:: ಮಾಯ್ ಭಾಸ್

ತಿಯೊಚಾ ಮತಿಂತ್ ಆತಾಂ ವಾದಾಳ್ ಉಟ್‌ಲ್ಲೆಂ. ಹೆಂ ಕಿತೆಂ ಘಡ್ಲೆಂ ಆಜ್? ಸಕಾಳಿಂ ಫುಡೆ೦ಚ್ ಮೆನೆಜರಾನ್ ಲೊನಾ ವಿಶ್ಯಾಂತ್ ಸಾಂಗೊನ್ ತಾಚಿ ತಕ್ಲಿ ಅರ್ಧಿ ಪಿಸಾಂತುರ್ ಕೆಲ್ಲಿ ತರ್ ಆತಾಂ ಮಾರ್ಕುಚಾ ಘರಾ ತಾಕಾ ಬೊಲ್ತೆಂಚ್ ಆಯ್ಕೊಂಕ್ ಮೆಳ್ಳೆಂ. ತಾಚೆಂ ಗಿನ್ಯಾನ್ ಥಾರ್‍ಯಾರ್ ನಾತ್‌ಲ್ಲೆಂ. ತೊ ಅಲಂಗಾರ್ ಥಾವ್ನ್ ಕೊಡ್ಯಾಳಾಕ್ ವೆಚಾ ಬಸ್ಸಾರ್ ಚಡ್ಲೊ.

ಬಸ್ಸಾರ್ ವೆಚಾ ತಿಯೊಚಾ ಮತಿಂತ್ ಹಜಾರ್ ನಮೂನ್ಯಾಚಿಂ ಚಿಂತ್ನಾಂ ಘುಂವೊಂಕ್ ಲಾಗ್ಲಿಂ. ಘಡ್ಯೆ ಘಡ್ಯೆ ತೊ ಬೊಸ್‌ಲ್ಲೆ ಕಡೆಚ್ ಉದ್ರೇಕಿತ್ ಜಾಲೊ. ಘಡ್ಯೆನ್ ರಾಗಾನ್ ಪೆಟ್ತಾಲೊ ಆನಿ ಆಪ್ಲ್ಯಾ ಹಾತಾಚೊ ಮುಟಿ ಬಿಗ್ದಿತಾಲೊ. ರಾಗಾನ್ ತಾಚಿ ಸಗ್ಳಿ ಕೂಡ್ ಕಾಂಪೊಂಕ್ ಲಾಗ್ಲಿ. ಎದೊಳ್‌ಚ್ ರಗಾತ್ ವಾಳ್‌ಲ್ಲೊ ಆಪ್ಲೊ ಹಾತ್ ದುಕ್ತಾಲೊ. ಪುಣ್ ತಾಚಾ ಮತಿಂತ್ ಆಸ್‌ಲ್ಲ್ಯಾ ದುಃಖಿ ಮಧೆಂ ಹಿ ದೂಃಖ್ ಚಿಲ್ಲರ್ ಮ್ಹಣೊನ್ ತಾಕಾ ಭೊಗ್ಲೆಂ.

ಕಿತ್ಲೆ೦ ವ್ಹಡ್ ಆಘಾತ್ ಆಪ್ಣಾಕ್? ಆಪ್ಣಾನ್ ಆತಾಂ ಹೆಂ ಸತ್ ತರ್ ಕಶೆಂ ಸೊಸ್ಚೆಂ ಮ್ಹಳ್ಳೆಂ ತಾಕಾ ಕಳ್ಳೆಂನಾ.

ಕೊಡ್ಯಾಳಾಕ್ ಪಾವ್‌ಲ್ಲೊ ತಿಯೊ ಸರ್ಕಾರಿ ಆಸ್ಪತ್ರೆಕ್ ಗೆಲೊ ಆನಿ ಆಪ್ಲ್ಯಾ ತಪಾಸ್ಣೆ ಖಾತಿರ್ ಡೊಕ್ಟರಾಕ್ ಭೆಟ್ಲೊ. ಡೊಕ್ಟರಾನ್ ತಾಚೆಂ ರಗಾತ್, ಮೂತ್ ಘೆತ್ಲೆಂ ಆನಿ ತಾಚಾ ಬಾವ್ಳ್ಯಾಚಿ, ಹರ್ದ್ಯಾಚಿ ತಪಾಸ್ಣಿ ಕರುನ್ ತಿಯೊಚಾ ರಗ್ತಾಚೆಂ ವತ್ತಡ್ ಚಡ್‌ಲ್ಲಿ ಸಂಗತ್ ಸಾಂಗ್ಲಿ. ಆನಿ ಸಗ್ಳೊ ರಿಪೋರ್ಟ್ ಫ಼ಾಲ್ಯಾಂ ಮೆಳ್ತಾ ಮ್ಹಣೊನ್ ತಿಯೊಕ್ ತೊ ರಿಪೊರ್ಟ್ ವರುಂಕ್ ದುಸ್ರೆ ದೀಸ್ ಆಪಯ್ಲೊ.

ಗಲ್ಫಾಂತ್ ಆಸ್ತಾನಾ ಜಾಲ್ಯಾರೀ ತಿಯೊಕ್ ಮೀಟ್ ಖಾಂವ್ಕ್ ನಾತ್‌ಲ್ಲೆಂ. ದೆಖುನ್ ಮೀಟ್ ನಾತ್‌ಲ್ಲೆಂ ನಿಸ್ತೆಂ ತೊ ಖಾತಾಲೊ. ಚಡ್ ತೆಲಾಚೆಂ, ಗೊಡ್ಶೆಂ, ಯಾ ಶಿತ್, ಖಾಂವ್ಕ್ ನಾತ್‌ಲ್ಲೆಂ. ಸೊರೊ ಬಿಲ್ಕು ಪಿಯೆಂವ್ಕ್ ನಾತ್‌ಲ್ಲೊ. ಪುಣ್ ಪಾಟ್ಲ್ಯಾ ಥೊಡ್ಯಾ ದಿಸಾಂ ಥಾವುನ್ ವಕ್ತಾಂಯ್ ಘೆಂವ್ಕ್ ನಾತ್‌ಲ್ಲ್ಯಾನ್ ಪರ್ತುನ್ ತಿಯೊಕ್ ಆಪ್ಲಿ ಪಿಡಾ ಅನ್ಯೇಕಾ ಕುಶಿನ್ ಧೊಸುಂಕ್ ಲಾಗ್ಲಿ.

ತೊ ಆಸ್ಪತ್ರೆ ಥಾವ್ನ್ ಭಾಯ್ರ್ ಆಯ್ಲೊ. ವೊರಾಂ ಎದೊಳ್‌ಚ್ ಚಾರ್ ಜಾಂವ್ಚಾರ್ ಆಸ್‌ಲ್ಲಿಂ. ಭಾಯ್ರ್ ಯೆತಾನಾ ತಾಕಾ ಸಗ್ಳೊ ಗಾಂವ್‌ಭರ್ ಕಾಳೊಕ್ ಭರ್ಲಾಶೆಂ ಭೊಗ್ಲೆಂ. ತಾಣೆಂ ರಾವ್‌ಲ್ಲಿ ಧರ್ತಿ ಕಾಂಪ್ತಾಲಿ ಅಶೆಂ ಭೊಗ್ಲೆಂ. ಏಕ್ ನರ್ ಮನಿಸ್ ತಾಚಾ ದೊಳ್ಯಾಂಕ್ ದಿಸ್ಲೊನಾ. ಆಪುಣ್ ಖಂಯ್ ಆಸಾಂ ಕಿತೆಂ ಕರ್ತಾಂ ಮ್ಹಳ್ಳೆಂ ಚಿಂತುನ್ ತೊ ಚಲ್ತಾಲೊ ಆನಿ ಎಕಾಚ್‌ಫ಼ರಾಂ ಕೊಣೆಂಗೀ ಜೊರಾನ್ ಹೋರ್ನ್ ಘಾಲ್ಚೆಂ ಆಯ್ಕಲೆಂ. ತೊ ರಸ್ತ್ಯಾ ಮಧೆಂ ಆಸ್‌ಲ್ಲೊ ಆನಿ ವೆಗಾನ್ ಯೆಂವ್ಚಾ ಲೊರಿಯೆನ್ ಬ್ರೇಕ್ ಘಾಲ್ಚಾ ಪಯ್ಲೆಂ ತಿಯೊಕ್ ಮಾರ್ನ್ ಪಾಪುಡ್ನ್ ಜಾಲ್ಲೊಚ್. ಆನಿ ತಿಯೊ ರಗ್ತಾಚೆಂ ಕೊಂಡಾಂತ್ ಬುಡೊನ್ ರಸ್ತ್ಯಾ ಮಧೆಂ ಪಡ್ಲೊಚ್.

ಲೊರಿ ತಿಯೊಕ್ ಆಪ್ಟೊನ್ ಕುಶಿಚಾ ಕಾಂಬ್ಯಾಕ್ ಆಪ್ಟೊನ್ ಡ್ರಾಯ್ವರ್ ಸ್ಟಿಯರಿಂಗಾ ವಯ್ರ್ ಮತ್ ಚುಕೊನ್ ಪಡ್‌ಲ್ಲೊ. ತಾಕಾಯ್ ಇಲ್ಲೊ ಮಾರ್ ಜಾಲ್ಲೊ. ಲೋಕ್ ಸಗ್ಳೊ ಪಳೆತಾಲೊ ತರೀ ಕೊಣೀಂ ಲಾಗಿಂ ಯೇಂವ್ಕ್ ಭಿಯೆತಾಲಿಂ. ಮನ್ಶಾಪಣಾಚೆಂ ಚಿಂತಾಪ್ ಚಿಂತುನ್ ಕಾಂಯ್ ಎಕ್ಲೊ ಮುಖಾರ್ ಯೇತ್ ಜಾಲ್ಯಾರ್ ಫಾಲ್ಯಾಂ ಕಾಂಯ್ ತಾಕಾ ಚಡ್ ಉಣೆಂ ಆಯ್ತ್ ತರ್ ಉಪ್ರಾಂತ್ ಪೊಲಿಸ್, ಕೋರ್ಟ್ ಮ್ಹಣೊನ್ ಕೊಣೆಂ ನಾಸ್ಚೆಂ ಮ್ಹಣೊನ್ ಕೊಣೀಂ ಮುಖಾರ್ ಆಯ್ಲೆನಾಂತ್.

ಸಭಾರ್ ವೇಳ್ ಪರ್‍ಯಾಂತ್ ತಿಯೊ ರಸ್ತ್ಯಾರ್ ಮತ್ ಚುಕೊನ್ ಪಡ್‌ಲ್ಲೊ. ತಾಚಾ ತಕ್ಲೆಕ್ ಜ್ಯೊರಾಚೊ ಮಾರ್ ಜಾಲ್ಲೊ ಆನಿ ಧಾರಾಳ್ ಮಾಪಾನ್ ರಗಾತ್ ವಾಳ್ತಾಲೆಂ. ತ್ಯಾ ಲೊಕಾಂ ಮಧೆಂ ಎಕ್ಲೊ ಸಾಂತ್ ವಿಶೆಂತ್ ಪಾವ್ಲಾಚಾ ಸಭೆಂತ್ ಮೆಳ್‌ಲ್ಲೊ ಭಾವ್ ಆಸ್‌ಲ್ಲೊ. ತಾಣೆಂ ತುರ್ತಾನ್ ಪೊಲಿಸಾಂಕ್ ಖಬಾರ್ ದಿಲಿ ಆನಿ ಯೇವ್ನ್ ತಿಯೊಕ್ ಉಟಂವ್ಕ್ ಪ್ರೇತನ್ ಕೆಲೆಂ. ತವಳ್ ಚಾ ಪಿಯೆಂವ್ಕ್ ಗೆಲ್ಲೊ ಟ್ರಾಫಿಕಾಚೊ ಪೊಲಿಸ್ ಥಂಯ್ ಪಾವ್ಲೊಚ್.

ಮತಿರ್ ಆಯಿಲ್ಲ್ಯಾ ಡ್ರಾಯ್ವಾರಾಕ್ ಬರೊ ಆಸ್‌ಲ್ಲ್ಯಾನ್ ಪೊಲಿಸಾಂನಿ ಸ್ಟೇಶನಾಕ್ ವೆಲೊ.

ತಿಯೊಚಾ ಬೊಲ್ಸಾಂತ್ ಆಸ್ಚಾ ಬೆಂಕಾಚಾ ರಶೀದೆವರ್‍ವಿಂ, ಆನಿ ಹೆಚ್ಚ್ ಆಸ್ಪತ್ರೆಂತ್ ತೊ ಯೇವ್ನ್ ಗೆಲ್ಲೊ ಆನಿ ತ್ಯಾ ಆಸ್ಪತ್ರೆಚಿ ಲ್ಹಾನ್ ಚೀಟ್ ಆಸ್‌ಲ್ಲ್ಯಾನ್ ತಿಯೊಚಾ ಘರ್ಚಾಂಕ್ ಖಬಾರ್ ದಿಲಿ.

ಸಾಂಜೆಚಾ ವೆಳಾರ್ ಹಿ ಖಬಾರ್ ಆಯ್ಕೊನ್ ಎಸ್ತೆಲ್ ಸಗ್ಳೆಂ ಶೆಳೆಲೆಂ. ತಾಕಾ ಕಿತೆಂಯ್ ಕರುಂಕ್ ಜಾಲೆಂನಾ. ಎದೊಳ್ ಪರ್‍ಯಾಂತ್ ಲತೀಫ್ ಖಂಚಾಯ್ ಗರ್ಜಾಂಕ್ ಪಾವ್ತಾಲೊ. ಆತಾಂ ತಾಚೊ ಘಾತ್ ನಿಹಾಳುನ್ ಪರತ್ ತಾಚೆಸಂಗಿಂ ಕೆದಿಂಕ್‌ಚ್ ಕಾಂಯ್ ಉಪ್ಕಾರ್ ಮಾಗ್ಚೊ ನ್ಹಂಯ್. ತ್ಯಾ ಶಿವಾಯ್ ಜೊಯೆಲ್ ಘರಾ ಪಾಟಿಂ ಯೆತಾನಾ ವೊರಾಂ ಧಾ ಉತರ್ತಾಲಿಂ. ಜಿವಿತಾಯ್ ಎದೊಳ್ ಘರಾ ಪಾಟಿಂ ಯೇಂವ್ಕ್ ನಾತ್‌ಲ್ಲ್ಯಾನ್ ತಾಕಾ ಕಿತೆಂ ಕರ್ಚೆಂ ಮ್ಹಳ್ಳೆಂಚ್ ಕಳ್ಳೆಂನಾ.

ತೆಂ ಕೊಡ್ಯಾಳ್ ವಚೊಂಕ್ ನೆಸೊನ್ ರಾವ್ಲೆಂ ಪುಣ್ ಎಕ್ಲ್ಯಾನ್ ಗೆಲ್ಯಾರ್ ಪಾಟಿಂ ಯೇಂವ್ಕ್ ಜಾಂವ್ಚೆಂನಾ ಮ್ಹಣೊನ್ ತೆಂ ದಾವಿದಾಗೆರ್ ಗೆಲೆಂ. ಕಾಮ್ ಸುಟೊನ್ ಆಯಿಲ್ಲೊ ದಾವಿದ್ ಅವ್ಚಿತ್ ಆಯಿಲ್ಲ್ಯಾ ಎಸ್ತೆಲಾಕ್ ಪಳೆವ್ನ್ ಅಜಾಪ್ಲೊ. ತಿಯೊ ರಸ್ತ್ಯಾ ಆವ್ಘಡಾಂತ್ ಪಡ್ಲಾ ಮ್ಹಳ್ಲೆಂ ಕಳ್ತಚ್ ಉಟಾಉಟಿಂ ಹಾತ್ ಪಾಂಯ್ ಧುವ್ನ್ ವೆಗಿಂ ವೆಗಿಂ ಭಾಯ್ರ್ ಸರ್ನ್ ಎಸ್ತೆಲಾ ಸವೆಂ ಕೊಡ್ಯಾಳಾಕ್ ಆಯ್ಲೊ.

"ಮ್ಹಾಕಾ ಮಾಫ್ ಕರ್ ದಾವಿದಾ, ತುಕಾ ಹಾಂವ್ ಬೆಶ್ಟಿಂ ದುಸ್ಮಾನ್ ಕರ್ನ್ ಘೆತ್ಲೊ, ತರೀ ತುಂ ಮ್ಹಜಾ ಗರ್ಜಾಂಕ್ ಪಾವ್ಲೊಯ್."

"ಸೆಜ್ ಸಾಂಬಾರ್ ಮ್ಹಣ್ತಾನಾ ಅಸಲಿಂ ಲ್ಹಾಲ್ಹಾನ್ ಝಗ್ಡಿಂ ಚಲ್ತಾತ್‌ಚ್ ಎಸ್ತೆಲಾ. ಪುಣ್ ಎಕಾ ರಾಗಾಕ್ ಎಕಾ ಬಾಂಯ್ತ್ ಉಡಿ ಮಾರ್ಚಿ ನ್ಹಂಯ್. ಸುಧಾರ್ಸುನ್ ಚಲ್ಚಿ ಗರ್ಜ್ ಆಸಾ. ಜಾಲ್ಲೆಂ ಸಗ್ಳೆಂ ಜಾವ್ನ್ ಗೆಲಾಂ. ತೆಂ ಆತಾಂ ಉಸ್ತುಂವ್ಚೆಂ ನಾಕಾ, ಆತಾಂ ತಿಯೊಕ್ ದೆವಾನ್ ರಾಕ್ಲೊ ತರ್ ಪುರೊ."

ಸಾಂಜೆಚಾ ಸಾಡೆ ಸಾತ್ ವೊರಾಂಕ್ ಕೊಡ್ಯಾಳಾಕ್ ಪಾವ್‌ಲ್ಲ್ಯಾ ಎಸ್ತೆಲಾಕ್ ಆನಿ ದಾವಿದಾಕ್ ತ್ಯಾ ಆಸ್ಪತ್ರೆಂತ್ ತಿಯೊಕ್ ಸೊಧುನ್ ಕಾಡುಂಕ್ ಚಡ್ ವೇಳ್ ಜಾಲೊನಾ. ತ್ಯಾ ಶಿವಾಯ್ ಮತಿರ್ ನಾತ್‌ಲ್ಲ್ಯಾ ತಿಯೊಕ್ ಪಳೆಂವ್ಕ್ ಎದೊಳ್‌ಚ್ ಏಕ್ ದೋನ್ ನರ್ಸಾಂ ಆಸ್‌ಲ್ಲಿಂ ಬರೆಂಚ್ ಜಾಲೆಂ. ನರ್ಸಾಂನಿ ದಾವಿದಾಕ್ ಆನಿ ಎಸ್ತೆಲಾಕ್ ಪಳೆವ್ನ್ ತಿಯೊಕ್ ಜಾಯ್ ಜಾಲ್ಲಿಂ ವಕ್ತಾಂ ಆನಿ ಗ್ಲೂಕೊಸ್ ಹಾಡುಂಕ್ ಏಕ್ ಚೀಟ್ ದಿಲಿ ಆನಿ ತಾಣಿಂ ಭಾಯ್ರ್ ವಚೊನ್ ತಿಂ ಸಗ್ಳಿಂ ವಕ್ತಾಂ ಘೆವ್ನ್ ಆಯ್ಲಿಂ.

ತಿಯೊಕ್ ಎದೊಳ್‌ಚ್ ದುಸ್ರಿ ಬೋತ್ಲ್ ಗ್ಲೂಕೊಸ್ ಚಡಯಿಲ್ಲೊ. ತರೀ ತೊ ಅಜೂನ್ ಮತಿರ್ ನಾತ್‌ಲ್ಲೊ. ತ್ಯಾ ಭಾಯ್ರ್ ತಾಚಾ ಕುಡಾಂತ್ ಹೆರ್ ದೋಗ್ ಪಿಡೇಸ್ತ್ ಆಸ್‌ಲ್ಲೆ. ತಾಂತ್ಲ್ಯಾ ಎಕ್ಲ್ಯಾ ತರ್ನ್ಯಾಟ್ಯಾನ್ ಎಸ್ತೆಲಾಕ್ ಬೊಸೊಂಕ್ ಆಪ್ಲಿ ಖಾಟ್ ದಿಲಿ ಆನಿ ಉಟೊನ್ ತಿಯೊಚಾ ಪಾಂಯಾಲಾಗಿಂ ಬೊಸ್ಲೊ. ಅನ್ಯೇಕಾ ಕುಶಿನ್ ದಾವಿದ್ ಬೊಸೊನ್ ತಿಯೊಕ್ ಮತಿರ್ ಯೇಂವ್ಕ್ ರಾಕ್ತಾಲೆ.

ಸಗ್ಳಿ ರಾತ್ ಬೊಸೊನ್ ಆಸ್ಲ್ಯಾರೀ ದಾವಿದ್ ಜಾಂವ್ ಎಸ್ತೆಲ್ ಜಾಂವ್ ಜೆಂವ್ಲಿನಾಂತ್. ಎಸ್ತೆಲಾಚಿ ಮತ್ ಮಾತ್ರ್ ಘರಾಂತ್ ಆಸ್‌ಲ್ಲಿ. ಭುರ್ಗಿಂ ಜೆವ್ಲ್ಯಾಂತ್‌ಗೀ ನಾಂತ್‌ಗೀ ಮ್ಹಣೊನ್. ಭುರ್ಗ್ಯಾಂಚಿ ಜತನ್ ಘೆಂವ್ಕ್ ಎಸ್ತೆಲಾನ್ ಎದೊಳ್‌ಚ್ ಎಲಿಜಾಕ್ ಸಾಂಗ್‌ಲ್ಲೆಂ ಬರೆಂಚ್ ಜಾಲೆಂ ಮ್ಹಣೊನ್ ಲೆಕ್ಲೆಂ. ವೊರಾಂ ಫಾಂತ್ಯಾಚಿಂ ಸಾಡೆ ಪಾಂಚ್ ಜಾತಾನಾ ಹಳ್ತಾರ್ ದಾವಿದಾನ್ ದೊಳೆ ಉಗ್ತೆ ಕೆಲೆ. ತೊ ಖಂಯ್ ಆಸಾ ಮ್ಹಳ್ಳೆಂ ತಾಕಾ ಸಮ್ಜೊಂಕ್ ಇಲ್ಲೊ ವೇಳ್ ಲಾಗ್ಲೊ. ಮುಖ್ಲ್ಯಾನ್ ಬೊಸೊನ್ ಜೆಮೆಂವ್ಚೊ ಎಕ್ಲೊ ತರ್ನಾಟೊ, ಆನಿ ದೀಸ್‌ಭರ್ ಕಾಮ್ ಕರ್ನ್ ಥಕ್‌ಲ್ಲೊ ದಾವಿದ್ ಆನಿ ಕುಶಿಚ್ ಬೊಸೊನ್ ನಿದ್‌ಲ್ಲೆಂ ಎಸ್ತೆಲ್ ಹಾಂಕಾ ಪಳೆವ್ನ್ ಎಕಾಚ್ಚ್‌ಫರಾಂ ತಿಯೊಕ್ ಸುಸ್ತಾಲೆಂ ಆಪುಣ್ ಆಸ್ಪತ್ರೆಂತ್ ಆಸಾಂ ಮ್ಹಳ್ಲೆಂ. ತಾಚಾ ತಕ್ಲೆಚೆರ್ ಬೆಂಡೆಜ್ ಘಾಲ್ಲೆಂ. ಆಪ್ಲ್ಯಾ ಹಾತಾಕ್ ಸುವಿಯೊ ತೊಪ್‌ಲ್ಲ್ಯೊ ಆನಿ ಗ್ಲೂಕೊಸಾಚೊ ನಳಿಯೊ ಚೆಪ್‌ಲ್ಲ್ಯೊ.

ತಾಚೊ ಉಡಾಸ್ ಪಾಟಿಂ ಗೆಲೊ. ಸಕಾಳಿಂ ಬೆಂಕಾಕ್ ಗೆಲ್ಲೊ, ತ್ಯೇ ಉಪ್ರಾಂತ್ ಮಾರ್ಕುಚಾ ಘರಾ ಗೆಲ್ಲೊ. ದೋನ್ ಜಾಗ್ಯಾಂನಿ ದೋನ್ ರಿತಿಂಚೊ ಆಘಾತ್ ಘೆವ್ನ್ ಕೊಡ್ಯಾಳ್ ಆಯಿಲ್ಲೊಂ ಆನಿ ಉಪ್ರಾಂತ್ ಆಪ್ಲ್ಯಾ ಪಿಡೆ ವಿಶ್ಯಾಂತ್ ಕಳೊನ್ ಆಯಿಲ್ಲೆಂ. ಉಪ್ರಾಂತ್ ತಕ್ಲಿ ಘುಂವೊಳ್ ಯೆತಾನಾ ಪಯ್ಸ್ ಥಾವ್ನ್ ವೇಗಾನ್ ಹೋರ್ನ್ ಘಾಲುನ್ ಯೆಂವ್ಚಿ ಲೊರಿ ಆಪ್ಣಾಕ್ ಆಪ್ಟಾಲ್ಲಿ. ಎಕಾ ಪಾಟ್ಲ್ಯಾನ್ ಏಕ್ ತಾಕಾ ಉಡಾಸ್ ಆಯ್ಲೆಂ. ತೊ ಹಳ್ತಾರ್ ಪಿಂರ್ಗಲೊ. ತಾಚಾ ಉಜ್ವ್ಯಾ ಹಾತಾಚಾ ಮುಟಿಕ್‌ಯಿ ವಕಾತ್ ಘಾಲ್ನ್ ಪಟ್ಟಿ ಬಾಂದ್‌ಲ್ಲಿ.

ತಿಯೊ ಮತಿರ್ ಆಯಿಲ್ಲೆಂ ತಾಚೆ ದೊಳೆ ಉಗ್ತೆಂ ಆಸ್ಚೆ ಪಳೆತಾನಾ ದಾವಿದಾಕ್ ಸಮ್ಜಾಲೆಂ. ತಾಣೆಂ ವಚೊನ್ ನರ್ಸಾಂಕ್ ಖಬಾರ್ ದಿಲಿ. ಎಸ್ತೆಲ್‌ಯ್ ಉಟ್ಲೆಂ. ಪುಣ್ ತಿಯೊನ್ ತೋಂಡ್ ಉಗ್ತೆಂ ಕೆಲೆಂನಾ. ತಾಚಾ ತೊಂಡಾರ್ ಕಸ್ಲಿಂಚ್ ಭಗ್ಣಾಂ ನಾತ್‌ಲ್ಲಿಂ. ದಾವಿದ್ ಉಲಯ್ತಾಲೊ "ತುಕಾ ಕಾಂಯ್ ಜಾಂವ್ಕ್ ನಾ ತಿಯೊ, ತುಂ ವೆಗಿಂಚ್ ಬರೊ ಜಾತಾಯ್. ದೆವಾನ್ ತುಕಾ ರಾಕ್ಲೆಂ. ತುಂ ಕಾಂಯ್ ಭಿಂಯನಾಕಾ. ವೆಗಿಂಚ್ ಬರೊ ಜಾವ್ನ್ ಯೆತಾಯ್ ಪಳೆ" ದಾವಿದಾಚಾ ಉತ್ರಾಂನಿ ತಿಯೊಕ್ ಕಸ್ಲೊಚ್ ಪರಿಣಾಮ್ ಜಾಲೊನಾ. ತಾಚಾ ತೊಂಡಾಚೊ ಜಿನೊಸ್ ಬದ್ಲಲೊ ನಾ. ತೊ ವಗೊಚ್ ಬೊಸ್ಲೊ. ನರ್ಸಾಂನಿ ಯೇಂವ್ನ್ ತಾಕಾ ಚಡ್ ತ್ರಾಸ್ ದಿಂವ್ಚೆಂ ನಾಕಾತ್ ಮ್ಹಣೊನ್ ಸಾಂಗ್ಲೆಂಚ್ ದಾವಿದ್ ಆನಿ ಎಸ್ತೆಲ್ ಪಾಟಿಂ ಘರಾಕ್ ಭಾಯ್ರ್ ಸರ್ಲಿಂ. ರಾತ್‌ಭರ್ ಜಾಗೆಂ ರಾವೊನ್ ತಿಂ ದೊಗಾಂಯ್ ಥಕ್‌ಲ್ಲಿಂ.

