:: ಮಾಯ್ ಭಾಸ್

ಬರಯ್ಣಾರಾ ವಿಶಿಂ ಜಾಣಾ ಜಾ...

Dec. 21, 2015
ಜೊರ್ಜಿ ಪೀಂತ್ ಆಯ್ಕೊಳ್

ಕೊಂಕ್ಣಿ ಸಾಹಿತ್ಯ್ ಶೆತಾಂತ್ ಆಪ್ಲಿಂ ಪಾಳಾಂ ರೊಂಬೊಯಿಲ್ಲೊ ಪ್ರಭುದ್ದ್ ಸಾಹಿತಿ. ಏಕ್ ಗೂಂಡ್ ಚಿಂತ್ಪಾಚೊ, ಅಪ್ಲ್ಯಾ ಸುಡಾಳ್ ಕೊಂಕ್ಣಿ ಭಾಸೆಖಾತಿರ್ ಲೊಕಾಂನಿ ಲೆಕ್‌ಲ್ಲೊ ವಿಚಾರ್‌ವಂತ್ ಸಾಹಿತಿ. ಹಾಚಾ ಲಿಖ್ನ್ಯಾಂನಿ ಉದೆಲ್ಲಿಂ ಪದಾಂ ಮಾಂಡ್ ಸೊಭಾಣ್ ಪಂಗ್ಡಾನ್ ಗಾಯ್ಲ್ಯಾಂತ್. ಹಾಚಾ ಜಾಹಿತ್ತ್ಯಾ ಕವಿತಾಂಕ್, ಕಾಣ್ಯಾಂಕ್ ಇನಾಮಾಂಯಿ ಲಾಭ್ಲ್ಯಾಂತ್. ಕೊಂಕ್ಣೆಂತ್ ಪರ್‍ಗಟ್ ಜಾಲ್ಲೆಂ ತಾಚೆಂ ತರ್‍ಜಣ್ - ಜಿವಿತಾ ಸೊಭಾಣ್, ಕೊಂಕ್ಣಿ ಸಾಹಿತ್ಯಾಂತ್ ಏಕ್ ಅಪ್ರೂಪ್ ದಿರ್‍ವೆಂ ಮ್ಹಣ್ಯೆತ್. ಎದೊಳ್ ಪರ್‍ಯಾಂತ್ ಕೊಂಕ್ಣೆಂತ್ ತತ್ವ್‌ಶಾಸ್ತ್ರ್ ತರ್ಜಣ್ ಜಾಂವ್ಕ್ ನಾತ್‌ಲ್ಲೆಂ ತೆಂ ಹಾಣೆಂ ಸಾಧ್ಯ್ ಕರ್‍ನ್ ದಾಖಯ್ಲಾಂ. ೨೦೦೨ - ೨೦೦೪ ಇಸ್ವೆಚ್ಯಾ ಆವ್ದೆಂತ್ ಮಾಯ್ ಭಾಸ್.ಕೊಮ್ ಚೆರ್ ಹೆಂ ಅಂಕಣ್ ಫಾಯ್ಸ್ ಜಾಲ್ಲೆಂ. ಜೊರ್ಜಿ ಪೀಂತಾಚೆಂ ಮರಣ್ ಕೊಂಕಣಿ ಸಾಹಿತ್ಯ್ ಶೆತಾಕ್ ಜಾಲ್ಲೆಂ ವ್ಹಡ್ ನಷ್ಟ್ ಮ್ಹಣ್ಯೆತಾ.

80.5

User Rating

"ಕಾಂಯ್ ಇಲ್ಲೆಶೆಂ ಪಿಯೆನಾಂ ಜಾಲ್ಯಾರ್ ನೀದ್‌ಚ್ ಯೇನಾಂ" ಮ್ಹಳ್ಳೆಂ ಉತರ್ ಕೊಣೀಂ ಪಿಯೆತಲ್ಯಾಚ್ಯಾ ತೊಂಡಾಂತ್ ಥಾವ್ನ್ ಯೆತಾ ಜಾಲ್ಯಾರ್ ತೊ ಆಮಾಲ್ ಪಿಡೇಸ್ತ್ ಮ್ಹಣೊನ್ ಖಾತ್ರೆನ್ ಸಾಂಗೊಂಕ್ ವಯ್ಜಾಚಿ ಗರ್ಜ್ ನಾಂ . ಹೆಂ ಉತರ್ ಆಮ್ಕಾಂ ವಾಜ್ಬಿ ದಿಸ್ತಾ. ಕಿತ್ಯಾಕ್ ಹೆರಾಂನಿಂ ಸಾಂಗ್‌ಲ್ಲೆಂಯ್ ಆಮಿಂ ಆಯ್ಕಾಲಾಂ. "ಆಮ್ಚ್ಯಾಕ್ ಇಲ್ಲೆಶೆಂ ಪಿಯೆನಾಂ ಜಾಲ್ಯಾರ್ ಜಾಯಿಚ್ಚ್ ನಾ. ಸಗ್ಳಿ ರಾತ್ ಕೂಸ್ ಪರ್ತುನ್ ಪಾಶಾರ್ ಕರ್ತಾ". ಹೊ ವಿಷಯ್ ಆಮಿಂ ಜರೀ ಗಂಭೀರಾಯೆನ್ ಘೆತ್ಲೊ ತರ್ ಹೆರಾಂನಿಂ ಸಾಂಗ್‌ಲ್ಲೆಂ ಆಸಾ, "ಥೊಡ್ಯಾಂಕ್ ತಶೆಂ ಜಾತಾ. ಕಾಂಯ್ ಇಲ್ಲೆಂ ಪಿಯೆನಾಂ ತರ್ ನೀದ್‌ಚ್ ಯೇನಾಂ. ತಿ ವ್ಹಡ್ಲಿ ಗಜಾಲ್ ನಹಿಂ ಹಾಬಾ". ತೆದಾಳಾ ಆಮಿಂಯೀಂ ಚಿಂತ್ಚೆಂ �ಜಾಂವ್ಕ್ ಪುರೊ� ಮ್ಹಣೊನ್. ಆಮಿಂ ತಕ್ಲಿ ಆಟಯ್ಲಿಚ್ ನಾಂ. ಸವಾಲ್ ಕೆಲೆಂಚ್ ನಾಂ - ಜರೀ ಪಿಯೆವ್ನ್೦ಚ್ ನೀದ್ ಯೆಂವ್ಚಿ ತರ್ ತಿ ಕಸಲ್ಯಾ ಕಸ್ತಾಚಿ ನೀದ್? ಮ್ಹಳ್ಲೆಂ ಸವಾಲ್ ಆಮ್ಕಾಂ ಝಳ್ಕಾಲೆಂಚ್ ನಾಂ. "ಮ್ಹಳ್ಯಾರ್, ನಿದ್ಚ್ಯಾಖಾತಿರ್ ಹಾಣೆಂ ಜಿಣಿಂಭರ್ ಹರ್‍ಯೆಕಾ ದಿಸಾ ಪಿಯೆಂವ್ಚೆಂ ಪಡ್ತೆಲೆಂಗೀ?" ಮ್ಹಳ್ಳೆಂ ಸವಾಲ್‌ಯೀ ಆಮ್ಚ್ಯಾ ಮತಿಕ್ ಆಯ್ಲೆಂ ನಾಂ. ಆಮಿಂ ಥೊಡ್ಯಾ ಗೈರ್ ಆಮಾಲಿಂಕ್ ಪಳೆಲೆಂ. ತಾಣೆಂ ಶಿಸ್ತೆನ್ ಏಕ್‌ದೋನ್ ಪೆಗ್ಗ್ ಪಿಯೆವ್ನ್ ಘಟ್ಟ್ ಜೇವ್ನ್ ಸ್ವಸ್ತ್ ನಿದ್ಚೆಂ ಪಳೆಲೆಂ. ವಿಚಾರ್‍ಲ್ಯಾರ್ ತಾಣೆಂ ಹಾಸೊನ್ ಹಾಸೊನ್ ಸಾಂಗ್ಲೆಂ - "ವ್ಹಯ್, ಬರೀ ಜಿರ್ವಣ್‌ಯೀ ಜಾತಾ ಆನಿ ಘಟ್ಟ್ ನೀದ್‌ಯೀ ಯೆತಾ" ಮ್ಹಣೊನ್. ಹಾಂಗಾಸರ್ ಆಮಿಂ ಫಟ್ವಾಲ್ಯಾಂವ್. ಭಲಾಯ್ಕೆಚ್ಯಾ ಮನ್ಶಾಕ್ ಆನಿ ಡಯಾಬಿಟೀಸ್ ಜಾಲ್ಲ್ಯಾಕ್ ಸಾಕರ್ ಕಶಿಗೀ ತಶೆಂ ಗೈರ್ ಆಮಾಲ್ಯಾಕ್ ಆನಿ ಆಮಾಲ್‌ಪಿಡೇಸ್ತಾಕ್ ಸೊರೊ ಮ್ಹಳ್ಳೆಂ ಆಮ್ಕಾಂ ಕೊಣೆಂಯ್ ಸಾಂಗ್ಲೆಂನಾಂ. ಆಮ್ಚ್ಯಾ ಪಿಡೇಸ್ತಾನ್ ಆಪ್ಲ್ಯಾ ಥೊಡ್ಯಾ ನಿದೆಖಾತಿರ್ ಸೊರ್‍ಯಾಚೆರ್‌ಚ್ ಹೊಂದ್ವೊಂಚೆ ಆಮಾಲ್ ಪಿಡೆಚೆಂ ಉಗ್ತೆಂ ಖುಣ್ ಮ್ಹಳ್ಳೆಂ ಆಮ್ಕಾಂ ಕಳ್ಳೆಂಚ್ ನಾಂ.

ಥೊಡ್ಯಾಂಕ್ ತಶೆಂ ಜಾವ್ಯೆತ್. ಪೂಣ್ ಆನಿ ಥೊಡ್ಯಾ ಪಿಡೇಸ್ತಾಂಕ್ ಫಕತ್ತ್ ಭರ್ಮಿದ್ ಮಾತ್ರ್. ಪಿಯೆಲ್ಲೆಂ ಚಡ್ ಜಾಲ್ಲೆ ತಶೆಂ ತೊ ಅಶಾಂತ್ ಜಾತಚ್ ವೆತಾ. ಆನಿ ಆಮಾಲ್ ಚಡೊನ್ �ನಿದ್ಲೊ� ಜಾಲ್ಯಾರೀ ತಾಚಿ ನೀದ್ ಶಾಂತ್ ಆಸಾನಾಂ. ಎಕ್‌ಚ್ ಮತ್ ಚುಕ್ತಾ ಪರ್‍ಯಾಂತ್ ನೀದ್ ಯೇನಾಂ. ಆನಿ ಪಿಯೆವ್ನ್ ಪಿಯೆವ್ನ್ ಮತ್ ಚುಕೊನ್ ಅರ್ಧ್ಯಾ ನಿದೆಂತ್ ಆಸ್ಲ್ಯಾರೀ ತೊ ಅಶಾಂತ್‌ಚ್ ಆಸ್ತಾ. ಭಲಾಯ್ಕೆಭರಿತ್ ಮನ್ಶಾಕ್ ನಿದೆವರ್ವಿಂ ಮೆಳ್ಚೊ ಸುಶೆಗ್ ಆನಿ ಸುಡ್ಸುಡಾಯ್ ತಾಕಾ ಮೆಳಾನಾಂ.

ನಿದೆಚಿ ಗಜಾಲ್ ಅಶಿ ತರ್, ತಾಚ್ಯಾ ಮತಿಚ್ಯಾ ಸಮಾಧಾನಾಚಿ ಗಜಾಲ್‌ಚ್ ವಿಂಗಡ್. ಶಾಂತಿ, ಸಮಾಧಾನ್ ಮ್ಹಳ್ಯಾರ್ ಕಿತೆಂ ತೆಂ ತಾಕಾ ಕಳಿತ್‌ಚ್ ನಾಂ. ಪಿಯೆಂವ್ಕ್ ಧಾರಾಳ್ ದುಡು ಆಸ್ಲ್ಯಾರ್ - ತೆಂಚ್ ತಾಕಾ ವ್ಹರ್ತೆಂ ಸಮಾಧಾನ್. ನಾಂ ತರ್ ತಾಚಿ ಮತ್ ನಿರಂತರ್ ಅಸಲ್ಯಾ ಗೊಂದೊಳಾಂತ್ ಆಸ್ತಾ ಕೀ, ತಾಕಾ ಉಡಾಸ್ ಆಸ್‌ಲ್ಲ್ಯಾ ಕಾಳಾಥಾವ್ನ್ ತಾಕಾ ನೀಜ್ ಸಮಾಧಾನೆಚೊ ಅನ್ಭೋಗ್ ಜಾಲ್ಲೊ ನಾಂ. ಜಾಲಾ ತರ್ ಕಾಂಯ್ ಭುರ್ಗ್ಯಾಪಣಾರ್ ಸಕಾಳಿಂಚ್ಯಾ ಮಿಸಾವೆಳಿಂ ವ ಎಕ್ಲೊಚ್ ಇಗರ್ಜೆಂತ್ ಮಾಗ್ತಾನಾಂ ಭಗ್‌ಲ್ಲ್ಯಾ ಶಾಂತ್‌ಪಣಾಚಿ ಘಡಿ ಆಸ್ಯೆತ್. ಪೂಣ್ ಆತಾಂ ತಾಕಾ ತಿ ಉಡಾಸ್ ನಾಂ. ಉಡಾಸ್ ಆಸ್ಲ್ಯಾರ್ ಖಂಯ್ ತರೀ ಅಪ್ರೂಪ್ ತೆಂ ಶಾಂತ್‌ಪಣ್ ಸೊಧುನ್ ತೊ ಇಗರ್ಜಿಕ್ ವಚಾತ್. ಪೂಣ್ ಫಾಯ್ದೊ ನಾಂ. ಪಾವ್ಸಾಳೆಂತ್ಲ್ಯಾ ಆವ್ರಾಂತ್, ನಂಯ್ಚ್ಯಾ ಘುಂವ್ಡೆರ್ ಕದ್ವಳ್ ಉದಾಕ್ ಉಚಾಂಬಳಾಯೆನ್ ವಯ್ರ್ ಪಂದಾ ಜಾಲ್ಲೆಬರಿ ತಾಚ್ಯಾ ಮತಿಂತ್ ಚಿಂತ್ನಾಂ ಚಾಳೊನ್೦ಚ್ ಆಸ್ತಾತ್ ಆನಿ ತೊ ಭುರ್ಗ್ಯಾಪಣಾಚೊ ಅನ್ಭೋಗ್ ತಾಕಾ ಪರತ್ ಮೆಳಾನಾಂ. ಅಶೆಂ ತಾಣೆಂ ಚುಕೊನ್ ತರೀ ಇಗರ್ಜೆಕ್ ವೆಚೆಂ ಬಂದ್‌ಚ್ ಜಾತಾ.

ಆತಾಂತಾಂ ತಾಚೆ ಇಷ್ಟ್ ಮ್ಹಣೊನ್ ಕೊಣೀಂ ನಾಂತ್. ಎಕಾವೆಳಾರ್ ತಾಚೆಭಂವ್ತಿಂ ಇಷ್ಟಾಂಚಿ ಫೊವ್ಜ್‌ಚ್ ಆಸ್‌ಲ್ಲಿ. ಹಾಚೆಂ ಪಿಯೊಣೆಂ ಚಡ್‌ಲ್ಲೆ ತಶೆಂ ಎಕೆಕ್ಲೊಚ್ ಮಾಯಾಗ್ ಜಾಲೆ. ಆತಾಂ ಆಸ್ಚೆ ಸಾಂಗಾತಿ ತಾಚೆ ತಸಲೆಚ್ ಪಿಡೇಸ್ತ್! ಕೊಡ್ಕಾರಾಕ್ ಕೊಡ್ಕಾರಾನ್ ಮಾತ್ರ್ ಸಾಂಗಾತ್ ದಿಂವ್ಚೆಬರಿ ಆಮಾಲ್ ಪಿಡೇಸ್ತಾಕ್ ತಾಚೆ ತಸಲೆಚ್ ಪಿಡೇಸ್ತ್ ಮಾತ್ರ್ ಸಾಂಗಾತಿ ಜಾವ್ನ್ ಮೆಳ್ತಾತ್. ಆಮ್ಕಾಂ ಹಿ ಗಜಾಲ್ ಗುಮಾನಾಕ್ ಗೆಲ್ಲಿ ತರೀ ಸಮ್ಜೊಂಕ್ ನಾಂ. "ತುಜೆ ಇಷ್ಟ್ ಸಗ್ಳೆ ಖಂಯ್ ಗೆಲೆ?" ಮ್ಹಣೊನ್ ವಿಚಾರ್‍ಲ್ಯಾರ್ ತಾಚಿ ಜಾಪ್ ರಾಗಾಚಿ ಆನಿ ದುರ್ಸೊಣ್ಯಾಚಿ ಆಸ್ತಾಲಿ. "ತಾಂಕಾಂ ಆತಾಂ ಹಂಕಾರ್ ಆಯ್ಲಾ. ವ್ಹಡ್ಪಣ್ ಆಯ್ಲಾಂ" ವ ತಶೆಂ ಕಿತೆಂಯ್ ಆನಿ ಆಮಿಂಯೀ ಪಾತ್ಯೆಲ್ಯಾಂವ್. ಹೆಂ ತಾಚ್ಯಾ ಪಿಡೆಚೆಂ ಆನ್ಯೇಕ್ ಲಕ್ಷಣ್ ಮ್ಹಳ್ಳೆಂ ಆಮ್ಕಾಂ ಕಳ್ಳೆಂ ನಾಂ.

ತಾಕಾ ಭಗ್ತಾ ಸಗ್ಳೆಂಯೀ ಆಪ್ಣಾಥಂಯ್ ಅನ್ನ್ಯಾಯ್ ಕರ್ತಾತ್. ಆಪ್ಣಾಕ್ ಖಂಯ್ಸರ್‌ಯೀ ನೀತ್ ಮೆಳಾನಾಂ. ಆಪ್ಲಿ ಶಾತಿ ಸಾಮರ್ಥಿ ಕೊಣೀಂ ವಳ್ಕಾನಾಂ, ಸಮಾಜಿಕ್ ಆಪ್ಣಾಚಿ ಪರ್ವಾನಾಂ, ಆಪುಣ್ ಕೊಣಾಕ್‌ಚ್ ನಾಕಾ ಜಾಲಾಂ ಅಸಲಿಂ ಆಪ್-ಬಿರ್ಮತಿಚಿಂ ಚಿಂತ್ನಾಂ ತಾಕಾ ಧೊಸ್ತಾತ್ ಆನಿ ತೆಂಚ್ ತಾಚೆಂ ಸದಾಂಚೆಂ ರುದಾನ್. ತಾಚೆ ಅಸಲೆ ಕಳ್ವಳೆ ಆನಿ ರುದಾನ್ ಪಳೆತಾನಾ ಆಮ್ಕಾಂ ತಾಚಿ ಬಿರ್ಮತ್ ದಿಸ್ತಾ. ನಾಂ ತೊ ಆಮ್ಕಾಂ ತರೀ ಜಾಯ್ ಆಮಿಂ ತಾಕಾ ಗೌರವ್ ದಿತಾಂವ್, ಮೋಗ್ ಕರ್ತಾಂವ್ ಮ್ಹಣೊನ್ ತಾಕಾ ದಾಕಂವ್ಕ್, ರುಜು ಕರುಂಕ್ ಆಮಿಂ ಆಮ್ಚ್ಯಾ ತಾಂಕಿ ವರ್ತಿ ಮ್ಹಿನತ್ ವಾಟಾಯ್ತಾಂವ್‌ಕಿ ಕೆದಾಳಾ ತರೀ ತೊ ರಡ್ತಾ. ಆಪುಣ್ ಜಿಣ್ಯೆಂತ್ ಸಲ್ವಾಲೊ ಮ್ಹಣೊನ್ ದುಖಾಂ ಗಳಯ್ತಾ. ಕಿತೆಂ ಜಾಯ್ಜಯ್ ಆಸ್‌ಲ್ಲೆಂ ಆಪ್ಣೆಂ ಆನಿ ನಶೀಬಾನ್ ಆಪ್ಣಾಕ್ ಖಂಯ್ಸರ್ ಪಾಯ್ಲೆಂ ಮ್ಹಳ್ಳೆಂ ಉದ್ಗಾರ್ ಸೊಡ್ತಾ, ಚುರ್ಚುರೆ ವಾಳಯ್ತಾ. ಆನಿ ತಾಚಿ ಹಿ ಪರಿಸ್ಥಿತಿ ಪಳೆತಾನಾಂ ಆಮ್ಚ್ಯಾ ಕಾಳ್ಜಾಕ್ ಸುರಿ ಘಾಲ್ಲೆಬರಿ ಭಗ್ತಾ. ತಾಚ್ಯಾ ಬಿರ್ಮತಿನ್ ಆಮ್ಚೆಂ ಮನ್ ರಡ್ತಾ. ಆನಿ ತಾಣೆಂ ಕಿತೆಂ ಸಾಂಗ್ಲ್ಯಾರೀ ಕರುಂಕ್, ತಾಕಾ ಕಿತೆಂ ಜಾಯ್ ತರೀ ದೀಂವ್ಕ್ ಆಮಿಂ ತಯಾರ್ ಜಾತಾಂವ್. ಆಮ್ಚ್ಯಾ ತಾಂಕಿವರ್ತೆಂ ಸಾಧನ್ ಕರ್ತಾಂವ್. ಆಮಿಂಯೀ ತಾಚ್ಯಾ ಪಿಡೆಚೊ ವಾಂಟೊ ಜಾತಾಂವ್, ಪಿಡೇಸ್ತಾ ಸಾಂಗಾತಾ ಆಮಿಂಯೀ ಪಿಡೇಸ್ತ್ ಜಾತಾಂವ್.

ಹ್ಯೆ ಥರಾನ್ ಪಿಡೇಸ್ತಾಚೆರ್ ಆನಿ ತಾಚ್ಯಾ ಭಂವ್ತಿಂಚ್ಯಾಂಚೆರ್ ಭುಲ್ ಘಾಲ್ಚಿ ಹಿ ಪಿಡಾ ಕಿತ್ಲಿ ಶಿಂತ್ರ್ಯಾಳಿ ಆನಿ ಮಾರೆಕಾರ್ ಆಸಾನಾಕಾ?

----------------------------------------------------------------------------------------------------------------------------------------------------------------------

ಜಿಣ್ಯೆರೊದಾಂ ಥಾಂಬ್ಲಿಂ?

[ಅಂತರ್‌ಜಾಳಾಂತ್ ಪರ್ಗಟ್ ಜಾಲ್ಲ್ಯಾ ಬರ್‍ಯಾಂತ್ಲೆಂ ಬರೆಂ ವಾಚಾಪ್ �ಜಿಣ್ಯೆರೊದಾಂ�- ಹಾಚಿ ಶ್ರೇಯ್ ಫಾವೊ ಫಕತ್ತ್ ಎಕ್ಲ್ಯಾಕ್ - ದೆ| ಜೊರ್ಜಿ ಪೀಂತ್ ಆಯ್ಕೊಳಾಕ್, ಜೊ ಆಮ್ಕಾಂ ಅಪ್ಲ್ಯಾ ಉಡಾಸಾಚಿ ಕುರ್‍ಹು ಮಾತ್ರ್ ಸೊಡ್ನ್ ಗೆಲಾ]

ರೊದಾಂ ಥಾಂಬ್ತಿತ್ ಪುಣ್ ಜಿಣ್ಯೆರೊದಾಂ ಬಿಲ್ಕುಲ್ ನ್ಹಯ್. ಇತ್ಲೆಂಚ್ ಸಾಂಗ್ಯೆತಾ ಶಿವಾಯ್ ರುಜು ಕರುಂಕ್ ಮ್ಹಜಾನ್ ಅಸಾಧ್ಯ್. ಜಿಣ್ಯೆರೊದಾಂ ಆಮ್ಕಾಂ ದೀವ್ನ್ ಆಮ್ಕಾಂ ಸಾಂಡುನ್ ಗೆಲೊ ಜೊರ್ಜಿ ಪೀಂತ್. ಆತಾಂ ಉರುಲ್ಲ್ಯಾ ಥೊಡ್ಯಾ ಉಡಾಸಾಚಾ ಕುರ್‍ಹುಂಕ್ ವಿಂಚುನ್ ಏಕ್ ಘಡ್ಯೆಕ್ ಹ್ಯಾ ಜಿಣ್ಯೆರೊದಾಂಚೆರ್ ನದರ್ ಮಾರ್ತಾನಾ ಎದೊಳ್ ಖೈಂಸರ್‌ಯ್ ಉಗ್ಡಾಪೆ ಜಾಯ್ನಾತ್‌ಲ್ಲಿಂ ಥೊಡಿಂ ಸತಾಂ ಆಪ್ಲೆ ದೀಸ್ ಮೆಜುನ್ ಆಸ್ಚೆಂ ಸ್ವಷ್ಟ್ ದಿಸ್ತಾ;

ಚಡುಣೆಂ ಎಕಾ ವರ್ಸಾಧಿಂ ಅಸಲ್ಯಾಚ್ಚ್ ಎಕಾ ಅಂಕಣಾಖಾತಿರ್ ಜೆನ್ನಾ ಹಾವೆಂ ಬಾಬ್ ಜೊರ್ಜಿಕ್ ವಿಚಾರ್ ಕರ್ತಾನಾ ತಾಚಿ ಜಾಪ್ ಅನ್ಯೇಕಾ ಸವಾಲಾಂತ್ ಆಸ್‌ಲ್ಲಿ;

"ಆಮಾಲ್ ಪಿಯೊಣ್ಯಾವಿಶ್ಯಾಂತ್ ಅಂಕಣ್ ಬರಂವ್ಕ್ ತುಕಾ ಹಾಂವ್ಂಚ್ ಎಕ್ಲೊ ದಿಸ್ಲೊಂಗೀ? ಎಕಾ ತೆಂಪಾಚೊ ಬೆಬ್ದೊ?".

"ನಾ ಜೊರ್ಜ್ಯಾಬಾ, ಪಾವ್ಲ್ ಜಾಲ್ಲ್ಯಾ ಸಾವ್ಲಾನ್ ಕೆಲ್ಲಿಂ ಕಾಮಾಂ ಹೆರ್ ಕೊಣೇಂಯ್ ಕೆಲ್ಲಿಂ ನಾಂತ್, ದೆಕುನ್ ತುಜೆಶಿವಾಯ್ ಹೆರ್ ಕೋಣ್ ಹೆಂ ಅಂಕಣ್ ಬರಯ್ತಿತ್?"

ಅಶೆಂ ಕಿತ್ಲೊಸೊ ವೇಳ್ ಆಮಿಂ ಎಕಾಮೆಕಾ ತರ್ಕ್ ಕೆಲೆಂ, ಆಖ್ರೇಕ್ ಫೈಸಲಾಚಾ ಘಡ್ಯೆ ತಾಣೆಂ ಅನ್ಯೇಕ್ ಸವಾಲ್ ಮ್ಹಾಕಾ ಕೆಲೆಂ;

"ವಲ್ಲಿ ಬಾಬ್, ಏಕ್ ಸಾಂಗ್ ತುಂ ಮ್ಹಾಕಾ, ಬರೆಂ ವಾಚಾಪ್ ದಿಂವ್ಚೆಂ ಆಮ್ಚೆತಸಲ್ಯಾ ಬರವ್ಪ್ಯಾಂಚೆಂ ಕಾಮ್. ಬರೆಂಚ್! ಪುಣ್ ಅಸಲೆಂ ವಾಚಪ್ ಕಿತ್ಲಿಂ ವಾಚ್ತಿತ್ ತೆಂ ಸಾಂಗ್ ತುಂ ಮ್ಹಾಕಾ. ಇತ್ಲೆಂ ಬರೆಂ ವಾಚಪ್ ಆಸ್ಚೊ ವಾಂಜೆಲ್ ಆಮ್ಕಾಂ ಆಸಾ, ಪುಣ್ ತೊ ವಾಂಜೆಲ್ ಫಕತ್ ಆಲ್ತಾರೆರ್ ಮಾತ್ರ್ ಸೊಭ್ತಾ ಶಿವಾಯ್ ಆಮ್ಚಾ ದಿಸಾಳೆಂ ವಾಸ್ಚಾ ಮೆಜಾರ್ ನ್ಹಯ್. ಕಿತ್ಯಾಕ್ ಮ್ಹಳ್ಯಾರ್ ಅಸಲೆಂ ವಾಚಪ್ ಆಮ್ಕಾಂ ಏಕ್ ಘಡಿ ಮತಿಚೆರ್ ಬೆಸೊರ್ ಘಾಲ್ತಾ ಆನಿ ಆಮ್ಚಾ ಕಾಳ್ಯಾ ಕರ್ತುಬಾಂಚೆರ್ ಆಪ್ಲೊ ಉಜ್ವಾಡ್ ಘಾಲ್ತಾ ಮ್ಹಣ್ ನ್ಹಯ್‌ವೇ?"

ಸತ್ ಸಾಂಗೊಂ ತರ್ ಏಕ್ ಘಡಿ ಹಾಂವ್ ಮಿಟಾಖಾಂಬೊ ಜಾಲ್ಲೊಂ. ಆನಿ ಅಶಿ ಜಾಪ್ ದಿಲಿ;

"ಜೊರ್ಜ್ಯಾಬಾ, ಜಿಣ್ಯೆಂತ್ ಆಮ್ಚೆಂ ಜಯ್ತ್ ಆಮಿಂ ಜಿತ್ಲೆಂ ಆರಾಯ್ಲಾಂ ಯಾ ಕಿತ್ಲೆಂ ನೆರಾಯ್ಲಾಂ ಹಾಚೆರ್ ನ್ಹಯ್, ಬಗಾರ್ ಜೆಂ ಕಿತೆಂ ಕೆಲಾಂ ತೆಂ ಕಿತ್ಲ್ಯಾ ಪರಿಪೂರ್ಣ್ ರಿತಿರ್ ತೆಂ ಕೆಲಾಂ ಮ್ಹಳ್ಳೆಂ ಪ್ರಮುಖ್ ಜಾವ್ನಾಸಾ. ಎಕಾಚ್ ಖಿಣಾನ್ ಕೊಣಾಯ್ಚಾನ್‌ಯ್ ಸಂಸಾರ್ ಬದ್ಲುಂಕ್ ಸಾಧ್ಯ್ ನಾ. ಅಸಲೆಂ ಅಂಕಣ್ ಕೋಣ್ ವಾಚ್ತಾ ಯಾ ಕೋಣ್ ಸೊಡ್ತಾ ಮ್ಹಣ್ಚ್ಯಾ ತತ್ವಾಂಚೆರ್ ಜರ್ ಆಮಿಂ ಬರಯ್ಲೆಂ ತರ್, ಆಮಿಂ ಆಮ್ಕಾಂಚ್ ಫಟಯ್ತಾಂವ್. ಕೋಣ್ ವಾಚ್ತಾ ಯಾ ಕೋಣ್ ಸೊಡ್ತಾ ತಾಂತಾಂಚಾ ವಿಚಾರಾಂಚೆರ್ ಹೊಂದ್ವೊನ್ ಆಸಾ. ಪುಣ್ ಏಕ್ ಸಂಗತ್ ಮಾತ್ರ್ ನಖ್ಖಿ ಸಾಂಗ್ತಾಂ, ಹೆಂ ವಾಸ್ಚೆ ಧಾ ಠಕ್ಕೆ ವಾಚ್ಪಿ ತರ್‌ಯ್ ಹ್ಯಾ ಧಾ ಠಕ್ಕೆ ವಾಚ್ಪ್ಯಾಂತ್ಲೆ ಆಠ್ ಜಣ್ ತರ್‌ಯ್ ಆಪ್ಲೆ ದೊಳೆ ಉಘಡೊಂಕ್ ಸಕ್ತೆಲೆ. ತುಕಾ ಹೆಂ ವ್ಹಯ್ ಮ್ಹಣ್ ದಿಸ್ತಾ ತರ್ ಹೆಂ ಅಂಕಣ್ ಬರಯ್, ತುಕಾ ಜರ್ ಹಿ ಅಲೋಚನ್ ಪಿಶಿ ಮ್ಹಣ್ ದಿಸ್ತಾ ತರ್ ತುಜಿ ಖುಶಿ ಜಾಂವ್."

ಥೊಡ್ಯಾಚ್ ದಿಸಾಂ ಭಿತರ್ ಆಪ್ಲ್ಯಾ ಸೊಭಿತ್ ಹಾತ್ ಬರ್ಪಾಂತ್ ತಾಣೆಂ ಹ್ಯಾ ಅಂಕಣಾಚಾ ಅವಸ್ವರಾಂಕ್ ಮ್ಹಜಾ ಹಾತಿಂ ದಿತಾನಾ ಆಮಿಂ ಎಕಾಮೆಕಾ ಪಳೆಲ್ಯಾಂವ್ ಮಾತ್ರ್ ಶಿವಾಯ್ ಥಂಯ್ ಆಮ್ಚೆಂ ಮೌನ್ ಉಲಯ್ತಾಲೆಂ. ಪುಣ್ ಮ್ಹಾಕಾ ವಿಜ್ಮಿತ್ ಕರುಂಕ್ ಕಾರಣ್ ಜಾಲ್ಲೆಂ ಏಕ್ ಸತ್ ಜಾವ್ನಾಸ್‌ಲ್ಲೆಂ; ತಾಣೆಂ ಹೊ ಸಗ್ಳೊ ಅಂಕಣ್ ಜಾಕಾ ಅರ್ಪಣ್ ಕೆಲ್ಲೊ ವೆಕ್ತಿ - ಒಡಿ. ಃಂಖಖಙ ಒಂಎಔಖ.

"ಕೋಣ್ ಹೊ? ಅಜೂನ್ ಹಾಚೆವಿಶಿಂ ಹಾವೆಂ ಆಯ್ಕಾಲ್ಲೆಂನಾ, ಪಳೆಲ್ಲೆಂ ನಾಂ" ಮ್ಹಜಾ ಸವಾಲಾಂಕ್ ತಾಚೆಲಾಗಿಂ ಏಕ್ ಲಾಂಬ್ ಸುಸ್ಕಾರ್ ಆಸ್‌ಲ್ಲೊ;

"ವಲ್ಲಿ ಬಾಬ್, ಹೊ ಎಕ್ಲೊ ಗೊರೊ, ಕೋಣ್? ಕಿತೆಂ? ತೆಂ ಹಾಂವ್‌ಯ್ ನೆಣಾಂ. ಫಕತ್ ಇತ್ಲೆಂಚ್ ಜಾಣಾಂಕೀ, ಎಕ್ಲೊ ಗ್ರೇಸ್ತ್ ಘರಾಣ್ಯಾಚೊ, ಆನಿ ಕಶೆಂ ಆಪ್ಣಾಕ್ ಏಕ್ ಬೆಬ್ದೊ ಕರ್ನ್ ಘೆತ್ಲೊಕೀ, ತಾಚಾ ಸಗ್ಳ್ಯಾ ಕುಟ್ಮಾನ್ ತಾಕಾ ಸೊಡ್ನ್ ಘಾಲೊ ಆನಿ ಕುವೆಯ್ಟಾಂತ್ ಎಕ್ಲೊಚ್ ಜಿಯೆವ್ನ್ ಆಸ್ಚೊ ಹೊ ಮಾನೆಸ್ತ್, ಅನಾಮಿಕ್ ಅಮಾಲಿಸ್ತಾಂಚಾ ಜಮಾತೆಂತ್ ಮೆಳ್ಳೊ ಆನಿಂಜಾಯ್ತಿಂ ಬರಿಂ ಕಾಮಾಂ ಕರುಂಕ್ ಪಾವ್ಲೊ. ಆನಿ ಆತಾಂ ಹೊ ಮನಿಸ್ ಆಮ್ಚೆಮಧೆಂ ನಾಂ ತರ್‌ಯ್ ತಾಚಾ ಉಡಾಸಾಕ್ ಹೆಂ ಸಗ್ಳೆಂ ಅಂಕಣ್ ಸಮರ್ಪಿತ್ ಕರ್ತಾಂ".

ಜೊರ್ಜಿ ಬಾಬಾಚಿಂ ಉತ್ರಾಂ ಅಜೂನ್ ಮ್ಹಜಾ ಕಾನಾಂತ್ ಘುಣ್ಗುಣ್ತಾತ್. ಹೆಂ ತಾಚಾ ವೆಕ್ತಿತ್ವಾಚಿ ಅನ್ಯೇಕ್ ಕೂಸ್ ವಯ್ರ್ ಪಡ್ಲಿ.

ಕಿತೇಂಯ್ ಜಾಂವ್, ಜಿಣ್ಯೆರೊದಾಂ ಅಂಕಣಾಂತ್ ಉಟೊನ್ ದಿಸ್ಚಿಂ ಸತಾಂ ಆಮ್ಚಾ ದೊಳ್ಯಾಹುಜಿರ್ ಆಜೂನ್ ದಿಶ್ಟಿಕ್ ಪಡ್ಚಿಂ ಜಾವ್ನಾಸಾತ್. ಮ್ಹಾಕಾ ದಿಸಾನ್‌ದೀಸ್ ಕುರ್ವೊನ್ ವೆಚಾ ಅಪ್ಲ್ಯಾಪಣಾಚೆರ್ ಜಿತ್ಲಿ ಸಹಾನುಭೂತಿ ಆಸಾಗೀ ತಿತ್ಲೊಚ್ಚ್ ತಾತ್ಸಾರ್ ಹ್ಯಾ ಬದ್ಲೊನ್ ವೆಚಾ ಸಂಸ್ಕೃತೆಚೆರ್ ಆಸಾ. ಮ್ಹಜಾಕೀ ದೊಡ್ಯಾನ್ ಜೊರ್ಜ್ಯಾಬಾಕ್ ಆಸ್‌ಲ್ಲೊ. ಎಕಾಮೆಕಾಮಧೆಂ ಅಖೇರ್ ಜಾಯ್ನಾತ್‌ಲ್ಲೆಂ ಸಂಭಾಶಣ್, ತರ್ಕ್, ಝಗ್ಡೆಂ ಹೆಂ ಸರ್ವ್ ಎಕಾಮೆಕಾ ಸೊಸುನ್ ವೆಲ್ಲೆಶಿವಾಯ್ ನಿರ್ವೋಗ್ ನಾತ್‌ಲ್ಲೊ. ಕಿತ್ಯಾಕ್ ಮ್ಹಳ್ಯಾರ್ ತಾಣೆಂ ಮೋಗ್ ಕರ್ಚಿ ಕೊಂಕ್ಣಿ ಆವಯ್‌ಚ್ ಮ್ಹಜಿಯ್ ಮೊಗಾಚಿ ಕೊಂಕ್ಣಿ ಆವಯ್ ಆಸ್ತಾಂ ಹೆರ್ ನಿರ್ವೋಗ್ ಆಸ್ಚೊ ತರ್‌ಯ್ ಕಸಲೊ?

ಹ್ಯಾ ಬದ್ಲೊನ್ ವೆಚಾ ಸಂಸ್ಕೃತೆಕ್ ಆಮಿಂಚ್ ಜವಾಬ್ದಾರ್. ಆಯ್ಚೊ ದೀಸ್ ಮಾತ್ರ್ ಆಮ್ಕಾಂ ಆಸ್ತಾಂ ಆಮ್ಚೆಂ ಫಾಲೆಂ ಕೊಣೆಂ ಪಳೆಲಾಂ ಮ್ಹಳ್ಳಿಂ ಪಿಶಿಂ ತತ್ವಾಂ ಮಾಂದುನ್ ಅಸಲ್ಯಾ ಆಮಾಲ್ ಪಿಯೊಣ್ಯಾಂತ್ ಆಪ್ಲಿ ಪ್ರಗತ್ ಮೆಜ್ಚಾಂಕ್ ಫಾಲ್ಯಾಂಚೊ ಶೆವೊಟ್ ಕಸ್ಲೋಯ್ ಆಸೊಂ. ಪುಣ್ ಸಮಾಜೆಹುಜಿರ್ ಅಪ್ಲೆಂ ಘನತ್ವ್ ದಾಖಂವ್ಕ್ ತಾಂಕಾಂ ಹೆಂ ಆಮಾಲ್ ಪಿಯೊಣೆಂ ಕಡ್ಡಾಯ್. ಪಾರ್ಟಿ, ಕ್ಲಬ್ಬಾಂ ಕಡ್ಡಾಯ್. ಪುಣ್ ವಿಪರ್‍ಯಾಸ್ ಕಸಲೊಗೀ ಮ್ಹಳ್ಯಾರ್ ಆಮಿಂ ಪಾಶ್ಚಾತ್ಯ್ ಸಂಸ್ಕೃತೆಚಾ ಪಾಟ್ಲ್ಯಾನ್ ಧಾಂವ್ತಾಂವ್ ಪುಣ್ ಪಾಶ್ಚಾತ್ಯ್ ಲೋಕ್ ಆಮ್ಚಾ ಸಂಸ್ಕೃತೆಚಾ ಮೊಗಾರ್ ಪಡೊನ್ ಆಮ್ಚಾ ಸಂಸ್ಕೃತೆಚಾ ಪಾಟ್ಲ್ಯಾನ್ ಧಾಂವ್ತಾ ಆನಿ ಹೆಂಚ್ ಏಕ್ ರೋದ್ - ಜಿಣ್ಯೆರೋದ್.

ಆತಾಂ ಖರೆಂಚ್ - ಜಿಣ್ಯೆರೊದಾಂ ಮ್ಹಜಾ ನದ್ರೆರ್ ಸದಾಂಚ್ ಎಕಾ ಬರ್‍ಯಾ ವಾಚ್ಪಾ ಪಯ್ಕಿ ಬರೆಂ ವಾಚಪ್, ಜೆಂ ಸದಾಂ ಕಾಳ್ ಬಾಳ್ವೊಂಚೆಂ. ಆನಿ ದೆಖುನ್ಂಚ್ ಹಾಂವ್ ಪರತ್ ಪರತ್ ಉದ್ಘಾರ್ತಾಂ; "ರೊದಾಂ ಥಾಂಬ್ತಿತ್, ತರ್‌ಯ್ ಹಿಂ ಜಿಣ್ಯೆರೊದಾಂ ಥಾಂಬ್ಚಿಂನಾಂತ್. ದಿಶ್ಟಿಂತ್ ಥಾಂಬ್ಲ್ಯಾರ್‌ಯ್ ಕಾಳ್ಜಾಂತ್ ಥಾಂಬ್ಚಿಂನಾಂತ್."

- ವಲ್ಲಿ ಕ್ವಾಡ್ರಸ್, ಅಜೆಕಾರ್

-------------------------------------------------------------------------------------------------------------------------------------------------------------------

�ಜಿಣ್ಯೆ ರೊದಾಂ� ಅಂಕಣ್ ಹಾಂಗಾಸರ್ ಸಂಪ್ತಾ. ಜಿಣ್ಯೆ ರೊದಾಂ ದ್ವಾರಿಂ �ಮಾಯ್‌ಭಾಸ್.ಕೊಮ್� ವಾಚ್ಪ್ಯಾಂಕ್ ಎಕಾ ಪ್ರತಿಭಾವಂತ್ ಆನಿ ಪ್ರಬುದ್ಧ್ ಲೇಖಕಾಚಿ ವಳಕ್ ಆನಿ ತಾಚ್ಯಾ ಸಾಹಿತ್ಯಾಚಿ ಗುಂಡಾಯ್ ಝಳ್ಕಾಶೆಂ ಕೆಲ್ಯಾ ಮ್ಹಳ್ಳಿ ತೃಪ್ತಿ ಆಮ್ಕಾಂ ಆಸಾ. ಜೊರ್ಜಿ ಪೀಂತ್ ಆಯ್ಕೊಳಾಚೆಂ ಮರಣ್ ಕೊಂಕ್ಣಿ ಸಾಹಿತ್ಯಿಕ್ ಶೆತಾಕ್ ಜಾಲ್ಲ್ಯಾ ವ್ಹಡ್ಲ್ಯಾ ನಷ್ಟಾ ಪಯ್ಕಿ ಏಕ್. ಸಾಸ್ಣಾಚೊ ವಿಶೆವ್ ತಾಕಾ ಲಾಭೊಂದಿ ಮ್ಹಳ್ಳೆಂ ಆಮ್ಚೆಂ ಮಾಗ್ಣೆಂ.

ಹೆಂ ಅಂಕಣ್ ಸುರ್‍ವಾತ್ ಕರುಂಕ್ ಆಲೋಚನ್ ದಿಲ್ಲ್ಯಾ ಶ್ರೀ ವಲ್ಲಿ ಕ್ವಾಡ್ರಾಸಾಕ್ ಆಮಿಂ ಅಭಾರಿ ಜಾವ್ನಾಸಾಂವ್.

- ಮಾಯ್‌ಭಾಸ್.ಕೊಮ್ ಪಂಗಡ್

Tags: Jeorge Pinto, Alcohol, Alcoholic, Konkani, Mangalore, Mangalorean, Mother Tongue

From around the world

ಜಿಣ್ಯೆ ರೊದಾಂ - ರುದಾನ್

User Rating

2 Comment/s.

Post your comments

ಪಾರ್ಟಿ

ಸುರ್‍ವಾತ್

ದಬಾವ್

ಕಿಟಾಳ್

ಮತ್

ಚುಕಾರಿ

ಗಿರಾಂತ್

ಕುಟಾಮ್

ಜಾಗ್ವಣ್

ಫರಕ್

ಹಮೀದಾರಿ

ತಾಂಕ್

ಪಾಟ್‌ವೋಡ್

ಇಲ್ಲೆಶೆಂ

ಮಾವೋಡ್

ಭಾವಾಡ್ತ್

ಭಾರ್ಕೊಣ್

ಸಕತ್

ರಾಗ್

ನಿಸ್ತೇಜ್‌ಪಣ್

ರುದಾನ್

Connect

Our Address
Mangalore

Our Address
Udupi

Our Address
Dubai