಲ್ಲ್ಯಾ ಮೊಶಿಕ್ ಬಾರಾ ಕುಟ್ಟಿಂ ದೂದ್' ಹಿ ಸಾಂಗ್ಣಿ ಆಮ್ಚೆ ಮಧೆಂ ಕಶಿ ರೊಂಬೊನ್ ಬೊಸ್ಲ್ಯಾ ಮ್ಹಳ್ಳೆಂ ಕಳಾನಾ. ಕೊಣಿ ಮರಣ್ ಪಾವ್‍ಲ್ಲ್ಯಾ ಉಪ್ರಾಂತ್‍ಚ್ಚ್ ಆಮ್ಕಾಂ ತಾಂಚೆ ವಿಶಿಂ ಬೊರೆಂ ಉಲೊಂವ್ಚಿ ಸವಯ್. ಜೀವಂತ್ ಆಸ್ತಾನಾ ಆಮ್ಕಾಂ ಹೆರಾಂಕ್ ಮೆಳೊಂಕ್, ತಾಂಚ್ಯೆ ವಿಶಿಂ ಏಕ್ ಬೊರೆಂ ಉತರ್ ಉಲಂವ್ಕ್ , ತಾಂಚ್ಯಾ ಗರ್ಜಾಂಕ್ ಪಾವೊಂಕ್, ತಾಂಚೊ ಉಪ್ಕಾರ್ ಭಾವ್ಡುಂಕ್ ಬಿಲ್ಕುಲ್ ಪುರ್ಸೊತ್ ಆಸಾನಾ. ತಾಂಚೆ ವಿಶಿಂ ಏಕ್ ಬೊರೆಂ ಉತಾರ್ ಆಮ್ಚ್ಯಾ ಜಿಬೆಚೆರ್ ಸುಟಾನಾ. ಜಾಲ್ಯಾರಿ, ತಾಂಚೆ ವಿಶಿಂ ವಾಯ್ಟ್ ಉಲಂವ್ಕ್, ತಾಂಚೆ ಪಾಂಯ್ ವೊಡುಂಕ್, ತಾಂಚಿ ಮರ್ಯಾದ್ ಕಾಡುಂಕ್ ಆಮಿಂ ತಯಾರ್. ತಾಂತುಂನ್‌ಚ್ ಆಮ್ಕಾಂ ವಿಶೇಷ್ ಸುಖ್. ಆನಿ ತೊ ಮ್ಹರಣ್ ಪಾವ್‍ಲ್ಲ್ಯಾ ಉಪ್ರಾಂತ್.......

ನೆಹಾ ಆನಿ ಸವಿತಾ ಕಾಳ್ಜಾಕ್ ಲಾಗ್ಶಿಲ್ಯೊ ಇಷ್ಟಿಣ್ಯೊ. ಸಾಂಗಾತಾ ವ್ಹಡ್ ಜಾಲ್ಲಿಂ. ದಿಸಾಕ್ ಏಕ್ ಪಾವ್ಟಿಂ ಪುಣಿ ಮೆಳಾನಾತ್ಲ್ಯಾರ್ ವಾ ಉಲಯ್ನಾತ್ಲ್ಯಾರ್ ತಾಂಕಾಂ ನೀದ್‍ಚ್ಚ್ ಪಡಾನಾತ್‍ಲ್ಲಿ. ಸಾಂಗಾತಾ ಶಿಕೊನ್ , ಕೊಲೇಜಿಚೆಂ ಶಿಕಾಪ್ ಆಖೇರ್ ಜಾತಾ ಮ್ಹಣಾಸರ್ ತಾಂಚಿ ಇಷ್ಟಾಗತ್ ಬೊರ‍್ಯಾನ್ ಚಲ್ಲಿ. ಕೊಲೇಜಿಚೆಂ ಶಿಕಾಪ್ ಜಾಲ್ಲ್ಯಾ ಕೂಡ್ಲೆ ತಾಂಚಿ ಇಷ್ಟಾಗತ್ ತುಟೊನ್ ಪಡ್ಲಿ. ಮ್ಹಣ್ತಾತ್‍ನೆ ಚಡ್ ಲಾಗ್ಶಿಲಿ ಇಷ್ಟಾಗತ್ ಆಸ್ಲ್ಯಾರ್ ನಿಷ್ಟುರ್ ಜಾಂವ್ಕ್ ಲ್ಹಾನ್‍ಶೆಂ ಕಾರಣ್ ಪಾವ್ತಾ. ಉಪ್ರಾಂತ್ ಕಾಮಾ ಖಾತಿರ್ ತಿಂ ವೆಗ್ಳ್ಯಾ ವೆಗ್ಳ್ಯಾ ಗಾಂವಾಂಕ್ ಪಾವ್ಲಿಂ. ವರ್ಸಾಂ ಪಾಶಾರ್ ಜಾಲಿಂ, ತಾಣಿಂ ಎಕಾಮೆಕಾ ಸಂಪರ್ಕ್ ಕರ್ಚೆಂ ಪ್ರಯತ್ನ್ ಕೆಲೆಂನಾ. ಚಡ್ ಉಣೆಂ ಚಾರ್ ವರ್ಸಾಂ ಉಪ್ರಾಂತ್ ಎಕಾ ದಿಸಾ ಆವ್ಚಿತ್ ನೆಹಾಕ್ ಸವಿತಾಚೆಂ ಫೊನ್ ಆಯ್ಲೆಂ,"ಹಾಂವ್ ಕ್ಯಾನ್ಸರ್ ಪಿಡೆನ್ ವಳ್ವಳ್ತಾಂ, ಮ್ಹಾಕಾ ತುಕಾ ಮೆಳಾಜಾಯ್, ಪಳೆಜಾಯ್. ದಯಾಕರುನ್ ಮ್ಹಾಕಾ ಮಾಫ್ ಕರ್ನ್ ಮೆಳೊಂಕ್ ಯೆತಾಯ್ಗಿ?" ಸವಿತಾನ್ ಉಪ್ಕಾರ್ ಮಾಗ್ಲೊ.
ಖಬರ್ ಆಯ್ಕೊನ್ ನೆಹಾಕ್ ಇಲ್ಲೆಂ ಬೆಜಾರ್ ಜಾಲೆಂ ಜಾಲ್ಯಾರೀ ತಾಚೊ ತೊ ಆದ್ಲೊ ರಾಗ್ ಆಜೂನ್ ತಾಚ್ಯಾ ಮನಾಂತ್ ಜಿವೊ ಆಸ್‍ಲ್ಲೊ. ಆಪ್ಣೆಂ ಕಿತ್ಯಾಕ್ ಆತಾಂ ಲ್ಹಾನ್ ಜಾಯ್ಜಾಯ್???? ನಿಷ್ಟುರ್‌ಗಾಯೆಕ್ ತೆಂಚ್ಚ್ ಕಾರಣ್. ತೆಂ ವಚೊಂಕ್ ನಾ. ಅಶೆಂ ಸುಮಾರ್ ಮಹಿನೆ ಪಾಶಾರ್ ಜಾಲೆ. ತವಳ್ ತವಳ್ ಸವಿತಾ, ನೆಹಾಕ್ ಫೊನ್ ಕರುನ್ಂಚ್ಚ್ ಆಸ್ತಾಲೆಂ. ಏಕ್ ಪಾವ್ಟಿಂ ಮೆಳೊಂಕ್ ಜಾಯ್ ಮ್ಹಳ್ಳಿ ತಾಚಿ ಆಶಾ ಜಾವ್ನಾಸ್‍ಲ್ಲಿ. ಪುಣ್ ಆಪ್ಣಾಕ್ ಪುರ್ಸೊತ್ ನಾ. ಫಾಲ್ಯಾಂ ಯೆತಾಂ, ಪೊರ್ವಾಂ ಯೆತಾಂ... ಮ್ಹಣೊನ್ ನೆಹಾ ದೀಸ್ ಪಾಟಿಂ ಪಾಟಿಂ ಘಾಲ್ತಾಲೆಂ.
ಆಖ್ರೇಕ್ ಎಕಾ ದಿಸಾ ನೆಹಾನ್ ಸವಿತಾಕ್ ಮೆಳೊಂಕ್ ನಿರ್ಧಾರ್ ಕೆಲೊ ಆನಿ ಹಿ ಬೊರಿ ಖಬರ್ ಸಾಂಗೊಂಕ್ ತಾಣೆಂ ಸವಿತಾಕ್ ಫೊನ್ ಘುಂವ್ಡಾಯ್ಲೆಂ. ಆನ್ಯೇಕಾ ಕುಶಿನ್ ಹುಸ್ಕಾರೊನ್ ಉಲೊಂವ್ಚೊ ತಾಳೊ ಆಯ್ಕೊನ್ ನೆಹಾ ಭಿಯೆಲೆಂ. "ಸವಿತಾ ಆಸಾಗೀ? ಹಾಂವ್ ಫಾಲ್ಯಾಂ ತಾಕಾ ಮೆಳೊಂಕ್ ಯೆತಾಂ" ಮ್ಹಣ್ತಾನಾ, "ಪುತಾ.... ಸವಿತಾನ್ ಕಾಲ್ ಪ್ರಾಣ್ ಸೊಡ್ಲೊ" ತ್ಯೆ ಖುಶಿನ್ ಥಾವ್ನ್ ತಾಚ್ಯಾ ಆವಯ್ನ್ ಗಳ್ಗಳ್ಯಾಂ ರಡೊನ್ ಜವಾಬ್ ದಿಲಿ.

ದೋನ್ ವರ್ಸಾಂ ಆದಿಂ ಮ್ಹಜೊ ಎಕ್ ವಳ್ಕಿಚೊ ವ್ಯಕ್ತಿ ಮರಣ್ ಪಾವ್‍ಲ್ಲ್ಯಾ ವೆಳಾರ್, ತ್ಯಾ ವ್ಯಕ್ತಿ ಖಾತಿರ್ ತಾಂಚ್ಯಾ ಆಫಿಸಾಚ್ಯಾಂನಿ ಆಸಾ ಕೆಲ್ಲ್ಯಾ ಏಕ್ Condolence Meeting(ಶ್ರದ್ಧಾಂಜಲಿ ಕಾರ್ಯೆಂ) ಕ್ ಹಾಂವ್ ಹಾಜರ್ ಜಾಲ್ಲೊಂ. ತ್ಯಾ ಸಭೆಂತ್ ತ್ಯಾ ವ್ಯಕ್ತಿ ವಿಶಿಂ ತಾಚ್ಯಾ ಧನಿಯಾ ಥಾವ್ನ್ ಕಂಪೆನಿಚ್ಯಾ ಪಿಯೊನಾ ಪರ್ಯಾಂತ್ಲ್ಯಾ ವಿವಿಧ್ ಜಣಾಂನಿ ಉಲಯಿಲ್ಲಿಂ ಉತ್ರಾಂ ಹಾಂವೆಂ ಆಯ್ಕಾಲಿಂ.... ತಾಚ್ಯಾ ವೀಸ್ ವರ್ಸಾಂಚ್ಯಾ ಸೆವೆ ವರ್ವಿಂ ಆಮ್ಚಿ ಕಂಪೆನಿ ಇತ್ಲ್ಯಾ ಊಂಚ್ ಮಟ್ಟಾಕ್ ಪಾವ್ಲ್ಯಾ. ಏಕ್ ಸಾಧೊ, ಮ್ಹಿನತಿ ಆನಿ ಸಮರ್ಪಿತ್ (Dedicated) ಕಾಮೆಲಿ ತೊ ಜಾವ್ನಾಸ್‍ಲ್ಲೊ... ಅಶೆಂ ಸರ್ವ್ ತಾಚೆ ಗುಣ್‍ಗಾನ್ ಕರಿತ್ತ್ ಗೆಲೆ. ಪುಣ್ ಕಿತೆಂ ಪ್ರಯೋಜನ್???? ತೊ ವ್ಯಕ್ತಿ ಮರಣ್ ಪಾಂವ್ಚ್ಯಾ ಚಾರ್ ಮಹಿನ್ಯಾಂ ಆದಿಂ ಮ್ಹಾಕಾ ಭೆಟ್‍ಲ್ಲೊ.ಆನಿಂ ತೊ ಸಾಂಗಾಲಾಗ್ಲೊ, "ಪುರೊ ಜಾಲೆಂ ಡಯಾನ್, ಹಾಂಕಾಂ ಕಿತ್ಲೆಂ ಕಾಮ್ ಕೆಲ್ಯಾರಿ ಪಾವಾನಾ. ಕೆದಾಳಾ ಪಳಯ್ಲಾರೀ ಫುರ್ಪುರ್ತಾತ್. ಆನಿ ಆಜ್ ಕಾಲ್ ತಾಣಿಂ ಮ್ಹಾಕಾ ಚಡ್ ಸತಾಂವ್ಕ್ (Harrassment) ಸುರು ಕೆಲಾಂ. ಮ್ಹಜಿ ಭಲಾಯ್ಕಿ ಬೊರಿ ನಾ. ಹಾಂವ್ ಆನಿ ಕಾಂಯ್ ಥೊಡ್ಯಾ ದಿಸಾಂನಿ ಕಾಮ್ ಸೊಡ್ತಾಂ.'' ತವಳ್ ತಾಕಾ ಹಾಂವೆಂ ಆಮ್ಚೊ ಆದ್ಲೊ ರಾಷ್ಟ್ರಪತಿ ಡೊ. ಅಬ್ದುಲ್ ಕಲಾಂ ಹಾಚ್ಯಾ ಉತ್ರಾಂಚೊ ಉಗ್ಡಾಸ್ ಕೆಲೊ "Love Your Job , Not your Company. Company may throw you out any time". ಪುಣ್ ತಾಚೆಂ ದುರಾದ್ರಷ್ಟ್! ಕಾಮಾಕ್ ಆದೇವ್ಸ್ ಮಾಗ್ಚ್ಯಾ ಪಯ್ಲೆಂ ತಾಣೆಂ ಸಂಸಾರಾಕ್‍ಚ್ಚ್ ಆದೇವ್ಸ್ ಮಾಗ್ಲೊ.

ಥೊಡ್ಯಾ ಪಾವ್ಟಿಂ ಅಶೆಂ ಭೊಗ್ತಾಕಿ, "ಆಮಿಂ ಮನ್ಶಾಂ ವಿಶಿಂ ಬೊರೆಂ ಉಲಯ್ಜಾಯ್ ಜಾಲ್ಯಾರ್ ತಾಣಿಂ ಮೊರಜಾಯ್. ಜೀವಂತ್ ಆಸ್ತಾನಾ ತಾಚ್ಯಾ ಪಿಡೆಂತ್ ಚಾಕ್ರಿ ಕೆಲ್ಲಿ ನಾ, ಆಸ್ಪತ್ರೆಕ್ ಭೆಟ್ ದಿಲ್ಲಿ ನಾ, ಮೊಗಾನ್ ದೆಖ್‍ಲ್ಲೆಂ ನಾ, ಏಕ್ ಫುಲಾಚೊ ಕುಡ್ಕೊ ದಿಲ್ಲೊ ನಾ. ಮೆಲ್ಲ್ಯಾ ಉಪ್ರಾಂತ್ ಪೆಟೆ ವಯ್ರ್ ರಾಸ್ ರಾಸ್ ಫುಲಾಂ ಆನಿ ರೀದ್, ಮಾಗ್ಣೆಂ ಕಿತೆಂ, ರಜಾರ್ ಕಿತೆಂ!!! ಜಿವಂತ್ ಆಸ್ತಾನಾ ಏಕ್ ಮುಸ್ತಾಯ್ಕಿ ಹಾಡುನ್ ದಿಲ್ಲಿ ನಾ. ಮೆಲ್ಲ್ಯಾ ಉಪ್ರಾಂತ್ ನವೊಚ್ಚ್ ಸೂಟ್ ಆನಿ ಬೂಟ್. ಜೀವಂತ್ ಆಸ್ತಾನಾ ಏಕ್ ಬೊರೆಂ ಉತಾರ್ ತಾಚ್ಯಾ ಕಾನಾಂತ್ ಸಾಂಗ್‍ಲ್ಲೆಂ ನಾ. ಮೆಲ್ಲ್ಯಾ ಉಪ್ರಾಂತ್ ಬ್ಯಾಂಡ್ ಆನಿ ವಾಜಪ್. ಉಪ್ರಾಂತ್ ಮೊರ್ನಾಚ್ಯಾ ಪೆಟೆರ್ ಪಡ್ಚೆಂ ಕಿತೆಂ, ರಡ್ಚೆಂ ಕಿತೆಂ! ಉಪ್ರಾಂತ್ ಥೊಡ್ಯಾಂನಿ ಸಾಂಗ್ಚೆಂಯಿ ಆಸ್ತಾ - "ಆಮ್ಕಾಂ ಸಾಂಗಾನಾಸ್ತಾನಾ ಗೆಲೊಯ್‍ಮೂ???" ತಾಕಾ ಮೊರ್ತಾ ಮ್ಹಣೊನ್ ಕಳಿತ್ ಆಸ್ಲ್ಯಾರ್ ನಂಯ್‍ಗೀ ತಾಣೆ ತುಮ್ಕಾಂ ಸಾಂಗ್ಚೆಂ??????

ಉಪ್ರಾಂತ್ ಸುರು ಜಾತಾ ಕಿತೆಂ ಉತ್ರಾಂಚೊ ಶ್ರಂಗಾರ್, ಕಿತೆಂ ಮಿಟಿಂಗಾಂ, ಕಿತೆಂ ಭಾಷಣಾಂ, ಆನಿ ಫೇಸ್‍ಬುಕ್, ವಾಟ್ಸಾಪಾಚೆರ್ ದುಖಾಂಚೊ ಸಾಗೊರ್ ಸಾಂಗ್ಚೊಚ್ ನಾಕಾ. ಕಿತ್ಲೊ ಬೊರೊ ಮನಿಸ್ ಸಾಯ್ಬಾ, ಖಂಯ್ ಮೆಳ್ಳ್ಯಾರಿ ತಾಕಾ ಉಲಯ್ಜಾಯ್, ಕಸಲಿ ಗರ್ಜ್ ಪಡ್ಲ್ಯಾರಿ, ರಾತ್ ಜಾಂವ್ದಿ - ದೀಸ್ ಜಾಂವ್ದಿ ತೊ ತಯಾರ್. ಇಲ್ಲೊ ಸೊರೊ ಪಿಯೆತಾಲೊ ಮ್ಹಳ್ಳೆಂ ದುರ್ಸೊಣೆ, ಸಾಂಗಾತಾಚ್ಚ್ ಸೊರೊ ಕೋಣ್ ಪಿಯೆನಾ ಮ್ಹಳ್ಳೊ ಸಯ್ಲಾಪ್. ಬರೊ ಮನಿಸ್, ಅಶೆಂ ಜಾಂವ್ಕ್ ನಜೊ ಆಸ್‍ಲ್ಲೆಂ....

ಹೆಂ ಸರ್ವ್ ಪಳೆವ್ನ್ ಸರ್‌ಲ್ಲ್ಯಾ ವ್ಯಕ್ತಿಚೊ ಅತ್ಮೊ ಅಶೆಂ ಚಿಂತ್ತಾಗೀ ಮ್ಹಣೊನ್ :

ಕೆದ್ನಾಂ ಮ್ಹಜೆಂ ಮರಣ್ ಜಾತಾ
ತವಳ್ ಮ್ಹಜ್ಯಾ ಆಂಗಾರ್ ಪಡೊನ್
ಪರತ್ ಪಾಟಿಂ ಯೆ
ಮ್ಹಣೊನ್ ಬೊಬಾಟ್ಚಿಂ ಹಿಂ
ಹಾಂವ್ ಜೀವಂತ್ ಆಸ್ತಾನಾ
ಮ್ಹಜೊ ವಿಚಾರ್ ಕರುಂಕ್
ಮ್ಹಜೆ ವಿಶಿಂ ದೋನ್ ಬೊರೆ ಸಬ್ದ್ ಉಲಂವ್ಕ್
ಹಾಂಚಿ ಜೀಬ್ ಕಿತ್ಯಾಕ್ ಫಾತೊರ್ ಜಾವ್ನ್ ಗೆಲ್ಲಿ????

ಸಗ್ಳೆ ಮನಿಸ್ ಹ್ಯಾಚ್ಚ್ ಕಾಸ್ತಾಚ್ಯೆ ಮ್ಹಣೊಂಕ್ ಜಾಯ್ನಾ. ಸಂಸಾರಾಂತ್ ಜಾಯ್ತೆ ಮನಿಸ್ ಬೊರೆ ಆಸಾತ್. ತಾಕಾ ಪೂರಕ್ ಜಾವ್ನ್ ಜಾಯ್ತಿಂ ನಿದರ್ಶನಾಂ ಆಮ್ಕಾಂ ಪಳೆಂವ್ಕ್, ವಾಚುಂಕ್ ಮೆಳ್ತಾತ್. ಥೊಡ್ಯಾ ತೆಂಪಾ ಆದಿಂ 83 ವರ್ಸಾಂಚೊ ರತನ್ ಟಾಟಾ, ತಾಚ್ಯಾ ದಪ್ತರಾಂತ್ ಸಬಾರ್ ವರ್ಸಾಂ ಕಾಮ್ ಕರುನ್, ಆತಾಂ ರಿಟಾಯರ್ಡ್ ಜಾವ್ನ್ ಪಾಟ್ಲ್ಯಾ ದೋನ್ ತೀನ್ ವರ್ಸಾಂ ಥಾವ್ನ್ ಭಲಾಯ್ಕಿ ವಿಶೇಷ್ ಪಾಡ್ ಜಾಲ್ಲ್ಯಾ ತಾಚ್ಯಾ ಎಕಾ ಕಾಮೆಲಿಚಿ ಖಬರ್ ಆಯ್ಕೊನ್, ಮುಂಬಯ್ ಥಾವ್ನ್ ಪೂನಾ ತಿಕಾ ಮೆಳೊಂಕ್ ತಿಚ್ಯಾ ಘರಾ ಗೆಲೊ. ಅಸಲ್ಯಾ ಮನ್ಶಾಪಣಾಕ್ ತುಮಿಂ ಕಿತೆಂ ಮ್ಹಣ್ತಾತ್?

2016 ವ್ಯಾ ವರ್ಸಾ ಬಾಹ್ರೆಯ್ನಾಚೊ ರಾಯ್‍ಭಾರಿ (Diplomat) Khalid Bin Ahmed Al Khalifa, ಆಪುಣ್ ಲ್ಹಾನ್ ಆಸ್ತಾನಾ ಆಪ್ಣಾಚಿ ವಿಶೇಷ್ ರಿತಿನ್ ಚಾಕ್ರಿ ಕರುನ್ ಮೋಗ್ ದಿಲ್ಲ್ಯಾ 93 ವರ್ಸಾಂಚ್ಯಾ ಕಾರ್ಮಿಣ್ ಬಾಯೆಕ್ ಭೆಟ್ ದಿಂವ್ಚ್ಯಾ ಖಾತಿರ್ ಮಂಗ್ಳೂರ್ ಪಾವ್‍ಲ್ಲೊ. 35 ವರ್ಸಾಂ ಆದಿಂ ಕಾರ್ಮಿಣ್ ಬಾಯ್ ಬಾಹ್ರೇಯ್ನಾಕ್ ಪಾವ್ತಾನಾ ತೊ ಜಲ್ಮೊಂಕ್ ಸಯ್ತ್ ನಾತ್‍ಲ್ಲೊ ಖಂಯ್. "ತಿ ಮ್ಹಜೊ ಪೋಸ್ ಕೆಲ್ಲಿ ಆವಯ್. ತಿಚೊ ಉಪ್ಕಾರ್ ಆಟಂವ್ಕ್ ಹಾಂವ್ ಆಯ್ಲಾಂ" ಅಶೆಂ ತೊ ಮ್ಹಣಾಲೊ. ಹ್ಯಾ ಉಪ್ಕಾರ್ ಆಟೊವ್ಣೆಕ್ (Gratitude) ತುಮಿಂ ಕಿತೆಂ ಮ್ಹಣ್ತಾತ್????

ಜಾಯ್ತೆ ಸಂಬಂಧ್ ತುಟೊನ್ ಗೆಲೆ, ಜಾಯ್ತಿಂ ಮೊಗಾಚಿಂ ಮನ್ಶಾಂ ಆಮ್ಕಾಂ ಸಾಂಡುನ್ ಗೆಲಿಂ. ಆಮ್ಚ್ಯಾ ಗರ್ಜಾಂಕ್ ಪಡ್‍ಲ್ಲಿಂ, ಆಮ್ಚಿ ಚಾಕ್ರಿ ಕೆಲ್ಲಿಂ, ಆಮ್ಕಾಂ ಮೋಗ್ ದಿಲ್ಲಿಂ, ಆಮಿಂ ತಾಂಚೊ ಉಪ್ಕಾರ್ ಭಾವುಡ್ಚ್ಯಾ ಆದಿಂಚ್ ಆಮ್ಚೆ ಥಾವ್ನ್ ತಿಂ ಪಯ್ಸ್ ಪಾವ್ಲ್ಯಾಂತ್. ಅಶೆಂ ಆಸ್ತಾಂ, ಆತಾಂ ತರೀ ಆಮ್ಚೆ ದೊಳೆ ಉಗ್ತೆ ಜಾಂವ್ದಿತ್. ಆಮ್ಚೊ ಮೊಸೊರ್, ನಿರ್ಲಕ್ಷಾ ಆನಿ Ego ಪಯ್ಸ್ ವಚೊಂದಿ. ಏಕ್ ಬೊರೆಂ ಉತಾರ್ ಆಮ್ಚ್ಯಾ ಜಿಬೆರ್ ವ್ಹಾಳೊಂದಿ.

ಆಮ್ಚ್ಯಾ ಘರಾಂನಿ, ಫಿರ್ಗಜಾಂನಿ, ಧಪ್ತರಾಂನಿ, ಆಸ್ಪತ್ರ್ಯಾಂನಿ ವಾ ಸಮಾಜೆಂತ್ ಆಮ್ಚ್ಯಾ ಗರ್ಜೆಕ್ ಪಡ್‍ಲ್ಲೆ ಕಿತ್ಲೆಶೆ ಮನಿಸ್ ಆಸಾತ್. ತಾಂಚೊ ಉಪ್ಕಾರ್ ಭಾವುಡ್ಚೊ ಪ್ರಯತ್ನ್ ಕರ್ಯಾಂ. 'ತುಕಾ ಅಭಿನಂದನ್, ತುಜಿ ತಿ ಸವಯ್ ಮ್ಹಾಕಾ ಬೊರಿ ಲಾಗ್ತಾ, ತುಜೊ ತೊ ಗೂಣ್ ಮ್ಹಾಕಾ ಪಸಂದ್ ಜಾತಾ, ತುಜ್ಯಾ ತ್ಯಾ ವಾವ್ರಾ ಖಾತಿರ್ ಮಜೊ ತುಕಾ ಸಲಾಮ್' ಅಸಲಿಂ ಉತ್ರಾಂ ಆಮಿಂ ತಾಂಕಾ ಸಾಂಗ್ಯಾ.