ಎಕಾ ನರ್ಸಾನ್ ಯೇವ್ನ್ ಎಸ್ತೆಲಾಕ್ ಸಾಂಗ್ಲೆಂ "ಭಿಯೆಂವ್ಚಿ ಕಾಂಯ್ ಗರ್ಜ್ ನಾ, ತೊ ಮತಿರ್ ಆಯ್ಲಾಸ್ತಾಂ, ತಾಚಿ ಜತನ್ ಆಮಿಂ ಘೆತೆಲ್ಯಾಂವ್. ತುಮಿಂ ತಿತ್ಲೆ ಪಯ್ಸ್ ಥಾವುನ್ ಸದಾಂ ಯೆಂವ್ಚಿ ಗರ್ಜ್ ನಾ" ಮ್ಹಳ್ಳೆಂಚ್ ಎಸ್ತೆಲಾಕ್ ಇಲ್ಲೆಂ ಸಮಧಾನ್ ಜಾಲೆಂ.

ತಿಯೊ ಬರೊ ಜಾಲ್ಲೆಂ ಪಳೆಲ್ಲ್ಯಾ ಎಸ್ತೆಲಾಕ್ ಸಂತೊಸ್ ಜಾಲೊ. ತೆಂ ಪಾಟಿಂ ಯೇಂವ್ಕ್ ತಯಾರ್ ನಾತ್‌ಲ್ಲೆಂ ತರೀ, ತಾಕಾ ದಾವಿದಾನ್ ಧಯ್ರ್ ದಿಲೆಂ. ಆನಿ ಘರ್ಚಿ, ಭುರ್ಗ್ಯಾಂಚಿ ಚತ್ರಾಯ್ ಕರುಂಕ್ ಪಾಟಿಂ ಆಪವ್ನ್ ವೆಲೊ.

ಮತಿರ್ ಆಯಿಲ್ಲೊ ತಿಯೊ ಕಿತೆಂಚ್ ಉಲಯ್ಲೊನಾ. ತಾಚಿ ತಪಾಸ್ಣಿ ಕರ್ತಾನಾ ತಾಕಾ ಕಳ್ಳೆಂ ಆಪುಣ್ ಕಾಲ್ ದನ್ಪಾರಾಂ ಆಯಿಲ್ಲ್ಯಾಚ್ ಆಸ್ಪತ್ರೆಂತ್ ಆಸಾಂ ಮ್ಹಳ್ಳೆಂ. ತೊ ಡೊಕ್ಟರಾಕ್ ಆಪ್ಲ್ಯಾ ಬೊಲ್ಸಾಂತ್ ಆಸ್ಚಿ ಚೀಟ್ ಕಾಡ್ನ್ ದಿಲ್ಲಿಚ್, ಡೊಕ್ಟರಾನ್ ತಿ ಎಕಾ ನರ್ಸಾಕ್ ದಿಲಿ ಆನಿ ಇಲ್ಲೆ ವೆಳಾನ್ ತ್ಯಾ ನರ್ಸಾನ್ ತೊ ರಿಪೋರ್ಟ್ ಹಾಡ್ಲೊ.

ತಿಯೊಚಾ ರಗ್ತಾಚೆಂ ವತ್ತಡ್ ಕಠೀಣ್ ಚಡ್‌ಲ್ಲೆಂ. ತ್ಯಾ ಶಿವಾಯ್ ಗೋಡ್ ಮುತಾಚಿ ಪಿಡಾಯ್ ಚಡ್‌ಲ್ಲಿ. ತಿಯೊಕ್ ಕಠೀಣ್ ಪೋತ್ ಕರುಂಕ್ ಸಾಂಗ್ಲೆಂ. ಚಡಿತ್ ಖಂತ್ ಕೆಲ್ಯಾರ್ ಕಾಳ್ಜಾಚಿ ಪಿಡಾ ಸುರು ಜಾಂವ್ಕೀ ಅಸಾ ಮ್ಹಳ್ಳಿ ಚತ್ರಾಯ್‌ಯ್ ದಿಲ್ಲಿ.

ದುಸ್ರೆ ದೀಸ್ ತಿಯೊಕ್ ಗ್ಲೂಕೊಸ್ ದಿಲೊನಾ. ತಾಚಾ ತಕ್ಲೆಚೆರ್ ಕಸ್ಲೆಂಗೀ ವೊಜೆಂ ಆಸ್‌ಲ್ಲೊ ಅನ್ಭೋಗ್ ತಿಯೊಕ್ ಜಾಲೊ. ತೊ ಏಕ್ ಸಬ್ಧ್ ಸಯ್ತ್ ಉಲಯ್ಲೊ ನಾ. ತಾಚಾ ಕುಶಿಚೊ ತರ್ನಾಟೊ ತಿಯೊಚಿ ಬರ್‍ಯಾನ್ ಚತ್ರಾಯ್ ಘೆತಾಲೊ. ತಾಕಾ ತಾಚಿಂ ಮ್ಹಳ್ಳಿಂ ಕೊಣೀಂ ನಾಂತ್ ಆಸ್ಯೆತ್ ದೆಖುನ್ ತೊ ಎಕ್ಲೊಚ್ ಆಸ್‌ಲ್ಲೊ. ತಿಯೊ ಆಪ್ಣಾಕ್ ಕಾಂಯ್ ವಕಾತ್ ಹಾಡ್ಚಿ ಗರ್ಜ್ ಪಡ್ಲಿ ತರ್ ತೊ ತರ್ನಾಟೊ ಹಾಡ್ನ್ ಯೆತಾಲೊ.

ಎದೊಳ್‌ಚ್ ತಿಯೊನ್ ಹ್ಯಾ ಆಸ್ಪತ್ರೆಕ್ ಯೇವ್ನ್ ಹಪ್ತೊ ಉತರ್‌ಲ್ಲೊ. ಆನಿ ಹ್ಯಾ ದಿಸಾಂನಿ ತಾಚಾ ಮತಿಕ್ ಇಲ್ಲೊ ಸುಶೆಗ್ ಮೆಳ್‌ಲ್ಲೊ. ತಾಕಾ ಭಾಯ್ಲೆಂ ಖಂಯ್ಚೆಂಚ್ ಚಿಂತುಂಕ್ ನಾಕಾಸ್‌ಲ್ಲೆಂ. ತಾಂತುಂ ತಾಕಾ ಕಠೀಣ್ ದೂಃಖ್ ಆನಿ ನಿರಾಶಾ ಭೊಗ್ತಾಲಿ. ತಾಕಾ ಪಾಟಿಂ ಗಾಂವಾಕ್ ಆಯಿಲ್ಲ್ಯಾ ದಿಸಾ ಥಾವುನ್ ತಾಚಾ ಮತಿಚೆಂ ಸಮಧಾನ್ ವಿಭಾಡ್‌ಲ್ಲೆಂ. ತಾಚೊ ಪಯ್ಲೊ ಸಂಸಾರ್ ಕೊಣೆಂಗೀ ಲುಟ್‌ಲ್ಲೆಂ ಚಿಂತಾಪ್ ತಿಯೊಚಾ ಮತಿಂತ್ ಯೆತಾಲೆಂ. ಆಪ್ಲ್ಯಾ ಕುಟ್ಮಾಚೊ ಉಡಾಸ್ ಆಯಿಲ್ಲೊಚ್ ತಾಚಾ ಮತಿಂತ್ಲಿ ದೂಃಖ್ ಚಡ್ತಾಲಿ. ಎಕಾ ವಯ್ರ್ ಏಕ್ ಆಘಾತ್, ಆಪ್ಲ್ಯಾ ಬಾಯ್ಲೆನ್ ಆಪ್ಣಾಕ್ ಕೆಲ್ಲೊ ಘಾತ್ ತಾಕಾ ಜಿಯೆಂವ್ಚಾ ಹರ್‍ಯೆಕಾ ಘಡ್ಯೆಚೊ ಕಾಂಠಾಳೊ ಉಬ್ಜಯ್ತಾಲೊ.

ಹಿ ಆಸ್ಪತ್ರ್ ಆನಿ ಹೆ ವಳ್ವಳೆ ಹಾಂಚೆ ಮಧೆಂ ತಿಯೊಚಾ ಮತಿಂತ್ ಆಸ್ಚಿಂ ಆಶಾವಾದಿ ಚಿಂತ್ನಾಂ ಎದೊಳ್‌ಚ್ ಉಭೊನ್ ಗೆಲ್ಲಿಂ. ತಾಚಾ ತೊಂಡಾಂತೂನ್ ಯೆಂವ್ಚಿಂ ಉತ್ರಾಂ ಸಂಪೊನ್ ಗೆಲ್ಲಿಂ ತರೀ ತಾಚಾ ಮತಿಂತ್ ಆತಾಂ ಏಕ್ ಆಂದೋಲನ್ ಸುರು ಜಾಲ್ಲೆಂ. ಜಿವಿತ್, ಮನಿಸ್ ಆನಿ ಸಂಬಂಧ್ ಮ್ಹಳ್ಳೆ ಅರ್ಥ್ ನಾತ್‌ಲ್ಲೆ ಸಬ್ಧ್ ಮ್ಹಳ್ಳಿಂ ಚಿಂತ್ನಾಂ ಭರೊನ್ ಆಯ್ಲಿಂ. ಸಗ್ಳೆಂ ಪೊಕೊಳ್. ಹೆ ಸಗ್ಳೆ ಸಬ್ಧ್ ಜರ್ ಪೊಯ್ಶೆ ಆಸಾತ್ ತರ್ ಹೆಣೆಂ ತೆಣೆಂ ಲಾಗ್ ಘಾಲ್ತಾತ್ ಆನಿ ಆಪ್ಲ್ಯಾ ಅಸ್ತಿತ್ವಾಚಿ ರುಜ್ವಾತ್ ದಿತಾತ್ ಶಿವಾಯ್ ನೀಜ್ ಜಿಣ್ಯೆಂತ್ ಕಿತೆಂ ಆಸಾ? ಫಕತ್ ಜಲ್ಮೊಂಚೆಂ ಆನಿ ಮೊರ್ತಾಪರ್‍ಯಾಂತ್ ಜಿಯೆಂವ್ಚೆಂ. ಇತ್ಲೆಂಚ್‌ಗೀ ಜಿಣ್ಯೆಚೆಂ ಮೋಲ್?

ಮನಿಸ್ ದುಬ್ಳೊ ಜಾಂವ್ ಯಾ ಕಿತ್ಲೊಯ್ ಗ್ರೇಸ್ತ್ ಜಾಂವ್ ದೊಗೀ ಸುಃಖಿ ನ್ಹಂಯ್. ದುಬ್ಳೊ ಚಿಂತಾ ಯೆಂವ್ಚಾ ಜಲ್ಮಂತ್ ಪುಣೀಂ ಆಪ್ಣಾಕ್ ಗ್ರೇಸ್ತ್ ಕರ್ ದೆವಾ. ಜಿ ಜಿಣಿಂ ಗ್ರೇಸ್ತ್ ಲೋಕ್ ಜಿಯೆತಾ ತಿ ಜಿಣಿ ಆಪ್ಣಾಕ್ ಆನಿ ಆಪ್ಲ್ಯಾ ಕುಟ್ಮಾಚಾಂಕ್ ಫಾವೊ ಕರ್ ಮ್ಹಣೊನ್ ದೆವಾಕ್ ಉಲೊ ಕರ್ತಾ ತರ್ ಗ್ರೇಸ್ತ್ ಹೊ ದುಡು ಆನಿ ಹ್ಯಾ ದುಡ್ವಾ ಖಾತಿರ್ ತಾಣೆಂ ಜೊಡ್‌ಲ್ಲೆಂ ಆನಿ ಹೊಗ್ಡಾಯಿಲ್ಲೆಂ ಸಗ್ಳೆಂ ತುಲನ್ ಕರ್ತಾನಾ ತಾಕಾ ದುಬ್ಳ್ಯಾ ಜಿಣ್ಯೆಂತ್ ಆಸ್ಚಾ ಸುಃಖಾ ಸಮಧಾನಾಚೊ ಖರೊ ಅರ್ಥ್ ಜಾತಾ. ಥೊಡೆ ಹೆಂ ಸಮ್ಜಾತಾತ್ ಥೊಡೆ ಹೆಂ ಸಮ್ಜೊಂವ್ಚಾಧಿಂಚ್ ದೊಳೆ ಧಾಂಪ್ತಾತ್. ಹಿಂ ಎಕಾಮೆಕಾ ದೋನ್ ಪಂಗ್ಡಾಮಧ್ಲಿಂ ಚಿಂತ್ನಾಂ. ದೋನ್ ಗುಡ್ಯಾಮಧ್ಲಿಂ ಚಿಂತ್ನಾಂ. ಎಕಾ ಗುಡ್ಯಾಕ್ ಚಡೊನ್ ತಿಳ್ತಾನಾ ಅನ್ಯೇಕ್ ಗುಡೊ ಸೊಭಿತ್ ದಿಸ್ತಾ. ಪುಣ್ ಅನ್ಯೇಕಾ ಗುಡ್ಯಾಕ್ ವೆತಾನಾ ಕಳ್ತಾ ತಾಂತುಂ ಆಸ್ಚೆ ಫ಼ಾತೊರ್, ಖಾಂಟೆ.

ದೀಸ್‌ಭರ್ ತಿಯೊ ಚಿಂತ್ನಾಂನಿ ಭರ್ತಾಲೊ. ಆಸ್ಪತ್ರೆಂತ್ ಯೇವ್ನ್ ಇತ್ಲೊ ತೇಂಪ್ ಜಾಲ್ಯಾರೀ ತೊ ಹೆರಾಂ ಪಿಡೇಸ್ತಾಂನಿ ಹ್ಯಾ ಆಸ್ಪತ್ರೆಚಾ ಡೊಕ್ಟರಾಂನಿ, ನರ್ಸಾಂನಿ ದಿಂವ್ಚಾ ಸೆವೆವಿಶ್ಯಾಂತ್ ಪುರ್ಪುನಾತ್‌ಲ್ಲೊ. ಕಶೆಂ ಸರ್ಕಾರಿ ಸಾಂಭಾಳ್ ಘೆವ್ನ್ ಆಸ್ಚಿಂ ಡೊಕ್ಟರಾಂ ಆನಿ ನರ್ಸಾಂ ಎಕಾಮೆಕಾ ಮಜಾ ಮಾರ್ತಾಲಿಂ. ಚಡ್ತಾವ್ ಡೊಕ್ಟರಾಂಕ್, ನರ್ಸಾಂಕ್ ಪಿಡೆಸ್ತಾಂಚಿ ಫಿಕಿರ್ ಬಿಲ್ಕುಲ್ ನಾತ್‌ಲ್ಲಿ. ಹಿ ಆಸ್ಪತ್ರ್ ಏಕ್ ಮೊರ್ನಾಚೆಂ ಘರ್‌ಶೆಂ ಜಾಲ್ಲೆಂ. ಕೊಣಾಕ್ ಘರಾ ಮೊರೊಂಕ್ ನಾಕಾ ತಾಣಿಂ ಯೇವ್ನ್ ಹಾಂಗಾ ಮೊರ್‍ಯೆತ್ ಆಸ್‌ಲ್ಲೆಂ. ತಾಚಾ ಕೂಡಾಂತ್ ಆಸ್ಚಾ ಹೆರ್ ಪಿಡೇಸ್ತಾಂಕ್ ತಿಯೊ ಏಕ್ ಮಿಸ್ತೆರ್‌ಸೊ ದಿಸ್ಲೊ. ತರೀ ತಾಂಚಾ ಪಿಡೆ ಮಧೆಂ ತಿಯೊಚಿ ಚತ್ರಾಯ್ ಘೆಂವ್ಕ್ ತೆ ಪಾವ್ತಾಲೆ. ತಾಂಚಾ ಸಯ್ರ್ಯಾಂನಿ ಕಶ್ಟಾಂನಿ ತಾಂಚಾ ಹಳ್ಳೆ ಥಾವ್ನ್ ವಾವವ್ನ್ ಹಾಡ್‌ಲ್ಲೆ ಬೊಂಡೆ, ಕೆಳಿಂ, ಎಕಾಮೆಕಾ ವಾಂಟುನ್ ಖಾತಾಲಿಂ.

ತ್ಯಾ ಆಸ್ಪತ್ರೆಂತ್ ತಿಯೊಚಾ ಕುಡಾಂತ್ ತಿಯೊ ಆನಿ ದೋಗ್ ಪಿಡೇಸ್ತ್ ಆಸ್‌ಲ್ಲೆ. ಏಕ್ ಇಲ್ಲೊ ಪ್ರಾಯೆಸ್ತ್ ಮನಿಸ್ ತರ್ ತಿಯೊನ್ ಆಸ್ಪತ್ರೆಕ್ ಸೆರ್‍ವಲ್ಲ್ಯಾ ಘಡ್ಯೆ ಥಾವ್ನ್ ತಾಚಿ ಚಾಕ್ರಿ ಕರ್ನ್ ಆಸ್ಚೊ ತರ್‍ನಾಟೊ ವಿವೇಕ್. ಆನಿ ತವಳ್ ತವಳ್ ತಿಯೊ ಆನಿ ಪ್ರಾಯೆಸ್ತ್ ಮನಿಸ್ ವಿವೇಕಾಸವೆಂ ಉಲವ್ನ್ ಆಸ್ತಾಂ ತಾಂಚಾ ಕುಶಿಚಾ ಕುಡಾಚೊ ಎಕ್ಲೊ ಮನಿಸ್ ಯೇವ್ನ್ ವೆತಾಲೊ. ತಾಚಾ ಉತ್ರಾಂನಿ ಉಪ್ಯೆಂವ್ಚಿ ಖತ್ಕತಿಂ ಉತ್ರಾಂ ಆಯ್ಕೊಂಕ್ ಇಲ್ಲಿಂ ಕಠೀಣ್ ದಿಸ್ತಾಲಿಂ ತರೀ ತಾಂತುಂ ಆಸ್ಚೆಂ ಸತ್ ಕೊಣಾಯ್ಕೀ ನೆಗಾರ್ ಕರುಂಕ್ ಇಲ್ಲೆಂ ಕಶ್ಟಾಂಚೆ.

"ಮನ್ಶಾಕ್ ಕೊಣಾಯ್ಚೆರ್ ಜರ್ ರಾಗ್ ಯೆತಾ ತರ್ ತಾಕಾ ತಾಚೆ ಥಾವ್ನ್ ಕೆಲ್ಲಿ ಆಶಾ ಕಾರಾಣ್ ಜಾವ್ನಾಸಾ. ಕೊಣಾ ಥಾವ್ನ್‌ಯಿ ಕಿತೆಂಚ್ ಆಶೆನಾಂ ತರ್ ಥಂಯ್ ಕಸಲಿಚ್ ನಿರಾಶಾ ಆಸಾನಾ, ರಾಗ್ ಆಸಾನಾ, ಹಗೆಂ ಆಸಾನಾ. ಕೊಣೀಂ ದಾದ್ಲೊ ಯಾ ಬಾಯ್ಲ್ ಫಕತ್ತ್ ಭುರ್ಗಿಂ ಕರುಂಕ್ ಕಾಜಾರ್ ಜಾಯ್ನಾಂತ್. ತಿಂ ಭುರ್ಗಿಂ ತಾಂಚಾ ಕುಡಿಚಾ ಖೆಳಾಂತ್ ಜಲ್ಮಾತಾತ್. ಆನಿ ಅಶೆಂ ಜಲ್ಮಾಲ್ಲ್ಯಾ ಭುರ್ಗ್ಯಾಂಕ್ ಜರ್ ಬರೆಂ ಕರ್ನ್ ಪೊಸ್ಲೆಂ ತರ್ ತಾಂತುಂ ತಾಂಚೊಚ್ ಮತ್ಲಬ್ ಆಸ್ತಾ. ಕಾಂಯ್ ಆಪ್ಲೊ ಭುರ್ಗೊ ಯಾ ಭುರ್ಗೆಂ ವಡ್ ಜಾವ್ನ್ ಆಪ್ಲ್ಯಾ ಕಶ್ಟಾಂಕ್ ಪಾವ್ತಾ ಕೊಣ್ಣಾ ಮ್ಹಳ್ಳ್ಯಾ ಚಿಂತ್ಪಾನ್. ಕೊಣೀಂ ಭುರ್ಗ್ಯಾಂ ಖಾತಿರ್ ತ್ಯಾಗ್ ಕರಿನಾ. ಹೊ ಸಗ್ಳೊ ಮನ್ಶಾಚೊ ಸುರಾತ್. ಹಾಂತುಂ ವಿಶೇಷ್ ಕಾಂಯ್ ನಾ. ಕಿತ್ಯಾಕ್ ಮ್ಹಳ್ಯಾರ್ ಮನಿಸ್‌ಯಿ ರಚ್ನೆಂತ್ ಏಕ್ ಜೀವಿಚ್. ಆನಿ ಮನಿಸ್ ಫಕತ್ತ್ ಚಿಂತುಂಕ್ ಸಕ್ತಾ ಆನಿ ಆಪ್ಲೊ ಫಾಯ್ದೊ ಸೊಧುಂಕ್ ಸಕ್ತಾ ದೆಖುನ್ ತೊ ಅಸಲ್ಯಾ ಸಂಗ್ತ್ಯಾಂಕ್ ತ್ಯಾಗ್, ಮೋಗ್, ಸಂಬಂಧ್, ಬಾಂಧ್ ಮ್ಹಳ್ಳೆ ವೆವೆಗ್ಳೆ ಸಬ್ಧ್ ದಿತಾ" ತೊ ಉಲವ್ನ್ಂಚ್ ಗೆಲೊ. ಪುಣ್ ತಾಚಿಂ ಉತ್ರಾಂ ಮ್ಹಾತಾರ್‍ಯಾಕ್ ಕಿತ್ಲಿಂ ಸಮ್ಜಾಲಿಂ ತೆಂ ಕೊಣಾಯ್ಕೀ ಕಳ್ಳೆಂನಾಂ ತರೀ ತಿಯೊಚಾ ಮತಿಂತ್ ಕಾಂಯ್ ಹೊ ಆಪ್ಣಾಕ್ ಖೊಂಕ್ತಾ ಗಾಯ್ ಮ್ಹಳ್ಳೆಂ ಚಿಂತಾಪ್ ಏಕ್ ಘಡ್ಯೆ ಆಯ್ಲೆಂ. ಆಂಬೊಟ್ ಖೆಲ್ಲ್ಯಾಕ್ ಗಳ್ಯಾಕಡೆ ಲಾಸ್ಚೆಪರಿಂ ತಾಚಿಂ ಹರ್‍ಯೆಕ್ ಉತ್ರಾಂ ತಿಯೊಚಾ ಮತಿಂತ್ ವಾದಾಳ್ ಉಟಂವ್ಕ್ ಲಾಗ್ಲಿಂ. ಮನಿಸ್ ತರ್ ಹೆರಾಂ ಥಾವ್ನ್ ಕಿತೇಂಯ್ ಪುಣಿಂ ಆಶೆತಾ ತರ್ ತೆಂ ಮೆಳಾನಾತ್‌ಲ್ಲ್ಯಾ ವೆಳಾರ್ ತಾಕಾ ಖಂಡಿತ್ ನಿರಾಶಾ ಜಾಂವ್ಚಿ ಸಹಜ್.

ಆಶಾ ಮಳ್ಯಾರ್ ಕಿತೆಂ? ನಿರಾಶಾ ಮ್ಹಳ್ಯಾರ್ ಕಿತೆಂ? ಸುಃಖ್ ಮ್ಹಳ್ಯಾರ್ ಕಿತೆಂ? ದೂಃಖ್ ಮ್ಹಳ್ಯಾರ್ ಕಿತೆಂ? ಜಿವಿತ್ ಮ್ಹಳ್ಳ್ಯಾ ನಾಣ್ಯಾಚೊ ಎಕೇಕ್ ಕುಸಿ. ಎಕಾ ಪರಿಪೂರ್ಣ್ ಜಿವಿತಾಕ್ ದೊನೀಂ ಗರ್ಜೆಚೆಂ. ಆನಿ ಎಕಾಂತ್ ಕೊಣೀಂ ಪರಿಪೂರ್ಣತಾ ಜೊಡಿನಾ.

ಥೊಡ್ಯಾಂಚಿ ಜಿಣಿ ಕಿತ್ಯಾಕ್ ಇತ್ಲಿ ದುಃಖಾಳ್ ಜಾತಾ? ತರ್ ತಾಚಾ ವಾಂಟ್ಯಾಚೆಂ ಸುಃಖ್ ಕೊಣೆಂ ತರೀ ಲುಟ್ಲಾಂ ಮ್ಹಣೊನ್ ಜಾಲೆಂ.

ತಿಯೊ ಚಿಂತುಂಕ್‌ಚ್ ಪಡ್ಲೊ. ತಾಚಾ ಜಿಣ್ಯೆಂತ್ಲ್ಯಾ ಥೊಡ್ಯಾ ಸವಾಲಾಂಕ್ ಆತಾಂ ಜಾಪ್ ಮೆಳ್ಚಾರ್ ಆಸ್‌ಲ್ಲಿ. ತರ್ ಆಪ್ಣಾನ್ ಆಪ್ಲ್ಯಾ ಭುರ್ಗ್ಯಾಂ ಖಾತಿರ್ ಖರ್ಚಿಲ್ಲ್ಯಾ ದಿಸಾಂಕ್ ಕಾಂಯ್ ಮೋಲ್ ನಾ? ಆಸ್‌ಲ್ಲೆಂ ತರ್ ಮ್ಹಜಿಂ ಭುರ್ಗಿಂ ಮ್ಹಾಕಾ ಅಶೆಂ ಪರ್ಕ್ಯಾ ಪರಿಂ ಲೆಕ್ತಿಂ? ಮ್ಹಜಾ ಘರಾ ಹಾಂವ್೦ಚ್ ಪರ್ಕಿ ಜಾತೊಂ? ಹೆರಾಂಕ್ ಚೋರ್ ಮ್ಹಣೊನ್ ಲೆಖ್ಚಾಧಿಂ ಮ್ಹಜಿಂಚ್ ಲುಟ್ಕಾರಾಂ ಮ್ಹಳ್ಳೆಂ ಕಳ್ತೆಂ? ಜಾಂವ್ಚೆಂ ಸಗ್ಳೆಂ ಬರ್‍ಯಾಕ್‌ಚ್ ಆನಿ ಜಾಲ್ಲೆಂ ಸಗ್ಳೆಂ ಬರ್‍ಯಾಕ್‌ಚ್. ಖರೆಂಚ್!

ಮುಖಾರ್‍ಸಿಲಾಂ...

Tags: Vally Quadras,e konkani novel, Konkani, Mangalore, Mangalorean, Mother Tongue

From around the world

ಪಾಟಿಂ ಗಾಂವಾಕ್ - ಅವಸ್ವರ್ 26

Post your comments

ಅವಸ್ವರ್ 1

ಅವಸ್ವರ್ 2

ಅವಸ್ವರ್ 3

ಅವಸ್ವರ್ 4

ಅವಸ್ವರ್ 5

ಅವಸ್ವರ್ 6

ಅವಸ್ವರ್ 7

ಅವಸ್ವರ್ 8

ಅವಸ್ವರ್ 9

ಅವಸ್ವರ್ 10

ಅವಸ್ವರ್ 11

ಅವಸ್ವರ್ 12

ಅವಸ್ವರ್ 13

ಅವಸ್ವರ್ 14

ಅವಸ್ವರ್ 15

ಅವಸ್ವರ್ 16

ಅವಸ್ವರ್ 17

ಅವಸ್ವರ್ 18

ಅವಸ್ವರ್ 19

ಅವಸ್ವರ್ 20

ಅವಸ್ವರ್ 21

ಅವಸ್ವರ್ 22

ಅವಸ್ವರ್ 23

ಅವಸ್ವರ್ 24

ಅವಸ್ವರ್ 25

ಅವಸ್ವರ್ 26

ಅವಸ್ವರ್ 27

ಅವಸ್ವರ್ 28

Connect

Our Address
Mangalore

Our Address
Udupi

Our Address
Dubai

From around the world

Post your comments

Connect

Our AddressMangalore

Our AddressUdupi

Our AddressDubai

Our Address
Mangalore

Our Address
Udupi

Our Address
Dubai