+971 50 7554105
ತುಮ್ಚ್ಯಾ ಗಮನಾಕ್:

ಪಾಟಿಂ ಗಾಂವಾಕ್  -  ಅವಸ್ವರ್ 13


"ಮ್ಹಜಾ ಮೊಗಾಳ್ ಪತಿಣೆಕ್ ಆನಿಂ ಭುರ್ಗ್ಯಾಂಕ್ ಪಾಟಂವ್ಚೊ ಮೋಗ್ ಆನಿಂ ಭುರ್ಗ್ಯಾಂಕ್ ದಿಂವ್ಚಿಂ ದೆವಾಚಿಂ ಬೆಸಾಂವಾಂ.

ಪಾಟ್ಲ್ಯಾ ಸಭಾರ್ ಮಹಿನ್ಯಾ ಥಾವುನ್ ತುಮ್ಚೆಥಾವುನ್ ಪಯ್ಸ್ ಆಸಾಂ ತರೀ ಎದೊಳ್ ಪರ್‍ಯಾಂತ್ ಭೊಗಾನಾತ್‌ಲ್ಲೆಂ ಎಕ್ಸುರ್ಪಣ್ ಆತಾಂ ಮ್ಹಾಕಾ ಭೊಗ್ತಾ. ಮ್ಹಜೆಂ ಕಾಮ್ ಕಾಂಯ್ ಕಶ್ಟಾಂಚೆಂ ನ್ಹಂಯ್ ತರೀ ಹಾಂವೆಂ ಹಾಂಗಾಸರ್ ಕಾಮ್ ಕರ್ಚೊ ಉದ್ದೇಶ್ ಏಕ್‌ಚ್ಚ್. ಮ್ಹಜಾ ಕುಟ್ಮಾಂಕ್ ಸುಃಖ್ ಸಮಧಾನ್ ಯೇಂವ್ಕ್. ಆನಿಂ ಮ್ಹಜೆಂ ಕುಟಾಮ್ ಮ್ಹಳ್ಯಾರ್ ಮ್ಹಜಿ ಬಾಯ್ಲ್ ಆನಿಂ ಮ್ಹಜಿಂ ಭುರ್ಗಿಂ. ತಶೆಂ ಆಸ್ತಾಂ, ತುವೆಂ ಹಾಂವೆಂ ಗಾಂವಾಕ್ ಯೆಂವ್ಚೆಂ ಸದ್ದ್ಯಾಕ್ ನಾಕಾ ಮ್ಹಣೊನ್ ಬರಯ್ಲಾಂಯ್. ತುಜಾ ಉತ್ರಾಂನಿ ಫಕತ್ತ್ ಸತ್ ಆಸ್ತೆಲೆಂ ಶಿವಾಯ್ ಹೆರ್ ಕಸ್ಲೊಯ್ ಘಾತ್ ಆಸ್ಚೊನಾ ಮ್ಹಣೊನ್ ಹಾಂವ್ ಚಿಂತಾಂ. ಆಮ್ಚಾ ಘರಾ ಯೆಂವ್ಚಾ ಮನ್ಶಾಂಕ್ ಚತ್ರಾಯೆನ್ ಪಳೆ. ಘರ್ಕಾರ್ ನಾತ್‌ಲ್ಲ್ಯಾ ಘರಾ ಚೊರಾಂಕ್ ಯೇಂವ್ಕ್ ಕೊಣೆಂಯ್ ಆಪವ್ಣೆಂ ದಿಂವ್ಚಿ ಗರ್ಜ್ ನಾ. ತುಜಾ ಆನಿಂ ತ್ಯಾ ಮಾಪ್ಳ್ಯಾ ತರ್ನಾಟ್ಯಾ ವಿಶ್ಯಾಂತ್ ಮ್ಹಾಕಾ ಮ್ಹಜಾ ಕಾನಾಂಕ್ ಆಯ್ಕೊಂಕ್ ತಾಂಕಾನಾತ್‌ಲ್ಲೆಂ ಆಯ್ಕೊಂಕ್ ಮೆಳ್ಳೆಂ. ತಾಂತುಂ ಕಿತ್ಲೆಂ ಸತ್ ಆಸಾ ಆನಿಂ ಕಿತ್ಲೆಂ ಫಟಿಂ ಆಸಾ ಮ್ಹಳ್ಳೆಂ ತುಂ ಆನಿಂ ಸರ್ವೆಸ್ಪರ್ ದೇವ್ ಜಾಣಾಂ. ದೆಖುನ್ ಏಕ್ ಬರೆಂ ಕುಟಾಮ್ ರಚುಂಕ್ ಹಾವೆಂ ಚಿಂತ್‌ಲ್ಲ್ಯಾ ಚಿಂತ್ನಾಂಕ್ ಆನಿಂ ಮ್ಹಜಾ ಮಿನತೆಕ್ ತುಂ ಶೆಳೆಂ ಉದಾಕ್ ವೊತ್ಚೆಂನಾಂಯ್ ಮ್ಹಳ್ಳ್ಯಾ ಭರ್ವಸ್ಯಾನ್ ಹೆಂ ಕಾಗಾದ್ ಅಖೇರ್ಸಿತಾಂ."

ಮಾಯಾಮೊಗಾಸವೆಂ, 
ತಿಯಾದೊರ್ ರುಜಾರಿಯೊ
ಕುವೇಯ್ಟ್.

ಕಾಗಾದ್ ಪೋಸ್ಟ್ ಕರ್ತೆಚ್ಚ್ ಕಸ್ಲೊಗೀ ಅವೆಕ್ತ್ ಸಂತೊಸ್ ತಿಯೊಚಾ ಕಾಳ್ಜಾಂತ್ ಜಾಂವ್ಕ್ ಲಾಗ್ಲೊ. ಖಂಡಿತ್ ಜಾವ್ನ್ ಜ್ಯೆ ಕಿತೆಂ ಆಪ್ಣಾನ್ ಆಯ್ಕಲಾಂ ತೆಂ ಫಟಿಂ ಜಾಂವ್ದಿತ್ ದೆವಾ ಮ್ಹಣೊನ್ ಗುಪ್ತಿಂ ತೊ ಆಪ್ಲ್ಯಾ ದೆವಾಕ್ ಉಲೊ ಮಾರಿಲಾಗ್ಲೊ. ಆಪ್ಲ್ಯಾ ಖಾಂದ್ಯಾಚೆಂ ವೊಜೆಂ ಇಲ್ಲೆಂ ಹಾಳು ಜಾಲೆಂ ಮ್ಹಳ್ಳೆಂ ಭೊಗಾಪ್ ತಾಕಾ ಆಯ್ಲೆಂ.

ಅಶೆ ಸಭಾರ್ ದೀಸ್ ಪಾಶಾರ್ ಜಾಲೆ. ಹ್ಯಾ ದಿಸಾಂನಿ ಏಕ್ ದೋನ್ ಪಾವ್ಟಿಂ ಗೋಪಿ ಯೇವ್ನ್ ಗೆಲೊ. ಪುಣ್ ಚಡಾವತ್ ಜಾವ್ನ್ ಮಣಿ ನಾತ್‌ಲ್ಲ್ಯಾನ್ ತಿಯೊಕ್ ಕಾಮ್ ಆಸ್ತಾಲೆಂ ಆನಿಂ ತೊ ಭಾಯ್ರ್ ವಚೊಂಕ್‌ಯಿ ಆಶೆನಾತ್‌ಲ್ಲೊ. ಮಾರ್ಕುಕ್ ಕಶೆಂ ತೋಂಡ್ ದಾಖಂವ್ಚೆಂ ಮ್ಹಳ್ಳೆಂ ತಾಕಾ ಕಳಾನಾತ್‌ಲ್ಲೆಂ. ತೊಂಡಾಕ್ ಕರಿ ಪುಸವ್ನ್ ಘೆತ್‌ಲ್ಲೊ ಅನ್ಭೋಗ್ ತಿಯೊಕ್ ಜಾಲ್ಲೊ. ಮಾರ್ಕು ಜಾಲ್ಯಾರೀ ತಿಯೊಕ್ ಇಲ್ಲೊ ತೇಂಪ್ ಎಕ್ಸುರೊ ಸೊಡ್ಚೆಂ ಬರೆಂ ಮ್ಹಣೊನ್ ಸಮ್ಜೊನ್ ತಾಕಾ  ಮೆಳೊಂಕ್‌ಯ್ ಆಯ್ಲೊನಾ.

ಅಶೆಂ ಅವ್ಚಿತ್ತ್ ಹ್ಯೇ ಪರಿಂ ಆಯಿಲ್ಲೆಂ ಕಾಗಾದ್ ವಾಚುನ್ ಎಸ್ತೆಲ್ ಶೆಳೊ ಘಾಮ್ ಘಾಮೆಲೆಂ. ತಾಚೆಂ ಆಂಗ್ ಕಾಂಪೊಂಕ್ ಲಾಗ್ಲೆಂ. ಅಶಿ ಖಬಾರ್ ತಿಯೊಕ್ ಪಾವತ್ ಮ್ಹಣೊನ್ ತಿಣೆಂ ತಿಚಾ ಸಪ್ಣಾಂತೀ ಚಿಂತುಂಕ್ ನಾತ್‌ಲ್ಲೆಂ. ಪುಣ್ ಹಿ ಖಬಾರ್ ಕಶಿ ಪಾವ್ಲಿ ಮ್ಹಳ್ಳಿ ಎಸ್ತೆಲಾಕ್ ಬಿಲ್ಕುಲ್ ಕಳ್ಳೆಂನಾ. ತಿಕಾ ಪಯ್ಲೆಂ ದಾವಿದಾವೆರ್ ದುಭಾವ್ ಆಯ್ಲೊ. ಏಕ್ ಪಾವ್ಟಿಂ ಮಾರ್ಕುಚೆರ್ ದುಭಾವ್ ಆಯ್ಲೊ ತರೀ ಮಾರ್ಕುಕ್ ಕಳಿತ್ ಆಸ್ಚೆಂನಾ ಮ್ಹಣೊನ್ ತಿಣೆಂ ದಾವಿದಾಚೆರ್ ಆಪ್ಲೊ ದುಭಾವ್ ಘಟ್ ಕೆಲೊ.

ಆತಾಂ ಕಿತೆಂ? ಜಾಂವ್ಚೆಂ ಜಾವ್ನ್ ಗೆಲಾಂ. ತ್ಯಾ ಶಿವಾಯ್ ಲತೀಫಾಸವೆಂ ಆಸ್ಚೊ ಸಂಬಂಧ್ ಮೊಡುಂಕ್ ಎಸ್ತೆಲಾಕ್ ನಾಕಾಸ್‌ಲ್ಲೆಂ. ಕಾಂಯ್ ತಿಯೊ ಗಾಂವಾಕ್ ಯೇತ್ ತರ್ ಮ್ಹಳ್ಳಿ ಭಿರಾಂತ್ ತಿಕಾ ಧೊಸುಂಕ್ ಲಾಗ್ಲಿ. ಖಂಚಾಯ್ಕೀ ಲತೀಫ್ ಯೆತೆಚ್ಚ್ ತಾಚೆಲಾಗಿಂ ಖಬಾರ್ ಕಳಂವ್ಕ್ ತೆಂ ರಾಕ್ಲೆಂ. ಲತೀಫ್ ಯೆತೆಚ್ಚ್ ಎಸ್ತೆಲಾನ್ ಲತೀಫಾಕ್ ತಿ ಖಬಾರ್ ದಿಲಿ. ಖಬಾರ್ ಆಯ್ಕೊನ್ ಲತೀಫ್ ಖುಬಾಳ್ಳೊನಾ. ತಾಣೆಂ ಹ್ಯಾವಿಶ್ಯಾಂತ್ ಎದೊಳ್‌ಚ್ಚ್ ಚಿಂತ್‌ಲ್ಲೆಂ. ತಣೆಂ ಎಸ್ತೆಲಾಕ್ ಸಮ್ಜಾಯ್ಲೆಂ. ಹೊಚ್ಚ್ ಬರೊ ಆವ್ಕಾಸ್. ಆಮ್ಚಾ ಬರೆಪಣಾಚಿ ರುಜ್ವಾತ್ ದೀಂವ್ಕ್ ಆನಿಂ ತಾಪ್‌ಲ್ಲ್ಯಾ ಲಂಕ್ಡಾಕ್ ಬಾಗಂವ್ಕ್ ಸಲೀಸ್. ಏಕ್ ಪಾವ್ಟಿಂ ಬಾಗ್ವಲೆಂ ತರ್ ಆಮ್ಕಾಂ ಜಾಯ್ ತಶೆಂ ಬಾಗ್ಶಿಯೆತ್. ದೆಖುನ್ ತುಂ೦ಯ್ ತಾಕಾ ಅಸಲಿಚ್ಚ್ ಜಾಪ್ ಬರಯ್. ಆಪ್ಣಾಕ್ ಕಾಗಾದ್ ವಾಚುನ್ ಕಾಳ್ಜಾಂತ್ ದೂಃಕ್ ಉದೆಲಿ ಮ್ಹಣೊನ್ ಕಳಯ್. ಅಶೆಂ ಸಾಂಗೊನ್ ಲತೀಫಾನ್ ಅಶೆಂ ಬರಂವ್ಕ್ ಸಾಂಗೊನ್ ದಿಲೆಂ.

"ಮೊಗಾಳ್ ಪತಿಕ್ ತುಜಾ ಪತಿಣೆನ್ ಬರಂವ್ಚೆಂ ಕಾಗಾದ್ ಆನಿಂ ದಿಂವ್ಚೊ ಮೋಗ್,

ತುಜೆಂ ಕಾಗಾದ್ ವಾಚುನ್ ಹಾಂವ್ ಥಂಯ್ಚ್ ಗಳ್ಳಿಂ. ಸಾಂಗ್ಚೊ ಲೋಕ್ ಕಸೊಯ್ ಸಾಂಗ್ತಾ ಕಿತೆಂಯ್ ಸಾಂಗ್ತಾ ಕಿತ್ಯಾಕ್‌ಯೀ ಸಾಂಗ್ತಾ. ಎಕ್ಲ್ಯಾಕ್ ಬರೆಂ ಜಾಲ್ಲೆಂ ಪಳೆಂವ್ಕ್ ಹೆರಾಂಕ್ ಸೊಸಾನಾ ದೆಖುನ್ ಅಸಲ್ಯೊ ಖಬ್ರೊ ಕರ್ತಾ. ತರ್ ತುವೆಂ ಏಕ್ ಘಡಿ ಚಿಂತುಂಕ್ ನಜೊಗೀ ತುಂ ಕಿತೆಂ ಬರಯ್ತಾಯ್ ಮ್ಹಳ್ಳೆಂ? ತುಂ ಮ್ಹಾಕಾ ಇತ್ಲೆಂಚ್ ಪಾತ್ಯೆತಾಯ್ಗೀ? ದೊಗಾಂ ಭುರ್ಗ್ಯಾಂಚಾ ಆವಯ್ ಜಾಲ್ಲ್ಯಾ ಮ್ಹಾಕಾ ಅಶೆಂ ಬರಂವ್ಚಾ ಆಧಿಂ ಜರ್ತರ್ ಹಾಂವ್ ಅಸಲ್ಯಾ ಸ್ವಭಾವಾಚಿಂ ತರ್ ಎದೊಳ್‌ಚ್ಚ್ ಧಾಂವ್ತಿಂ ನಂಯ್ಗೀ? ಮ್ಹಳ್ಳೆಂ ಚಿಂತಿಜಯ್ ಆಸ್‌ಲ್ಲೆಂ ನಯ್ಗೀ? ಕಿತೆಂಯ್ ಜಾಂವ್ ಹಿ ಕೊಣಾಚಿಗೀ ಚಾಲಾಕಿ, ಆಮ್ಕಾಂ ಎಕಾಮೆಕಾ ವೆಗ್ಳಾಚಾರ್ ಹಾಡುಂಕ್. ತುಕಾ ಸತ್ ಜಾಯ್ ತರ್ ಆಯ್ಕ್. ಹೆಂ ಸತ್ ತುಂ ಗಾಂವಾಕ್ ಯೆತಾನಾ ಸಾಂಗೊಂಕ್ ಆಶೆತಾಲಿಂ ತರೀ ತುಜೆ ಮತಿಚೆ ಆಟೆವಿಟೆ ದೆಖ್ತಾನಾ ತುಕಾ ಸಾಂಗೊನ್ ಸೊಡ್ಯಾಂ ಮ್ಹಣೊನ್ ಭೊಗ್ತಾ.

ಪಯ್ಲ್ಯಾ ಸುವಾತೆರ್ ತ್ಯಾ ಮಾಪ್ಳ್ಯಾ ಚೆಡ್ಯಾಕ್ ಘರಾ ಯೇಂವ್ಕ್ ಸಾಂಗ್‌ಲ್ಲೆಂ ಕೊಣೆಂ? ಫುಲಾಂ ವರುಂಕ್, ತರ್ಕಾರ್‍ಯೊ ವರುಂಕ್ ತಾಕಾ ಘರಾ ಆಪವ್ನ್ ಹಾಡ್‌ಲ್ಲೊಯ್ ತುಂವೆಂ ಆನಿಂ ತೊ ಬರೊ ಭುರ್ಗೊ. ಸದಾಂ ಯೆತಾ ಆನಿಂ ಘರಾ ಜಾಯ್ ಜಾಲ್ಲ್ಯೊ ವಸ್ತು, ತಾಂದು, ಮೀಟ್, ಮಿರ್ಸಾಂಗ್, ಮಾಸ್ಳಿ ಯಾ ಹೆರ್ ಹಾಡುನ್ ಮ್ಹಾಕಾ ಕುಮೊಕ್ ಕರ್ತಾ ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್.

ತುಜೊ ಈಶ್ಟ್ ದಾವಿದ್ ಕಸ್ಲೊ ಮನಿಸ್ ಪಳೆ, ತಾಕಾ ಪಯ್ಲೆಂ ಥಾವುನ್ ಮ್ಹಜೆರ್ ದೊಳೊ ಆಸ್‌ಲ್ಲೊ. ತುವೆಂ ಗಲ್ಫಾಕ್ ಗೆಲ್ಲೆ ರಾತಿಂಚ್ಚ್ ತೊ ಮ್ಹಜೆಲಾಗಿಂ ಆಯಿಲ್ಲೊ. ಹಾಂವೆ ತಾಕಾ ಬರೀಂ ದೋನ್ ಉತ್ರಾಂ ಸಾಂಗೊನ್ ಧಾಂವ್ಡಾಯಿಲ್ಲೊ ದೆಖುನ್ ಮ್ಹಜೆರ್ ರಾಗಾರ್ ಆಸ್‌ಲ್ಲೊ. ತಾಣೆಂ ಮೊಸ್ರಾನ್ ಮ್ಹಜೆರ್ ನಾಕಾ ಜಾಲ್ಲ್ಯೊ ಖಬ್ರೊ ಕೆಲ್ಯಾತ್ ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್. ತಶೆಂಚ್ಚ್ ತುಜೆವಿಶ್ಯಾಂತ್ ಸಯ್ತ್ ಹಾವೆಂ ಜಾಯ್ತೆಂ ಆಯ್ಕಾಲಾಂ. ತುಂ ಥಂಯ್ ಎಕಾ ಬಾಯ್ಲೆಸವೆಂ ಮಿರಯ್ತಾಯ್ ಮ್ಹಣೊನ್ ಹಾಂವೆಂಯ್ ಆಯ್ಕಾಲಾಂ. ತರೀ ಹಾವೆಂ ತುಕಾ ತ್ಯೇ ಪರಿಂ ಕಾಗಾದ್ ಬರಯ್ಲಾಂಗೀ? ನಾ. ಕಿತ್ಯಾಕ್ ಮ್ಹಳ್ಯಾರ್ ಮ್ಹಾಕಾ ತುಜೆರ್ ಪಾತ್ಯೆಣಿ ಆಸಾ. ತುಂ ಕಸೊ ಥಂಯ್ ಪರ್ದೇಶಾಂತ್ ಎಕ್ಸುರೊಗೀ ತಶೆಂಚ್ಚ್ ಹಾಂವೀ ಹಾಂಗಾ ತುಜೆಶಿವಾಯ್ ಎಕ್ಸುರಿಂಚ್ಚ್ ದೆಖುನ್ ತುಕಾ ಹಾಂವೆ ಕಿತೆಂಚ್ ದುಖಂವ್ಚೆತಸಲೆಂ ಬರಂವ್ಕ್ ನಾ. ತುವೆಂ ಗಲ್ಫಾಂತ್ ಆಸ್ಚಾ ಹೆರಾಂ ಭಾಯ್ಲಾಂಕ್ ಪಳೆಲಾಂಯ್. ತಾಂಚಾ ಗಳ್ಯಾರ್ ಕಿತೆಂ ಭಾಂಗಾರ್? ಕಿತೆಂ ತಾಂಚೊ ಶ್ರಂಗಾರ್? ಪುಣ್ ಮ್ಹಜಾ ಗಳ್ಯಾರ್ ಏಕ್ ಭಾಂಗಾರಾಚೆಂ ಸುತ್ ಸಯ್ತ್ ನಾ. ತುಕಾ ಹಾಂವೆ ತ್ಯೇ ವಿಶ್ಯಾಂತ್ ಕೆದ್ನಾಂಯ್ ಬರಯ್ಲಾಂಗೀ? ತಶೆಂ ಆಸ್ತಾಂ ತುಂ ತುಜಾ ಮತಿಚೆಂ ಸಮಧಾನ್ ವಿಭಾಡ್ನಾಕಾ. ಲತೀಫ್ ಬರೊ ಭುರ್ಗೊ ಆನಿಂ ಘರಾ ತೊ ಬರೊ ಕುಮೊಕ್ ಕರ್ತಾ. ತಾಕಾ ಹಿ ಖಬಾರ್ ಕಳತ್ ತರ್ ಕೆದಿಂಕ್‌ಚ್ಚ್ ಆಮ್ಚಾ ಘರಾ ಪಾಂಯ್ ದವ್ರುನ್ ಯೆಂವ್ಚೊನಾ. ಆನಿಂ ತ್ಯಾ ವರ್‍ವಿಂ ಕಶ್ಟ್ ಜಾತೆಲೆ ಮ್ಹಾಕಾಚ್ಚ್. ತುಜಿಂ ಕಾಗ್ದಾಂ ಪೋಸ್ಟ್ ಕರುಂಕ್ ಯಾ, ಪೆಂಟೆಕ್ ವಚೊನ್ ಫುಲಾಂ ದೀವ್ನ್ ಯೇಂವ್ಕ್, ಘರಾ ಜಾಯ್ ಜಾಲ್ಲೊ ಸಾಮಾನ್ ಹಾಡುಂಕ್ ಹಾಂವೆಚ್ಚ್ ಧಾಂವಾಜಯ್ ಪಡ್ತೆಲೆಂ. ಆನಿಂ ಮ್ಹಾಕಾ ಕಶ್ಟ್ ಯೆಂವ್ಚೆ ತುಕಾಯ್ ಪಸಂದ್ ಮ್ಹಣೊನ್ ಹಾಂವ್ ಚಿಂತಿನಾ. ತುಕಾ ತಶೆಂ ಮ್ಹಾಕಾ ಕಶ್ಟಿಜಯ್ ಮ್ಹಳ್ಳಿ ಆಶಾ ಆಸಾ ತರ್ ಮ್ಹಾಕಾ ಕಳಯ್, ಆನಿಂ ಆಪುಣ್ ತಾಕಾ ಆಮ್ಚಾ ಘರಾ ಯೇನಾತ್‌ಲ್ಲೆಪರಿಂ ಸಾಂಗ್ತೆಲಿಂ.

ತುಂವೆಂ ಕೆಲ್ಲೊ ತ್ಯಾಗ್ ಮ್ಹಜಾ ದೊಳ್ಯಾಂ ಮುಖಾರ್ ಆಸಾ ಆನಿಂ ಹಾಂವೆ ತುಕಾ ಕೆದಿಂಕ್‌ಚ್ ವಾಯ್ಟ್ ಚಿಂತುಂಕ್ ನಾ ಯ ಕರುಂಕ್ ನಾ ಮ್ಹಣೊನ್ ಕಶಿ ರುಜ್ವಾತ್ ದೀಂವ್? ತುಂ ಯೇ ಆನಿಂ ಹಾಂವ್ ಮ್ಹಜೊ ಜೀವ್ ಜಾಲ್ಯಾರೀ ದೀವ್ನ್ ತುಕಾ ರುಜ್ವಾತ್ ದಿತೆಲಿಂ

ಅಖೇರ್ಸಿತಾ,
ತುಜಿಚ್ಚ್ ಪತಿಣ್
ಎಸ್ತೆಲ್.

ಲತೀಫಾಚಿ ಮಜತೆ ಶಿವಾಯ್ ಅಸಲೆಂ ಕಾಗಾದ್ ಬರಂವ್ಕ್ ಎಸ್ತೆಲಾನ್ ಸಾತ್ ಜಲ್ಮ್ ಘೆಜಯ್ ಪಡ್ತೊ. ತಿಕಾ ಆತಾಂ ದುಸ್ರಿ ವಾಟ್ ನಾತ್‌ಲ್ಲಿ. ಕಿತ್ಲೊ ತೇಂಪ್ ಪರ್‍ಯಾಂತ್ ತಿಯೊ ಸಮಧಾನೆರ್ ಆಸ್ತಾಗೀ ತಿತ್ಲೊ ತೇಂಪ್ ತೊ ಗಲ್ಫಾಂತ್ ಆಸ್ತಲೊ. ಆನಿಂ ತಿತ್ತುನ್ ಪರ್ಯಾಂತ್ ಘರಾಕ್ ತೊ ಸರಾಗ್ ಪೊಯ್ಶೆ ಧಾಡ್ತಲೊ ಆನಿಂ ಆಪ್ಣಾಕ್ ಜಿಣ್ಯೆಂತ್ ಸಂತೊಸ್ ಭೊಗುಂಕ್ ಆವ್ಕಾಸ್ ಮೆಳ್ತಲೊ.

ಎಸ್ತೆಲಾನ್ ಬರೆಂ ಜಾಲೆಂ ದಾವಿದಾಚೆರ್ ದುಭಾವ್ ಕೆಲ್ಲೊ. ನ್ಹಂಯ್ ತರ್ ಎಕಾಧಾವೆಳಾ ಸತ್ ಕಳ್‌ಲ್ಲೆಂ ತರ್ ತೆಂ ಮಾರ್ಕು ವಿಶ್ಯಾಂತ್‌ಯಿ ಬರಂವ್ಕ್ ಪಾಟಿಂ ಸರ್ತೆಂ ನಾಂ.

ಉಟಾಉಟಿಂ ಆಯಿಲ್ಲ್ಯಾ ಜಾಪಿಕ್ ವಾಚುನ್ ತಿಯೊಚಿ ಮತ್ ಇಲ್ಲಿ ಹಗುರ್ ಜಾಲಿ. ಆಪ್ಣಾನ್ ಭೆಶ್ಟೆಂಚ್ ಆಪ್ಲ್ಯಾ ಬಾಯ್ಲೆಚೆರ್ ದುಭಾವ್ ಕೆಲೊ ಆನಿ ಆಂವ್ಸರಾನ್ ತಿಚೆಂ ಮನ್ ದುಖಯ್ಲೆಂ. ತೇಂಯ್ ಕೊಣಾ ಕೊಣಾಚೆಂ ಉತಾರ್ ಆಯ್ಕೊನ್ ಮ್ಹಣೊನ್ ಕಳ್ತಚ್ ತೊ ಮತಿಂಚ್‌ಚ್ಚ್ ಚುರ್ಚುರ್ಲೊ. ಫುಡ್ಲ್ಯಾ ಹಾಪ್ತ್ಯಾಂತ್ ಮಾರ್ಕುಕ್ ಮೆಳೊನ್ ತಾಣೆಂ ಎಸ್ತೆಲಾಚೆಂ ಕಾಗಾದ್ ಆಯಿಲ್ಲಿ ಗಜಾಲ್ ಕಳಯ್ಲಿ. ಪುಣ್ ಮಾರ್ಕುಕ್ ತ್ಯೇಶಿಂ ಚಡ್ತಿಕ್ ಉಲಂವ್ಕ್ ನಾಕಾಸ್‌ಲ್ಲೆಂ. ತಾಣೆಂ ಹ್ಯಾ ಘಡ್ಯೆ ತಿಯೊಚಾ ಮನೊಸ್ಥಿತೆ ಖಾತಿರ್ ಸಲ್ವಣಿಂ ಆಪ್ಣಾಂವ್ಕ್ ಚಿಂತ್ಲೆಂ.

ಮಾರ್ಕುನ್ ಆಪ್ಲ್ಯಾ ದೊಳ್ಯಾಂನಿ ತಿಯೊಚಾ ಮಿನತೆಕ್ ಪಳೆಲ್ಲೆಂ ಆನಿಂ ಪೋರ್ ಆಪ್ಣಾನ್ ಉಲಯಿಲ್ಲ್ಯಾ ಉತ್ರಾಂನಿ ತಿಯೊಚಾ ಕಾಳ್ಜಾಂತ್ ಘಾಲ್ಲ್ಯಾ ಪರಿಣಾಮಾಂತ್ ತೊ ಇಲ್ಲೊ ಭಿಂಯೆಲ್ಲೊ. ಕಾಂಯ್ ಚಡುಣೆಂ ಜಾಲೆಂ ತರ್ ತಾಚೊ ಪರಿಣಾಮ್‌ಯಿ ಭೊಗುಂಕ್ ತಿಯೊಕ್‌ಚ್ಚ್ ಪಡ್ತೆಲೆಂ ಮ್ಹಳ್ಳೆಂ ಮಾರ್ಕು ಬರ್‍ಯಾನ್ ಜಾಣಾಸ್‌ಲ್ಲೊ. 

ಅಶೆಚ್ಚ್ ದೀಸ್ ಪಾಶಾರ್ ಜಾತಾಲೆ. ಆನಿಂ ವೆಗಿಂಚ್ ದೋನ್ ಮಹಿನೆ ಸಂಪ್ಲೆ ಆನಿಂ ರಜೆರ್ ಗಾಂವಾಕ್ ಗೆಲ್ಲೊ ಮಣಿಂ ಪಾಟಿಂ ಆಯ್ಲೊ ಆನಿಂ ತಾಚಾ ತೊಂಡಾರ್ ಹಾಸೊ ಆಸ್‌ಲ್ಲ್ಯೊ. ತಾಣೆಂ ಗಾಂವಾಕ್ ವಚೊನ್ ಇಲ್ಲೊ ಜಾಗೊ ಮೊಲಾಕ್ ಘೆತ್‌ಲ್ಲಿ ಖಬಾರ್ ಹಾಡ್ನ್ ಆಯಿಲ್ಲೊ. ಆನಿಂ ತ್ಯಾ ಜಾಗ್ಯಾರ್ ಲ್ಹಾನ್‌ಶೆಂ ಘರ್ ಬಾಂದ್ಲೆಂ ತರ್ ಉಪ್ರಾಂತ್ ಬಾಡ್ಯಾಚಾ ಘರಾ ರಾಂವ್ಚಾ ಆಪ್ಲ್ಯಾ ಬಾಯ್ಲೆ ಭುರ್ಗ್ಯಾಂಕ್ ರಾವೊಂಕ್ ಏಕ್ ಆಸ್ರೊ ಆಸ್ತಲೊ ಮ್ಹಳ್ಳೆಂ ಚಿಂತುನ್ ತೊ ಸಂತೊಸಾನ್ ಆಸ್‌ಲ್ಲೊ. ದೋನ್ ಮಹಿನೆ ಕಶೆ ಪಾಶಾರ್ ಜಾಲೆ ಮ್ಹಳ್ಳೆಂ ತಾಕಾಚ್ಚ್ ಕಳ್ಳೆಂನಾ. ಬಾಯ್ಲ್ ಭುರ್ಗ್ಯಾಂಸವೆಂ ಕಶೆ ದೀಸ್ ವೆಗಿಂ ಪಾಶಾರ್ ಜಾತಾತ್ ಮ್ಹಳ್ಳೆಂಚ್ ತಾಕಾ ಕಳಿತ್ ಜಾಂವ್ಚಾಧಿಂ ತಾಣೆಂ ಪಾಟಿಂ ಯೇಂವ್ಕ್ ಆಸ್‌ಲ್ಲೆಂ.

ಮಣಿ ಪಾಟಿಂ ಯೆತೆಚ್ಚ್ ತಿಯೊಕ್ ಗಾಂವಾಕ್ ವಚೊಂಕ್ ವತ್ತಾಯ್ ಕರಿಲಾಗ್ಲೊ. ಪುಣ್ ತಿಯೊನ್ ಏಕ್ ವರಸ್ ಗಾಂವಾಕ್ ವೆಚೆಂ ನಾಕಾ ಮ್ಹಣೊನ್ ನಿಚೆವ್ ಕೆಲ್ಲೊ. ಪರತ್ ಚಾರ್ ಪಾಂಚ್ ಮಹಿನೆ ಉತಾರ್ಲೆಲೆ ಆನಿಂ ಶೆಖಾಚಾ ರಿಣಾಚೊ ಅರ್ಧೊ ವಾಂಟೊ ಎದೊಳ್‌ಚ್ಚ್ ಫಾರಿಕ್ ಜಾಲ್ಲೊ. ಆನಿಂ ತಿಯೊಚಾ ಹಾತಾಂತ್‌ಯಿ ಚಡುಣೆಂ ಪಂದ್ರಾ ವೀಸ್ ಹಜಾರ್ ರುಪಯ್ ಮ್ಹಣಾಸರ್ ಆಸ್‌ಲ್ಲೆ. ತಾಣೆಂ ಆತಾಂ ತೆ ಸಗ್ಳೆಂ ಜಮೊ ಕರ್ನ್ ತಾಚೊ ಸಾಂಬಾಳ್ ಮೆಳವ್ನ್ ಪಂಚ್ವೀಸ್ ಹಜಾರಾಂಚಿ ಡ್ರಾಫ್ಟ್ ಕರ್ನ್ ಆಪ್ಣಾನ್ ತಶೆಂ ಕೊಣಾಕೊಣಾಚಿಂ ಉತ್ರಾಂ ಆಯ್ಕೊನ್ ಬರಯಿಲ್ಲ್ಯಾ ಕಾಗ್ದಾವಿಶ್ಯಾಂತ್ ಚುರ್ಚುರೆ ಉಚಾರ್ನ್ ತಿ ಡ್ರಾಫ್ಟ್ ಧಾಡ್ನ್ ದಿಲಿ.

ದೀಸ್ ಅಶೆಚ್ಚ್ ಪಾಶಾರ್ ಜಾತಾಲೆ. ತಿಯೊಚಾ ಮತಿಂತ್ ಆತಾಂ ಕಿತೆಂಚ್ ನಾತ್‌ಲ್ಲೆಂ. ತೊ ಜೆ ಕಿತೆಂ ಘಡ್ಲಾಂ ತೆಂ ಏಕ್ ಸ್ವಪಾಣ್ ಮ್ಹಳ್ಳೆಪರಿಂ ವಿಸ್ರೊನ್ ಗೆಲೊ. ಆನಿಂ ತವಳ್‌ತವಳ್ ಗಾಂವಾಕ್ ಪೊಯ್ಶೆ ಧಾಡುಂಕ್ ಲಾಗ್ಲೊ. ಕಶೆಯ್ ತಾಚೆಂ ಶೇಖಾಲಾಗ್ಚೆಂ ರೀಣ್ ಸಗ್ಳೆಂ ಫಾರಿಕ್ ಜಾಲ್ಲೆಂ ದೆಖುನ್ ತಿಯೊ ಇಲ್ಲೊ ಸಂತೊಸಾನ್ ಆಸ್‌ಲ್ಲೊ. ಮಣಿಚೆಂ ರೀಣ್‌ಯ್ ತಾಣೆಂ ಪಾಟಿಂ ದಿಲ್ಲೆಂ. ಮಣಿಚೆಂ ರೀಣ್ ಉಪ್ರಾಂತ್‌ಯಿ ಪಾಟಿಂ ದಿವ್ಯೆತ್ ಮ್ಹಳ್ಳೆಂ ತಿಯೊಕ್ ಕಳಿತ್ ಆಸ್‌ಲ್ಲೆಂ.

ತಾಕಾ ಎಸ್ತೆಲಾಚೆಂ ಕಾಗಾದ್ ವಾಚುನ್ ಆಪ್ಣಾಚೆರ್‌ಚ್ಚ್ ಶಿಣ್ ಉಚಾರ್ಲೊ. ಆಪ್ಣಾನ್ ತಶೆಂ ಕರಿನಾಯೆ ಆಸ್‌ಲ್ಲೆಂ ಮ್ಹಳ್ಳೆಂ ತಾಕಾ ಸುಸ್ತಾಲೆಂ. ತರೀ ಆತಾಂ ಕಿತೆಂಚ್ ಕರ್ಚೆಪರಿಂ ನಾ. ತಿಯೊನ್ ಮಾರ್ಕುಚೊ ಸಾಂಗಾತ್ ಇಲ್ಲೊ ಉಣೊ ಕೆಲ್ಲೊ. ಕೊಣೆಂಯ್ ಸಾಂಗ್‌ಲ್ಲೆಂ ಆಯ್ಕೊಂವ್ಚೆಂ ನ್ಹಂಯ್ ಮ್ಹಣೊನ್ ಎದೊಳ್‌ಚ್ಚ್ ತಿಯೊನ್ ಮತಿಂತ್ ಧೃಡ್ ನಿಚೆವ್ ಕೆಲ್ಲೊ. ತಾಚಾ ಚಿಂತ್ನಾ ಭ್ರಮಿದೆಂತ್ ತಾಚಾ ಕುಟ್ಮಾನ್ ಏಕ್ ಬರೆಂ ಜಿವಿತ್ ಜೊಡ್ಚೆಂ ಜಾಯ್ ಆಸ್‌ಲ್ಲೆಂ ಆನಿಂ ತ್ಯಾ ಖಾತಿರ್ ತೊ ಕಸಲ್ಯಾಯ್ ತ್ಯಾಗಾಕ್ ತಯಾರ್ ಆಸ್‌ಲ್ಲೊ.

ಅಶೆಂ ಕುವೆಯ್ಟಾಕ್ ಯೇವ್ನ್ ಎದೊಳ್‌ಚ್ ಸಾಡೆ ತೀನ್ ವರ್ಸಾಂ ಉತಾರ್ಲಿಂ ಆನಿಂ ತಿಯೊನ್ ಆಪ್ಣಾನ್ ಗಾಂವಾಕ್ ಯೆಂವ್ಚೆವಿಶ್ಯಾಂತ್ ಎಸ್ತೆಲಾಕ್ ಬರಯ್ಲೆಂ. ಆನಿಂ ಎಸ್ತೆಲಾನ್ ತಾಕಾ ಜಾಪ್ ಬರಯ್ಲಿ. ಗಾಂವಾಕ್ ಯೆಂವ್ಚಿ ಖಬಾರ್ ಸಂತೊಸಾಚಿಚ್ಚ್. ತರೀ ಆನಿಂ ಇಲ್ಲೊ ತೇಂಪ್ ರಾವೊನ್ ಕಾಂಯ್ ಇಲ್ಲೆಂ ಭಾಂಗಾರ್ ಕೆಲೆಂ ತರ್ ಬರೆಂ. ಪುಣ್ ಖಂಚೇಂಯ್ ಚಿಂತುನ್ ಪಳೆ. ಘರಾಂತ್ ಆತಾಂ ಜಾಯ್ತಿ ಬದ್ಲಾವಣ್ ಕರುಂಕ್ ಆಸಾ. ಮಾತಿಯೆಚೊ ದೊರೊ ಎದೊಳ್‌ಚ್ ಪರ್ತಾಲಾ ದೆಖುನ್ ತೊ ಬರೊ ಕರುಂಕ್ ಆಸಾ. ಘರಾ ಬಗ್ಲೆನ್ ಆಸ್ಚಾ ಬಾಂಯ್ಕ್ ಪಾಂಪು ಘಾಲುಂಕ್ ಆಸಾ. ಆಂಗ್ಣಾಕ್ ಸಿಮೆಟ್ ಘಾಲಂವ್ಕ್ ಆಸಾ, ಘರಾ ಪಾಟ್ಲೆಂ ಕೊಡ್ಕೆಂ ದುರಸ್ತ್ ಕರುಂಕ್ ಆಸಾ, ನಾಣಿಂ ಆನಿಂ ಖಾಕುಸ್ ಬಾಂದುಂಕ್ ಆಸಾ. ತ್ಯಾ ಶಿವಾಯ್ ಭುರ್ಗಿಂ ದೊಗಾಂಯ್ ಆತಾಂ ಇಸ್ಕೊಲಾಂತ್ ಶಿಕ್ತಾತ್ ದೆಖುನ್ ತಾಂಚೊ ಗರ್ಜೊ ಆಸಾತ್. ಕೆನ್ನಾ ಪಿಕ್ನಿಕಾಕ್ ವೆತಾತ್, ತಾಂಕಾ ನಾ ಮ್ಹಣೊಂಕ್ ಜಾಯ್ನಾ. ತಾಂಚಾ ಮುಸ್ತಾಯ್ಕೆಕ್, ಬುಕಾಂಕ್ ಆನಿಂ ಇತರ್ ಖರ್ಚಾಕ್ ಪೊಯ್ಶೆ ಜಾಯ್. ಘರಾಂತ್ ಮೆಳ್ಚಿ ಉತ್ಪತ್ತಿ ಕಾಂಯ್ ಹ್ಯಾ ಸಂಗ್ತ್ಯಾಂಕ್ ಪಾವಾನಾ. ಬೆಂಕಾಂತ್ ಕಾಂಯ್ ಜಮೊ ಜಾಲ್ಲೆ ಪೊಯ್ಶೆ ನಾಂತ್. ಗಾಂವಾಕ್ ಆಯ್ಲ್ಯಾರೀ ಖರ್ಚ್‌ಚ್ ಶಿವಾಯ್ ಹೆರ್ ಕಾಂಯ್ ನಾ. ಉಪ್ರಾಂತ್ ತೆಚ್ಚ್ ಪಯ್ಲೆಂಚಾ ದಿಸಾಂಕ್ ಪಾಟಿಂ ವಚಾಜಯ್ ಪಡ್ತೆಲೆಂ. ಆಪ್ಣಾಕ್ ಎಕ್ಲ್ಯಾಕ್ ಘರ್ ಸಗ್ಳೆಂ ಸಾಂಭಾಳುಂಕ್ ತ್ರಾಸ್ ಜಾತಾತ್ ತರೀ ಆನಿಂ ಥೊಡೊ ತೇಂಪ್ ಸುಧಾರ್ಸುನ್ ವೆಲ್ಲೆ ಶಿವಾಯ್ ನಿರ್ವೊಗ್ ನಾ. ಹೆಂ ಸಗ್ಳೆಂ ಏಕ್ ಘಡಿ ಚೀಂತ್ ಆನಿಂ ಉಪ್ರಾಂತ್ ತುಕಾ ಯೇಜಯ್ ಮ್ಹಣೊನ್ ಭೊಗ್ತಾ ತರ್ ಯೇ ಮ್ಹಣೊನ್ ಬರಯ್ಲೆಂ.

ಸತ್ತೀ ಮನಾಚಾ ತಿಯೊಕ್ ಎಸ್ತೆಲಾಚಾ ಕಾಗ್ದಾಂತ್ ಆಸ್ಚಿಂ ಸತಾಂ ದಿಸ್ಲಿಂ. ತೋಯ್ ಚಿಂತುಂಕ್ ಪಡ್ಲೊ. ಘರಾಕ್ ವಸ್ತು ಕೆಲ್ಯೊ ತರ್, ತಿ ಆಸ್ತ್‌ಚ್ಚ್ ಪಳೆ. ಗಲ್ಫಾಂತ್ ಕಾಮ್ ಕರ್ಚಾಂಚಾ ಘರಾಂತ್ ಪಳೆ ಭಾಯ್ಲ್ಯಾ ಆಂಗ್ಣಾ ಥಾವುನ್ ಭಿತರ್ಲ್ಯಾ ಕುಜ್ನಾ ಪರ್‍ಯಾಂತ್ ಗಲ್ಫಾಚೊಚ್ಚ್ ಸಾಮಾನ್. ತಾಂಚಾ ಬಾಯ್ಲ್ ಭುರ್ಗ್ಯಾಂಚಾ ಮುಸ್ತಾಯ್ಕೆಂತ್‌ಯಿ ತಿಚ್ಚ್ ಕಾಣಿಂ. ಪಾಂಯಾಂಕ್ ಘಾಲ್ಚಾ ವಾಣಾಂ ಥಾವುನ್ ತಕ್ಲೆರ್ ಮಾಳ್ಚಾ ಫುಲಾಂ ಪರ್‍ಯಾಂತ್ ಸಗ್ಳ್ಯೊ ವಸ್ತು ಗಲ್ಫಾಚೊ. ತಾಂಚೆಪರಿಂ ಭಾಂಗಾರಾಂತ್ ಲೊಳೊಂಕ್ ಆಮ್ಕಾಂ ಸಾಧ್ಯ್ ನಾ ಖಂಡಿತ್. ಪುಣ್ ಇಲ್ಲೆಂ ತರೀ ಭಾಂಗಾರ್ ಹಾಡಿನಾಕಾಯೆ? ಫಾಲ್ಯಾಂಚೆ ದೀಸ್ ಕಶೆ ರಾವ್ತಿತ್ ಮ್ಹಳ್ಳೆಂ ಕೊಣೀಂ ನೆಣಾಂತ್.

ಭುರ್ಗಿಂ ವ್ಹಡ್ ಜಾವ್ನ್ ಯೆತಾನಾ ತಾಂಚೊ ಗರ್ಜೊ ವಾಡ್ತಾತ್. ಆತಾಂ ಭುರ್ಗಿಂ ಪಳೆ, ಜೊಯೆಲ್ ಹಾಯ್‌ಸ್ಕೂಲಾಂತ್ ಶಿಕ್ತಾಲೊ ಆನಿಂ ಜಿವಿತಾ ಸಾತ್ವೆಂತ್ ಶಿಕ್ತಾಲೆಂ. ದೆಖುನ್ ಹೆರಾಂಚಾ ಭುರ್ಗ್ಯಾಂಕ್ ಪಳೆವ್ನ್ ಮ್ಹಜಿಂ ಭುರ್ಗಿಂ ನವ್ಯೊ ನವ್ಯೊ ಆಶಾ ಕರುನ್ ಪಪ್ಪಾ ತೆಂ ಧಾಡ್, ಹೆಂ ಧಾಡ್, ಪಪ್ಪಾ ತೆಂ ಘೆವ್ನ್ ದೀ ಹೆಂ ಘೆವ್ನ್ ದೀ ಮ್ಹಣ್ತಾನಾ ತಾಂಕಾ ಕಶೆಂ ನಾಂ ಮ್ಹಣೊಂ? ಆಶೆಂವ್ಚೆಂ ಹಕ್ಕ್ ಹೆರಾಂಚಾ ಭುರ್ಗ್ಯಾಂಪರಿಂ ಆಪ್ಲ್ಯಾ ಭುರ್ಗ್ಯಾಂಕ್ ನಾಂಗೀ?

ಹಾಂವೆ ಘೆತ್‌ಲ್ಲೆಪರಿಂ ಕಶ್ಟ್ ಮ್ಹಜಾ ಭುರ್ಗ್ಯಾಂನಿಂ ಘೆಂವ್ಕ್ ನ್ಹಜೊ. ತಾಂಕಾ ಏಕ್ ಬರೊ ಫುಡಾರ್ ದಿಂವ್ಚೆಂ ಮ್ಹಜೆಂ ಕಾಮ್. ಮ್ಹಜಾ ಬಾಪಾಯ್ಕ್ ಏಕ್ ಸಬ್ಧ್ ಬರಂವ್ಕ್ ಕಳಿತ್ ನಾತ್‌ಲ್ಲೆಂ ತರೀ ಮ್ಹಾಕಾ ಕಾಂಯ್ ಇಲ್ಲೆಂ ಶಿಕಾಪ್ ದಿಲ್ಲೆಂ. ಆನಿಂ ಮ್ಹಜಾ ಭುರ್ಗ್ಯಾಂಕ್ ಬರೆಂ ಶಿಕಾಪ್ ಆನಿಂ ಬರೊ ಫುಡಾರ್ ದಿಂವ್ಚೆಂ ಆಪ್ಣಾಚೆಂ ಕಾಮ್ ಮ್ಹಣೊನ್ ತಿಯೊ ಚಿಂತಿಲಾಗ್ಲೊ ಆನಿಂ ಆಪ್ಣಾನ್ ಗಾಂವಾಕ್ ವೆಚಿ ಆಲೋಚನ್ ಸದ್ದ್ಯಾಕ್ ಸೊಡ್ನ್ ಸೊಡ್ಲಿ.

ಮುಂದರ್‍ಸಿಲಾಂ...

Tags:  Vally Quadras,e konkani novel, Konkani, Mangalore, Mangalorean, Mother Tongue

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE