:: ಮಾಯ್ ಭಾಸ್

ಬರಯ್ಣಾರಾ ವಿಶಿಂ ಜಾಣಾ ಜಾ...

Dec. 21, 2015
ಜೊರ್ಜಿ ಪೀಂತ್ ಆಯ್ಕೊಳ್

ಕೊಂಕ್ಣಿ ಸಾಹಿತ್ಯ್ ಶೆತಾಂತ್ ಆಪ್ಲಿಂ ಪಾಳಾಂ ರೊಂಬೊಯಿಲ್ಲೊ ಪ್ರಭುದ್ದ್ ಸಾಹಿತಿ. ಏಕ್ ಗೂಂಡ್ ಚಿಂತ್ಪಾಚೊ, ಅಪ್ಲ್ಯಾ ಸುಡಾಳ್ ಕೊಂಕ್ಣಿ ಭಾಸೆಖಾತಿರ್ ಲೊಕಾಂನಿ ಲೆಕ್‌ಲ್ಲೊ ವಿಚಾರ್‌ವಂತ್ ಸಾಹಿತಿ. ಹಾಚಾ ಲಿಖ್ನ್ಯಾಂನಿ ಉದೆಲ್ಲಿಂ ಪದಾಂ ಮಾಂಡ್ ಸೊಭಾಣ್ ಪಂಗ್ಡಾನ್ ಗಾಯ್ಲ್ಯಾಂತ್. ಹಾಚಾ ಜಾಹಿತ್ತ್ಯಾ ಕವಿತಾಂಕ್, ಕಾಣ್ಯಾಂಕ್ ಇನಾಮಾಂಯಿ ಲಾಭ್ಲ್ಯಾಂತ್. ಕೊಂಕ್ಣೆಂತ್ ಪರ್‍ಗಟ್ ಜಾಲ್ಲೆಂ ತಾಚೆಂ ತರ್‍ಜಣ್ - ಜಿವಿತಾ ಸೊಭಾಣ್, ಕೊಂಕ್ಣಿ ಸಾಹಿತ್ಯಾಂತ್ ಏಕ್ ಅಪ್ರೂಪ್ ದಿರ್‍ವೆಂ ಮ್ಹಣ್ಯೆತ್. ಎದೊಳ್ ಪರ್‍ಯಾಂತ್ ಕೊಂಕ್ಣೆಂತ್ ತತ್ವ್‌ಶಾಸ್ತ್ರ್ ತರ್ಜಣ್ ಜಾಂವ್ಕ್ ನಾತ್‌ಲ್ಲೆಂ ತೆಂ ಹಾಣೆಂ ಸಾಧ್ಯ್ ಕರ್‍ನ್ ದಾಖಯ್ಲಾಂ. ೨೦೦೨ - ೨೦೦೪ ಇಸ್ವೆಚ್ಯಾ ಆವ್ದೆಂತ್ ಮಾಯ್ ಭಾಸ್.ಕೊಮ್ ಚೆರ್ ಹೆಂ ಅಂಕಣ್ ಫಾಯ್ಸ್ ಜಾಲ್ಲೆಂ. ಜೊರ್ಜಿ ಪೀಂತಾಚೆಂ ಮರಣ್ ಕೊಂಕಣಿ ಸಾಹಿತ್ಯ್ ಶೆತಾಕ್ ಜಾಲ್ಲೆಂ ವ್ಹಡ್ ನಷ್ಟ್ ಮ್ಹಣ್ಯೆತಾ.

