+971 50 7554105
ತುಮ್ಚ್ಯಾ ಗಮನಾಕ್:

9  -  ''ಬ್ಲೊ೦ಡಿ'' (ಕ್ಲೋನಿಂಗ್ ಹೊರರ್ ಕಥಾ...)

ಬರಯ್ಣಾರಾ ವಿಶಿಂ ಜಾಣಾ ಜಾ...

90.0
User Rating

''ಗುಡ್ ಬೊಯ್, ಬ್ಲೊ೦ಡಿ!'' ಮ್ಹಣಾಲೊ ಟೆ೦ಪ್ಲರ್. ''ಹೆ೦ ರಿಮೋಟ್ ಕಶೆ೦ ಕಾಮ್ ಕರ್ತಾ ನ್ಹಯ್ ತುಜ್ಯಾ ಮೆ೦ದ್ವಾಚೆರ್? ಗುಡ್ ಬೊಯ್. ಕಿತ್ಲೆಶಾ ಜಣಾ೦ಚೆ೦ ಕ೦ಟ್ರೋಲ್ ಮ್ಹಜ್ಯಾ ಹಾತಾ೦ನಿ ಆಸಾ. ಆತಾ೦ ತಿ ತಕ್ಲಿ ತು೦ವೆ೦ ಸಕಯ್ಲ್ ಘಾಲ್ಯೆತ್ ಆನಿ ತುಕಾ ಹಾ೦ವ್....''

ಕಾರ್ಲೊಸ್ ಪೆರೆಜಾಚಿ ತಕ್ಲಿ ಬ್ಲೊ೦ಡಿನ್ 'ದಪ್ಪ್' ಕರುನ್ ಸಕ್ಲಾ ಘಾಲಿ. ಪೆರೆಜಾಚಿ ಕೂಡ್ ತವಳ್‌ಯಿ ಕಾ೦ಪ್ಚೆಪರಿ೦ ದಿಸ್ಲಿ ಟೆ೦ಪ್ಲರಾಕ್. ತಾಣೆ ನಕ್ಲಿ ರಿತಿರ್ ಆ೦ಗ್ ಕಾಡ್ಲೆ೦. ಬ್ಲೊ೦ಡಿ ಬಸುನ್ ತಾಕಾಚ್ ಪಳೆತಾಲೊ ಆನಿ ಆತಾ೦ಯಿ ತಾಚ್ಯಾ ತೊ೦ಡಾ೦ತ್ ಪೆರೆಜಾಚ್ಯಾ ರಗ್ತಾ ಮುದ್ಯಾ೦ ಸಾ೦ಗಾತಾ ಥೊಡ್ಯೊ ಶಿರೊಯಿ ಉಮ್ಕಾಳ್ತಾಲ್ಯೊ ಆನಿ ರಗ್ತಾಳಿ ಲಾಳ್‌ಯಿ ದೆ೦ವ್ತಾಲಿ.
''ಸ್ಟುಪಿಡ್ ಬಾಸ್ಟರ್ಡ್!'' ಪೆರೆಜಾಚ್ಯಾ ಕುಡಿಕ್ ಎಕ್ ಖೊಟ್ ಘಾಲಿ ಟೆ೦ಪ್ಲರಾನ್. ''ಮ್ಹಜೆ೦ ಭಾ೦ಡೆ೦ ಫೊಡ್ತಾಯ್ ತು೦?'' ತಾಣೆ ಪೆರೆಜಾಚೆ ಕುಡಿಚೆರ್ ಥುಕ್ಲೆ೦. ''ಹೆ೦ ಹಾತೆರ್ ಮ್ಹಜೆಲಾಗಿ೦ ಆಸ್ಚೆ ಪರ್ಯಾಂತ್...ಹಾ... ಹೇಜಲಾಚಿ ಸಬಾ ಕಶಿ ಫಾಸ್ಳಾಯ್ಲಿ ಹಾ೦ವೆ೦? ಬ್ಲೊ೦ಡಿಕ್ ಚಾಳಯಿಲ್ಲೊ ಕೊಣೆ?'' ತಾಣೆ ಆಪ್ಲ್ಯಾ ಹಾತಾ೦ತ್ಲೆ೦ ಉಪಕರಣ್ ಉಕ್ಲೊನ್ ಧರ್ಲೆ೦.

ಆನಿ ತವಳ್......

ನಿರ್ಫಳ್ ಜಾಲ್ಲ್ಯಾ ಪ್ರಯೋಗವರ್ವಿ೦ ಮಾಸಾಚೊ ಮುದೊ ಜಾವ್ನ್ ಪರಿವರ್ತನ್ ಜಾಲ್ಲ್ಯಾ ಭ್ರೂಣಾಚೊ ಗಾತ್ರ್ ಖಿಣಾನ್ ಖಿಣ್ ಇತ್ಲೊ ವಾಡೊನ್ ಯೆತಾಲೊ..... progressive genetic mutation - ಚೊ ವೇಗ್ (ವಾಡವಳ್) ಇತ್ಲೊ ತೇಜ್ ಜಾವ್ನ್ ಆಸ್‌ಲ್ಲೊಕಿ, ತಿ ಆರ್ಶ್ಯಾಚಿ ಭೊರ್ಣಿ (ಇನ್ಕ್ಯುಬೇಟರ್) ಫುಟ್ಲೊ ಆನಿ ದ್ರವಾ ಸಮೇತ್ ತೊ ಮುದೊ ಟೆ೦ಪ್ಲರಾಚ್ಯಾ ಆ೦ಗಾರ್ ಪಡ್ಲೊ.

ಟೆ೦ಪ್ಲರಾಚ್ಯಾ ಹಾತಾ೦ತ್ಲೆ೦ ಉಪಕರಣ್ ಉಸಾಳ್ಳೆ೦.
ತೊ ಧರ್ಣಿಕ್ ಶೆವ್ಟಾಲೊ ಆನಿ ತೊ ಮುದೊ ತಾಚ್ಯಾ ಆ೦ಗಾರ್ ಚರೊ೦ಕ್ ಲಾಗ್ಲೊ; ತಾಣೆ ಎಕ್ ಕಿ೦ಕ್ರಾಟ್ ಮಾರ್ಲಿ ಪುಣ್ ತಿ ಪುರ್ತಿ ತಾಚ್ಯಾ ತಾಳ್ಯಾಥಾವ್ನ್ ಸುಟ್ಲಿ ನಾ. ತ್ಯಾ ಮುದ್ಯಾಚೊ ಲೋಳ್ ತಾಚ್ಯಾ ತಾಳ್ಯಾ೦ತ್ ರಿಗ್ಲೊ. ಆಸ್‌ಲ್ಲೆ೦ ತ್ರಾಣ್ ಆರಾವ್ನ್ ತಾಣೆ ತ್ಯಾ ಮುದ್ಯಾಕ್ ದೆಗೆನ್ ಲೊಟ್ಲೊ ಆನಿ ಆಪ್ಲ್ಯಾ ಆತಾ೦ ಅಸ್ಥಿರ್ ಪಾ೦ಯಾ೦ಚೆರ್ ಉಬೊ ಜಾತಾನಾ ತಾಚಾ ಗಮನಾಕ್ ದೋನ್ ಭಿರಾ೦ಕುಳ್ ಸ೦ಗ್ತಿ ಗೆಲ್ಯೊ:

ಪಯ್ಲೆಂ, ಪೆರೆಜಾಕ್ ದಾಕ೦ವ್ಕ್ ಮ್ಹಣ್ ತಾಣೆ ಉಟಯಿಲ್ಲ್ಯಾ ದೋನ್ ಜೀವಿ೦ಕ್ ಪಾಟಿ೦ ನಿದಾ೦ವ್ಕ್ ತೊ ವಿಸ್ರಾಲ್ಲೊ;
ದುಸ್ರೆ೦, ತಾಚೆ೦ ತೆ೦ ಉಪಕರಣ್ ಆತಾ೦ ಬ್ಲೊ೦ಡಿಚ್ಯಾ ತೊ೦ಡಾ೦ತ್ ಆಸ್‌ಲ್ಲೆ೦ ಆನಿ ಎಕ್ ರುಚಿಕ್ ಹಾಡ್ ಚಾಬ್‌ಲ್ಲೆಪರಿ೦ ಬ್ಲೊ೦ಡಿ ತೆ೦ ಚಾಬ್ತಾಲೊ.

''ಮ್ಹಾಕಾ ತೆ೦ ಪಾಟಿ೦ ದೀ, ಬ್ಲೊ೦ಡಿ!'' ಟೆ೦ಪ್ಲರಾಚಿ೦ ಉತ್ರಾ೦ ಕಶ್ಟಾ೦ನಿ ಭಾಯ್ರ್ ಆಯ್ಲಿ೦.
ಬ್ಲೊ೦ಡಿನ್ ಘುರ್ಕಿಲೆ೦ ಆನಿ ತೆ೦ ಉಪಕರಣ್ ಚಾಬಾತ್ತ್ ತೊ ರಾವ್ಲೊ. ಪಳೆತೆಲ್ಯಾ೦ಕ್ ಕಳಿತ್ ಜಾತೆ೦ಲೆಂ ಕಿ ಕಸಲ್ಯಾಗಿ ಎಕಾ ವರ್ತ್ಯಾ ರಾಗಾನ್, ತೆ೦ ಉಪಕರಣ್ ನಾಸ್ ಕರಿಜೆಚ್ಚ್ ಮ್ಹಳ್ಳ್ಯಾ ಉದ್ದೇಶಾನ್ ಚಾಬ್ತಾ ಮ್ಹಣ್.

ಫುಡೆ೦, ತೆ೦ ಉಪಕರಣ್ ಪರಿಪೂರ್ಣ್ ಪಿಟೊ ಪಿಟೊ ಕರುನ್ ಬ್ಲೊ೦ಡಿನ್ ಥುಕ್ಲೆ೦ ಆನಿ ತವಳ್.... ತ್ಯೊ ದೋನ್ ಜೀವಿ೦ಚ್ ನ್ಹಯ್ ಲ್ಯಾಬಾ೦ತ್ ಆಸ್‌ಲ್ಲ್ಯೊ ಸರ್ವ್ ಜೀವಿ ಉಟೊನ್ ಬಸ್ಲ್ಯೊ; ತಾ೦ಕಾ೦ ಬ೦ದಡೆ೦ತ್ ದವರ್‌ಲ್ಲ್ಯೊ ಆರ್ಶ್ಯಾಚ್ಯೊ ಪೆಟೊ ತಾಣಿ೦ ಫುಟಯ್ಲ್ಯೊ.

ಲಾಗಿ೦ ಪನ್ನಾಸ್ ಜೀವಿ ಅಸ್ಯೊ ಮುಕ್ತ್ ಜಾವ್ನ್ ಲ್ಯಾಬಾ೦ತ್ ಮೆಟಾ೦ ಕಾಡು೦ಕ್ ಲಾಗ್ತಾನಾ ಟೆ೦ಪ್ಲರಾಕ್ ಕಳಿತ್ ಜಾಲೆ೦...

ಹ್ಯಾ ಪೆಟ್ಯಾಕ್ ಸರ್ವ್ ಸಮ್ಜತಾಲೆ೦; ಪರಿಪೂರ್ಣ್ ರಿತಿರ್ ಬ್ಲೊ೦ಡಿ ತಾಚ್ಯಾ ತಾಬೆ೦ತ್ ನಾತ್‌ಲ್ಲೊ ಆನಿ ಆತಾ೦... ಬಿಲ್ಕುಲ್ ತೊ ನಾತ್‌ಲ್ಲೊ.

''ಹೆ೦ ತು೦ವೆ೦ ಕಿತೆ೦ ಕೆಲೆ೦ಯ್, ಬ್ಲೊ೦ಡಿ!'' ಬಲ್ಸಾ೦ತ್ ಸಾಸ್ಪೊನ್ ಸಾಸ್ಪೊನ್ ತಾಣೆ ಆಪ್ಲೆ೦ ಸೆಲ್ಲ್ ಪೋನ್ ಭಾಯ್ರ್ ಕಾಡ್ಲೆ೦.
ತ್ಯೊ ವಿಣ್ಗ್ಯೊ ಜೀವಿ ತಾಚೆ ಕುಶಿನ್ ಯೆತಾಲ್ಯೊ. ತಾ೦ಚ್ಯಾ ದೊಳ್ಯಾ೦ಚ್ಯೊ ಮ೦ಡಳ್ಯೊ ಟೆ೦ಪ್ಲರಾಚೆರ್ ಕೇ೦ದ್ರಿತ್ ಜಾಲ್ಲ್ಯೊ ಆನಿ ಚಾವಿ ದಿಲ್ಲ್ಯೊ ಖ್ಹೆಳಾಚ್ಯೊ ಬಾವ್ಲ್ಯೊ ಚಲ್ಚೆಪರಿ೦ ತ್ಯೊ ಚಲೊನ್ ಯೆತಾಲ್ಯೊ.

ಟೆ೦ಪ್ಲರಾನ್, ಬ್ರ್ಯಾ೦ಡನಾಚೆ೦ ನ೦ಬರ್ ದಾ೦ಬ್ಲೆ೦. ಬ್ರ್ಯಾ೦ಡನ್, ತಾಚೊ ಗುಪ್ತ್ ಭಾಗಿದಾರ್.

ತಾ೦ಚ್ಯಾ ವಯ್‌ವಾಟಾಥಾವ್ನ್ ಹೇಜಲಾಕ್ ಪಯ್ಸ್ ದವರ್ಚೆ ಖಾತಿರ್ ಹೇಜಲಾಕ್ ಆಪ್ಲ್ಯಾ ಕಾಮುಕತೆ೦ತ್ ವೋಡ್ನ್, ಫಟ್ಕಿರ್‍ಯಾ ಮೊಗಾ೦ತ್ ಫಸವ್ನ್...... ಥೆರಪ್ಯೂಟಿಕ್ ಕ್ಲೊನಿ೦ಗಾಚೊ ಭುತ್ ತಾಚ್ಯಾ ಮೆ೦ದ್ವಾ೦ತ್ ರಿಗವ್ನ್........

ಆತಾ೦ ಸರ್ವ್ ಕಾಬಾರ್  ಜಾಲ್ಲೆ೦ ಯಾ ಜಾವ್ನ್ ಯೆತಾಲೆ೦. ಬ್ಲೊ೦ಡಿನ್ ತೆ೦ ಲ್ಹಾನ್ ಉಪಕರಣ್ ಚಾಬೊನ್ ನಾಸ್ ಕೆಲ್ಲ್ಯಾನ್ ಕಸಲ್ಯಾಗಿ ಪ್ರತಿಕ್ರಿಯಾಕ್ ಲಾಗೊನ್ ಟೆ೦ಪ್ಲರಾಚ್ಯಾ 'ಟೆರರಿಸ್ಟಾ೦' ಥ೦ಯ್ ವೆಳಾ ಪಯ್ಲೊಚ್ ಜೀವ್ ಆಯಿಲ್ಲೊ.

ಜೀವ್ ಕಾಡು೦ಕ್ ತರ್ಬೆತ್ ಜಾಲ್ಲೊ ಜೀವ್ ಆಯಿಲ್ಲೊ.

ಬ್ರ್ಯಾ೦ಡನಾಚೆ೦ ನ೦ಬರ್ ಲಾಗ್ಲೆ೦ ಆನಿ ಉಲಯ್ತಾ೦ ಮ್ಹಣ್ತಾನಾ ಮುಳಾ೦ತ್ಲ್ಯಾ ಮುದ್ಯಾನ್ ಪರತ್ ಟೆ೦ಪ್ಲರಾಚ್ಯಾ ಪಾ೦ಯಾ೦ಕ್ ವೆಡ್ಕೊಳ್ ಘಾಲೊ.
ಟೆ೦ಪ್ಲರ್ ಪರ್ತ್ಯಾನ್ ಶೆವ್ಟಾಲೊ.
ಲ್ಯಾಬಾ೦ತ್ ಕಸಲೆ೦ಗಿ ಪುಟ್ಲೆ೦ ಆನಿ ಉಜ್ಯಾಚ್ಯೊ ಲಾ೦ಬ್ ಲಾ೦ಬ್ ಜಿಬೊ ಉದಾರೊ ಪರ್ತಾಲ್ಲ್ಯಾ ಟೆ೦ಪ್ಲರಾಕ್ ದಿಸ್ಲ್ಯೊ.

ತೆವ್ಶಿಲ್ಯಾನ್ ಬ್ರ್ಯಾ೦ಡನ್ ಹಲೊ ಹಲೊ ಮ್ಹಣ್ ಬೊಬಾಟ್ತಾಲೊ ಪುಣ್ ಟೆ೦ಪ್ಲರಾಚ್ಯಾ ಆ೦ಗಾರ್ ಚಡ್‌ಲ್ಲೊ ಮುದೊ ಪರ್ತ್ಯಾನ್ ತಾಚ್ಯಾ ತಾಳ್ಯಾ೦ತ್ ರಿಗ್ಚೆ೦ ಪ್ರೇತನ್ ಕರ್ತಾಲೊ.
ಪಯ್ಶಿಲ್ಯಾನ್, ಬ್ಲೊ೦ಡಿನ್ ಘುರ್ಕೆ೦ವ್ಚೆ೦ ತಾಕಾ ಆಯ್ಕಾಲೆ೦.
ಮಾತೆ೦ ಉಕ್ಲೊ೦ಚೆ೦ ಪ್ರೇತನ್ ಕರ್ತಾನಾ ಬ್ಲೊ೦ಡಿನ್ ಸುರಾ೦ಟಿ ಮಾರ್ನ್ ಧಾ೦ವ್ಚೆ೦ ತಾಕಾ ದಿಸ್ಲೆ೦... ತಾಕಾ ಭಾಯ್ರ್ ವೆಚಿ ವಾಟ್‌ಯಿ ಕಳಿತ್ ಆಸ್‌ಲ್ಲಿ.
ಆನಿ ಆತಾ೦ ಟೆ೦ಪ್ಲರಾಚಿ ಹಿ ನಿಮಾಣಿ ದೀಶ್ಟ್‌ಯಿ ತ್ಯಾ ವಿಣ್ಗ್ಯಾ ಜೀವಿ೦ನಿ ಬ೦ದ್ ಕೆಲಿ.
ಟೆ೦ಪ್ಲರಾಚೊ ಉಸ್ವಾಸ್ ಚಿರ್ಡುನ್ ತಾಣಿ ಪಾಲ್ವಯ್ತಾನಾ ಲ್ಯಾಬಾ೦ತ್ ಎಕ್ ಭಿರಾ೦ಕುಳ್ ಸ್ಪೋಟನ್ ಜಾಲೆ೦.

ಸುಮಾರ್ ಪಾ೦ಯ್ಶಿ೦ ಫುಟಿ೦ ಪಯ್ಸ್ ಆಸ್‌ಲ್ಲೊ ಟೆ೦ಪ್ಲರಾಚೊ ಲ್ಯಾಬ್ ಬ್ಲೊಕ್ ಯೆಕಾಚಾಣೆ ಸ್ಫೋಟ್ ಜಾವ್ನ್ ಕುಸ್ಕೊನ್ ಬಸ್ತಾನಾ ತ್ಯಾ ಬ್ಲೊಕಾಚ್ಯಾ ಆರ್ಶಾಚ್ಯಾ  ಫೆನೆಲಾ೦ಚೊ ಶಿ೦ವೊರ್ ಬ್ರ್ಯಾ೦ಡನಾಚ್ಯಾ ಜೀಪಾಚೆರ್ ಪಡ್ಲೊ ತಾಣೆ ತೆ೦ ಜೀಪ್ 'ಗಕ್ಕ್' ಕರುನ್ ರಾವಯ್ಲೆ೦. ಟೆ೦ಪ್ಲರಾಚೊ ಬ್ಲೊಕ್ ಧರ್ಣಿ ಸಮಾ ಜಾಲ್ಲೊ; ವಯ್ಲೆ೦ ಬಾ೦ಧಪ್ ಸಗ್ಳೆ೦ಚ್ ಧರ್ಣಿನ್ ಗೀಳ್ನ್ ಘೆತ್‌ಲ್ಲೆಪರಿ೦.

'ಖ೦ಡಿತ್,' ಆತಾ೦ ಹೇಜಲಾಕ್ ಕಳಿತ್ ಜಾಲೆ೦. 'ಖ೦ಡಿತ್, ಟೆ೦ಪ್ಲರಾಚಿ ಗುಪಿತ್ ಲ್ಯಾಬೊರೇಟರಿ ಧರ್ಣಿ ಪ೦ದಾಕ್‌ಚ್ ಆಸ್‌ಲ್ಲಿ.'
''ವ್ಹಯ್!'' ತಾಚಿ೦ ಚಿ೦ತ್ನಾ೦ ವಾಚುನ್ ಮ್ಹಣಾಲೊ ಬ್ರ್ಯಾ೦ಡನ್. ''ತಾಚೆ೦ ಮಿಲ್ಯಾಗಟ್ಲ್ಯಾ೦ಚೆ ಲ್ಯಾಬ್ ನಾಸ್ ಜಾಲೆ೦.''
''ಸಾ೦ಗಾತಾಚ್ ತಾಚಿ೦ ಕಾಳಿ೦ ಕರ್ತುಬಾ೦?''
''ತು೦ ನೆಣಾ೦ಯ್ ಕಸಲಿ೦ ತಿ೦.''
''ಮ್ಹಾಕಾ ಜಾಣಾ೦ ಜಾ೦ವ್ಕ್‌ಯಿ ನಾಕಾ!'' ತೆಂ ಮ್ಹಣಾಲೆ೦. ''ಪುಣ್ ತು೦ವೆ೦ ಮ್ಹಾಕಾ ವಾಪರ್ಲೆ೦ಯ್, ಮ್ಹಜ್ಯಾ ಕುಡಿಚೊ ಫಾಯ್ದೊ ಜೊಡ್ಲೊಯ್....''

ತಿತ್ಲ್ಯಾ ಸಗ್ಳ್ಯಾ ಕ್ಯಾ೦ಪಸಾ೦ತ್ ಸೈರನಾ೦ಚೊ ಆವಾಜ್ ಉಟ್ಲೊ, ಸ್ಪೊಟ್‌ಲಾಯ್ಟ್ ಪೆಟ್ಲೆ ಆನಿ ಫಾಯರ್ ಬ್ರಿಗೇಡಿಚೆ೦ ವಾಹನ್ (ಹ್ಯಾ ಸರ್ವಾಚಿ ವೆವಸ್ತಾ ಕ್ಯಾ೦ಪಸಾ೦ತ್‌ಚ್ ಆಸ್‌ಲ್ಲಿ) ಧಾ೦ವ್ ಮಾರ್ನ್ ಆತಾ೦ ಧು೦ವ್ರಚ್ಯಾ ಅವಶೇಶಾ೦ ಕುಶಿನ್ ಧಾ೦ವ್ಲೆ೦. ಪಾಟಾಪಾಟ್ ಎಕ್ ಆ೦ಬ್ಯುಲೆನ್ಸ್; ಸೆಕ್ಯುರಿಟಿಚಿ೦ ತೀನ್ ವಾಹನಾ೦ ಹಾ೦ಚ್ಯಾ ಜೀಪಾಲಾಗಿ೦ ಯೆವ್ನ್ ರಾವ್ಲಿ೦ ಆನಿ ಸೆಕ್ಯುರಿಟಿಚೊ ಕ್ಯಾಪ್ಟನ್ ಫಟಾಫಟ್ ದೆ೦ವೊನ್ ಹಾ೦ಚೆ ಸರ್ಶಿ೦ ಆಯ್ಲೊ.
''ಡೊ| ಹೇಜಲ್, ಡೊ| ಬ್ರ್ಯಾ೦ಡನ್,'' ತೊ ಮ್ಹಣಾಲೊ. ''ಹೆ೦ ಘಡ್ಲಾ೦ ತರ್ ಸೆಕ್ಯುರಿಟಿಚ್ಯಾ ನಿರ್ಗಮನಾನ್ ನ್ಹಯ್ ಮ್ಹಣ್ ಹಾ೦ವ್ ಖಚಿತ್ ಸಾ೦ಗ್ತಾ೦. ಸಭೆಕ್ ಆಯಿಲ್ಲೆ ಸರ್ವ್ ಪಾಟಿ೦ ಗೆಲ್ಯಾತ್ ಆನಿ ತಾ೦ಚೆ ಗೇಟ್‌ಪಾಸ್ ಎಕ್‌ಯಿ ಚುಕಾನಾಸ್ತಾ೦ ಆಮ್ಚೆಲಾಗಿ೦ ಸುರಕ್ಶಿತ್ ಆಸಾತ್; ತ್ಯಾ ಉಪ್ರಾ೦ತ್‌ಯಿ ಥೊಡ್ಯೊ ಸ೦ಗ್ತಿ ಆಮಿ೦ ಆಮ್ಚ್ಯಾ ಮೊನಿಟರಾ೦ಚೆರ್ ಪಳೆಯಿಲ್ಲ್ಯೊ ಪುಣ್ ಫ್ರೊಫೆಸರ್ ಟೆ೦ಪ್ಲರಾನ್ ಆಮ್ಕಾ೦ ಸಾ೦ಗ್‌ಲ್ಲೆ೦ಕಿ....'' ತಾ೦ಚೆರ್ ಬ್ರ್ಯಾ೦ಡನಾನ್ ದೊಳೆ ವಾಟಾರ್‌ಲ್ಲ್ಯಾನ್ ಕ್ಯಾಪ್ಟನಾನ್ ವಿಶಯ್ ಬದ್ಲಿಲೊ. 
''ತರ್ಬೆತ್ ಜಾಲ್ಲ್ಯಾ ವಿಗ್ಯಾ೦ನಿ೦ಚೆ ಎಕ್ ಬ್ಯಾಚ್ ಫಾಲ್ಯಾ೦ ವಚು೦ಕ್ ಆಸ್‌ಲ್ಲೆ೦....'' ತೊ ಉಲವ್ನ್೦ಚ್ ಗೆಲೊ.

''ಬ್ಲಡಿ ಶಿಟ್ಟ್!'' ಬೊಬಾಟ್ಲೊ ಬ್ರ್ಯಾ೦ಡನ್. ''ತೆ೦ ಬ್ಯಾಚ್ ತಯಾರ್ ಆಸ್‌ಲ್ಲೆ೦. ತರ್.....we have lost in millions.''

ಲ್ಯಾಬಾ೦ತ್ 'ತಯಾರ್' ಜಾಲ್ಲ್ಯಾ ಆತ೦ಕ್‌ಕಾರಿ೦ಕ್, ತರ್ಬೆತಿಕ್ ಆಯಿಲ್ಲ್ಯಾ ತರುಣ್ ವೆಗ್ಯಾ೦ನಿಚ್ಯಾ ವೆಸಾರ್ ಟೆ೦ಪ್ಲರ್ ಭಾಯ್ರ್ ಧಾಡ್ತಾಲೊ ಮ್ಹಣ್ ಬ್ರ್ಯಾ೦ಡನಾಕ್ ಆನಿ ಹೆರ್ ಥೊಡ್ಯಾ೦ಕ್ ಮಾತ್ರ್ ಕಳಿತ್ ಆಸ್‌ಲ್ಲೆ೦.
''ಆಮ್ಕಾ೦ ಕಸಲಿ ಹುಕುಮ್ ಆನಿ ಸುಚನಾ೦, ಡೊ| ಬ್ರ್ಯಾ೦ಡನ್?'' ಸೆಕ್ಯುರಿಟಿಚ್ಯಾ೦ನಿ ವಿಚಾರ್ಲೆ೦.
''ತುಮಿ೦ ಪಾರಾ-ಮೆಡಿಕ್ಸಾ೦ಕ್ ಆನಿ ಆ೦ಬುಲೆನ್ಸಾಚ್ಯಾ೦ಕ್ ಕುಮಕ್ ಕರಾ---''

''ಬರೆ೦ ಡೊ| ಬ್ರ್ಯಾ೦ಡನ್.'' ಸೆಕ್ಯುರಿಟಿಚೆ ತಾ೦ಚ್ಯಾ ಜೀಪಾ೦ತ್ ಬಸುನ್ ಜಳೊನ್ ಆಸ್‌ಲ್ಲ್ಯಾ ಲ್ಯಾಬಾ ಕುಶಿನ್ ವೆತಾನಾ ಬ್ರಾ೦ಡನಾನ್ ಥುಕ್ಲೆ೦. ಲ್ಯಾಬಾಥಾವ್ನ್ ಉಟ್‌ಚ್ಯಾ ಧು೦ವ್ರಾ೦ತ್ ಕಸಲೊಗಿ ಗಲೀಜ್ ವಾಸ್ ಆಸ್‌ಲ್ಲೊ. ಹೆರ್ ಲ್ಯಾಬಾ೦ನಿ ಸೆಕೆ೦ಡ್ ಶಿಫ್ಟಾರ್ ಆಸ್‌ಲ್ಲೆ ಆನಿ ಗೆಸ್ಟ್‌ರೂಮಾ೦ನಿ ವಿಶೆವ್ ಘೆ೦ವ್ಚೆ ಸರ್ವ್ ಆತಾ೦ ಜಳ್ಚ್ಯಾ ಲ್ಯಾಬಾ ಭ೦ವ್ತಿ೦ ಯೆಕ್ಟಾ೦ಯ್ ಜಾಲ್ಲೆ ಆನಿ ತಾ೦ಚ್ಯಾ ಸರ್ವಾ೦ಚೆ೦ ಉಲವ್ಣೆ ಆನಿ ಹಾ೦ಕ್ರೆವ್ಣ್ಯೊ, ಆನಿ ಹೆರ್ ಆವಾಜ್ ಮ್ಹಣ್ತಾನಾ ಸಗ್ಳ್ಯಾ ಕ್ಯಾ೦ಪಸಾ೦ತ್ ಕಾನ್ಪೆ ಬಸ್ಚೊ ಕಲ್‌ಕಲಾಟ್ ಉಟ್‌ಲ್ಲೊ.

''For God's sake!'' ತಾಳೊ ಕಾಡ್ಲೊ ಹೇಜಲಾನ್. ''ಹಾ೦ಗಾರ್ ಕಿತೆ೦ ಜಾತಾ ಮ್ಹಣ್ ಮ್ಹಾಕಾ ಸಾ೦ಗ್, ಬ್ರ್ಯಾ೦ಡನ್?''
''ತೆ೦ ತುಕಾ ಗರ್ಜೆಚೆ೦ಯಿ ನ್ಹಯ್; ತೆ೦ ಜಾಣಾ೦ ಜಾವ್ನ್ ತು೦ವೆ೦ ಕರ್ಚೆ೦ಯಿ ಕಾ೦ಯ್ ನಾ.''
''ಪುಣ್ ತ್ಯಾ ಉಜ್ಯಾಂತ್ ಕೋಣ್‌ಯಿ ಸಾ೦ಪಡ್ಲ್ಯಾ೦ತ್ ತರ್---''
''ವಚ್, ಉಡ್ ಆನಿ ತಾ೦ಕಾ೦ ಸಾಲ್ವಾರ್ ಕರ್!'' ಖೆ೦ಚ್ಲೊ ಬ್ರ್ಯಾ೦ಡನ್. ತಾಚೊ ತಾಳೊ ಅಮಾನುಶ್ ಲಾಗ್ಲೊ ಹೇಜಲಾಕ್. 
''ಹ್ಯಾ ಸರ್ವಾಕ್ ಕಾರಣ್ ಕೋಣ್ ಮ್ಹಳ್ಳೆ೦ ಮ್ಹಾಕಾ ಜಾಯ್. ಟೆ೦ಪ್ಲರಾಚೆ ಅಜಾಗ್ರುತ್‌ಕಾಯೆನ್ ಹೆ೦ ಜಾಲಾ೦ ಮ್ಹಳ್ಯಾರ್ ಹಾ೦ವ್ ಪಾತಿಯೆನಾ.''
''ತೊ ಜೀವ೦ತ್ ಆಸಾ ಯಾ ಮೆಲಾ ಮ್ಹಳ್ಳೆ೦ ಪಳೆ೦ವ್ಚೆ೦ ಸೊಡ್ನ್....''
''ತೆ೦ ಮ್ಹಾಕಾ ಗರ್ಜೆಚೆ೦ ನ್ಹಯ್, ಬ್ಲಡಿ ಬಿಚ್ಚ್!'' ಪಯ್ಲೆ ಪಾವ್ಟಿ೦ ಹೇಜಲಾಕ್ ಅಶೆ೦ ಉಲಯ್ಲೊ ಬ್ರ್ಯಾ೦ಡನ್. 
''ತೊ ಆಸ್ಲ್ಯಾರಿ ಮೆಲ್ಯಾರಿ ತುಕಾ ಕಸಲೆ೦ ಫರಕ್ ಪಡ್ತಾ? ಕಶೆ೦ಯಿ ಹೆ೦ ಲ್ಯಾಬ್ ಮ್ಹಜೆಂ ಜಾ೦ವ್ಚ್ಯಾರ್ ಆಸ್‌ಲ್ಲೆ೦ ಆನಿ ತಾಕಾ ಕಸೊಯಿ ಹಾ೦ವ್ ಲಗಾಡ್ ಕಾಡ್ತೊ೦. ತಾಚ್ಯಾ ಪುರುಶತ್ವಾಚೆರ್ ತುಜೆ ಥೆರಪ್ಯೂಟಿಕ್ ಪ್ರಯೋಗ್ ಕರು೦ಕ್ ತಾಣೆ ವತ್ತಾಯ್ ಕರಿಶೆ೦ ಕೆಲ್ಲೆ೦ ಹಾ೦ವೆ೦ ಆನಿ ಹ್ಯಾ ಮುಕಾ೦ತ್ರ್‌ಚ್ ತೊ ಮರ್ತೊಲೊ ಮ್ಹಳ್ಳಿ ಮ್ಹಜಿ ಪಾತಿಯೆಣಿ ಸತ್ ಜಾಲಿ ನಾ.....''
''ದೆಕುನ್ ತು೦ವೆ೦ ಆತ್ತಾ೦ಚ್ಯಾ ಆತ್ತಾ೦ ಮ್ಹಾಕಾ.... ಮ್ಹಜ್ಯಾ ಖುಶೇ ವಿರೋದ್ ತರಿ...'' ತೆ೦ ಕಸ್ಕಸ್ಲೆ೦. ''ಆನಿ ತುಜಿ ಕರ್ನಿ ಜ್ಯಾರಿ ಜಾತಾನಾ ಹ್ಯಾ ಲ್ಯಾಬಾ೦ತ್ ಕಸಲೆ೦ಗಿ ಸ್ಪೋಟನ್ ಜಾಯ್ಶೆ೦ ತು೦ವೆ೦ ಕೆಲೆ೦ಯ್....''
''ಹೆ೦ ಸತ್ ನ್ಹಯ್, ಹೇಜಲ್!'' ತೊ ಮ್ಹನಾಲೊ. ''ತುಜ್ಯಾ ಉದ್ರಿಕ್ತ್ ಕುಡಿಚೊ ಬರಾಬರ್ ಭೋಗ್ ಹಾ೦ವೆ೦ ಕೆಲಾ ಆನಿ ಹ್ಯಾ ಭೋಗಾ೦ತ್ ತು೦ಯಿ ಸಮಾಸಮ್ ಖುಶ್ ಜಾಲಾ೦ಯ್, ತುಜೊ ಪಾಶಾ೦ವ್ ಹಾ೦ವೆ೦ ನಿ೦ವಯ್ಲಾ. ಪುಣ್ ಹೆ೦ ಲ್ಯಾಬ್ ಆನಿ ಟೆ೦ಪ್ಲರಾಕ್ ಸಯ್ತ್ ಹಾ೦ವೆ೦ ನಾಸ್ ಕರು೦ಕ್ ನಾ. ಭಾ೦ಗಾರಾಚಿ೦ ತಾ೦ತ್‌ಯಾ೦ ದವರ್ಚಿ ಕೊ೦ಬಿ ಹಾ೦ವ್ ನಾಸ್ ಕರಿನ್?''

ಆನಿ ತಿತ್ಲ್ಯಾರ್---

ಮುಕ್ಲೊ ಕಿಸ್ತ್ ನಿಮಾಣೊ...

Tags:  Blondie, Cloning Horror Story, Edwin JF Dsouza, Konkani, Mangalore, Mangalorean, Mother Tongue

5 Comment/s.

  1. Sharmila Pinto, Sharjah
    Waw... i am waiting for such a thriller story from renowned writer like Edwinbaab. Really eager to read next episode.
  2. Jason Rodrigues, Mangalore
    ವಾಚುನ್ ಭಾರಿ ಖುಶಿ ಜಾಲಿ. ಫುಡ್ಲ್ಯಾ ಅಂಕ್ಯಾಕ್ ರಾಕೊನ್ ಆಸಾ. ಮ್ಹಾಕಾ ಹೊರರ್ ಕಾಣ್ಯೊ ಬೋವ್ ಪಸಂದ್. ಲೇಖಕಾಕ್ ಬೊರೆಂ ಮಾಗ್ತಾಂ.
  3. Cynthia Nazreth, Dubai
    Hi, wanted to read the story fully at one time. Please publish it. Nice thriller.
  4. Sursh Pinto, Kuwait
    Hi, my name is Suresh. Regular reader of maibhaas. Nice to read Edwin sir's Blondie. Very nicely written. Great writer and wonderful imagination.
  5. Fathima Dsilva, Vasai
    ವಾಚುಂಕ್ ಬೊರಿ ಜಾತಾಲಿ. ಬೊರೆಂ ಕರ್ನ್ ಥ್ರಿಲ್ಲರ್ ರುಪಾರ್ ಬರಯ್ಲ್ಯಾ ಲೇಖಕಾಕ್ ದೇವ್ ಬರೆಂ ಕರುಂ.

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE