From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ವೊದ್ದುವಾರಂಟ್ - ಭಾಗ್ 2
December 30, 2015
"ಆಯ್ಕ್... ಚಿಕ್ಕೆ ಸಮಾಧಾನೆನ್ ಆಯ್ಕ್. ತೊಮಾಸಾಗೆರ್ ಏಕ್ ರಾಸ್ ಸಮಾನ್ ಹಾಡ್ಲ್ಯಾ. ಪುರಾ ತಾಣಿಂ ಕೆಲ್ಲ್ಯಾ ಪಾರ್‍ಟೆವೆಳಾ ಗಿಫ್ಟ್ ಮೆಳ್‌ಲ್ಲೊ ಖಂಯ್!"
"ಕಸ್ಲ್ಯೊ ಪಾರ್‍ಟಿ?!"
"ಕಸ್ಲ್ಯೊ ಮ್ಹಳ್ಯಾರ್ ಭುರ್‍ಗ್ಯಾಂಚ್ಯೊ ಬರ್‍ತ್‌ಡೇ, ಕುಮ್ಗಾರ್, ಕ್ರಿಜ್ಮ್ ಮ್ಹಣ್!"
"ಕಿತೆಂ ತಾಂಕಾಂ ಗಿಫ್ಟ್ ಕಾಣ್ಘೆಂವ್ಕ್ ಕಿತೆಂ ಬಿಟ್ ಲಾಗ್ಲ್ಯಾಗೀ ಕಿತೆಂ?! ಗತ್ ನಾಂ ತರ್ ಕೊಣೆಂ ಪಾರ್‍ಟಿ ಕರುಂಕ್ ಸಾಂಗ್ಲ್ಯಾ ಖಂಯ್?! ಇತ್ಲೆ ಪಯ್ಶೆ ಆಸಾತ್ ತೆ ಕಿತೆಂ ವೊಣೊದಿಕ್ ಚಿಡ್ಕಾಂವ್ಕ್ ಆಸಾತ್ ವ ಪೆಟೆಂತ್ ಮೊರ್‍ತಾನಾ ವ್ಹರೊಂಕ್ ಆಸಾತ್? ಗಿಫ್ಟಾಂ ಮೆಳ್‌ಲ್ಲಿಂ ಮ್ಹಣ್ ಸಾಂಗೊಂಕ್ ಲಜ್ ದಿಸಾನಾಂ ತಾಂಕಾಂ. ಆದ್ಲೆ ಪಾವ್ಟಿಂ ಹಾಂವ್ ಗೆಲ್ಲೊಂ ತ್ಯಾ ಭುರ್‍ಗ್ಯಾಂಚಿ ಉಚಾಂಬಳಾಯ್ ಪಳೆಯ್ತಾನಾ ಖಂಯ್ ತರ್‌ಯೀ ರಾನಾ ಥಾವ್ನ್ ಆಯಿಲ್ಲ್ಯಾಪರಿಂ ಭೊಗ್ತಾ. ಖಾಂವ್ಚೆಂ ಪಳೆಯ್ತಾನಾ ಮಹಿನೊಭರ್ ಪೊಟಾಕ್ ನಾತ್‌ಲ್ಲ್ಯಾಪರಿಂ ದಿಸ್ತಾ... ತಾಚಾ ವಯ್ಲ್ಯಾನ್ ಗಿಫ್ಟಾಚೆಂ ಪ್ರದರ್‍ಶನ್ ತುಕಾ ಕರ್‍ತಾತ್‌ಗೀ?!" ಹಾಂವ್ ತಾಪ್ಲೊಂ ಭುರ್‍ಗ್ಯಾಂಚಿ ಅಶಿಸ್ತ್ ಚಿಂತುನ್. ತಾಂಚಿ ರೀತ್ ನೀತ್ ಮ್ಹಾಕಾ ಜಮಾ ನಾತ್‌ಲ್ಲಿ.
"ತುಂ ತಾಪಾನಾಕಾ ಸಾಯ್ಬಾ... ತಾಚಾ ಬಾಯ್ಲೆಕ್ ಎಕಾ ದೆಡ್ಕೆಚೊ ಮೆಂದು ನಾಂ. ತುಕಾ ಪುಣೀ ಮೆಳ್‌ಲ್ಲೆಂ ತರ್ ಕಾಜಾರಾಚಾ ದುಸ್ರೆ ದಿಸಾ ಜಿವ್ಘಾತ್ ಕರ್‍ನ್ ಕಾಣ್ಘೆತಯ್. ತಾಕಾ ಖುಶಿ ಕರ್‍ಚ್ಯಾ ಖಾತಿರ್ ತೊಮಾಸ್ ನಾಚ್ತಾ. ಧಾ-ಬಾರಾ ವರ್‍ಸಾಂಚಾ ಭುರ್‍ಗ್ಯಾಂಕ್ ಆಜೂನ್ ನ್ಹಾಂವ್ಕ್ ಗೊತ್ತು ನಾಂ... ತಾಚಿ ಬಾಯ್ಲ್ ನ್ಹಾಣಯ್ತಾ."
"ಉಜೊ ಪಡೊಂ ತಾಂಚಾ ಗಜಾಲಿಂಕ್. ಗಲ್ಫಾಗಾರಾಂಚೆಂ ಹಣೆಬರಪ್ ಪಳೆಯ್ತಾನಾ ಉಸ್ತುರೆಂ ವೆತಾ. ಚಾರ್ ಪಯ್ಶೆ ಜಾಲೆ... ಥೊಡೆ ಇಂಗ್ಲಿಷ್ ಕಾತ್ರುಂಕ್ ಆಯ್ಲೆಂ ಮ್ಹಣ್ತಾನಾ ಬ್ರಿಟಿಷ್ ಸಿಟಿಜನ್‌ಶಿಪ್ ಮೆಳ್‌ಲ್ಲ್ಯಾಪರಿಂ ಕರ್‍ತಾತ್ ಆಮ್ಚೆ ಮನಿಸ್...! ಆಡೆಭಾಗ್!! ಆಮ್ಚೆ ಗಾಂವ್ಚೆ ಮನಿಸ್ ಧಾ ವಾಂಟ್ಯಾಂಕ್ ಜಾವ್ಯೆತ್..." ಮ್ಹಜೆ ಜಾಳ್ ವೊಂಕ್ಲೆ.
"ತೆಂ ಸಮಾಂ! ಹಾಂವ್ ತಾಂಚಿ ಗಜಾಲ್ ಉಲಯ್ನಾಂ! ಹ್ಯೆ ಪಾವ್ಟಿಂ ಆಮ್ಚ್ಯಾ ರಾಯನಾಚೊ ಕುಮ್ಗಾರ್ ಮ್ಹಜಾ ಆಲೋಚನೆ ಪರ್‍ಮಾಣೆಂ ಕರ್‍ತಾಂ. ಲೋಕ್ ಮ್ಹಾರ್‍ಗಾಯ್ ಜಾಣಾಂ. ಸಮ್ಜೊಣಿ ಆಸ್‌ಲ್ಲೊ ಖೆಲ್ಲೆಂ ಋಣ್ ದವರಿನಾ."
"ಏಕ್ ಮಿನುಟ್!" ಹಾಂವೆಂ ಬ್ರೇಕ್ ಮಾರ್‍ಲಿ.
"ಋಣ್ ಕಸ್ಲೆಂ? ಜೆವ್ಣಾಕ್ ಕಾರ್‍ಯಾಕ್ ಆಮಿಂ ಖುಶೆನ್, ಮೊಗಾನ್ ಆಪಂವ್ಚೆಂ, ತಾಂತುಂ ಋಣ್ ಯೆನಾಂ" ಕಾತ್ರಿನ್ ಪುಲ್ಚೆಲೆಂ.
"ತುಂ ತುಜೆಂ ಕೊಕ್ಕೆಂ ಘಾಲಿನಾಕಾ."
"ತುಂ ತುಜೆಂ ವೊದ್ದುವಾರಂಟ್ ಸೊಡ್."
"ನಾಂ, ಹೆ ಪಾವ್ಟಿಂ ತುಕಾ ಮ್ಹಜಿ ಶಾಥಿ ದಾಕಯ್ತಾಂ. ವಿಂಗಡ್‌ಚ್ ಮಾಂಡಾವಳ್, ಪುರಾ ಕ್ರಿಯೆಟಿವ್, ಸಕ್ಡಾಂಕ್ ಖುಶಿ ಜಾಯ್ಜಯ್. ಗಿಫ್ಟ್ ದಿಲ್ಯಾರ್‌ಯೀ ಬೆಜಾರ್ ಜಾಂವ್ಕ್ ನಜೊ..." ಭಾರೀ ಖುಶೆನ್ ಕಾತ್ರಿನ್ ಸಾಂಗಾಲಾಗ್ಲೆಂ.
"ನಾಕಾ ಸಾಯ್ಬಿಣಿ, ತೆಂ ಗಿಫ್ಟ್ ಘೇವ್ನ್ ಪಾರ್‍ಟಿ ಕರ್‍ಚಿ! ಆಜ್‌ಕಾಲ್ ಕೊಣೀ ಸುದ್ರಾಲ್ಲಿಂ ಕೊಡಿಯಾಳ್‌ಗಾರಾಂ ಕಾಣ್ಗೆನಾಂತ್. ತ್ಯಾ ಭಾಯ್ರ್ ಆಮಿಂ ಸಭಾರ್ ತೇಂಪ್ ಥಾವ್ನ್ ಘೆಂವ್ಕ್ ನಾ..."
"ತೆಂ ಮ್ಹಾಕಾಯೀ ಗೊತ್ತು ಆಸಾ. ದೆಕುನ್ ಆಮಿ ಹ್ಯೆ ಪಾವ್ಟಿಂ ದುಸ್ರಿಚ್ ಆಲೋಚನ್ ಕರ್‍ಯಾಂ. ಪ್ರೆಸೆಂಟ್ ವಿಚಾರ್‍ಚೆಂ ನಾಕಾ. ’ನೊ ಪ್ರೆಸೆಂಟ್’ ಘಾಲ್ಚೆಂಯೀ ನಾಕಾ, ಕಶಿ ಆಲೋಚನ್?!"
"ತುಜಿ ಆಲೋಚನ್ ಹಿಟ್ಲರಾಚಿ ಆನಿ ಕಾಮಾಂ ಬೊಟ್ಲೆರಾಚಿಂ. ಎದೊಳ್ ಲಾಭ್ ಜಾಂವ್ಕ್ ನಾಂ ತರ್‌ಯೀ ನಷ್ಟ್ ಜಾಂವ್ಕ್ ನಾತ್‌ಲ್ಲೊ. ಹ್ಯೆ ಪಾವ್ಟಿಂ ಮ್ಹಾಕಾ ದುಬಾವ್ ಜಾತಾ."
"ಛೆಕ್ಕ್! ತುಜಾ ಕೊಟ್ಟಾ ಜಿಬೆನ್ ಕಿತೆಂ ತರೀ ವಾಂಕ್ಡೆಂ ಸಾಂಗ್ತಾಯ್‌ಚ್ಚ್. ತುಕಾ ಬಾಯ್ಲೆಕ್ ಉತ್ತೇಜನ್ ದೀಂವ್ಕ್ ಗೊತ್ತುನಾಂ. ಕಂಡಾಮ್ ಕರ್‍ತಾಯ್. ಮ್ಹಾಕಾಯೀ ಸ್ವತಂತ್ರ್ ಆಸಾ. ಮ್ಹಾಕಾ ಆಲೋಚನೋ ಆಸಾತ್. ಮ್ಹಾಕಾಯೀ ವಯ್ರ್ ಯೆಂವ್ಕ್ ಚಾನ್ಸ್ ದಿಜಾಯ್ ತುಂವೆಂ!" ಹಾಂವೆಂ ತೊಂಡಾಕ್ ಹಾತ್ ಧರ್‍ಲೊ.
"ಕಿತೆಂ ಹಾಂವೆಂ ತುಕಾ ವಯ್ರ್ ಯೆಂವ್ಕ್ ಚಾನ್ಸ್ ದಿಜಾಯ್?" ಹೆಂ ಸಾಕ್ರಿಲೆಜ್ ಪಾತಾಕ್. ಹಾಂವ್ ಘೊವ್ ಜಾವ್ನ್ ತಸೆಂ ಕರುಂಕ್ ಇಗರ್‍ಜ್‌ಮಾತೆಚೊ ಆನಿ ದೆವಾಚೊ ಕಾಯ್ದೊ ಸೊಡಿನಾಂ."
"ಶೆಟ್ ಆಪ್" ತೆಂ ತಾಪ್ಲೆಂ.
"ಜಾಲೆಂ ಸಾಯ್ಬಿಣಿ. ತುಕಾ ಖುಶಿ ಆಸ್‌ಲ್ಲ್ಯಾಪರಿಂ ಕರ್." ಹಾಂವ್ ಮಾತ್ಸೆಂ ಥಂಡ್ ಜಾಲೊಂ.
"ಬರೆಂ, ಮ್ಹಾಕಾ ಏಕ್ ಪನ್ನಾಸ್ ಹಜಾರ್ ರುಪಯ್ ದಿ. ಏಕ್ ದೊನ್ಶಿ ಸಿಲೆಕ್ಟಡ್ ಜಣಾಂಕ್ ಕುಮ್ಗಾರಾಚಿ ಪಾರ್‍ಟಿ ಕರ್‍ತಾಂ."
"ಕಿತೆಂ ಪನ್ನಾಸ್ ಹಜಾರ್?!"
"ಸವ್ಕಾಸ್, ಸವ್ಕಾಸ್ ಕಾಳಿಜ್ ಬಸಾತ್! ಕಿತೆಂ ಮ್ಹಣ್ ಚಿಂತ್ತಾಯ್?! ಬಿಜ್ನೆಸ್ ಮ್ಹಳ್ಯಾರ್ ’ಪಯ್ಶೆ ಘಾಲ್ನ್ ಪಯ್ಶೆ ಕಾಡ್’ ಪೊಲಿಸಿ. ಕಳ್ಳೆಂಗೀ? ತ್ಯಾ ಪನ್ನಾಸ್ ಹಜಾರಾಂ ಥಾವ್ನ್ ಸಾಟ್ ಸತ್ತರ್ ಹಜಾರ್ ರುಪಯ್ ಜಮೊ ಕರುಂಕ್ ಹಾಂವ್ ಜಾಣಾಂ." ಭಾರೀ ಗತ್ತಾರ್ ಸಾಂಗಾಲಾಗ್ಲೆಂ. ಬಹುಶ್ಯಾ ಕುವೈಟ್ಚ್ಯೊ ಆಯ್ಡಿಯಾ ಘೆವ್ನ್ ಆಯಿಲ್ಲ್ಯಾ ದಳ್ಭಾರಾನ್ ಜಾಯ್ಜಾಯ್.
ಹಾಂವೆಂ ಥಿಂಪಿ ಗೀಳ್ನ್ ಸವ್ಕಾಸ್ ಸಾಂಗ್ಲೆಂ.
"ಕಾತ್ರಿನಾ, ಹಾಂವ್ ತುಕಾ ಹೆ ಪಾವ್ಟಿಂ ಏಕ್ ಚಾನ್ಸ್ ದಿತಾಂ ಆನಿ ಪಯ್ಶೆ ದಿತಾಂ ಪುಣ್ ಎಕಾ ಕಂಡಿಶನಾಚೆರ್!"
"ತುಜೆಂ ಏಕ್ ನ್ಹಯ್ ಧಾ ಕಂಡಿಶನಾಂ ಸಾಂಗ್. ಪಯ್ಲೆಂ ಪಯ್ಶೆ ದಿಲ್ಯಾರ್ ಜಾಲೆಂ" ತೇಂವೀ ಖಡಕ್ಕ್ ಸಾಂಗಾಲಾಗ್ಲೆಂ.
"ಬರೆಂ ಲಾಭ್ ಜಾಲ್ಯಾರ್ ತುಕಾ ಆನಿ ತುಜಾ ಭುರ್‍ಗ್ಯಾಂಕ್ - "
"ಕಿತೆಂ ಮ್ಹಣಾಲೊಯ್?!"
"ಸೊರ್ರಿ ಆಮ್ಚ್ಯಾ ಭುರ್‍ಗ್ಯಾಂಕ್. ಆನಿ ನಷ್ಟ್ ಜಾಲ್ಯಾರ್ ತುಂವೆಂ ತುಜಾ ಬಾಪಾಯ್ಚೆ ಹಾಡ್ನ್ ದೀಂವ್ಕ್ ಜಾಯ್, ಜಾಯ್ತ್‌ಗೀ?!"
"ಅರೇ ಕರ್‍ಮಾನೋ?! ಮ್ಹಜೊ ಬಾಪಯ್ ಮೆಲಾ ತೆಂ ನೆಣಾಂಯ್ಗೀ?!"
"ತೆಂ ಜಾಣಾಂ. ತಾಚಿ ಆಸ್ತ್ ಭಿತರ್ ಘಾಲ್ಲೊ ಪೂತ್ ನಾಂವೇ?!"
"ತಾಚಿ ಗಜಾಲ್ ಸೊಡ್. ಮ್ಹಜೆಂ ಭಾಂಗಾರ್ ಪುಣೀ ವಿಕುನ್ ತುಕಾ ದಿತಾಂ!"
"ಬರೆಂ, ಪೂಣ್ ಪರ್ತುನ್ ಭಾಂಗಾರ್ ಕರ್‍ನ್ ದಿ ಮ್ಹಣೊನ್ ಸಾಂಗೊಂಕ್ ನಜೊ. ತಾಂತುಂ ಆನಿಕೀ ಲುಕ್ಸಾಣ್ ಜಾಯ್ತ್ ಮ್ಹಾಕಾ...!" ಹಾಂವ್ ಘಾಬರ್‍ಲೊಂ.
"ತುಂ ಎಕ್ಲೊ ಸುರಾತೆಚಿ ಸುಕಿ ಕಟ್ಟಿ. ಪುರಾ ಹಾಂವ್ ಕಶಿ ಮಾಂಡಾವಳ್ ಕರ್‍ತಾಂ ಪಳೆ. ತುವೆಂ ಖಾಲಿ ತ್ಯಾ ದೀಸ್ ಸುಧಾರ್‍ಸಿಲ್ಯಾರ್ ಜಾಲೆಂ." ಭಾರೀ ಖುಶೆನ್ ಚಿತ್ಳಾಪರಿಂ ಉಡೊನ್ ಧಾಂವ್ಲೆಂ ಕಾತ್ರಿನ್.
ಹಾಂವ್ ಮಾತ್ರ್ ಪಯ್ಶೆ ಚಿಂತುನ್ ಕಾತ್ರಿಭಿತರ್ ಆಸ್‌ಲ್ಲ್ಯಾ ಪೊಪ್ಳಾಪರಿಂ ಜಾವ್ನ್ ಗೆಲ್ಲೊಂ.
ಮುಕ್ಲ್ಯಾ ಮಹಿನ್ಯಾಂತ್ ಪುತಾ ರಾಯನಾಚೊ ಕುಮ್ಗಾರ್ ಜಾಲ್ಲ್ಯಾನ್ ಇನ್ವಿಟೇಶನಾಂ ತಾಚ್ಯಾಚ್ ಮರ್‍ಜೆನ್ ಛಾಪ್ಲಿಂ. ’ನೋ ಪ್ರೆಜೆಂಟೇಶನ್’ ಮ್ಹಣ್ ಘಾಲುಂಕ್ ನಾ. ಬದ್ಲಾಕ್ ಭುರ್‍ಗ್ಯಾಂಕ್ ಫನ್, ಗೇಮ್ಸ್ ಆನಿ ಗಿಫ್ಟ್ ಆಸಾತ್ ಮ್ಹಣ್‌ಯೀ ಛಾಪ್ಲೆಂ. ಜುಸ್ತ್ ೧೨.೧೫ಕ್ ದನ್ಪಾರಾಂ ಕಾರ್‍ಯೆಂ ಸುರು ಜಾತಾ ಮ್ಹಣ್ ದಾಟ್ ಅಕ್ಷರಾಂನಿ ಛಾಪ್ಲೆಂ. ಜೆವ್ಣಾಕ್ ಶಹರಾಂತ್ಲ್ಯಾ ನಂಬರ್ ವನ್ ಕ್ಯಾಟರಿಂಗ್‌ವಾಲ್ಯಾಂಕ್ ಆರ್‍ಡರ್ ದಿಲೆಂ. ಮೆನೊಂತ್ ಚಾರ್ ಮಾಸಾಂ ಸಾಂಗ್ಲಿಂ. ಚಿಕನ್ ಫ್ರಾಯ್, ಬೀಫ್ ರೋಸ್ಟ್, ಮಟನ್ ಕುರ್‍ಮಾ ಆನಿ ಪೋರ್‍ಕ್ ಇಂದಾಲು. ರಷ್ಯನ್ ಸಲಾದ್, ಗ್ರೀನ್ ಸಲಾದ್, ಫ್ರೆಂಚ್ ಸಲಾದ್, ತೆಂಡ್ಳಿಂ ಸುಕಿಂ, ನವರತ್ನ ಕುರ್‍ಮಾ, ಪುಲಾವ್, ಸಾರ್, ಶಿತ್, ಲೊಣ್ಚೆಂ, ಕುಲ್ಪಿ... ಇತ್ಯಾದಿ.
ದೋನ್ ನಮುನ್ಯಾಂಚಿ ವಿಸ್ಕಿ, ಬೀರ್ ಕಾರ್‍ಟೂನಾಂ ಲೆಕಾರ್ ಸಾಂಗಿಲಾಗ್ಲೆಂ. ಘರಾಕ್ ಡೆಕೊರೇಶನ್, ಶಾಮಿಯಾನಾ, ಕರೆಂಟ್ ಗೆಲ್ಯಾರ್ ಜನರೇಟರ್‌ಯೀ ಬಂದಬಸ್ತ್ ಕೆಲೊ.
ಪುರಾ ಪುತಾಚಾ ಮೊಗಾನ್ ನ್ಹಯ್ ಗಿಫ್ಟಾಂಚಾ ಮೊಗಾನ್ ಆನಿ ಆಶೆನ್.
ಧಾರಾಳ್ ಕವರಾಂ ಮೆಳ್ತೆಲಿಂ. ಭಾಂಗಾರಾಚ್ಯೊ ಚೇಯ್ನಿ, ಲೊಕೆಟಾಂ ಮೆಳ್ತೆಲಿಂ. ಕುವೆಯ್ಟಾಂತ್ ತೊಮಾಸಾಚಾ ಭುರ್‍ಗ್ಯಾಂಕ್ ಮೆಳ್‌ಲ್ಲ್ಯಾಪರಿಂ ಮ್ಹಣ್ ಕಾತ್ರಿನ್ ಸ್ವಪ್ಣಾಂ ರಾವ್ಳೆರಾಂ ಬಾಂದುನ್೦ಚ್ ಆಸ್‌ಲ್ಲೆಂ.
ತ್ಯಾ ಎಕಾ ಬರ್‍ಯಾ ದಿಸಾ ಸಕಾಳಿಂಚಾ ಮಿಸಾರ್ ರಾಯನಾಚೊ ಕುಮ್ಗಾರ್. ಹಾಂವ್ ಸುಟಾಚೆರ್ ಆನಿ ಕಾತ್ರಿನ್ ಲಾಂಬ್ ದೆಗೆಚಾ ಪಾಂಚ್ ಹಜಾರಾಂಚಾ ಕಾಪ್ಡಾಚೆರ್.
ಮೀಸ್, ಕುಮ್ಗಾರ್ ಜಾತೆಚ್ ಕಿತೆಂ ಜಣ್ ರಾಯನಾಕ್ ಆನಿ ಆಮ್ಕಾಂ ವಿಶ್ ಕರುಂಕ್. ಕಾತ್ರಿನಾಕ್ ಭಾರೀ ಖುಶಿ, ಲೋಕ್ ಘರಾ ಮಾತ್ರ್ ನ್ಹಯ್ ಇಗರ್ಜೆಕ್‌ಯೀ ಆಯ್ಲಾ ಮ್ಹಣೊನ್. ಹರ್‍ಯೆಕ್ಲ್ಯಾಕ್ ಘರಾ ಕಾರ್‍ಯಾಕ್ ಯೇಂವ್ಕ್ ಪರತ್ ಒತ್ತಾಯ್ ಕರಿಲಾಗ್ಲೆಂ. ಸ್ಪೆಶಲ್ ಕಾರ್‍ಯೆಂ ಮಾಂಡುನ್ ಹಾಡ್ಲಾಂ ತೆಂವೀ ಸಾಂಗಾಲಾಗ್ಲೆಂ.
ಘರಾ ಸಾಡೆ ಧಾಂ-ಕ್ ಮ್ಯೂಜಿಕ್ ಬ್ಯಾಂಡ್ ಶ್ಯಾಮಿಯಾನಾಂ ದಿವೆ ವಿಲೆವರಿ ಜಾಲ್ಲಿ.
ಇಕ್ರಾ ವೊರಾರ್ ಎಕೇಕ್ ಪೆಗ್ಗ್ ಚಡವ್ನ್ ಮ್ಯೂಜಿಕ್‌ವಾಲ್ಯಾಂನಿ ವ್ಹಾಜೊಂಕ್ ಸುರು ಕೆಲೆಂ. ಕ್ಯಾಟರಿಂಗ್‌ವಾಲೆ ಹೆಣೆಂ-ತೆಣೆಂ ಧಾಂವಾಲಾಗ್ಲೆ. ಎಂ.ಸಿ. ಕೋಟ್ ಸಮಾ ಕರ್‍ನ್ ಮಯ್ಕಾಲಾಗಿಂ ಆಪ್ಲೊ ನಾಟಕ್ ರಿಯಸ್ಸಲ್ ಕರ್‍ತಾಲೊ. ಸೆಜಾರ್‍ಚಾ ಎಕ್ಲ್ಯಾ ದೊಗಾಂಕ್ ದೀಸ್-ಕೂಲ್ ದೀವ್ನ್ ಕುಮ್ಕೆಕ್ ಆಪಯಿಲ್ಲೆಂ.
ವೊರಾಂ ಬಾರಾ ಜಾತಾನಾ... ಮ್ಹಾಕಾ ಯೆಜ್ಮಾನ್ ಜಾವ್ನ್ ಸಯ್ರ್ಯಾಂಕ್ ಬರೊ ಯೆವ್ಕಾರ್ ಮಾಗೊಂಕ್ ಬಾಗ್ಲಾಲಾಗಿಂ ರಾವೊಂಕ್ ಕಾತ್ರಿನಾನ್ ಧಮ್ಕಿ ದಿಲಿ. ಹಾಂವ್ ಸೊಸ್ಣಿಕಾಯೆನ್ ಸಗ್ಳೆಂ ಸೊಸುನ್ ರಾವ್ಲೊಂ. ಭಿತರ್ ಪನ್ನಾಸ್ ಹಜಾರ್ ಧೊಸುನ್ ಆಸ್‌ಲ್ಲೆ.
ತಿತ್ಲ್ಯಾರ್ ಫೊನಾಂ ಎಕಾ ಪಾಟ್ಲ್ಯಾನ್ ಏಕ್ ಯೇಂವ್ಕ್ ಲಾಗ್ಲಿಂ. ರಾಯನಾಕ್ ವಿಶ್ ಕರ್‍ನ್ ಆಮ್ಕಾಂ ಸಾಂಗಾಲಾಗ್ಲೆ. ’ಅರ್‍ಜೆಂಟ್ ಕಾಮ್ ಪಡ್ಲಾಂ ಯೇಂವ್ಕ್ ಜಾಯ್ನಾಂ.’
’ಎಮರ್‍ಜೆನ್ಸಿ ಮೀಟಿಂಗ್ ಆಸಾ. ಸೊರ್ರಿ ಯೇಂವ್ಕ್ ಜಾಯ್ನಾ.’
’ಬೊಸಾ ಸಾಂಗಾತಾ ಆವ್ಚಿತ್ ಭಾಯ್ರ್ ವಸೊಂಕ್ ಆಸಾ.’
’ಬಾಯ್ಲ್ ಹುಶಾರ್ ನಾಂ. ಆಸ್ಪತ್ರೆಕ್ ವಸೊಂಕ್ ಆಸಾ.’
’ಭುರ್‍ಗೊ ಖೆಳ್ತಾನಾ ಪಡ್ಲೊ. ದಾಕ್ತೆರಾಸರ್‍ಶಿನ್ ವ್ಹರುಂಕ್ ಆಸಾ.’
’ಎಮರ್‍ಜೆನ್ಸಿ ಕೇಜ್ ಆಯ್ಲ್ಯಾ ಯೇಂವ್ಕ್ ಜಾಯ್ನಾಂ.’
’ಬಿಜ್ನೆಸ್ ಕ್ಲಾಂಯ್ಟ್ ಭಾಯ್ರ್ ಥಾವ್ನ್ ಆಯ್ಲಾ...’ ಇತ್ಯಾದಿ ಇತ್ಯಾದಿ.
ಮ್ಹಾಕಾ ಗಜಾಲ್ ಸಮ್ಜಾಲಿ.
ಹಾಂವ್ ಯೆವ್ಕಾರ್ ಕರುಂಕ್ ಬಾಗ್ಲಾರ್ ರಾವ್ಲೊಂ. ಕಾತ್ರಿನ್ ಫೊನಾರ್ ’ಯೆನಾಂ’ ಮ್ಹಣ್ತಾಲ್ಯಾಂಚೆ ಕಷ್ಟ್ ಆಯ್ಕೊಂಕ್ ಪಡ್ಲೆಂ, ಆನಿ ರಾಯಾನ್ ಪಾತೊಳಿ ಜೋಡ್ನ್ ಆಶೀರ್‍ವಾದಾಕ್ ರಾವ್ಲಾ.
ಎಕಾ ಕೊನ್ಶ್ಯಾಕ್ ಏಕ್ ಮೇಜ್ ಆನಿ ಡಬ್ಬೊ, ಗಿಫ್ಟಾಂ ಆನಿ ಕವರಾಂ ಖಾತಿರ್ ರಾಕೊನ್ ರಾವ್ಲಾ.
ವೊರ್ ಏಕ್ ಜಾತಾನಾ ಪನ್ನಾಸ್ ಜಣಾಂ ಆಯ್ಲಿಂ. ದೇಡ್ ಜಾತಾನಾ ಸಕ್ಡಾಂಕ್ ಕುಡ್ಸಿಲ್ಯಾರ್ ಆಮ್ಕಾಂ, ವಾಡ್ತೆಲ್ಯಾಂಕ್, ಗಾಯ್ತೆಲ್ಯಾಂಕ್, ಮಾಯ್ಕಾವಾಲ್ಯಾಂಕ್, ಎಮ್.ಸಿ.ಕ್ ಮ್ಹಣೊನ್ ಶೆಂಬೊರಾ ಲಾಗಿಂ ಲೋಕ್ ಜಾಲೊ. ಎಮ್.ಸಿ.ನ್ ಧಾ ಪಾವ್ಟಿಂ ’ಸುರು ಕರ್‍ತಾಂ ಸುರು ಕರ್‍ತಾಂ’ ವಿಚಾರ್‍ಲ್ಯಾ ಉಪ್ರಾಂತ್ ’ಸುರು ಕರ್’ ಮ್ಹಣ್ ಕಾತ್ರಿನಾನ್ ಸಾಂಗ್ತಾನಾ ತಾಚೆಂ ’ಸುರುಂ ಜಾಲೆಂ.’
ಗೇಮ್ಸಾಂತ್ ಕಿತ್ಲಿಂ ಪ್ರಯ್ಜಾಂ ದಿಲ್ಯಾರೀ ಮನಿಸ್ ಉಣೆಂ ಪಡ್ತಾತ್.
ಆಯಿಲ್ಲ್ಯಾಂಪಯ್ಕಿ ಎಕೇಕಾ ಘರಾ ಥಾವ್ನ್ ಚಾಚಾರ್ ಜಣಾಂ ಆಸ್‌ಲ್ಲಿಂ ಆನಿ ಚಡ್ ಕರ್‍ನ್ ಲ್ಹಾನ್ಶೆಂ ಗಿಫ್ಟ್ ಹಾಡ್ನ್ ಆಯ್ಲ್ಯಾಂತ್. ಎಮ್.ಸಿ.ನ್ ಪ್ರಯ್ಜಾಂ ಮುಗ್ದೊಂವ್ಚ್ಯಾಖಾತಿರ್ ಸ್ಪೋಟ್ ಗಿಫ್ಟಾಂ ಕಿತೆಂ ಕಿತೆಂ ತೊಂಡಾಕ್ ಆಯಿಲ್ಲೆಂ ಸಾಂಗೊನ್ ಆಯಿಲ್ಲ್ಯಾಂಕ್ ವಾಂಟ್ಲಿಂ.
ಸಗ್ಳ್ಯಾ ಕಾರ್‍ಯಾಂತ್ ಶೀದಾ ಸಾದೊ ಮನಿಸ್ ಮ್ಹಳ್ಳೆಂ ಏಕ್ ಪ್ರಯ್ಜ್ ಮ್ಹಾಕಾಯೀ ಮೆಳ್ಳೆಂ.
ಚಡ್ ಮೊಲಾಚಾ ಕಾಪ್ಡಾರ್ ಸೊಭ್ಚ್ಯಾ ಬಾಯ್ಲೆಚೆಂ ಪ್ರಯ್ಜ್ ಕಾತ್ರಿನಾಕ್ ಮೆಳ್ಳೆಂ.
ಹರ್‍ಯೆಕ್ ಪ್ರಯ್ಜಾಂ ವಾಂಟ್ತಾನಾ ಮ್ಹಜ್ಯಾ ಕಾಳ್ಜಾಂತ್ ಮುಸ್ಳಾಂ ಕಾಂಡ್ತೆಲಿಂ.
ಕಾತ್ರಿನ್ ಗಿಫ್ಟಾಂ ದವರ್‍ಚ್ಯಾ ಮೆಜಾಚೆರ್ ಅರ್‍ದಿಂ ಗಿಫ್ಟಾಂಯೀ ನಾತ್‌ಲ್ಲೆಂ ಪಳೆವ್ನ್ ಶಿರಿಂ ಚುಕೊನ್ ಗೆಲ್ಲೆಂ.
’ಲಾಬ್ ನಾತ್ಲ್ಯಾರೀ ವ್ಹಡ್ ನಾಂ ಲುಕ್ಸಾಣ್ ಕರಿನಾಕಾ’ ಮ್ಹಣೊನ್ ದೆವಾಲಾಗಿಂ ಮನಿಂಚ್ ಮಾಗೊಂಕ್ ಲಾಗ್ಲೆಂ. ಪುಣ್ ವೇಳ್ ಉತರ್‍ನ್ ಗೆಲ್ಲೊ.
ಲೋಕ್ ಖಾವ್ನ್ ಪಿಯೆವ್ನ್ ನಾಚೊಂಕ್‌ಲಾಗ್ಲೊ. ಗಿಫ್ಟ್ ದಿಲಾಂ ಮ್ಹಣೊನ್ ಸುಶೆಗಾತ್ ಘೊಟ್ತಾಲೆ, ಖಾತಾಲೆ.
ಕಾತ್ರಿನಾನ್ ದುಖ್‌ಲ್ಲ್ಯಾ ಕಾಳ್ಜಾಂತ್, ಭರ್‌ಲ್ಲ್ಯಾ ಸಿಂತಿಮೆಂತಾಂನಿ ವಿಚಾರ್‍ಲೆಂ.
"ಹಾಂವೆಂ ಕ್ಲೋಸ್ ಮನ್ಶ್ಯಾಂಕ್, ಯೆಂವ್ಚ್ಯಾಚ್ ಮನ್ಶ್ಯಾಂಕ್ ಸಾಂಗ್‌ಲ್ಲೆಂ, ದಾಕ್ಷೆಣೆಕ್ ಪುಣೀ ಯೇಂವ್ಕ್‌ನಾಂತ್ ಕಿತ್ಯಾಕ್?!" ದೊಳ್ಯಾಂತ್ ದುಃಖಾಂಚೆ ಟ್ಯಾಪ್ ಉಗ್ತೆ ಜಾಲೆಂ.
"ಆತಾಂ ರಡಾನಾಕಾ ’ಪಯ್ಶ್ಯಾಂಕ್ ದಾಕ್ಷೆಣ್ ನಾಂ’ ದೆಕುನ್ ಫೊನಾರ್ ವಿಶ್ ಕರ್‍ನ್ ಕಾಯ್ದೊ ತಿರ್‍ಸಿಲಾ. ಆನಿ ಹಾಂಗಾ ಯೆವ್ನ್ ವಿಶ್ ಕರ್‍ಚ್ಯಾಕ್ ಸೆನ್ಸ್ ನಾಂ, ಕಿತ್ಯಾಕ್ ಗಿಫ್ಟ್ ದೀವ್ನ್ ಜೆಂವ್ಚೆಂ ಸೆನ್ಸ್‌ಲೆಸ್ಸ್ ಮಾತ್ರ್ ನ್ಹಯ್ ನಾನ್‌ಸೆನ್ಸ್ ಕಳ್ಳೆಂಗೀ? ಆನಿ ತರೀ ತುಜೆಂ ವೊದ್ದುವಾರಂಟ್ ಸೊಡ್. ಆನಿ ಜೇವ್..." ಹಾಂವೆಂ ಕಂಗಾಲ್ ಜಾವ್ನ್ ಸಾಂಗ್ಲೆಂ. ಕಾತ್ರಿನ್ ಕ್ಯಾಟರಿಂಗ್‌ವಾಲ್ಯಾಂಕ್ ಆನಿ ಜೆವ್ಣಾಕ್ ತೊಂಡ್ ಪಳೆಯ್ನಾಸೆಂ ರಾಗಾನ್, ಬೆಜರಾಯೆನ್ ಭುಕೆನ್೦ಚ್ ನಿದೊಂಕ್ ಗೆಲೆಂ.
Tags:
Lancy Pinto Nayak, Konkani Comedy, Kuwait, Konkani Kulwar, Konkani Jokes, Usturem, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
1 Comment/s.
Hats off to wtiter… he is my favourite writer…