80.5

User Rating

ಎಕಾ ಸರ್ಜನಾಚಿ ಕಾಣಿಂ ಚಡಾವತ್ ಜಣಾಂನಿ ಆಯ್ಕಾಲ್ಯಾ. ಭಾರಿಚ್ ಫಾಮಾದ್ ಸರ್ಜನ್, ತಾಚೆಂ ಖಂಚೆಂಚ್ ಆಪರೇಶನ್, ಫೇಯ್ಲ್ ಜಾಲ್ಲೆಂ ನಾಂ. ಪೂಣ್ ತಾಣೆಂ ಆಪರೇಶನ್ ಥಿಯೇಟರಾಕ್ ರಿಗ್ಚ್ಯಾ ಪಯ್ಲೆಂ ಪಿಯೆಂವ್ಚೆಂ ಪಡ್ತಾಲೆಂ. ಪಿಯೆವ್ನ್ ತಾಣೆಂ ಕೆಲ್ಲೆಂ ಆಪರೇಶನ್ ಯಶಸ್ವಿಚ್ ಸಯ್. ಆನಿಂ ಪಿಯೆನಾಸ್ತಾಂ ತೊ ಆಪರೇಶನ್ ಕರಿನಾತ್‌ಲ್ಲೊ. ಬಹುಶ್ಯ ಅಸಲ್ಯೊ ಜಾಯ್ತ್ಯೊ ಕಾಣಿಯೊ ಆಮಿಂ ಆಯ್ಕಾಲ್ಯಾತ್. ಆಮ್ಚ್ಯಾ ಗಾಂವಾಂತ್, ವಾಡ್ಯಾಂತ್ ಕೋಣ್ ತರೀ ಎಕ್ಲೊ ಆಸ್ತಾ - ತಾಕಾ ಏಕ್ ಕಾಲ್ದಿ ದಿಲಿ ತರ್ ಕಿತ್ಲ್ಯಾ ಗೂಂಡ್ ಬಾಂಯ್ಕ್ ಜಾಲ್ಯಾರೀ ದೆಂವ್ತಾ, ಮಾಡಿಯಾಂ ತೊಟಾಂತ್ ಎಕಾ ಪೊಂತಾಚ್ಯಾ ಮಾಡಿಯೆರ್ ಚಡೊನ್ ದುಸ್ರ್ಯಾ ಪೊಂತಾಚ್ಯಾ ಮಾಡಿಯೆ ವಯ್ಲ್ಯಾನ್ ದೆಂವ್ತಾ, ಕಸಲಿ ಕುಸ್ಡಿ ಘಾಣ್ ಯೆಂವ್ಚಿ ಮೊರೊನ್ ಪಡ್‌ಲ್ಲಿ ಮನ್ಜಾತ್ ಜಾಲ್ಯಾರೀ ಪುರ್ತಾ, ಕಿತ್ಲ್ಯಾ ಕಷ್ಟಾಂಚೆಂ ಅಸಾಧ್ಯ್ ಕಾಮ್ ಜಾಲ್ಯಾರೀ ಕರ್ತಾ. ಬುದ್ವಂತ್ಕಾಯ್ ವಾಪಾರ್ಚ್ಯಾ ಕಾಮಾಂನಿ ಜಾಲ್ಯಾರೀ ತಶೆಂಚ್, ಕೋಣ್ ತರೀ ಪಳೆಂವ್ಕ್ ಮೆಳ್ತಾ, ತೊ ಮೆಕ್ಯಾನಿಕ್ ಜಾವ್ಯೆತ್, ಇಜ್ನೆರ್ ಜಾವ್ಯೆತ್, ಕುಜ್ನೆರ್ ಜಾವ್ಯೆತ್, ಬರವ್ಪಿ ಜಾವ್ಯೆತ್ ವ ನಾಟಕಿಸ್ತ್ ಜಾವ್ಯೆತ್, "ಇಲ್ಲೆಶೆಂ ಘಾಲ್ನ್" ಆಪ್ಲೆಂ ಕಾಮ್ ಸುರ್‍ವಾತಿತ್ ತರ್ ತಾಚ್ಯಾ ಮೆಂದ್ವಾಚ್ಯೊ ಶಿರೊ ಸಡಿಲ್ ಜಾವ್ನ್ ಬರ್‍ಯೊ ಬರ್‍ಯೊ ಆಲೋಚನ್ಯೊ, ಉಂಚ್ಲೆಂ ಚಿಂತಾಪ್, ವಿವಿಧ್ ಕಾರ್‍ಯಾಂತ್ ತಾಕಾ ಝಳ್ಕಾತಾತ್. ಆನಿಂ ಹ್ಯೆ ಖಾತಿರ್ ತೊ/ತಿ ಪಿಯೆತಾತ್.

ಮ್ಹಣ್ತಚ್, ಸೊರ್‍ಯಾಚ್ಯಾ ಶಾಥಿಯೆಚ್ಯಾ ವೈಭವೀಕರಣಾಕ್ ಆನಿಂ ಕಿತೆಂ ಜಾಯ್? ಜೆಂ ಕಿತೆಂ ಏಕ್ ಮನಿಸ್ ಆಪ್ಲ್ಯಾ ಸಾದ್ಯಾ ಶಾಥಿಯೆನ್ ಕರುಂಕ್ ಸಕಾನಾಂ, ತೆಂ ತಾಣೆಂ ಕರ್ಚೆ ತಸಲಿ ತಾಂಕ್ ತಾಕಾ ಸೊರೊ ದಿತಾ ತರ್, ತೊ ಬೊರೊಚ್ ಆಸಾಜಯ್ ನಹಿಂಗೀ? ಆನಿ ಎಕ್ಲೊ "ಇಲ್ಲೆಶೆಂ ಘಾಲ್ನ್" ವ್ಹಡ್ ವ್ಹಡ್ ಕಾರ್ಭಾರಾಂ ಕರ್ತಾ ತರ್, ಹಾಂವೆಂಯೀ ಕಿತ್ಯಾಕ್ ತಶೆಂ ಕರುಂಕ್ ನಜೊ? ಮ್ಹಳ್ಳೆಂ ಸವಾಲ್ ತುಲನಾಚೊ ಸ್ವಭಾವ್ ಆಪ್ಣಾಯಿಲ್ಲ್ಯಾ ಆಮ್ಚ್ಯಾ ಮತಿಕ್ ಝಳ್ಕೊಂಚೆಂ ಸಹಜ್‌ಚ್ ನಹಿಂಗೀ?

ಆಮ್ಕಾಂ ವಯ್ಲೆಂ ಆನಿಂ ಭಾಯ್ಲೆಂ ಸ್ವರೂಪ್ ದಿಸ್ತಾ ಶಿವಾಯ್ ತಾಚಿಂ ಮುಳಾಂ ಪಾಳಾಂ ದಿಸಾನಾಂತ್. ಹಿ ಚೂಕ್ ನಹಿಂ. ಹಕೀಗತ್. ವ್ಹಯ್, ಸೊರೊ ಬಳ್ ದಿತಾ, ತಾಂಕ್ ದಿತಾ, ಶಾಥಿ ದಿತಾ. ಪೂಣ್ ತೆಂ ಸಗ್ಳೆಂ ದಿತಾ - ಆಮಾಲ್ಯಾಕ್ ವ ಸಂಭವ್ ಆಮಾಲ್ಯಾಕ್ ಮಾತ್ರ್. ಗೈರ್ ಆಮಾಲಿ(ನೊನ್-ಆಲ್ಕೋಹಾಲಿಕ್) ಮನ್ಶಾಕ್ ನಹಿಂ ಮ್ಹಳ್ಳಿ ಸಂಗತ್ ಆಮ್ಚ್ಯಾ ಗುಮಾನಾಂತ್ ವಚಾನಾಂ. ಗೈರ್ ಆಮಾಲಿ ಮನಿಸ್ ಜರೀ ಆಪ್ಲಿ ಸಾಮರ್ಥಿ ವಾಡಂವ್ಚ್ಯಾ ಖಾತಿರ್ ಪಿಯೆತ್ ತರ್, ತಾಚಿ ಸಾಮರ್ಥಿ ವಾಡಾನಾ ಬದ್ಲೆಕ್ ತೊ ಅಥಿರ್ ಜಾತಾ, ತಾಚ್ಯಾನ್ ಕಿತೆಂಚ್ ಕರುಂಕ್ ಜಾಯ್ನಾಂ. ಆಮಾಲಿ ಜಾಲ್ಲ್ಯಾ ವ ಜಾಂವ್ಚ್ಯಾ ಮನ್ಶಾಕ್ ಮಾತ್ರ್ ಸೊರ್‍ಯಾಚಾ ಆಧಾರಾನ್ ಕಿತೆಂಯ್ ಕರುಂಕ್ ಜಾತಾ, ಆನಿಂ ಸೊರೊ ನಾಸ್ತಾನಾಂ ಕಿತೆಂಚ್ ಕರುಂಕ್ ಜಾಯ್ನಾಂ. ಸೊರೊ ನಾಂ ತರ್ ತೊ ಪಾಂಗುಳ್‌ಘೊಡೊ(ಕ್ರಚ್) ಬಗ್ಲೆಕ್ ನಾತ್‌ಲ್ಲ್ಯಾ ಅಪಾಂಗ್ ವ್ಯಕ್ತಿಬರಿ. ಖಂಚೆ ಚುಕ್‌ಲ್ಲ್ಯಾ ರೊದಾಬರಿ, ತೇಲ್ ನಾತ್‌ಲ್ಲ್ಯಾ ಚಿಮ್ಣೆಬರಿ.

ಪೂಣ್ ಸಮಾಜ್ ಜಾವ್ನ್ ಆಸ್ಚ್ಯಾ ಆಮ್ಕಾಂ ಹ್ಯಾ ಸಂಗ್ತಿಂಚಿ ಜಾಗ್ವಣ್ ನಾಂ. ಆಸ್ಲ್ಯಾರೀ ಆಮ್ಕಾಂ ನಿರ್ವೊಗ್ ನಾಂ. ಆಮ್ಕಾಂ ಆಮ್ಚ್ಯಾ ಗಾಂವಾಂತ್ - ವಾಡ್ಯಾಂತ್ ತಸಲ್ಯಾ ಎಕಾ ಮನ್ಶಾಚಿ ಗರ್ಜ್ ಆಸಾ. ನಾಂ ತರ್ ಮೊರೊನ್ ಕುಸ್‌ಲ್ಲ್ಯಾ ಸುಣ್ಯಾ ಮಾಜ್ರಾಕ್ ಪುರ್‍ಚೆಂ ಕೊಣೆಂ? ಉಂಬ್ಲೆ ಭರ್‌ಲ್ಲ್ಯಾ ರುಕಾರ್ ಚಡ್ಚೆಂ ಕೊಣೆಂ? ಆಂಗ್ಡಿ ಥಾವ್ನ್ ಸಾಮಾನ್ ಘರಾ ಹಾಡ್ನ್ ಘಾಲ್ಚೊ ಕೊಣೆಂ? - "ತ್ಯಾ ಕುಡ್ಚೆಲಾಕ್ ಏಕ್ ಕಾಲ್ದಿ ದಿಲ್ಯಾರ್ ಜಾಲೆಂ, ತೊ ಕಿತೆಂಯ್ ಕಾಮ್ ಕರ್ತಾ." (ಆನಿಂ ಹೆರಾಂ ಕಾಮೆಲ್ಯಾಂಕ್ ದಿಲ್ಲೆಬರಿಂ ಸಾರ್ಕಿ ಮಜೂರಿ ದಿಂವ್ಚಿಯ್ ಗರ್ಜ್ ನಾಂ!).

ಜರೀ ತರೀ ಕೊಣೀಂ ಆಪ್ಲೆಂ ಕಾಮ್ ಚುರುಕಾಯೆನ್ ಆನಿಂ ಬರ್‍ಯಾನ್ ಕರುಂಕ್ ಸಾಧ್ಯ್ ಜಾತಾ ಮ್ಹಳ್ಳ್ಯಾಖಾತಿರ್ ಪಿಯೆತಾ ತರ್ ತೊ ಗೈರ್ ಆಮಾಲಿ ನಹಿಂ ಮ್ಹಳ್ಳೆಂ ವಿಂಗಡ್ ಸಾಂಗ್ಚಿ ಗರ್ಜ್ ನಾಂ ನಹಿಂಗೀ? ಫಕತ್ತ್ ಆಮಾಲಿ ಜಾಲಾ ತೊ ವ ಜಾಂವ್ಚ್ಯಾ ವಾಟೆರ್ ಆಸಾ ತೊ ಮಾತ್ರ್ ಸಾಂಗ್ತಾ, ಆಪ್ಲೆಂ "ಥೊಡೆಂ" ಪಿಯೆಲ್ಲೆ ವರ್ವಿಂ, ಆಪ್ಣಾಕ್ ಆಪ್ಲೆಂ ಕಾಮ್ ಚಡ್ ಬರ್‍ಯಾ ರಿತಿನ್ ಕರುಂಕ್ ಸಾಧ್ಯ್ ಜಾತಾ ಮ್ಹಣೊನ್. ಗೈರ್ ಆಮಾಲಿ ಮನ್ಶಾಕ್ ಅಸಲ್ಯಾ ಪಾಂಗುಳ್‌ಘೊಡ್ಯಾಚಿ ಗರ್ಜ್ ಆಸಾನಾಂ. ಮಾತ್ರ್ ನಹಿಂ ತಾಚ್ಯಾನ್ ತೊ ವಾಪರ್ಚೆಂಯ್ ಸಾಧ್ಯ್ ಜಾಯ್ನಾಂ.

ಹಾಂಗಾಸರ್ ಆಮಿಂ ಏಕ್ ಘಡಿ ಥೊಡೆಂ ಚಿಂತ್ಚೆಂ ಪಡ್ತಾ. ಆಮಿಂ ಆಮ್ಚ್ಯಾ ಭುರ್ಗ್ಯಾಂಕ್ "ಫಕತ್ತ್ ಖುಶಲಾಯೆಖಾತಿರ್", "ಜಸ್ಟ್ ಫಾರ್ ಫನ್" ಥೊಡಿ ಬಿಯರ್, ವಾಯ್ನ್ ವ ಸುರ್ ಭರಯ್ತಾನಾಂ ಕಿತೆಂ ಕರ್ತಾಂವ್? ತಾಣೆಂ ಆಮಾಲಿ ಜಾಂವ್ಚಿ ಶಕ್ಯತಾ(ಟೆನ್ಡೆನ್ಸಿ) ತಾಂಚೆಥಂಯ್ ಆಸಾ ವ ನಾಂ ತೆಂ ಆಮಿಂ ನೆಣಾಂವ್. ನಾಂ ತರ್ ಬರೆಂಚ್. ಪೂಣ್ ತೀ ಶಕ್ಯತಾ ನಾಂ ಮ್ಹಣೊನ್ ಖಾತ್ರೆನ್ ಸಾಂಗ್ಚೆಂ ಕೊಣಾಚ್ಯಾನ್ ಸಾಧ್ಯ್ ಆಸಾ? ಬುದ್ವಂತಾಂತ್ಲ್ಯಾ ಬುದ್ವಂತ್ ವಯ್ಜಾನ್ ಜಾಂವ್, ವ ಕೊಣೆಂಯ್ ತಶೆಂ ಸಾಂಗ್ಚೆಂ ಸಾಧ್ಯ್ ನಾಂ. ತಶೆಂ ಆಸ್ತಾಂ ಆಮಿಂ ಕಶೆಂ ಸಾಂಗ್ಚೆಂ? ಆಮಿಂ ಆಮ್ಚ್ಯಾಚ್ ಭುರ್ಗ್ಯಾಂಕ್ "ಜಸ್ಟ್ ಫಾರ್ ಫನ್" ಇಲ್ಲೆಶೆಂ ಆಮಾಲ್ ಭರಯ್ತಾನಾ "ಕಾಂಯ್ ಜಾಯ್ನಾಂ" ಮ್ಹಣೊನ್ ಚಿಂತಾಂವ್ ತರೀ ತ್ಯಾ ಭುರ್ಗ್ಯಾಥಂಯ್ ಆಮಾಲಾಯೆಚಿ ಶಕ್ಯತಾ ಆಸಾ ತರ್, ಕರ್ಡಚ್ಯಾ ಮುಟ್ಯಾಕ್ ಕಿಟಾಳ್ ಉಡಾಯಿಲ್ಲೆಬರಿ ನಹಿಂಗೀ?

"ನಾಚೊಂಕ್ ಬರೆಂ ಜಾತಾ, ಘಟ್ಟ್ ಜೇಂವ್ಕ್ ಜಾತಾ, ಜಿರ್ವಣೆಕ್ ಬರೆಂ, ಡೋಂಟ್ ಬಿ ಶಾಯ್, ಗಮ್ಮತ್ ಕರ್‍ಯಾಂ, ಜಾಯ್ತೆಂ ಕಾಮ್ ಆಸಾ - ಇಲ್ಲೆಶೆಂ ಕಾಣ್ಘೆ", ಅಸಲ್ಯಾ ಉತ್ರಾಂನಿ ಪಿಯೆಂವ್ಕ್ ಹುಮೆದ್ ದಿಂವ್ಚ್ಯಾ ಮಾರಿಫಾತ್ ಆಮಿಂ ಕೊಣಾಚೆಂ ಬರೆಂ ಕರ್ತಾಂವ್? ಬರೆಂ ಕರ್ತಾಂವ್ ವ ಎಕಾ ಜಿಣ್ಯೆಚ್ಯಾ, ಎಕಾ ಸಗ್ಳ್ಯಾ ಕುಟ್ಮಾಚ್ಯಾ ಜಿಣಿಯೆಚ್ಯಾ ವಿಭಾಡಾಚ್ಯಾ ಸುರ್ವಾತೆಕ್ ಪ್ರೇರಣ್ ದಿತಾಂವ್?

"ತೆಂ ಕಿತೆಂ? ಪಿಯೆಲ್ಲೆ - ಪಿಯೆಂವ್ಚೆಂ ಸಗ್ಳೆ ಆಮಾಲಿ ಜಾತಾತ್ಗೀ?" ಮ್ಹಳ್ಳೆಂ ರಕ್ಷಣಾತ್ಮಕ್ ಸವಾಲ್ ಯೆತಾ. ಪೂಣ್ ಹಾಂವೆಂ-ತುಂವೆಂ ಪಿಯೆಂವ್ಕ್ ವತ್ತಾಯ್ ಕರ್ಚೊ ಭುರ್ಗೊ, ತರ್ನಾಟೊ ಫುಡಾರಾಂತ್ ಆಮಾಲಿ ಜಾಂವ್ಚೊನಾಂ ಮ್ಹಳ್ಳಿ ಕಸಲಿ ಹಮೀದಾರಿ ಹಾಂವ್-ತುಂ ದೀಂವ್ಕ್ ಸಕ್ತಾಂವ್? ಆಮಿಂ, ತಾಣೆಂ ತಾಚ್ಯಾ ಫೊಂಡಾಕ್ ದೆಂವ್ಚಿ ತಯಾರಿ ಕರ್ನ್ ದಿತಾಂವ್ ಮ್ಹಳ್ಳಿ ಸಂಗತ್ ಕಶಿ ನೆಗಾರ್ ಕರುಂಕ್ ಸಕ್ತಾಂವ್?

Tags: Jeorge Pinto, Alcohol, Alcoholic, Konkani, Mangalore, Mangalorean, Mother Tongue

From around the world

ಜಿಣ್ಯೆ ರೊದಾಂ - ಹಮೀದಾರಿ

User Rating

2 Comment/s.

Post your comments

ಪಾರ್ಟಿ

ಸುರ್‍ವಾತ್

ದಬಾವ್

ಕಿಟಾಳ್

ಮತ್

ಚುಕಾರಿ

ಗಿರಾಂತ್

ಕುಟಾಮ್

ಜಾಗ್ವಣ್

ಫರಕ್

ಹಮೀದಾರಿ

ತಾಂಕ್

ಪಾಟ್‌ವೋಡ್

ಇಲ್ಲೆಶೆಂ

ಮಾವೋಡ್

ಭಾವಾಡ್ತ್

ಭಾರ್ಕೊಣ್

ಸಕತ್

ರಾಗ್

ನಿಸ್ತೇಜ್‌ಪಣ್

ರುದಾನ್

Connect

Our Address
Mangalore

Our Address
Udupi

Our Address
Dubai