ತುಮ್ಚೆಂ ಏಕ್ ಉತರ್ ತ್ಯಾ ವ್ಯಕ್ತಿಕ್ ಅಪಾರ್ ಖುಶಿ ದೀಂವ್ಕ್ ಸಕ್ತಾ ತರ್ ಆಮಿಂ ಕಿತ್ಯಾಕ್ ತಾಣಿಂ ಮೊರೊಂಕ್ ವಾ ಗಾಂವ್ ಸೊಡುನ್ ವಚೊಂಕ್ ರಾಕ್ಚೆಂ??? ರೂಕ್ ಜಾವ್ನ್ ಕಿತ್ಲ್ಯಾ ಜಣಾಂನಿ ಆಮ್ಕಾಂ ಸಾವ್ಳಿ ದಿಲ್ಯಾ, ತಾಂಕಾಂ ಇಷ್ಟ್ ಜಾವ್ನ್ ಸಾಂಗಾತ್ ದಿವ್ಯಾಂ. ದೋನ್ ಉತ್ರಾಂ ಬೊರಿಂ ಉಲವ್ನ್ ಖುಶಿ ಕರ‍್ಯಾಂ. ಪಾಲ್ಯಾಂಚೊ ದೀಸ್ ಕೊಣೆ ಪಳೆಲಾ?

ಜರ್ ಲ್ಹಾನ್ ಭುರ್ಗಿಂ ಆಸ್ತಾನಾ ಟಿಚೆರಿನ್ Good, ತುಂ ಹುಶಾರ್ ಜಾತಾಯ್ ಮ್ಹಣೊನ್ ಪಾಟ್ ಥಾಪ್ಡುತಾನಾ ಕಿತ್ಲಿ ಖುಶಿ ಜಾತಾ!!!! ಜಿವಿತಾಂತ್ ಆಮ್ಚೆಂ ಕಾಳಿಜ್ ಭುರ್ಗ್ಯಾಂಪರಿಚ್ಚ್. ಜೀವಂತ್ ಆಸ್ತಾನಾ ತಾಂಚಿಂ ಖೆಳ್ಕುಳಾಂ ಕರ್ಚಿಂ, ದುರ್ಸೊಂಚೆಂ, ಖೊಡಿ ಕಾಡ್ಚೆಂ, ವಾಯ್ಟ್ ಉಲೊಂವ್ಚೆಂ... ಮೆಲ್ಲ್ಯಾ ಉಪ್ರಾಂತ್ ತಾಕಾ ಫುಗಾರ್ಚೆಂ ಕಿತ್ಲೆಂ ಸಾರ್ಕೆಂ?????

ಆಜ್ ಜೀವಂತ್ ಆಸ್ತಾನಾ ಘೊವ್ ಬಾಯ್ಲಾಂ ಮಧೆಂ, ಆವಯ್ ಭುರ್ಗ್ಯಾಂ ಮಧೆಂ, ಇಷ್ಟಾಂ ಮಧೆಂ, ಫಿರ್ಗಜ್‍ಗಾರಾಂ ಮಧೆಂ, ಜಿಣ್ಯೆಂತ್ ಭೆಟ್‍ಲ್ಲ್ಯಾ ವಿವಿಧ್ ಮನ್ಶಾಂ ಮಧೆಂ ಅಸಲ್ಯಾ ಏಕ್ ವಿಶಾಲ್ ಮನೋಭಾವಾಚಿ ಗರ್ಜ್ ಆಸಾ. ವೇಳ್ ಉತ್ರೊನ್ ವೆಚ್ಯಾ ಪಯ್ಲೆಂ ಸಾರ್ಕೊ ನಿರ್ಧಾರ್ ಕರ್ಚೊ ಬೊರೊ. ಮೆಲ್ಲ್ಯಾ ಉಪ್ರಾಂತ್ ಪಶ್ಚಾತ್ತಾಪ್ ಕರುನ್, ರಡೊನ್ ಆನಿ ಬೊರಿ ಹೊಗ್ಳಿಕ್ ಉಚಾರ್ನ್ ಕಿತೆಂ ಫಾಯ್ದೊ?

Tags:  Dayan Dsouza, Daiji Dubai, Gratitude, Thanks Giving, Konkani, Mangalore, Mangalorean, Mother Tongue

17 Comment/s.

  1. Wilson D'Souza, mortgage.wilson@gmail.com
    Hi Dayan Good article and this is todays reality , in my opinion its not the childern fault. Every parent should take ownership of this problem.Thank you very much for taking time to write this and God Bless you. Sincerely Wilson
  2. Clifford Pinto , Mangalore
    Very true! Excellent article and good learning! This is what happens when one is not practical.
  3. Diana, Dubai
    Very Nice Article.
  4. Vivian Fernandes, Dubai
    ಅನ್ಯೆಕ್ ಬಿಗ್ರಿಸಾಂವ್ ಕ್ರಿಸ್ತಾಂವ್ ಕುಟ್ಮಾಂನಿ ದಿಸೊಂನ್ ಯೆಂವ್ಚೆ ಬುರ್ಗ್ಯಾಂಕ್ ಕೊಂಕ್ಣಿ ಉಲಯ್ಲ್ಯಾರ್ ತಾಂಚಿ ಪ್ರತಿಶ್ಟ ಉಣೆಂ ಜಾತಾ ಮ್ಹಳ್ಳೆ ಬಿಯೆ.ಡಯಾನ್ ಅತೀ ಉತ್ತಮ್ ಲೇಕನ್. ಸಾರ್ವ್ ಕ್ರಿಸ್ತಾಂವ್ ಘರಾಂನಿ ಪಾವೊಂದಿ ಸ್ಪೆಶಾಲಿ ಗಲ್ಫಾಚಾ.
  5. Glany Fernandes, Mangalroe/Dubai
    ದೇವ್ ಬರೆಂ ಕರುಂ ಮೊಗಾಳ್ ಡಯಾನ್ ತುಮ್ಕಾಂ, ಜಿವಿತಾಂತ್ ವ್ಹಡ್ ವ್ಹಡ್ ಆಶೆತೆಲ್ಯಾಂಕ್ ಮುಕಾರ್ ಕಿತ್ಲೆಂ ವ್ಹಡ್ ರಕೊನ್ ಅಸ್ತಾ ಮ್ಹಳ್ಳೆಂ ಮನದಟ್ಟ್ ಜಾಲೆಂ. ಕನ್ನಡಚಿ ಗಾದ್ "ದೂರದ ಬೆಟ್ಟ ನುಣ್ಣಗೆ" ಹೆಂ ಅದ್ಲ್ಯಾನಿಂ ಸಂಗ್ಲೆಲೆಂ ಸತ್ ಜಾವ್ನಾಸಾ. ವಿಪರ್ಯಾಸ್ ಕಿತೆಂಗೀ ಮ್ಹಳ್ಯಾರ್ ಅತಾಂಚ್ಯಾ ಕುಟ್ಮಾಂಕ್ ಬುರ್ಗ್ಯಾಂಚಿಚ್ ವ್ಹಡ್ ಖಂತ್ ಆನಿ ತ್ಯಾ ಖಂತಿ ಪಾಟ್ಲ್ಯಾನ್ ಆಮ್ವೆಂ ಜಿವಿತ್ ಜಿಯೆಂವ್ಕ್ ಅಮಿಂ ವಿಸ್ರತಾಂವ್.
  6. Melwin Kalakul, Dubai/allipade
    ಹೆಂ ನಿಜಾಯ್ಕಿ ಕಥೆ ಅಲ್ಲಾ ಜೀವನ. ... ಅಕ್ರೆಕ್ ಮಾತ್ರ್ ವ್ಯಥೆ ಜಾತಾ ,ಮಾಗಿರ್ ಪಶ್ಚಾತಾಪ್ ಕರ್ನ್ ಕಿತೆಂ ಪಾಯ್ದೊ...ಡಯಾನ್ ಸರ್ "ಉಗ್ಡಾಸಾಚ್ಯಾ ಸೊದ್ಣೆರ್ " ಲೇಖನ್ ಖೂಬ್ ಆವಾಡ್ಲೆಂ....
  7. Vivian, Dubai
    ಅಮ್ಕಾಂ ಪುಂಜಾಯ್ಲ್ಯಾರೀ ತೃಪ್ತಿ ಮ್ಹಳ್ಳಿ ಮೆಳಾನಾ, ಕಿತ್ಯಾಕ್ ತಾಕಾ ಅಂಗಲಾಪ್ ಚಡ್. ಬೋವ್ ಅಫುರ್ಬಾಯೆಚೆಂ ಲೆಖನ್. ಅಮ್ಚ್ಯಾ ಒಪಿಸಾಂನಿ ಹ್ಹೆಂ ಪಳೆಂವ್ಕ್ ಮೆಳ್ತಾ. ೫೦ ಉಪ್ರಾತಿಂ ಮನ್ಯಾಂಕ್ ಪಯ್ಸ್ಯಾಂತ್ ತ್ರಾಪ್ತಿ ಮೆಳ್ನಾ ಥರ್ ಅನೆಕ್ಲ್ಯಾಕ್ ಕಾಮಾಕ್ ಖಂಯ್ ಥಾವ್ನ್ ಅವ್ಕಾಸ್ ಮೆಳ್ಚೊ?
  8. Vincy Pinto, Angelore
    ಡಯಾನಾನ್ ಬರಯ್ಲಿ ಕಾಣಿ ನ್ಹಂಯ್, ಜಾಯ್ತ್ಯಾ ಪರ್ಗಾವಿ ಜೊಡ್ತೆಲ್ಯಾಚಿ ಹೊರ್ಬೊಸಾಚಿ ಜಿಣಿ. ಗಾಂವಾಂತ್ ರಾವೊನ್ ಕರ್ಚೆಂ ಕಿತೆಂ ? ಮಾತಿ ಖಾಂವ್ಚಿಗೀ ಮ್ಹಣ್ತೆಲ್ಯಾಂಕ್..ನಿಮಾಣೆ ಗಾಂವ್ಚಿ ಮಾತಿಚ್ ಫಾವೊ ಜಾತಾ.
  9. Arthur G Aranha, aranhaag@yahoo.com
    Dear Dayan, Your flair for writing in Konkani is well known. This article on self health based on daily happenings is very meaningful and helpful. Keep it up !
  10. Walter Lasrado, Mumbai 400095
    Very good article. Eye opener.
  11. Austin Prabhu, Chicago
    ಮೊಗಾಳ್ ಡಯಾನ್, ಬರಯ್ತ್ ರಾವ್. ತುಜ್ಯಾ ಮತಿಂತ್ಲಿ ಜಾಣ್ವಾಯ್ ಹೆರಾಂಕ್ ವಾಂಟುನ್ ತಾಂಚೆಂ ಜೀವನ್ ನಂದನ್ ಜಾಂವ್ಚ್ಯಾ ಕಾರ್ಯಾಕ್ ಹಾಂವ್ ಜಯ್ತ್ ಆಶೇತಾಂ.
  12. Ronald Monteiro, Bondel/Canada
    ಡಯಾನ್ ಹೆ೦ ತುಜೆ೦ ಬೋವ್ ಬೊರೆ೦ ಚಿ೦ತಾಪ್. ಆದ್ಲ್ಯಾ ಕಾಲಾರ್ ಚಡ್ತಾವ್ ಲೋಕ್ ಸಾಗ್ವಳೆಚೆ೦ ಕಾಮ್ ಕರ್ತಾಲೊ. ದಪ್ತರಾ೦ತ್ ಕಾಮ್ ಕರ್ಚೊ ಉಣೊ. ಚಡ್ತಾವ್ ಮನಿಸ್ ಭಲಾಯ್ಕೆ೦ತ್ ಅಸ್ತಾಲೆ. ವಾಹನಾ ಉಣಿ ಆಸ್ಲಿ೦. ಲೋಕ್ ಚಲ್ತಾಲೊ. ಆತಾ೦ ಹರ್ಯೆಕ್ಲ್ಯಾಚಾ ಘರಾ ಏಕ್ ವಾಹನ್ ಅಸಾಚ್. ಚಲ್ಚೆ೦ ಉಣೆ೦ ಜಾಲಾ೦. ಹರ್ಯೆಕಾ ವ್ಯೆಕ್ತಿನ್ ಚಿ೦ತಿಜಾಯ್ ಜಾಲ್ಲೊ ವಿಶಯ್ ಹ್ಯಾ ಅ೦ಕಣಾಚೆರ್ ಪಿ೦ತ್ರಾಯ್ಲಾಯ್. ತುಕಾ ಶಾಬಾಸ್ಕಿ ಪಾವೊ.
  13. Gerry D'Mello, Bendur / Canada
    ಡಯಾನ್ ಡಿಸೊಜಾ ಮುಕಾಮಾರ್ ತುಜ್ಯಾ ತಿಂತೆರಾಥಾವ್ನ್ ಉದೆಲ್ಲೆಂ ಹೆಂ ನವೆಂ ಅಂಕಣ್ "ಉಗ್ಡಾಸಾಚ್ಯಾ ಸೊದ್ನೆರ್" ಹಾಚೊ ಪಯ್ಲೊ ಆಂಕ್ದೊ ವಾಚುನ್ ಸಂತೊಸ್ಲೊಂ. ಕೊಂಕ್ಣೆಚ್ಯಾ ಹರ್ಯೇಕ್ ಪ್ರಕಾರಾನಿಂ ತುವೆಂ ಕೆಲ್ಲೆಂ ಸಾಧನ್ ಹೊಗ್ಳಿಕೆಚೆಂ. ತುಜ್ಯಾ ಸರ್ವ್ ಮುಕ್ಲ್ಯಾ ಕೊಂಕ್ಣಿ ವಾವ್ರಾಕ್ ಯಶ್ ಆಶೆತಾಂ!
  14. CLARENCE PINTO, muscat
    ಡಯಾನ್ ಡಿ ಸೊಜಾಚೆಂ ನವೆಂ ಅಂಕಣ್ ವಾಚುನ್ ಖುಶಿ ಜಾಲಿ. ಡಯಾನ್ ಏಕ್ಲೊ ಬರೊ ಉಲವ್ಪಿ ಆನಿಂ ನಾಟಕಿಸ್ತ್. ಥೊಡ್ಯಾ ಯಶಸ್ವಿ ನಾಟಕಾನಿಂ ತಾಣೆಂ ಕೆಲ್ಲೆ ಥೊಡೆ ಪಾತ್ರ್ ಆಜೂನ್ ಮ್ಹಜ್ಯಾ ಉಡಾಸಾಂತ್ ಆಸಾತ್. ತಾಚ್ಯಾ ಮುಕೆಲ್ಪಣಾ ಖಾಲ್ ಜಾಲ್ಲಿಂ ಕಾರ್‍ಯಿಂ ಭಾರಿಚ್ಚ್ ಯಶಸ್ವಿ ಜಾಲ್ಯಾಂತ್ ಮ್ಹಣ್ ಹಾಂವೆಂ ಆಯ್ಕಾಲಾಂ.
  15. Sannu Niddodi, Dubai
    "ಪಿಡಾ ಅಸೊಂ ಯಾ ನಾಸ್ತಾನಾ ರಾವೊಂ ಪುಣ್ ಭಲಾಯ್ಕೆ ಸಾಂಬಾಳ್ಣೆಚಿ ಧನಾತ್ಮಕ್ ಚಿಂತಾಪ್ ಅಸ್ಚೆಂ ಹರ್ಯೆಕ್ ವೆಕ್ತಿಕ್ ಫಾಯ್ದ್ಯಾಚೆ ಜಾವ್ನಾಸಾ" ಏಕ್ ಬರೆಂ ಚಿಂತಪ್ ಆನಿ ಸರ್ವಾನಿಂ ವಾಚುಂಕ್ ಜಾಯ್ ಜಾಲ್ಲೆಂ ಲೇಖನ್......
  16. Shanthi Lewis, Vamanjoor
    Ho... Dayan Dattu is back! I really surprised to read his article. Well written. Great.
  17. Marcel Pinto, Moodubelle
    ಹಾಂವ್ ಡಯಾನಾಚೊ ಬೋವ್ ವ್ಹಡ್ಲೊ ಅಭಿಮಾನಿ. ತಾಚೆಂ ಲೇಖನ್ ವಾಚುನ್ ಭಾರಿಚ್ ಖುಶಿ ಜಾಲಿ. ಡಯಾನ್, ಬರಂವ್ಚೆಂ ರಾವಯ್ ನಾಕಾ.

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE