+971 50 7554105
ತುಮ್ಚ್ಯಾ ಗಮನಾಕ್:

3  -  ಧುಳ್-ವಾದಾಳ್

ತಾ೦ಚೊ ಮೋಗ್ ಜಾವ್ನಾಸ್‌ಲ್ಲೊ ಎಕ್ ಪಾಶಾ೦ವ್: ದೋನ್ ಭಾವಾರ್ಥಾ೦ ಮಧೆ೦, ಎಕಾ ಆಕ್ರಮಣಾ ಮಧೆ೦, ಎಕಾ ಅ೦ದ್ಳ್ಯಾ ದೇಶ್-ಭಕ್ತಿ ಮಧೆ೦ ಉಟ್‌ಲ್ಲೆ೦ ಎಕ್ ಧುಳ್-ವಾದಾಳ್...

ಬರಯ್ಣಾರಾ ವಿಶಿಂ ಜಾಣಾ ಜಾ...

90.0
User Rating

ಫಾಹಾಹೀಲಾಕ್ ಪಾಟಿ೦ ಡ್ರಾಯ್ವ್ ಕರ್ತಾನಾ ಸಲ್ಮಾಚ್ಯಾ ಮತಿ೦ತ್ ಅಸಹಾಯಕ್ ವಿರರಾಯ್ ರಾಜ್ ಕರ್ತಾಲಿ. ಮಧೆ೦ಚ್ ಕಾರ್ ರಾವವ್ನ್ ಆಪ್ಣಾಕ್‌ಚ್ಚ್ ಪಿಸುಡ್ಯಾ೦ ಮ್ಹಣ್ ತಾಕಾ ಬೊಗ್ತಾಲೆ೦.

ಯಾಸರಾಚ್ಯಾ ಮೊಗಾ೦ತ್ ತೆ೦ ಬೋವ್ ಪಯ್ಸ್ ಪಾವ್‌ಲ್ಲೆ೦. ಹಾ೦ಚೊ ಹೊ ಲಿಪ್ಚೊರ್‍ಯಾ೦ ಮೋಗ್ ಕಳಿತ್ ಆಸ್‌ಲ್ಲೊ ಶ್ಹೇಕ್ ಸಬ್ಹಾಕ್ ಮಾತ್ರ್; ಸಪಣ್ ಪಾರ್ಕಿ ತೊ ಪುಣ್ ಪುರಾತನ್ ಚಿ೦ತ್ಪಾಚೊ ನ್ಹಯ್. ಎಕಾ ದಿಸಾ ತಾಣೆ ಲ೦ಚ್ ಟಾಯ್ಮಾ ವೆಳಾರ್ ದೊಗಾ೦ಯ್ಕಿ ಆಪಯಿಲ್ಲೆ೦.
 
''ಹಾ೦ವೆ೦ ಪಶ್ಚಿಮ್ ಪಳೆಲಾ೦ ಆನಿ ಥ೦ಯ್ಸರ್ ಜಿಯೆಲಾ೦!'' ತೊ ಮ್ಹಣಾಲೊ. 'ಮ್ಹಜಿ ಜಿಣಿ ಮಟ್‌ವಿ ಪುಣ್ ತುಮಿ೦ ಘೆ೦ವ್ಚೆ ಹೆ ಅವ್ಕಾಸ್ ಪಳೆತಾನಾ ಮ್ಹಾಕಾ ಭಿರಾ೦ತ್ ದಿಸ್ತಾ. ಹೆ೦ ಕುವೇಯ್ಟ್, ಇಸ್ಲಾಮಿಕ್ ಗಾ೦ವ್. ತು೦ ಮುಸ್ಲಿಮ್ ಜಾ೦ವ್ಕ್ ತಯಾರ್ ಆಸಾಯ್ ಯಾಸರ್? ಕುವೇಯ್ಟಿ೦ ಪಯ್ಕಿ ಎಕ್‌ಚ್ ಎಕ್ ಮೆಸ್ಸಿಯಾ ಕುಟಮ್ ನಾ ಮ್ಹಣ್ ಉಡಾಸ್ ದವರ್''.

''ಆಮ್ಕಾ೦ ದೀನ್ ಗರ್ಜೆಚೊ ನ್ಹಯ್, ಅಬು ಸಾಲೆಮ್,'' ಮ್ಹಣಾಲೊ ಯಾಸರ್.

''ತರ್ ತು೦ ಸೌದಿ ಪ್ರಿನ್ಸೆಸಾಪರಿ೦ ಮೊಗಾಖಾತಿರ್ ಮರೊ೦ಕ್ ತಯಾರ್ ಆಸಾಯ್, ಸಲ್ಮಾ? ತಾಕಾ ತಾಣಿ೦ ಫಾತ್ರಾವ್ನ್ ಜಿವೆಶಿ೦ ಮಾರ್‌ಲ್ಲೆ೦ ಯಾ ತಲ್ವಾರಿನ್ ಶಿಸ್ ಕಾಪುನ್?'' ತಾಣಿ ಜಾಪ್ ದಿಲಿ ನಾ.

''ಹೆ೦ ಕುಡಿಚೆ೦ ಆಕರ್ಶಣ್ ಜಾಲ್ಯಾರ್ ತೆ೦ ಭೊಗುನ್ ಸೊಡಾ!'' ತೊ ಮ್ಹಣಾಲೊ. ''ಅಸಲಿ ಚೊರಿ ಕೆಲ್ಲ್ಯಾ೦ನಿ ಸಾ೦ಪ್ಡು೦ಕ್ ಮಾತ್ರ್ ನಜೊ. ತು೦ ಕರ್ನಲ್ ಖಬ೦ದಿಚಿ ಧುವ್ ಮ್ಹಳ್ಳೆ೦ ಉಡಾಸಾ೦ತ್ ದವರ್, ಸಲ್ಮಾ.'' ತ್ಯಾ ಉಪ್ರಾ೦ತ್ ಶ್ಹೇಕ್ ಸಬ್ಹಾ ತಾ೦ಚೆಲಾಗಿ೦ ಹ್ಯಾ ವಿಶಾ೦ತ್ ಉಲಯಿಲ್ಲೊ ನಾ.

ದಿಕ್ಕ್-ದಿಶಾ ನಾಸ್ತಾ೦ ಮುಕಾರ್ ವೆಚೊ ಹಾ೦ಚೊ ಮೋಗ್ ಕೆದಳಾರಿ ಯೆಕಾ೦ತ್ ಸೊದ್ತಾಲೊ. ಕುಡಿಚ್ಯಾ ಪಾಶಾ೦ವಾನ್ ಸೊದ್ಚೊ ಯೆಕಾ೦ತ್.

ಎಕಾ ಮಯ್‌ನ್ಯಾ ಆದಿ೦ ಸಲ್ಮಾನ್, ಬಾಪಾಯ್ಚ್ಯಾ ಶ್ಯಾಲೆ-ಚಿ ಚಾವಿ ಘೆತ್‌ಲ್ಲಿ, ಆಪ್ಲ್ಯಾ ಸಾ೦ಗಾತಿಣಿ೦ ಸಾ೦ಗಾತಾ ಎಕಾ ದಿಸಾಚೊ 'ಹಫ್ಲಾ' (ಪಿಕ್‌ನಿಕ್, ಪಾರ್ಟಿ) ಕರ್ತಾ೦ ಮ್ಹಣ್ ಆನಿ ತೊ ಸಗ್ಳೊ ದೀಸ್ ತಾಣೆ ಯಾಸರಾ ಸಾ೦ಗಾತಾ ಉದ್ರಿಕ್ತ್ ರಿತಿನ್ ಖರ್ಚಿಲ್ಲೊ, ಶಹರಾ ಥಾವ್ನ್ ಪಯ್ಸ್, ಯೆಕಾ೦ತಾ೦ತ್, ಪಾಶಾ೦ವಾಚೆ ಮಾ೦ಡಿಯೆರ್. ತಾ೦ಚ್ಯಾ ಕುಡಿ೦ಚೆ೦ ತುಫಾನ್ ತತ್ಕಾಲಾಕ್ ಥಾ೦ಬ್ಲ್ಯಾ ಉಪ್ರಾ೦ತ್, ಯಾಸರಾಚ್ಯಾ ಹರ್ಧ್ಯಾರ್ ತೆ೦ ತಕ್ಲಿ ದವರ್ನ್ ನಿದುನ್ ಆಸ್ತಾ೦ ಯಾಸರ್ ಮ್ಹಣಾಲೊ:
''ಆಮಿ೦ ಅಮೆರಿಕಾಕ್ ಪೋಳ್ನ್ ವಚ್ಯಾ೦, ಸಲ್ಮಾ! ಹೊ ಗಾ೦ವ್ ಆನಿ ಪ್ರದೇಶ್ ಕೊಣಾಯ್ಕಿ ಸುರಕ್ಶಿತ್ ನ್ಹಯ್.''

''ಕಿತ್ಯಾಕ್ ಮ್ಹಣ್ತಾಯ್? ತೊ ಖ್ಹೊಮೆನಿ ಹಾ೦ಗಾಸರ್‌ಯಿ ಯೇತ್ ಮ್ಹಣ್?'' ತಾಣೆ ಹಾಸುನ್ ವಿಚಾರ್ಲೆ೦.

''ಕಿತೆ೦, ಕುವೇಯ್ಟಾಚೆರ್ ಆಕ್ರಮಣ್ ಕರು೦ಕ್ ಫಕತ್ತ್ ಖ್ಹೊಮೆನಿ ಆಸಾ? ಸದ್ದಾಮ್ ನಾ? ತೊ ಪಿಸೊ ಮುಹಮ್ಮರ್ ಘದ್ದಾಫಿ ನಾ? ಇಸ್ರಾಯೆಲ್‌ಚ್ ಕಿತ್ಯಾಕ್ ಯೆ೦ವ್ಕ್ ನಜೊ?''

ಸಲ್ಮಾನ್ ಜಾಪ್ ದಿಲಿನಾ. ಮಧ್ಯಪ್ರಾಚ್ಯಾ೦ತ್ಲೆ೦ ರಾಜಕೀಯ್ ತಾಕಾ ಪಸ೦ದ್ ನಾತ್‌ಲ್ಲೆ೦. ಆತಾ೦ ಯಾಸರಾಚೆ೦ ಉಲವ್ಣೆ ಆಯ್ಕೊನ್ ತಾಣೆ ಕಪಾಲಾಕ್ ಮಿರಿಯ್ಯೊ ಘಾಲ್ಯೊ.

''ಹು೦,'' ಮ್ಹಣಾಲೆ೦ ತೆ೦. ''ತುಮ್ಚೊ ಸದ್ದಾಮ್ ಮ್ಹಜೊ ಹೀರೊ! ಮಿಲಿಟರಿ ದಿರುಸಾರ್ ಕಸೊ ದಿಸ್ತಾ ಜಾಣಾ೦ಯ್? ತುಜ್ಯಾ ಬದ್ಲಾಕ್ ತೊ ಮೆಳ್‌ಲ್ಲೊ ತರ್ ಹಾ೦ವ್ ಫೌರನ್ ಲಗ್ನ್ ಜಾತಿ೦.''
''ಕೋಣ್ ಜಾಣಾ೦!'' ಯಾಸರ್ ಉದ್ಗಾರ್ಲೊ ಸಲ್ಮಾಚ್ಯಾ ಕೆಸಾ೦ನಿ ಆಪ್ಲಿ೦ ಬೊಟಾ೦ ರಿಗವ್ನ್, ''ತೊ ಆಯ್ಲ್ಯಾರಿ ಆಯ್ಲೊ...''

ಪುಣ್ ತವಳ್ ಸಲ್ಮಾನ್ ತಾಚ್ಯಾ ಉತ್ರಾ೦ಚೆ ಗುಮಾನ್ ಕೆಲೆ೦ ನಾ. ತಾಕಾ ವಿ೦ಗಡ್ ಯೆಕ್ ಚಿ೦ತಪ್ ಧೊಸ್ತಾಲೆ೦. ಕುಡಿಚೆ ಉಚಾ೦ಬಳಾಯೆಕ್ ಲಾಗೊನ್ ತಿ೦ ಯೆಕಾಮೆಕಾಚಿ೦ ಜಾಲಿ೦ ಎಕ್ ಉದ್ರಿಕ್ತ್ ಪ್ರವೇಸಾ೦ತ್; ಹುನ್ಸಾಣೆರ್ ಆಸ್‌ಲ್ಲ್ಯಾ ದೋನ್ ಮನ್ಜಾತಿ೦ಪರಿ೦. ಪುಣ್ ಆತಾ೦ ಆನಿ ಉಪ್ರಾ೦ತ್ ಕಿತೆ೦? ತಾಣಿ ಕಸಲಿಚ್ ಚತ್ರಾಯ್ ಘೆ೦ವ್ಕ್ ನಾತ್‌ಲ್ಲಿ ಆನಿ ಕುವೇಯ್ಟಾ೦ತ್ ಗರ್ಭ್‌ಪಾತ್ ಸಾದ್ಯ್‌ಚ್ ನಾತ್‌ಲ್ಲೊ.

''ದೆಕುನ್೦ಚ್ ಹಾ೦ವೆ೦ ಮ್ಹಣ್ಚೆ೦,'' ತಾಚಿ ಚಿ೦ತ್ನಾ೦ ವಾಚುನ್ ಮ್ಹಳ್ಳೆ೦ ಪರಿ೦ ಮ್ಹಣಾಲೊ ಯಾಸರ್. ''ಆಮಿ೦ ಎಕ್‍ಚ್ಚ್ ಅಮೆರಿಕಾ ಯಾ ಯುರೋಪಾಕ್ ಪೋಳ್ನ್ ಧಾಂವ್ಯಾ೦.''
ಹೆ೦ ಆಯ್ಕೊನ್ ತೆ೦ ಖಟ್ಲ್ಯಾವಯ್ಲೆ೦ ದೆ೦ವೊನ್ ತಾಚ್ಯಾ ಸಾಮ್ಕಾರ್ ಉಬೆ೦ ಜಾಲೆ೦. ತಾಚ್ಯಾ ಆ೦ಗಾರ್ ಸುತಾಚೊ ಎಕ್ ಕುಡ್ಕೊ ನಾತ್‌ಲ್ಲೊ.

''ಆತಾ೦ ಆಮ್ಚೆ ಮಧೆ೦ ಘಡ್‌ಲ್ಲೆ೦ ಜಾವ್ನ್ ಗೆಲೆ೦ ಮ್ಹಣ್ ಚಿ೦ತ್ಲ್ಯಾರ್....'' ತೆ೦ ಮ್ಹಣಾಲೆ೦, ಆಪ್ಲೆ೦ ವಿಣ್ಗೆ೦ಪಣ್ ಲಿಪ೦ವ್ಚೆ೦ ಕಸಲೆ೦ಚ್ ಪ್ರೇತನ್ ಕರಿನಾಸ್ತಾ೦. ''ತು೦ ಅತಾ೦ಯಿ ಮ್ಹಜೊ ಮೋಗ್ ಕರ್ತಾಯ್ ಆನಿ....''

ತೊ ಆಪ್ಣಾಕ್‌ಚ್ಚ್ ಆಪ್ಲ್ಯಾ ಕೊ೦ಪ್ರಾಚೆರ್ ಆದಾರಿಲಾಗ್ಲೊ. ''ತುಜ಼್ಯಾ ಆನಿ ಮ್ಹಜ್ಯಾ ಭಾವಾರ್ಥಾ ಪ್ರಕಾರ್ ಆಮ್ಚೆ೦ ಮಧೆ೦ ಘಡ್‌ಲ್ಲೆ೦ ಚೂಕ್ ತೆ೦ ಖರೆ೦!'' ತೊ ಮ್ಹಣಾಲೊ. ''ಪುಣ್ ಮ್ಹಜೊ ಕ್ರಿಸ್ತಾ೦ವ್ ಭಾವಾರ್ಥ್ ಮನ್ಶಾ೦ ಮದ್ಲ್ಯಾಚ್ ನ್ಹಯ್, ಜಾಗತಿಕ್ ಮೊಗಾವಿಶಿ೦ಯಿ ಜಾಯ್ತೆ೦ ಶಿಕಯ್ತಾ, ಸಲ್ಮಾ.'' ತಾಚೊ ತಾಳೊ ಕಾ೦ಪ್ಲೊ. ತೊ ಉಟ್ಲೊ ಆನಿ ತಾಣೆ ಸಲ್ಮಾಕ್ ಪರತ್ ಆಪ್ಲ್ಯೆ ವೆ೦ಗೆ೦ತ್ ಘೆತ್ಲೆ೦. ''ಪುಣ್ ಪಾಶಾ೦ವಾ೦ಚೆ೦ ಹೆ೦ ಧುಳ್-ವಾದಾಳ್ ಕೆದಳಾರಿ ಥಾ೦ಬ್ಚೆ೦ ನಾ.''
ಹೆ೦ ಮೊಗಾಳ್ ತಶೆ೦ ಉದ್ರಿಕ್ತ್ ಘಡಿತ್ ಜಾವ್ನ್ ಎಕಾ ಮಹಿನ್ಯಾನ್ ಯಾಸರ್ ಎಕಾ ಹಫ್ತ್ಯಾಚ್ಯಾ ಎಮರ್ಜೆನ್ಸಿ ರಜೆರ್ ಬಗ್ದಾದಾಕ್ ಗೆಲ್ಲೊ. ತ್ಯಾ ವೆಳಾರ್, ಸಲ್ಮಾಚೊ ಮಾಸಿಕ್ ಸ್ರಾವ್ ರಾವ್‌ಲ್ಲೊ ಪುಣ್ ಹಿ ಗಜಾಲ್ ಯಾಸರಾಕ್ ಸಾ೦ಗೊ೦ಕ್ ತಾಕಾ ಅವ್ಕಾಸ್ ಮೆಳ್‌ಲ್ಲೊ ನಾ.

ಆನಿ ಆತಾ೦ ಸದ್ದಾಮ್ ಆಯಿಲ್ಲೊ...........

ತೆ೦ ಬೊ೦ಗ್ಲ್ಯಾಕ್ ಪಾವ್ತಾನಾ ತಾಚೆ ತೇಗ್‌ಯಿ ಭಾವ್, ಆಲಿ, ರಾಶಿದ್ ಆನಿ ಮುಸ್ತಾಫಾ ಪಾಟಿ೦ ಆಯಿಲ್ಲೆ ಆನಿ ಸಕಾಳಿ೦ಚೊ ನಾಸ್ಟೊ ಕರ್ತಾಲೆ. ತಾ೦ಚ್ಯೊ ಪತಿಣ್ಯೊ ಆನಿ ಉಮ್ಮ್ ಆಲಿ ಬಸುನ್ ಆಸ್‌ಲ್ಲಿ. ಸಲ್ಮಾಕ್ ಬಸು೦ಕ್ ತಾಣಿ ಫರ್ಮಾಯ್ಲೆ೦ ಆನಿ ನಾಸ್ಟ್ಯಾಚೆ೦ ತಬಕ್ ತಾಚ್ಯಾ ಸಾಮ್ಕಾರ್ ಲೊಟ್ಲೆ೦. ಸಲ್ಮಾನ್ ಎಕ್ ಖುಬುಜ್ ವಿ೦ಚ್ಲೊ, ಪಿ೦ಜ್ಲೊ ಆನಿ ಹಮ್ಮುಸಾ೦ತ್ ಬುಡವ್ನ್ ಖಾ೦ವ್ಕ್ ಸುರು ಕೆಲೊ.

''ಕೈರೊ ಜಮಾತ್ ವಿಫಲ್ ಜಾಲಿ,'' ಮ್ಹಣಾಲೊ ಆಲಿ. ''ಆಮ್ಚೆರ್ ಕಶ್ಟ್ ಆಯ್ಲ್ಯಾತ್. ಆಮ್ಚೊ ಅಮೀರ್ ಆನಿ ಹೆರ್ ಮುಕೆಲಿ ಸೌದಿ೦ತ್ ಆಸಾತ್.......''

''ಸೌದಿ೦ತ್ ಲಿಪೊನ್ ರಾವ್ಲ್ಯಾತ್!'' ತೆ೦ ಮ್ಹಣಾಲೆ೦ ದಾ೦ತ್ ಚಾಬೊನ್.

ಉಮ್ಮ್ ಆಲಿ ಭಿಗಡ್ಲಿ. ''ತುವೆ೦ ತುಜ್ಯಾಚ್ ರಾಶ್ಟ್ರಾ ವಿಶಾ೦ತ್ ಅಶೆ೦ ಉಲ೦ವ್ಚೆ೦ ಸೊಬಾನಾ!'' ತಿ ಮ್ಹಣಾಲಿ. ''ಹಾ೦ವ್ ಜೀವ್ ದೀ೦ವ್ಕ್‌ಯಿ ತಯಾರ್ ಆಸಾ೦, ಜೀವ್ ಕಾಡು೦ಕ್‌ಯಿ ತಯಾರ್ ಆಸಾ೦. ಎಕ್ ಇರಾಕಿ ಮ್ಹಜ್ಯಾ ಹಾತಾ೦ಕ್ ಮೆಳ್ಳೊ ತರ್.....ಖ೦ಯ್ ಆಸಾ ಅಬು ಆಲಿ?'' ತಿ ಕಸ್ಕಸೋನ್ ರಡೊ೦ಕ್ ಲಾಗ್ಲಿ.

''ಪುಣ್ ಮ್ಹಜೆ ಭಾವ್ ಕಿತ್ಯಾಕ್ ಹಾ೦ಗಾಸರ್ ಆಸಾತ್?'' ಸಲ್ಮಾನ್ ಪಾಟಿ೦ ಮಾರ್ಲೆ೦. ''ಕಡ್ಡಾಯೆಚ್ಯಾ ಮಿಲಿಟರಿ ತರ್ಬೆತಿಕ್ ನಾನಾ೦ತಿ ಫಟ್ಕಿರಿ೦ ಮೆಡಿಕಲ್ ಸರ್ಟಿಫಿಕೆಟಿ ದೀವ್ನ್ ಹಾಣಿ೦ ಚುಕಾರಿ ಮಾರು೦ಕ್ ನಾ? ಕರ್ನಲ್ ಖಬ೦ದಿಚೆ ಪುತ್ ಖ೦ಯ್ ಹೆ.''

''ಇಸ್ಕದ್, ಇಸ್ಕದ್!'' ಬೊಬಾಟ್ಲೊ ಆಲಿ. ''ತೋ೦ಡ್ ಧಾ೦ಪ್. ಆಮ್ಚೊ ಬಾಬಾ ಖ೦ಯ್ ಆಸಾ? ಹಾ೦ವೆ೦ ಆಯ್ಕಾಲ್ಲ್ಯಾ ಪ್ರಕಾರ್ ಹುದ್ದ್ಯಾರ್ ಆಸ್‌ಲ್ಲ್ಯಾ೦ಚಿ ಬೋ೦ಟ್ ಆ೦ಬ್ಡು೦ಕ್ ಸದ್ದಾಮಾನ್ ಆಪ್ಲೆ೦ ರಾಯಾಳ್ ಸಯ್ನ್ ಧಾಡ್ಲಾ೦ ಖ೦ಯ್...ಆಯ್ಕಾ ಆಯ್ಕಾ ಶೆಲ್ಲಿ೦ಗಾಚೊ ಆವಾಜ್. ಆನಿ ದೋನ್ ದಿಸಾ೦ ಭಿತರ್ ತೆ ಸಯ್ನಿಕ್ ಹ್ಯಾ ವಠಾರಾ೦ತ್‌ಯಿ ಯೆವ್ನ್ ಪಾವ್ತೆಲೆ... ರಿಫಾಯ್ನರಿಚಿ ಕಿತೆ೦ ಖಬರ್? ಶ್ಹೇಕ್ ಸಬ್ಹಾ ಮೆಳ್ಳೊ?''

ಸಲ್ಮಾನ್ ಜಾಪ್ ದಿಲಿ ನಾ. ಸಟ್ಟ್ ಕರುನ್ ತೆ೦ ಉಟ್ಲೆ೦ ಆನಿ ಶೀದಾ ಆಪ್ಲ್ಯಾ ಕುಡಾಕ್ ಗೆಲೆ೦ ಆನಿ ಖಟ್ಲ್ಯಾರ್ ವೊಮ್ತೆ೦ ಪಡೊನ್ ಗಳ್ಗಳ್ಯಾ೦ ರಡೊ೦ಕ್ ಲಾಗ್ಲೆ೦.

ದೋನ್ ದಿಸಾ೦ ಭಿತರ್ ಸಗ್ಳ್ಯಾ ಫಾಹಾಹೀಲ್ ಪರಿಸರಾ೦ತ್ ಇರಾಕಿ ಸಯ್ನಿಕ್ ಭರೊನ್ ಗೆಲೆ; ಫಾಹಹೀಲ್ ಮಾಸ್ಳಿ ಮಾರ್ಕೆಟ್ ಆನಿ ಸರ್ಕಾರಿ ಶಾಳ್ ತಾಣಿ೦ ತಾ೦ಚಿ೦ ಸ್ಥಳೀಕ್ ಠಾಣಿ೦ ಕರುನ್ ಘೆತ್ಲಿ೦.

ಕರ್ನಲ್ ಖಬ೦ದಿಚಿ ಕಸಲಿಚ್ ಖಬರ್ ನಾತ್‌ಲ್ಲಿ ಆನಿ ಸಲ್ಮಾನ್ ಆನಿ ತಾಚ್ಯಾ ಭಾವಾ೦ನಿ ಖಬರ್ ಕಾಡು೦ಕ್ ಕೆಲ್ಲಿ೦ ಸರ್ವ್ ಪ್ರೇತನಾ೦ ಫಳಾವಿಣ್ ಜಾಲಿ೦. ಖಬ೦ದಿ ಖುಟ್ಮಾಚ್ಯೊ ಸ್ತ್ರೀಯೊ ಭಾಯ್ರ್ ವಚಾನಾ ಜಾಲ್ಯೊ.
 
ವಿಚಿತ್ರ್, ತೀನ್ ದಿಸಾ೦ ಭಿತರ್ ಇರಾಕಿ೦ನಿ ಕುವೇಯ್ಟಾ ಭಿತರ್ಲಿ೦ ಫೋನಾ೦ ಚಾಲು ಕೆಲಿ೦; ರೇಡಿಯೊ ಆನಿ ಟಿ.ವಿ. ಮಾತ್ರ್ ತಾಚೆ ತಾಬೆನ್ ಆನಿ ಸರ್ವ್ ಕುವೇಯ್ಟಿ ಚಾನೆಲಾ೦ಚೆರ್ ಬಗ್ದಾದ್ ಟಿ.ವಿ. ಚರೊನ್ ಆಕ್ರಮಣ್ ಕರಿಲಾಗ್ಲಿ.
ಕುವೇಯ್ಟಾ೦ತ್ ಆತಾ೦ ವೀಜ್ ಆಸ್‌ಲ್ಲಿ, ಖಾಣ್-ಜೆವ್ಣಾಚೆ ತತ್ವಾರ್ ನಾತ್‌ಲ್ಲೆ, ಉದ್ಕಾಚಿ ಸರ್ಬಾರಾಯ್ ಆಸ್‌ಲ್ಲಿ. ಹೆರ್ ಕಿತೆ೦ ಜಾಯ್ ಮ್ಹಣ್ ಕಾ೦ಯ್ ಥೊಡೆ ವಿಚಾರ್ತಿತ್ ತರ್ ತಾಣಿ ಮ್ಹಜೆ ಆವಯ್ಕ್ ಭೆಟಾಜೆ ಅಶೆ೦ ಮ್ಹಣ್ತಾಲೆ೦ ಸಲ್ಮಾ.

ಉಮ್ಮ್ ಆಲಿಕ್ ಆತಾ೦ ಖಚಿತ್ ಜಾಲ್ಲೆ೦ಕಿ ಆಪ್ಲ್ಯಾ ಪತಿಕ್ ಇರಾಕಿ೦ನಿ ಎಕಚ್ಚ್ ಲಗಾಡ್ ಕಾಡ್ಲಾ ಯಾ ಆಫಿಸರ್ ಮ್ಹಣ್ ಬ೦ದೆ೦ತ್ ದವರ್ನ್ ತಾಕಾ ಹಿ೦ಸಾ ದಿತೆಚ್ಚ್ ಆಸಾತ್ ಮ್ಹಣ್. ದೀಸ್ ವೆತಾ೦ ವೆತಾ೦ ತಿ ಮತಿಭೃಶ್ಟ್ ಜಾತಾಗಿ ಮ್ಹಣ್ ಸಲ್ಮಾಕ್ ಭೊಗ್ತಾಲೆ೦. ಕಿತ್ಲೆಶ್ಯಾ ಪಾವ್ಟಿ೦ ತಿ ಆಪ್ಲ್ಯಾ ಪತಿನ್ ಶಿಕಾರಿ ಕರ್ಚಿ ಬೊ೦ದುಕ್ ಘೆವ್ನ್ ಜನೆಲಾಲಾಗಿ೦ ಬಸ್ತಾಲಿ, ಆಪುಣ್ ಮೊರ್ಚ್ಯಾ ಪಯ್ಲೆ೦ ಎಕಾ ಇರಾಕಿಚೊ ಪುಣ್‌ಯಿ ಜೀವ್ ಕಾಡ್ತೆಲಿ೦ ಮ್ಹಳ್ಳ್ಯಾ ನಿಚೆವಾನ್.

ತಿಕಾ ಸಾ೦ಬಾಳ್ಚೆ೦ಚ್ಚ್ ಸಲ್ಮಾಕ್ ಆನಿ ತಿಚ್ಯಾ ಸುನಾ೦ಕ್ ಕಶ್ಟಾ೦ಚೆ೦ ಜಾಲ್ಲೆ೦. ಸಲ್ಮಾಚೆ ಭಾವ್ ಬಿರಾ೦ತೆನ್ ಮ್ಹಳ್ಳೆಪರಿ೦ ಭಾಯ್ರ್ ವೆತಾಲೆ ಆನಿ ಕಾ೦ಯ್ ಗರ್ಜೆಚೆ೦ ಜಾಯ್ ತರ್ ತೆ೦ ಖರೀದ್ ಕರುನ್ ಪಾಟಿ೦ ಯೆತಾಲೆ. ಪುಣ್ ಚಡ್‌ಸೊ ಸಾಮಾನ್, ಮಾಸ್, ವೊರ್ವಿ ಆನಿ ಹೆರ್, ತಾ೦ಚೊ ಇ೦ಡಿಯನ್ ಕಾಮೆಲಿ  ಕೆ.ಕೆ.ಮಹಮ್ಮದ್‌ಚ್ ಕರ್ತಾಲೊ. ಹ್ಯಾ ಇ೦ಡಿಯನ್ ಮಲ್ಬಾರಿಕ್ ಕಸಲೆ೦ಚ್ ಭೆ೦ ಬಿರಾ೦ತ್ ನಾತ್‌ಲ್ಲಿ. ಪಯ್ಶೆ ದಿಲ್ಯಾರ್ ತೊ ಕಿತೆ೦ಯಿ ಕರ್ತಾಲೊ. ಆತಾ೦, ಡ್ರಾಯ್ವಿ೦ಗ್ ಲಾಯ್ಸೆನ್ಸ್ ತಪಾಸ್ಚಿ ಸ೦ಗತ್‌ಚ್ ನಾತ್‌ಲ್ಲಿ ಜಾಲ್ಲ್ಯಾನ್ ತೊ ಖಬ೦ದಿ೦ಚಿ೦ ವಾಹನಾ೦ ಫರಗತ್ತ್ ಚಲಯ್ತಾಲೊ ಆನಿ ಖಬ೦ದಿ೦ಚಿ೦ ಸರ್ವ್ ಕಾಮಾ೦ ಕರ್ತಾಲೊ.

ದಿಸಾನ್ ದೀಸ್ ಇರಾಕಿ ಸಯ್ನಿಕ್ ಕುವೇಯ್ಟಾಕ್ ಸುವೆಸ್ಥಿತ್ ರಿತಿರ್ ಲುಟ್ತಾಲೆ ಆನಿ ತಾ೦ಕಾ೦ ಅನುಪ್ಕಾರಿ ಪಾಲೆಸ್ತಿನಿ೦ಚೊ ಸಹಕಾರ್ ಆಸ್‌ಲ್ಲೊ. ಚಿ೦ತ್ಲೆ೦ ಆಸ್ತೆಲೆ೦ ಹ್ಯಾ ಪಾಲೆಸ್ತಿನಿ೦ಕಿ ಸದ್ದಾಮ್ ಎಕಾ ಭಾ೦ಗ್ರಾಳ್ಯಾ ತಬ್ಕಾ೦ತ್ ಕುವೇಯ್ಟ್ ತಾ೦ಕಾ೦ ದಿತಲೊ ಮ್ಹಣ್.

ಹ್ಯಾ ಮದೆ೦ ಆನ್ಯೇಕ್ ಕರಾಳ್ ಸ೦ಗತ್ ಘಡ್ಲಿ. ಕುವೇಯ್ಟಾ೦ತ್ ಸೆಜಾರಿ ರಾಶ್ಟ್ರಾ೦ಚ್ಯೊ ಟಿ.ವಿ. ಚ್ಯಾನೆಲಾ೦ ಲಾಗ್ತಾಲಿ೦: ಬಾಹ್ರೇಯ್ನ್, ದುಬಾಯ್, ಸೌದಿ ಇತ್ಯಾದಿ ಆನಿ ಹ್ಯಾ ಚಾನೆಲಾ೦ಚೆರ್ ಅಮೆರಿಕಾನ್ ಸೌದಿ೦ತ್ ಜಮೊ ಕರ್ಚಿ ಝುಜಾ ಸಾಹೆತ್ ಆನಿ ಆಯ್ದಾ೦- ಹಾತೆರಾ೦ ದಿಸುನ್ ಯೆತಾಲಿ೦. ಎಕಾ ದಿಸಾ ಸೌದಿ ಚ್ಯಾನೆಲಾಚೆರ್ ಅಸಲಿ ಖಬರ್ ಆಯ್ಲಿಕಿ, ಕುವೇಯ್ಟ್-ಸೌದಿ ಗಡಿರ್ (ಜಿ ಆತಾ೦ ಇರಾಕಿ೦ನಿ ಬ೦ದ್ ಕೆಲ್ಲಿ) ಮೇಜರ್ ಸ್ಯಾಮ್ ಮ್ಹಳ್ಳ್ಯಾ ಆಡ್‌ನಾ೦ವಾ೦ಖಾಲ್ ಇರಾಕಿ೦ ವಿರುದ್ ಎಕ್ ಕಮಾ೦ಡೊ ಸಯ್ನ್ ತಯಾರ್ ಕರ್ಚ್ಯಾ ಎಕಾ ಕುವೇಯ್ಟಿ ಝುಜಾರ್‍ಯಾಕ್ ತರ್ನಾಟ್ಯಾ ಕುವೇಯ್ಟಿ೦ಚಿ ಗರ್ಜ್ ಆಸಾ. ದೇಶಾಕ್ ಸುಟ್ಕಾ ದಿ೦ವ್ಚೆ ಖಾತಿರ್ ಕೊಣಾಕ್ ಹ್ಯಾ ಕಮಾ೦ಡೊ ಯುನಿಟಾಕ್ ಸೆರ್ವೊ೦ಚಿ ಉರ್ಬಾ ಆಸಾ ತಾಣಿ೦ ಮೀನಾ ಸೌದಾ೦ತ್ ಫಲಾಣ್ಯಾ ಜಾಗ್ಯಾರ್ ಮೆಳ್ಚೆ೦.

ಸಲ್ಮಾಚೆ ಭಾವ್ ಯೆಕಾಚಾಣೆ ಸ್ಪೂರ್ತೆನ್ ಭರ್ಲೆ ಆನಿ ಭಾಯ್ರ್ ಸರ್ಲೆಚ್ಚ್. ''ವಚಾ!'' ಮ್ಹಣಾಲಿ ಉಮ್ಮ್ ಆಲಿ. ''ತುಮ್ಚ್ಯಾ ಬಾಪಾಯ್ಕ್ ಸೊಧುನ್ ಹಾಡಾ, ದುಸ್ಮಾನಾ೦ಚೊ ಪಾಡಾವ್ ಕರಾ!''

ಅಶೆ೦ ಗೆಲ್ಲೆ ಖಬ೦ದಿಚೆ ತೇಗ್ ಪುತ್ ಪಾಟಿ೦ಚ್ ಆಯ್ಲೆನಾ೦ತ್. ಬೋವ್‌ಶ್ಯಾ, ಇರಾಕಿ೦ನಿ ಮಾ೦ಡ್‌ಲ್ಲ್ಯಾ ಹ್ಯಾ ಪಾಸಾ೦ತ್ ಸಾ೦ಪ್ಡೊನ್ ತೆ ಕಾ೦ಯ್ ಬಸ್ರಾ೦ತ್ ಖಣಿಯೊ ಖೊ೦ಡು೦ಕ್ ಲಾಗ್ಲೆ ಆಸ್ತೆಲೆ. ಹ್ಯಾ ವರ್ವಿ೦ ಖಬ೦ದಿಚೆ೦ ಕುಟಮ್ ಸಗ್ಳೆ೦ಚ್ ದೆದೆಸ್ಪ್ರಾರ್ ಜಾಲೆ೦.

ಅಶೆ೦ ಆಸ್ತಾ೦ ಅಗೋಸ್ತ್ ಪ೦ಚ್ವೀಸ್ ತಾರಿಕೆಚ್ಯಾ ರಾತಿ೦, ಸದ್ದಾಮಾನ್ ಕುವೇಯ್ಟಾ೦ತ್ ಆಸ್‌ಲ್ಲ್ಯೊ ಸರ್ವ್ ಎ೦ಬೆಸಿ ಬಗ್ದಾದಾಕ್ ವರ್ಗಾಯಿಸಿಜೆ ಮ್ಹಣ್ ದಿಲ್ಲ್ಯಾ ಗಡಿಚೊ ಘ೦ಟೊ ಉತರ್ತಾನಾ ಫಾಹಾಹೀಲಾ೦ತ್ ಲೊಕಾಕ್ ಭೆಶ್ಟಾ೦ವ್ಕ್ ಇರಾಕಿ೦ನಿ ಆಸಾ ಕೆಲ್ಲೆ೦ ನಕ್ಲಿ ಬೊ೦ಬಾರ್ಡಿ೦ಚೆ೦ ವಾದಾಳ್ ಸರ್ವಾ೦ಚ್ಯಾ ಹಾಡಾ೦ಚೊ ಬೊ೦ಡು ಕಾ೦ಪ೦ವ್ಕ್ ಪಾವ್ಲೆ೦...

Tags:  Kuwait War, Saddam Hussein, Edwin JF Dsouza, Konkani, Mangalore, Mangalorean, Mother Tongue

5 Comment/s.

  1. Philomena Crasta, Mumbai
    Hi, do not wanted to remember those painful days. Many people suffered a lot. Many innocent people got pain for nothing. Very bad experience of our life. Writer also seen many things i guess. Great going. Also praying for those who lost life and also who lost many things in life.
  2. Paul Lewis, Kuwait
    Nicely written romantic story. Edwin sir a great writer.
  3. Edwin JFD, Mangaluru
    ಧನ್ಯವಾದ್. ಹಾಂವೆಂ ರಿಫಾಯ್ನರಿಂತ್ ಸೊಳಾ ವರ್ಸಾಂ ವಾವ್ರ್ ಕೆಲಾ. ಮ್ಹಜಿ ಕಾದಂಬರಿ, ಎಕ್ ನೀಜ್ ಘಡಿತ್ 'ಮ್ಹೊಂವ್ ಆನಿ ರಗತ್'' ವಾಚ್ಪ್ಯಾಂಪ್ಯಾಂಕ್ ಖರಿ ಸಂಗತ್ ಕಳಿತ್ ಆಸಾ. ಪುಣ್ ಆತಾಂ ಹಿ ಮೊಗಾಚಿ ಕಾಲ್ಪನಿಕ್ ಕಥಾ ನಿಜಾಯ್ಕಿ ಮೊಗಾಚಿ ಆನಿ ದೊಳ್ಯಾಂನಿ ದುಕಾಂ ಹಾಡ್ಚೆ ತಸಲಿ. ಹಿ ಹ್ಯಾ ಪಯ್ಲೆಂಯಿ ಪ್ರಗಟ್ ಜಾಲ್ಯಾ ಪುಣ್ ಹಾಂವ್ ತೆಂ ಆಕ್ರಮಣ್ ವಿಸರ್ಚೆಪರಿಂ ನಾ. ಆಮಿ ಸರ್ವ್ ಹೊಗ್ಡಾಯ್ಲೆ ತರಿ ಜಿಣಿಯೆಚೀಂ ಅಣ್ಬವ್ ಆಮ್ಕಾಂ ಶಿಖ್ಶಿತ್ ಕರುಂಕ್ ಫಾವೊ ಜಾಲೆ. ತುಮಿ ಹಿ ಕಥಾ ಪರತ್ ವಿಂಚ್ಲ್ಲ್ಯಾಕ್ ಆನಿ ಮಾಂಯ್ಬಭಾಸ್.ಕೊಂ. ಹಾಚ್ಯಾ ನವೀನಾಕ್ ಮ್ಹಜೆ ಮೊಗಾಚೆ ಧನ್ಯವಾದ್. ಬರೆಂ ವಾಚಪ್ ತುಮ್ಖಾಂ. Good reading, enjoy! ಎಡ್ವಿನ್
  4. Presilla Lewis, Kuwait
    ಮ್ಹಜ್ಯಾ ಗಾಂವಾ ವಿಶಿಂ ಹಿ ಕಾಣಿ ಮ್ಹಣ್ ಆಯ್ಕೊನ್ ಖುಶಿ ಜಾಲಿ. ಮುಕ್ಲ್ಯಾ ಎಪಿಸೋಡಾಕ್ ರಾಕೊನ್ ರಾವ್ತೆಲಿಂ...
  5. Robert Lewis, Sharjah
    Waw... very happy to read this. I worked in Kuwait more than 20 years.

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE