:: ಮಾಯ್ ಭಾಸ್

ತಿಸ್ರೊ ಗೃ೦ತ್ - "....ಆನಿ ಹಾ೦ವ್ ಜಿಯೆತಾ೦"

ಅವಸ್ವರ್ ಸತ್ರಾ-ವೊ:

ಪಾವ್ಸ್ ಯೆತಾಲೊ.

ರಾತ್ ದಾಂಟೊನ್ ಆಯಿಲ್ಲಿ ಆನಿ ವೊರಾ೦ ಧಾ ಉತ್ರಾಲ್ಲಿ೦. ಆಟ್ ವೊರಾ೦ ಉಪ್ರಾ೦ತ್ ಚಿಕ್ಕೆಸೆ ಉಣೊ ಜಾಲ್ಲೊ ಪಾವ್ಸಾಚೊ ಧಮ್ಮ್ ಆತಾ೦ ಶಿಕರಾಕ್ ಪಾವ್‌ಲ್ಲೊ. ಘಡ್ಗಡೊ ಝಗ್ಲಾಣೆ ಥಾ೦ಬ್‌ಲ್ಲೆ೦ ತರಿ ಪಾವ್ಸ್ ಶಿರಾ೦ಧಾರಿಚ್ಯಾ ದಾಟ್ ಪಡ್ದ್ಯಾಪರಿ೦ ಪಡೊನ್೦ಚ್ ಆಸ್‌ಲ್ಲೊ, ಖಳ್ಮಿತ್‌ನಾಸ್ತಾ೦.

’ಪ್ರಥ್ವಿಚೆರ್, ತಿಚ್ಯಾ ಮೊಗಾಚೊ ದಾದ್ಲೊ ಆಪ್ಲೆ೦ ಭಿ೦ ವೊ೦ಪ್ತಾಲೊ....’ ಆಪ್ಲ್ಯಾಚ್ ಲೇಕನಾ೦ತ್ಲೆ೦ ವಾಕ್ಯೆ೦ ಉಡಾಸಾಕ್ ಆಯ್ಲೆ೦ ವಿಕ್ಟರಾಕ್.

ಹೆಲ್ಗಾಚ್ಯಾ ದಿವಾನ್‌ಖಾನ್ಯಾ೦ತ್ ತೊ ಆಸ್‌ಲ್ಲೊ ಆನಿ ತಾಚ್ಯಾ ಸಾಮ್ಕಾರ್ ತ್ಯಾ ದಿಸಾ ಪ್ರಗಟ್ ಜಾಲ್ಲಿ ’ಮನಿಸ್’ ಪತ್ರಾಚಿ ಪ್ರತಿ ಆಸ್‌ಲ್ಲಿ.

’ಮನಿಸ್’ ಪತ್ರಾಚಿ ನಿಮಾಣಿ ಪ್ರತಿ!

ನಿವ್ಸ್‌ಪ್ರಿ೦ಟ್ ಮುಗ್ದಾಲ್ಲೆ೦ ಆನಿ ಹೆರ್ ಕಸಲೆ೦ಯಿ ಕಾಗಾತ್ ವಿಕ್ಟರಾಕ್ ಮೆಳೊ೦ಕ್ ನಾತ್‌ಲ್ಲೆ೦. ಎಸೊಸಿಯೆಶನಾಚ್ಯಾ ದಲಾಲ್ಯಾ೦ನಿ ತಾಕಾ ಕಾಗಾತ್ ಭಾಸಾಯಿಲ್ಲೆ೦ ತರಿ ತಾಣಿ೦ ಮಾ೦ಡ್‌ಲ್ಲೊ ಪಾಸ್ ತೊ ಬರ್‍ಯಾನ್ ಜಾಣಾ೦ ಆಸ್‌ಲ್ಲೊ ಜಾಲ್ಲ್ಯಾನ್ ತಾಣೆ ತಾ೦ಚೆಕಡ್ಚೆ೦ ಪೇಪರ್ ಘೆತ್ಲೆ೦ ನಾ. ಸಭಾರ್ ಪ್ರಯತ್ನಾ೦ ಕರುನ್ ತೆ ದಲಾಲಿ ಸಲ್ವಾಲ್ಲೆ.

ಆತಾ೦, ಫಾಲ್ಯಾ೦ಚೊ ದೀಸ್ ಕಸಲೊ ಮ್ಹಳ್ಳೆ೦ ಸವಾಲ್ ತಾಚ್ಯಾ ಸಾಮ್ಕಾರ್ ಆಸ್‌ಲ್ಲೆ೦. ಪ್ರೆಸ್ಸಾಚೆರ್ ಎಸೊಸಿಯೆಶನಾಚೊ ಹಾತ್ ಬಸ್ಚ್ಯಾ ಪಯ್ಲೆ೦ಚ್ ಕಿತೆ೦ ಕರಿಜೆ ಮ್ಹಣ್ ತಾಣೆ ಆನಿ ಹೆಲ್ಗಾನ್ ನಿರ್‍ಣಯ್ ಕೆಲ್ಲೊ ಆನಿ ತೊ ನಿರ್‍ಣಯ್ ಕ್ಶಣಾ ಭಿತರ್ ಜ್ಯಾರಿ ಕರ್‍ಚಿ ತಯಾರಾಯ್ ತಾಣಿ ಕೆಲ್ಲಿ, ಕೊಣಾಕ್‌ಚ್ಚ್ ಕಳಿತ್‌ನಾಸ್ತಾ೦.

ತ್ಯೆ ನಿಮಾಣ್ಯೆ ಪ್ರತಿಯೆಚೆರ್ ಆಪ್ಲೊ ಹಾತ್ ಮೊಗಾನ್ ತಾಣೆ ಭ೦ವ್ಡಾಯ್ಲೊ. ಪ್ರಥ್ವಿಚ್ಯಾ ಪುತ್ರಾನ್ ಆಪ್ಲೆ೦ ಭಿ೦ ವೊ೦ಪುನ್ ಜಾಲಾ೦ ಮ್ಹಣ್ ತೊ ಜಾಣಾಸ್ಲೊ. ’ಮನಿಸ್’ ಪತ್ರಾಚೊ ತಾಳೊ ಪಾವ್‌ಲ್ಲ್ಯಾ ಹರ್‌ಯೆಕಾ ಜಾಗ್ಯಾರ್ ಮನಿಸ್ ಜೀವ್೦ತ್ ಜಾಲ್ಯಾತ್ ಮ್ಹಣ್ ತಾಕಾ ಕಳಿತ್ ಜಾಲ್ಲೆ೦. ತ್ಯಾ ಮನ್ಶಾ೦ಕ್ ಕಾರ್‍ಯಾರ೦ಗಾಕ್ ದೆ೦ವ೦ವ್ಕ್ ಎಕ್‌ಚ್ಚ್ ಕೀಟ್ ಬಾಕಿ ಆಸ್‌ಲ್ಲೆ೦--ಹೆ೦ ಕೀಟ್ ’ಮನಿಸ್’ ಪತ್ರಾಚೆ೦ಚ್ ನಾಸ್ ವ್ಹಯ್ ತರ್, ತ್ಯಾ ನಾಸಾಕ್ ಖುದ್ದ್ ಕಾರಾಣ್ ಜಾ೦ವ್ಕ್ ವಿಕ್ಟರ್ ಆನಿ ಹೆಲ್ಗಾ ತಯಾರ್ ಆಸ್‌ಲ್ಲಿ೦. ಕೊಣಾಕ್‌ಚ್ ತಕ್ಲಿ ಬಾಗಾಯ್‌ನಾಸ್ತಾ೦ ಆಪ್ಲೆ೦ ಮರಣ್ ಸಯ್ತ್ ಆಪ್ಣಾಚ್ಯಾ ಮರ್‍ಜೆನ್ ಘೆತ್‌ಲ್ಲ್ಯಾ ’ಮನಿಸ್’ ಪತ್ರಾವರ್‍ವಿ೦ ಜಾ೦ವ್ಚೊ ಪರಿಣಾಮ್ ತಿ೦ ಬರ್‍ಯಾನ್ ಜಾಣಾ೦ ಆಸ್‌ಲ್ಲಿ೦.

ವಿಕ್ಟರ್ ಹಾಳ್ವಾಯೆನ್ ಹಾಸ್ಲೊ.

ಚಿಕ್ಕೆಸೆ ಪಯ್ಸ್ ಬಸುನ್ ಆಸ್‌ಲ್ಲೆ೦ ಹೆಲ್ಗಾ ತಾಚೆ ಲಾಗಿ೦ ಆಯ್ಲೆ೦ ಆನಿ ತಾಕಾ ತೆ೦ಕೊನ್ ಬಸ್ಲೆ೦. ವಿಕ್ಟರಾನ್ ತಾಕಾ ಲಾಗಿ೦ ಆರಾಯ್ಲೆ೦ ಆನಿ ತಾಚೆ೦ ಮಾತೆ೦ ಆಪ್ಲ್ಯಾ ಉಸ್ಕ್ಯಾರ್ ದವರ್‍ಲೆ೦. ಮುಕಮಳಾರ್ ಬಿಸ್ಳೆ ಜಾಲ್ಲೆ ಹೆಲ್ಗಾಚೆ ಕೇಸ್ ತಾಣೆ ಪಾಟಿ೦ ಪುಸ್ಲೆ ಆನಿ ತಾಚ್ಯಾ ವೊ೦ಟಾ೦ಚೊ ಹಾಳ್ವಯೆನ್ ಉಮೊ ಘೆತ್ಲೊ ಆನಿ ಪರ್‍ತ್ಯಾನ್ ತೊ ಹಾಸ್ಲೊ.

"ಕಿತ್ಯಾಕ್ ಹಾಸ್ತಾಯ್?" ಹೆಲ್ಗಾನ್ ವಿಚಾರ್‍ಲೆ೦ ಕಪಾಲಾರ್ ಪಡ್ಲೆಲೆ ತಾಚೆ ಕೇಸ್ ಧರುನ್. ಕಸಲ್ಯಾಕಿ ನ್ಹಯ್ ಮ್ಹಳ್ಳ್ಯಾ ಜಾಪಿ೦ತ್ ವಿಕ್ಟರಾನ್ ಮಾತೆ೦ ಹಾಲಯ್ಲೆ೦. ಹೆಲ್ಗಾಚೆ೦ ಮುಕಮಳ್ ಎಕಾಚಾಣೆ ಸಾವ್ಳೆಲೆ೦; ಕುಶಿಕ್ ಘು೦ವೊನ್ ತಾಣೆ ವಿಕ್ಟರಾಚ್ಯಾ ಪೆ೦ಕ್ಟಾ ಭ೦ವ್ತಣಿ ಹಾತ್ ರೆವ್ಡಾಯ್ಲೆ ಆನಿ ತಾಕಾ ಬಳಾನ್ ಆರಾವ್ನ್ ಧರ್‍ಲೊ. ತಾಚಿ೦ ಭೊಗ್ಣಾ ಸಮ್ಜಾಲ್ಲ್ಯಾ ವಿಕ್ಟರಾನ್ ತಾಚೆ೦ ಮಾತೆ೦ ಆನಿ ಪಾಟ್ ಪೊಶೆಲಿ. ಪಾ೦ಚ್ ಮಿನುಟಾ೦ಚ್ಯಾ ವೆ೦ಗೆನ೦ತರ್ ತೆ೦ ಉಟ್ಲೆ೦ ಆನಿ ವಿಕ್ಟರಾಚ್ಯಾ ಉಸ್ಕ್ಯಾರ್ ಬಸ್ಲೆ೦. ತಾಚೆ೦ ಮುಕಮಳ್ ಆಪ್ಲ್ಯಾ ಹಾತಿ೦ ಘೆವ್ನ್ ಪಾಟಾಪಾಟ್ ಉಮ್ಯಾ೦ನಿ ತೆ೦ ಭರಿಲಾಗ್ಲೆ೦. ನಿಮಾಣೆ, ತೆ೦ ತಾಚ್ಯಾ ಮುಕಮಳಾಕ್ ಪಳೆಲಾಗ್ಲೆ೦--ತಾಚೆ೦ ರೂಪ್ ಶಾಶ್ವಿತ್‌ಥರಾನ್ ಮತಿ೦ತ್ ಉರ೦ವ್ಚ್ಯಾ ಜಿನ್ಸಾರ್.

"ಮ್ಹಜೊ ಉಮೊ ಘೆ, ವಿಕ್ಟರ್!"

ವಿಕ್ಟರಾಚೆ ಹಾತ್ ತಾಚ್ಯಾ ಕುಡಿಭ೦ವ್ತಿ೦ ಅತ್ಯ೦ತ್ ಮೊವಾಳಾಯೆನ್ ರೆವ್ಡಾಲೆ. ಹೆಲ್ಗಾಚಿ ಕೂಡ್ ತಾಣೆ ಆಪ್ಲ್ಯಾ ಉಸ್ಕ್ಯಾವಯ್ಲಿ ದೆ೦ವಯ್ಲಿ ಆನಿ ಸೊಫಾಚೆರ್ ನಿದಾಯ್ಲಿ. ತ್ಯೆಚ್ ಬಸ್ಕೆಚೆ ದೆಗೆನ್ ತೊ ಬಸ್ಲೊ ಆನಿ ಆಪ್ಲೆ೦ ಮುಕಮಳ್ ತಾಣೆ ಬಾಗಾಯ್ಲೆ೦. ಉಬಾರ್‌ಲ್ಲ್ಯಾ ಹೆಲ್ಗಾಚ್ಯಾ ವೊ೦ಟಾ೦ಕ್ ವಿಕ್ಟರಾಚೆ ವೋ೦ಟ್ ಮೆಳ್ತಾನಾ ಹೆಲ್ಗಾಚೆ೦ ಸರ್‍ವಾ೦ಗ್ ಕಾ೦ಪ್ಲೆ೦ ಆನಿ ಆಪ್ಲ್ಯಾ ಮೊಗಾಳ್ ಉಮಾಳ್ಯಾ೦ಕ್ ಆಧಾರ್ ಜಾವ್ನ್ ತಾಣೆ ವಿಕ್ಟರಾಕ್ ಲಾಗಿ೦ ಆರಾಯ್ಲೊ....

ತ್ಯಾ ಉಮ್ಯಾ ನ೦ತರ್ ವಿಕ್ಟರ್ ಧರ್‍ಣಿಕ್ ಹಾ೦ತುಳ್ಳೆಲ್ಯಾ ರತನ್ ಕಾ೦ಬ್ಳಿಚೆರ್ ನಿದ್ಲೊ. ಸೊಫಾಚೆರ್ ನಿದ್‌ಲ್ಲ್ಯಾ ಹೆಲ್ಗಾನ್ ಆಪ್ಲಿ ತಕ್ಲಿ ಕುಶಿಕ್ ಮಾಲ್ವಯ್ಲಿ ಆನಿ ಆತಾ೦ ತಾಚಿ ದೀಶ್ಟ್ ವಿಕ್ಟರಾಚ್ಯಾ ಲಾ೦ಬ್ ಕುಡಿಚೆರ್ ಪಡ್ತಾಲಿ.

ಅಶೆ೦ಚ್ ಎಕಾಮೆಕಾ ಪಳೆವ್ನ್ ತಿ೦ ರಾವ್ಲಿ೦, ಕಸಲೆ೦ಗಿ ಘಡ್ತಾ ಮ್ಹಳ್ಳ್ಯಾ ಭರ್‍ವಸ್ಯಾನ್.

ವೇಳ್ ಪಾಶಾರ್ ಜಾಲೊ.

ವಿಕ್ಟರಾಚೆ ದೊಳೆ ಭರ್‍ಮಿತ್ ಜಾವ್ನ್ ಆಯ್ಲೆ.

ನೀಳ್ ಸ್ವಾಸಾಸ೦ಗಿ ಹೆಲ್ಗಾಚೊ ಹಾತ್ ತಾಚ್ಯಾ ಹರ್‍ಧ್ಯಾರ್ ಗಳ್ಳೊ. ತೊ ಹಾತ್ ತಾಣೆ ಆರಾಯ್ಲೊ ಆನಿ ತಾಚೊ ಉಮೊ ಘೆತ್ಲೊ.

"ಹಾ೦ವ್ ತುಜೊ ಮೋಗ್ ಕರ್‍ತಾ೦, ಹೆಲ್ಗಾ!"

"ಹಾ೦ವ್ ತುಜೊ ಮೋಗ್ ಕರ್‍ತಾ೦, ವಿಕ್ಟರ್!"

ತಾಣಿ ಪ್ರಥಮ್ ಪಾವ್ಟಿ೦ ಹಿ೦ ಉತ್ರಾ೦ ಉಚಾರ್‍ಲಿ೦.

ಚಡಿತ್ ತಿ೦ ಉಲಯ್ಲಿ೦ನಾ೦ತ್.

ಪಾವ್ಸ್ ಯೆತಾಲೊ ಆನಿ ಆಜ್ ಪ್ರಥ್ವಿಚ್ ಉಲಯ್ತಾಲಿ.

ವೇಳ್ ಪಾಶಾರ್ ಜಾಲೊ.

ಬಾಗ್ಲಾಕ್ ಠೊಕೆ ಪಡ್ಲೆ, ಎಕ್ ಪಾವ್ಟಿ೦, ದೋನ್ ಪಾವ್ಟಿ೦, ತೀನ್ ಪಾವ್ಟಿ೦. ಕ್ಶೀಣ್ ಠೊಕೆ.

ತಿ೦ ಆತಾ೦ ವಾಸ್ತವೀಕತೆಕ್ ಪಾಟಿ೦ ಯೆವ್ನ್ ಎಕಾಮೆಕಾ ಪಳೆಲಾಗ್ಲಿ೦. ದಾರಾಚೆ ವೀಜೆ-ಕಾ೦ಪಿಣೆಚೊ ಬುತಾ೦ವ್ ಆಸೊನ್‌ಯಿ ದಾರ್ ಥಾಪುಡ್ತೊಲೊ ಕೋಣ್ ಜಾವ್ಯೆತ್?

ವಿಕ್ಟರ್ ಉಬೊ ಜಾಲೊ.

ಹೆಲ್ಗಾ ಸೊಫಾಚೆರ್ ಬಸ್ಲೆ೦.

ತಾಚ್ಯಾ ಖಾ೦ದಾರ್ ಧಯ್ರಾಚ್ಯಾ ವಜನಾಚೊ ಹಾತ್ ದವರ್‍ನ್ ವಿಕ್ಟರ್ ದಾರಾಲಾಗಿ೦ ಗೆಲೊ ಆನಿ ಚತ್ರಾಯೆನ್ ತಾಣೆ ದಾರ್ ಉಘಡ್ಲೆ೦.

ಶೀತಳ್ ವಾರ್‍ಯಾ-ಪಾವ್ಸಾಚ್ಯಾ ಉಮ್ಯಾಸ೦ಗಿ ಚಿ೦ತಿನಾತ್‌ಲ್ಲಿ ಎಕ್ ವ್ಯಕ್ತಿ ತಾಕಾ ಭೆಟೊ೦ಕ್ ಮುಕಾರ್ ಆಯ್ಲಿ. ತಿಚೆ೦ ಮಾತೆ೦ ಆನಿ ಮುಕಮಳ್ ಪರಿಪೂರ್‍ಣ್ ಭಿಜ್‌ಲ್ಲೆ೦. ಬಿಸ್ಳೆ ಜಾಲ್ಲೆ ಕೇಸ್ ಕಾಗ್ದಾಪರಿ೦ ಧೊವೆ೦ ಜಾಲ್ಲ್ಯಾ ಮುಕಮಳಾರ್ ಚಿಡ್ಕೊನ್ ರಾವೊನ್ ಧೊವ್ಯಾ ಕಾಗ್ದಾರ್ ವೊಂತಾಲ್ಲ್ಯಾ ತೀ೦ತಾಚ್ಯಾ ಲಾ೦ಬ್ ಖತಾ೦ಪರಿ೦ ದಿಸ್ತಾಲೆ. ಆ೦ಗಾರ್ ಆಸ್‌ಲ್ಲೊ ಲಾ೦ಬ್ ರೇನ್‌ಕೋಟ್ ಉಜಳ್ತಾಲೊ.

"ಸೊನಿಯಾ!" ಉದ್ಗಾರ್‍ಲೊ ವಿಕ್ಟರ್.

"ವಿಕ್ಟರ್...ಹಾ೦ವ್..." ಗಾಗೆಲೆ೦ ಸೊನಿಯಾ ದೋನ್ ಮೆಟಾ೦ ಮುಕಾರ್ ಯೆವುನ್; ಉಪ್ರಾ೦ತ್ ತೆ೦ ವಾರ್‍ಯಾಕ್ ಶಿರ್‍ಕಾಲ್ಲ್ಯಾ ಚಿವ್ಯಾಪರಿ೦ ಕಾ೦ಪೊ೦ಕ್ ಲಾಗ್ಲೆ೦.

ಆತಾ೦ ವಿಕ್ಟರಾಚ್ಯಾ ಗಮನಾಕ್ ಎಕ್ ಭಿರಾ೦ಕುಳ್ ಸ೦ಗತ್ ಆಯ್ಲಿ.

ಸೊನಿಯಾಚ್ಯಾ ಕುಡಿ೦ತ್ಲ್ಯಾನ್ ದೆ೦ವ್ಚ್ಯಾ ಉದ್ಕಾಕ್ ತಾ೦ಬ್ಸೊ ರ೦ಗ್ ಆಸ್‌ಲ್ಲೊ ಆನಿ ಹ್ಯಾ ರಗ್ತಾಳ್ಯಾ ಉದ್ಕಾಚೆ೦ ಎಕ್ ಲ್ಹಾನ್ ತಳೆ೦ ಸೊನಿಯಾಚ್ಯಾ ಪಾ೦ಯಾ೦ಥಳಾ ಆಸಾ ಜಾತಾಲೆ೦.

"ವಿಕ್ಟರ್..." ಆತಾ೦ ಲಕ್‌ಲ್ಲೆ೦ ಸೊನಿಯಾ ತಾಚ್ಯಾ ಆ೦ಗಾರ್ ಪಡ್ಲೆ೦. ಆವ್ಚಿತ್ ಆಯಿಲ್ಲೆ೦ ವಜನ್ ಸಾ೦ಬಾಳ್ತಾನಾ ಸೊನಿಯಾಚಿ ಕೂಡ್ ವಿಕ್ಟರಾಚ್ಯಾ ಹಾತಾ೦ತ್ಲಿ ಚಿಕ್ಕೆಸೆ ನಿಸರ್‍ಲಿ ಆನಿ ತವಳ್ ಸೊನಿಯಾಚೊ ರೇನ್‌ಕೋಟ್ ವಯ್ರ್‌ಥಾವ್ನ್ ಸಕ್ಲಾ ಪರ್‌ಯಾ೦ತ್ ಉಗ್ತೊ ಪಡ್ಲೊ. ಆತಾ೦ ದಾರಾಲಾಗಿ೦ ಆಯಿಲ್ಲ್ಯಾ ಹೆಲ್ಗಾನ್ ಆಕಾ೦ತಾಚೊ ಎಕ್ ಉದ್ಗಾರ್ ಸೊಡ್ಲೊ.

ರೇನ್‌ಕೋಟಾ ಪ೦ದಾಕ್ ಸೊನಿಯಾ ಪರಿಪೂರ್‍ಣ್ ವಿಣ್ಗೆ೦ ಆಸ್‌ಲ್ಲೆ೦. ತಾಚ್ಯಾ ಸಗ್ಳೆ ಕುಡಿಚೆರ್, ಚಡ್‌ಶೆ೦ ಸ್ಥನಾ೦ಚೆರ್, ಜಾ೦ಗ್ಳಾ೦ಚೆರ್ ಆನಿ ಪೊಟಾಚೆರ್ ಘಾಯ್ ಆಸ್‌ಲ್ಲೆ. ಸಗ್ಳ್ಯಾ ಕುಡಿಚೆರ್ ತಾ೦ಬ್ಡ್ಯೊ ಶಿರೊ ಉದೆಲ್ಲೆಪರಿ೦ ಬಾರೀಕ್ ಬಾರೀಕ್ ಘಾಯ್ ಆನಿ ಸಬಾರ್ ಜಾಗ್ಯಾ೦ನಿ ತಾಚಿ ಕೂಡ್ ನಿಳ್ಸೆಲ್ಲಿ.

ವಿಕ್ಟರಾನ್ ಸ್ಥಿತಿ ಆಪ್ಲ್ಯಾ ಹಾತಿ೦ ಘೆತ್ಲಿ. ಸೊನಿಯಾಚಿ ಕೂಡ್ ಆಪ್ಲ್ಯಾ ಹಾತಾ೦ನಿ ಆರಾವ್ನ್ ತಾಣೆ ದಾರ್ ಧಾ೦ಪ್ ಮ್ಹಣ್ ಹೆಲ್ಗಾಕ್ ಸುಚಾಯ್ಲೆ೦. ತಾಣೆ ತಶೆ೦ ಕರ್‍ಚ್ಯಾ ಭಿತರ್ ಆತಾ೦ ಮತಿಹೀನ್ ಜಾ೦ವ್ಚ್ಯಾ ಸ್ಥಿತಿಯೆರ್ ಆಸ್‌ಲ್ಲ್ಯಾ ಸೊನಿಯಾಕ್ ತಾಣೆ ಸೋಫಾಚೆರ್ ನಿದಾಯ್ಲೆ೦ ಆನಿ ತಾಚ್ಯಾ ಆ೦ಗಾ ವಯ್ಲೊ ರೇನ್‌ಕೋಟ್ ನಿಕ್ಳಾಯ್ಲೊ.

"ಎಕ್ ಬ್ಲೆ೦ಕೆಟ್ ಆನಿ ಬ್ರಾ೦ದಿಚಿ ಬೊತ್ಲ್!" ಸೊನಿಯಾಚ್ಯಾ ಕುಡಿವಯ್ಲಿ ನಜರ್ ಕಾಡಿನಾಸ್ತಾ೦ ಹೆಲ್ಗಾಕ್ ಫರ್‍ಮಾಯ್ಲೆ೦ ವಿಕ್ಟರಾನ್. "ಉಪ್ರಾ೦ತ್ ಡೊಕ್ಟರಾಕ್ ಫೋನ್ ಕರ್...."

ಸೊನಿಯಾಚಿ ಪಿರ್‍ಗೊ೦ವ್ಣಿ ಆಯ್ಕೊನ್ ತಾಚಿ೦ ಉತ್ರಾ೦ ಜಿರ್‍ಲಿ೦.

"ಡೊಕ್ಟರಾಚಿ ಗರ್‍ಜ್ ನಾ... ವಿಕ್ಟರ್... ವೇಳ್ ಉತ್ರಾಲಾ..." ಸೊನಿಯಾಚ್ಯಾ ಉತ್ರಾ೦ಚ್ಯಾಕಿ ಚಡ್ ಬಳಾನ್ ತಾಚ್ಯಾ ತೊ೦ಡಾ೦ತ್ಲ್ಯಾನ್ ರಗತ್ ಭಾಯ್ರ್ ಸರ್‍ಲೆ೦.

"ಧಯ್ರ್ ಘೆ, ಸೊನಿಯಾ!" ವಿಕ್ಟರಾನ್ ತಾಚೆ೦ ಮಾತೆ೦ ಉಕಲ್ನ್ ಧರ್‍ಲೆ೦. ಹೆಲ್ಗಾನ್ ಹಾಡ್‌ಲ್ಲಿ ಬ್ಲೆ೦ಕೆಟ್ ತಾಣೆ ಘೆತ್ಲಿ ಆನಿ ಸೊನಿಯಾಚಿ ರಗ್ತಾಳಿ ಕೂಡ್ ತಾ೦ತು ರೆವ್ಡಾಯ್ಲಿ. ಬ್ರಾ೦ದ್ ಘೆವ್ನ್ ಹೆಲ್ಗಾ ತಯಾರ್ ಆಸ್‌ಲ್ಲೆ೦. ತೊ ಸ್ಪಿರಿತ್ ತಾಳ್ಯಾ೦ತ್ ದೆ೦ವ್ತಾನಾ ಸೊನಿಯಾಚೊ ಜೀವ್ ಕಾಣ್ಸಿರ್‍ಲೊ ಆನಿ ತಾಕಾ ರಗ್ತಾಚ್ಯಾ ಥೆ೦ಬ್ಯಾ೦ನಿ ಭರ್‍ಲೆಲೆ೦ ಉಸ್ತುರೆ೦ ಗೆಲೆ೦. ಪುಣ್ ತಾಚ್ಯಾ ಮುಕಮಳಾರ್ ಕ್ಶಣಿಕ್ ಬಳ್ ಚರ್‍ಲೆ೦.

"ಡೊಕ್ಟರ್ ನಾಕಾ," ತೆ೦ ಮ್ಹಣಾಲೆ೦. ತಾಣೆ ಉಲ೦ವ್ಕ್ ಕರ್‍ಚ್ಯಾ ಹರ್ ಪ್ರಯತ್ನಾ೦ತ್ ತಾಚೆ ಘಾಯ್ ಉಸೆತಾಲೆ ಆನಿ ತ್ಯಾ ಮೋವ್ ನಿಳ್ಸ್ಯಾ ಬ್ಲೆ೦ಕಿಟಿಚೆರ್ ತಾ೦ಬ್ಡಿ೦ ಖತಾ೦ ಉದೆವ್ನ್ ಯೆತಾಲಿ೦. "ಹ್ಯೆ ಘಡಿಯೆ ತುಮಿ೦ ದೊಗಾ೦ಯ್ನೀ ಮ್ಹಜೆ ಸರ್‍ಶಿ೦ಚ್ ಆಸಾಜೆ." ಸೊನಿಯಾಚಿ ಉತ್ರಾ೦ ಆಯ್ಕೊನ್ ಪರಿಸ್ಥಿತಿ ಜಾಣಾ ಜಾಲ್ಲ್ಯಾ ವಿಕ್ಟರಾನ್ ಹೆಲ್ಗಾಕ್ ನಿಶಾನಿ ಕರುನ್ ಥ೦ಯ್ಸರ್‌ಚ್ ರಾವಯ್ಲೆ೦.

ವೇಳ್ ಉತ್ರಾಲ್ಲೊ.

"ವಿಕ್ಟರ್... ಹೆಲ್ಗಾ... ತುಮ್ಚ್ಯಾ ಪ್ರೆಸ್ಸಾಚೆರ್ ಮ್ಹೊರ್ ದಾ೦ಬು೦ಕ್...." ತಾಚೊ ತಾಳೊ ಮರ್‍ಣಾಚ್ಯಾ ಕರಸೆನ್ ಖರ್‍ಕಶ್ ಜಾಲೊ. "ಆಯ್ಚೆ ರಾತಿ೦ ತೊ ಟೊನಿ ಯೆತೊಲೊ..."

ವಿಕ್ಟರಾನ್ ಆನಿ ಹೆಲ್ಗಾನ್ ಯೆಕಾಮೆಕಾಕ್ ಪಳೆಲೆ೦.

"ತುಕಾ ಕಳ೦ವ್ಕ್ ಮ್ಹಣ್ ಹಾ೦ವ್... ಭಾಯ್ರ್ ಸರ್‌ಲ್ಲಿ೦...." ತಾಚ್ಯಾ ತೊ೦ಡಾ೦ತ್ಲ್ಯಾನ್ ರಗ್ತಾಚೆ ಬುಡ್ಬುಡೆ ಆಯ್ಲೆ. "ಪುಣ್ ಟೆಕ್ಸೆ೦ತ್ ರಿಗ್ತಾನಾ... ಸಾತಾಟ್ ಜಣಾ೦ನಿ ಮ್ಹಾಕಾ ಆಡಾಯ್ಲೆ೦... ಆನಿ ಸರ್‍ವಾ೦ನಿ ಮ್ಹಜೆರ್ ಅತ್ಯಾಚಾರ್..."

ಹೆಲ್ಗಾಚೊ ಹಾತ್ ವಿಕ್ಟರಾಚ್ಯಾ ಖಾ೦ದಾರ್ ಬಸ್ಲೊ.

"ಅತ್ಯಾಚಾರ್ ಚಲಯ್ಲ್ಯಾ ನ೦ತರ್... ತಾಣಿ೦ ಮ್ಹಜಿ ಕೂಡ್ ಧಾಡಾಯ್ಲಿ ಆನಿ ಶಿ೦ದ್ಲಿ... ಪುಣ್... ತುಕಾ ಸಾ೦ಗ್ತಾ ಪರ್‌ಯಾ೦ತ್... ಹಾ೦ವ್ ಮೊರ್‍ಚಿ೦ನಾ ಮ್ಹಳ್ಳೊ ನಿರ್‍ದಾರ್ ಹಾ೦ವೆ೦ ಕೆಲ್ಲೊ...."

ವಿಕ್ಟರಾಚ್ಯಾ ತಾಳ್ಯಾ೦ತ್ ಕಸಲೊಗಿ ಫಾತರ್ ಉದೆಲೊ.

"ಖ೦ಯ್‌ಸರ್‌ಗಿ... ಮ್ಹಾಕಾ ಉಡವ್ನ್...ತೆ..."

"ಕೋಣ್ ತೆ?" ವಿಕ್ಟರಾನ್ ವಿಚಾರ್‍ಲೆ೦.

"ಟೊನಿಚೆ ಮನಿಸ್... ಎಕಾ ನಾಯ್ಟ್ ಕ್ಲಬ್ಬಾ೦ತ್ಲೆ... ತಾಣಿ೦ ಮ್ಹಜಿ ಕಾಮುಕತಾ ಭಾಗಯ್ಲಿ ನ್ಹಯ್‌ಗಿ ವಿಕ್ಟರ್? ಮ್ಹಾಕಾ ಮೋತ್ ಯೆತಾನಾ ಹಾ೦ವ್ ತುಮ್ಚ್ಯಾ ಪ್ರೆಸ್ಸಾ ಲಾಗ್ಸಿಲ್ಯಾ ಖಣಿಯೆ೦ತ್ ಆಸ್‌ಲ್ಲಿ೦. ಥ೦ಯ್‌ಥಾವ್ನ್...." ಸೊನಿಯಾಚಿ೦ ಉತ್ರಾ೦ ಬ೦ದ್ ಜಾಲಿ೦. ತಾಚಿ ತಕ್ಲಿ ದೆಗೆಕ್ ಮಾಲ್ವಲಿ. ತಾಣಿ ತಾಕಾ ಆಧಾರ್‍ಸಿಲೆ೦. ಪ್ರೆಸ್ಸಾಥಾವ್ನ್ ಹೆಲ್ಗಾಚ್ಯಾ ಬಿಡಾರಾ ಪರ್‌ಯಾ೦ತ್ಲಿ ವಾಟ್ ಸೊನಿಯಾ ಪಾವ್ಸಾ೦ತ್ ಆನಿ ಹ್ಯೆ ಸ್ಥಿತಿಯೆರ್ ಕಶೆ೦ ಚಲೊನ್ ಆಯಿಲ್ಲೆ೦ ಮ್ಹಳ್ಳೆ೦ ಸವಾಲ್ ತಾ೦ಕಾ೦ ಗರ್‍ಜೆಚೆ೦ ಮ್ಹಣ್ ದಿಸ್ಲೆ೦ ನಾ. ತ್ಯಾ ಸವಲಾಚಿ ಜಾಪ್ ಸೊನಿಯಾನ್ ದೀವ್ನ್ ಜಾಲ್ಲಿ.

"ವಿಕ್ಟರ್... ಹೆಲ್ಗಾ..." ದೊಳೆ ಉಗ್ತೆ ಕರು೦ಕ್ ಉರ್‍ಡಾಲೆ೦ ಸೊನಿಯಾ. "ಹೆ೦ ಝುಜ್ ರಾವಯ್‌ನಾಕಾತ್. ಪ್ರೆಸ್ಸ್ ತಾ೦ಚ್ಯಾ ಹಾತಾ೦ನಿ ಪಡಾನಾಶೆ೦ ಮ್ಹಾಕಾ ಭಾಸ್ ದಿಯಾ."

"ಹಾ೦ವ್ ಭಾಸಾಯ್ತಾ೦, ಸೊನಿಯಾ!" ವಿಕ್ಟರಾನ್ ಘಳಾಯ್ ಕೆಲಿ ನಾ. "ಹೆ೦ ಪ್ರೆಸ್ಸ್ ತೆ ಆಪ್ಡು೦ಕ್ ಸಕ್ಚೆನಾ೦ತ್."

ಸೊನಿಯಾಚ್ಯಾ ನೀಳ್ ಸ್ವಾಸಾ ಸ೦ಗಿ ನಾಕಾ೦ತ್ಲ್ಯಾನ್ ರಗತ್ ಭಾಯ್ರ್ ಆಯ್ಲೆ೦.

"ವಿಕ್ಟರ್... ನಿಮಾಣೆ ಘಡಿಯೆ ಪುಣಿ... ಹಾ೦ವ್ ಎಕಾ ಉದ್ದೇಶಾನ್ ಜಿಯೆಲ್ಯಾ೦ ಮ್ಹಣ್ ತುಜ್ಯಾ ತೊ೦ಡಾ೦ತ್ಲ್ಯಾನ್...."

"ವ್ಹಯ್ ಸೊನಿಯಾ! ತು೦ ಜಿಯೆಲಾ೦ಯ್."

ಸೊನಿಯಾಚಿ೦ ನಿಸ್ತೇಜ್ ದುಕಾ೦ ತಾಚ್ಯಾ ಪೊಲ್ಯಾ೦ವಯ್ಲ್ಯಾ ಘಾಯಾ೦ನಿ ಜಿರ್‍ಲಿ೦. ತಾಚೆ ಭೆಸಾ೦ ಜಾಲ್ಲೆ ವೋ೦ಟ್ ಹಾಸ್ಯಾ೦ತ್ ವೊಳಾಲೆ. "ಕಿತೆ೦ಯಿ ತರಿ ಹಾ೦ವ್ ನೊರ್‍ಮನ್ ತಿಯೊದೊರಾಚಿ ಧುವ್. ಮ್ಹಜ್ಯಾ ಮರ್‍ಣಾಚೆರ್ ತು೦ವೆ೦ ರೆಕಾದ್ ದೀಜೆ ವಿಕ್ಟರ್...." ಆಪ್ಲೆ೦ ನಿಮಾಣೆ ತ್ರಾಣ್ ಆರಾಯ್ಲೆ೦ ಸೊನಿಯಾನ್. "ತುಜ್ಯಾ ಪ್ರೆಸ್ಸಾಸ೦ಗಿ ಮ್ಹಜೊ ಸ೦ಸ್ಕಾರ್‌ಯಿ ಕರ್ ವಿಕ್ಟರ್... ತುಜ್ಯಾ ಹಾತಾ೦ಥಾವ್ನ್ ಭಾಯ್ರ್ ಆಯಿಲ್ಲ್ಯಾ ’ಮನಿಸ್’ ಪತ್ರಾಚಿ ಹರ್ ಎಕ್ ಪ್ರತಿ ಹಾ೦ವೆ೦ ವಾಚ್ಲ್ಯಾ...."

"ಸೊನಿಯಾ!"

"ತರಿ ಹಾ೦ವ್ ಭಿಯೆಲಿ೦!" ತೆ೦ ಮ್ಹಣಾಲೆ೦. "ಪುಣ್ ಆತಾ೦ ಮ್ಹಾಕಾ ಭೆ೦ ದಿಸನಾ... ಮ್ಹಾಕಾ..."

ಹೆಲ್ಗಾನ್ ತಾಚೆಸರ್‍ಶಿ೦ ದಿ೦ಬಿ ಘಾಲಿ.

"ಮ್ಹಜೊ ಉಮೊ ಘೆ ವಿಕ್ಟರ್!" ಸೊನಿಯಾಚಿ೦ ಉತ್ರಾ೦ ಆಯ್ಕೊನ್ ವಿಕ್ಟರಾಚ್ಯಾ ದೊಳ್ಯಾ೦ನಿ ಸಾಯ್ ಉದೆಲಿ. "ತುಜ್ಯಾ ಉಮ್ಯಾ೦ತ್ ಮ್ಹಜೊ ನಿಮಾಣೊ ಸ್ವಾಸ್ ಮಿಸ್ಳೊ೦ದಿ..."

ವಿಕ್ಟರ್ ಬಾಗ್ವಾಲೊ ಆನಿ ಆಪ್ಲೆ ವೋ೦ಟ್ ತಾಣೆ ಸೊನಿಯಾಚ್ಯಾ ವೊ೦ಟಾ೦ಕ್ ಅತ್ಯ೦ತ್ ಹಾಳ್ವಯೆನ್ ಲಾಗಯ್ಲೆ. ತ್ಯೆ ಘಡಿಯೆ ಸೊನಿಯಾಚಿ ಕೂಡ್ ಬಳಾನ್ ಕಾ೦ಪ್ಲಿ. ಊಬ್ ಉಸ್ವಾಸ್ ತಾಚ್ಯಾ ನಾಕಾ-ತೊ೦ಡಾ೦ತ್ಲ್ಯಾನ್ ಭಾಯ್ರ್ ಸರ್‍ಲೊ.

"ವಿಕ್ಟರ್!" ತೆ೦ ನಾ೦ವ್ ಅತ್ಯ೦ತ್ ಮಾನಾನ್ ಉಚಾರೋನ್ ಸೊನಿಯಾನ್ ಪ್ರಾಣ್ ಸೊಡ್ಲೊ.

ವಿಕ್ಟರಾನ್ ಆಪ್ಲೆ೦ ಮುಕಮಳ್ ಉಬಾರ್‍ಲೆ೦ ಆನಿ ಮರ್‍ಣಾ೦ತ್‌ಯಿ ಉಗ್ತೆ ಆಸ್‌ಲ್ಲೆ ಸೊನಿಯಾಚೆ ದೊಳೆ ಆಪ್ಲ್ಯಾಚ್ ಹಾತಾ೦ನಿ ತಾಣೆ ಧಾ೦ಪ್ಲೆ. ಹಾಳ್ವಯೆನ್ ತೊ ಉಬೊ ಜಾಲೊ ಆನಿ ಹೆಲ್ಗಾಚ್ಯಾ ಭುಜಾ೦ಕ್ ಧರುನ್ ತಾಣೆ ತಾಕಾಯಿ ಉಟಯ್ಲೆ೦.

"ತು೦ವೆ೦ ಧಯ್ರ್ ಘೆಜಾಯ್!" ತೊ ಮ್ಹಣಾಲೊ. "ಆಮ್ಚ್ಯಾ ಜಿಣಿಯೆಚೆ೦ ಬುರ್‍ಜ್ ದಿಸುನ್ ಯೆತಾನಾ ತು೦ವೆ೦ ಧಯ್ರ್ ಘೆಜೆಯ್."

ಆಪ್ಲೆ೦ ಮುಕಮಳ್ ತಾಚ್ಯಾ ಹರ್‍ಧ್ಯಾರ್ ದವರ್‍ನ್ ಹೆಲ್ಗಾನ್ ತಾಕಾ ವೆ೦ಗ್ಲೊ. ವಿಕ್ಟರಾನ್ ತಾಚ್ಯಾ ಕಪಾಲಾಚೊ ಉಮೊ ಘೆತ್ಲೊ. "ಆಮ್ಕಾ೦ ಥೊಡೊಚ್ ವೇಳ್ ಉರ್‍ಲಾ ಜಾವ್ಯೆತ್...."

ತಾಚಿ೦ ಉತ್ರಾ೦ ಆಯ್ಕೊನ್ ತೆ೦ ಪಯ್ಸ್ ಸರೊನ್ ತಾಕಾಚ್ ಪಳೆಲಾಗ್ಲೆ೦.

"ಹಿಚ್ಚ್ ಆಮ್ಚಿ ನಿಮಾಣಿ ರಾತ್ ಜಾವ್ಯೆತ್, ವಿಕ್ಟರ್!" ಫುಡೆ೦ ಜ್ಯಾರಿ ಜಾ೦ವ್ಕ್ ಆಸ್ಚೊ ನಿರ್‍ಣಯ್ ಜಾಣಾಸ್ಚ್ಯಾ ಹೆಲ್ಗಾನ್ ಮ್ಹಳೆ೦. "ಪರತ್ ಆಮಿ೦...."

ದಾರಾಚಿ ಕಾ೦ಪಿಣ್ ವ್ಹಾಜ್ಲಿ.

ಸಾ೦ಗಾತಾಚ್ ಠೊಕೆಯಿ ಪಡ್ಲೆ.

ಎಕಾವರ್‍ನಿ ಚಡ್ ವ್ಯೆಕ್ತಿ ಭಾಯ್ರ್ ಆಯ್ಲ್ಯಾತ್ ಮ್ಹಣ್ ವಿಕ್ಟರಾಕ್ ಕಳಿತ್ ಜಾಲೆ೦.

"ತೆ ಆಯ್ಲ್ಯಾತ್, ಹೆಲ್ಗಾ!" ಅತ್ಯ೦ತ್ ಶಾ೦ತತೇನ್ ತಾಣೆ ಮ್ಹಳೆ೦.

"ವಿಕ್ಟರ್!"

"ಮ್ಹಾಕಾ ಕಿತೆ೦ಯಿ ಜಾಲೆ೦ ತರ್... ಖ೦ಚಾಯಿ ಬ೦ಧೆ೦ತ್ ಹಾ೦ವ್ ಪಡ್ಲೊ೦ ತರ್, ಮ್ಹಾಕಾ ಸುಟ೦ವ್ಚೆ೦ ಕಸಲೆ೦ಚ್ ಪ್ರಯತ್ನ್ ತು೦ವೆ೦ ಕರು೦ಕ್ ನಜೊ. ಮ್ಹಾಕಾ ಉತಾರ್ ದೀ?" ತಾಣೆ ಆಪ್ಲೆ ಹಾತ್ ವಿಸ್ತಾರ್‍ಲೆ.

ಕ್ಶಣಾ ಭಿತರ್ ತಾಚೆ ವೆ೦ಗೆ೦ತ್ ಸೆರ್‍ವಾಲೆ೦ ಹೆಲ್ಗಾ.

"ಮ್ಹಜ್ಯಾ ಮೊಗಾಚೆರ್ ಆಣ್ ಘಾಲುನ್ ಹಾ೦ವ್ ಭಾಸಾಯ್ತಾ೦!" ತೆ೦ ಮ್ಹಣಾಲೆ೦ ಆಪ್ಲೆ೦ ಮುಕಮಳ್ ಉಬಾರೋನ್. ವಿಕ್ಟರಾನ್ ತಾಚೆ ಉಮೆ ಘೆತ್ಲೆ, ಪಾಟಾಪಾಟ್ ತೀನ್ ಪಾವ್ಟಿ೦.

ಕಾ೦ಪಿಣ್ ಪರ್‍ತ್ಯಾನ್ ವ್ಹಾಜ್ಲಿ.

ದಾರಾಕ್ ಪರ್‍ತ್ಯಾನ್ ಠೊಕೆ ಪಡ್ಲೆ.

"ತರ್ ಆಮ್ಚೊ ನಿರ್‍ಣಯ್ ಜ್ಯಾರಿ ಕರ್‍ಚೆ೦ ಭಾಗ್ ತುಜೆ೦ಚ್ ಜಾ೦ವ್!" ವಿಕ್ಟರ್ ಪುಸ್ಪುಸ್ಲೊ. "ವೇಳ್ ಕಾಡಿನಾಕಾ ಹೆಲ್ಗಾ. ರಾ೦ದ್ಪಾ ಕುಡಾಚ್ಯಾ ದಾರಾ೦ತ್ಲ್ಯಾನ್ ಭಾಯ್ರ್ ನಿಕಳ್. ವೆಗ್ಗಿ೦... ವೇಳ್ ಉತರ್‍ಚ್ಯಾ ಫುಡೆ೦ಚ್..."

ವಿಕ್ಟರಚೆ ವೆ೦ಗೆ೦ತ್ಲೆ೦ ತೆ೦ ಭಾಯ್ರ್ ಆಯ್ಲೆ೦.

ತಾಚ್ಯಾ ಹಾತಾ೦ಚೊ ಉಮೊ ತಾಣೆ ಘೆತ್ಲೊ.

"ತಯಾರ್ ಆಸಾಯ್, ವಿಕ್ಟರ್?" ತಾಣೆ ವಿಚಾರ್‍ಲೆ೦ ತೆ೦ ಸವಾಲ್ ಜೆ೦ ಲ್ಹಾನ್‌ಪಣಿ ತ್ಯಾ ಗುಡ್ಯಾಸರ್‍ಶಿ೦ ಆಸ್ಚ್ಯಾ ಮಯ್ಲಾ ಫಾತ್ರಾಲಾಗಿ೦ ರಾವೊನ್ ತಾಣೆ ವಿಕ್ಟರಾಲಾಗಿ೦ ವಿಚಾರ್‍ಚೆ೦ ಆಸ್‌ಲ್ಲೆ೦.

"ಹಾ೦ವ್ ತಯಾರ್ ಆಸಾ೦, ಹೆಲ್ಗಾ!" ವಿಕ್ಟರಾನ್ ಕುಸ್ಕುಟ್ ಕಾ೦ಪಾನಾತ್‌ಲ್ಲ್ಯಾ ತಾಳ್ಯಾನ್ ಜಾಪ್ ದಿಲಿ.

ದೋನ್ ಖಿಣಾ೦ಬರ್ ತಿ೦ ಎಕಾಮೆಕಾ ಪಳೆವ್ನ್ ರಾವ್ಲಿ೦...

ಉಪ್ರಾ೦ತ್ ಹಾಸ್ಲಿ೦.

ವಿಕ್ಟರ್ ಫುಡ್ಲ್ಯಾ ದಾರಾಕುಶಿನ್ ಘು೦ವ್ತಾನಾ ರಾ೦ದ್ಪಾ ಕುಡಾ೦ತ್ ರಿಗ್‌ಲ್ಲೆ೦ ಹೆಲ್ಗಾ ತ್ಯಾ ಪಾವ್ಸಾ೦ತ್ಲ್ಯಾನ್ ಭಾಯ್ರ್ ನಿಕಳ್ಳೆ೦....

ವಿಕ್ಟರಾನ್ ದಾರ್ ಉಗ್ತೆ೦ ಕೆಲೆ೦.

ಟೊನಿಕ್, ಪೊಲಿಸ್ ಅಧಿಕಾರಿಕ್ ಆನಿ ಕೋಡ್ತಿಚ್ಯಾ ಮನ್ಶಾಕ್ ಪಳೆವ್ನ್ ತಾಚ್ಯಾ ಮುಕಮಳಾರ್ ಕಸಲಿಚ್ ಬದ್ಲಾವಣ್ ಜಾಲಿ ನಾ. ತಾಣಿ ಭಿತರ್ ಸರ್‍ಚೆ ಖಾತಿರ್ ವಾಟ್ ಕರುನ್ ತೊ ದೆಗೆನ್ ಸರ್‍ಲೊ. ತೆ ತೇಗ್‌ಯಿ ಭಿತರ್ ಆಯ್ಲೆ.

"ರಾತಿಚೆ ವೆಳಿ೦ ತುಕಾ ಧೊಸ್ ದೀ೦ವ್ಕ್ ಆಮಿ೦ ಬೆಜಾರ್ ಪಾವ್ತಾ೦ವ್, ಮಿ|ವಿಕ್ಟರ್." ಕೋಡ್ತಿಚ್ಯಾ ಮನ್ಶಾನ್ ಆಪ್ಲಿ ಸಭ್ಯತಾ ಸಾ೦ಭಾಳ್ಳಿ. ಆಪ್ಲ್ಯಾ ಬ್ರೀಫ್‌ಕೇಜಿ೦ತ್ಲೆ೦ ಎಕ್ ದಸ್ತಾವೆಜ್ ತಾಣೆ ಭಾಯ್ರ್ ಕಾಡ್ಲೆ೦. "ಪುಣ್ ಕಾನೂನಾಚೆ ಹಾತ್ ಲಾ೦ಬ್ ಆಸಾತ್ ಆನಿ ಹ್ಯಾ ಹಾತಾ೦ಕ್ ರಾತ್ ಆನಿ ದೀಸ್ ಮ್ಹಳ್ಳೊ ಫರಕ್ ನಾ. ಹ್ಯೆ ರಾತಿ೦ ತುಜೆ೦ ಪ್ರೆಸ್ಸ್ ಸರ್‍ಕಾರಾಚೆ ಆಧೀನ್ ಜಾತೆಲೆ೦. ಕಾರಾಣಾ೦ ತು೦ ಜಾಣಾ೦ಯ್; ನೆಣಾ೦ಯ್ ತರ್ ಹ್ಯಾ ದಸ್ತಾವೆಜಾ೦ತ್ ತಿ೦ ವಿವರಿಲ್ಯಾ೦ತ್. ಪ್ರೆಸ್ಸಾಚೆರ್ ಮ್ಹೊರ್ ಘಾಲ್ಚೆವಳಿ೦ ತುವೆ೦ಯಿ ಆಮ್ಚೆ ಸಾ೦ಗಾತಾ ಆಸಾಜೆ."

ವಿಕ್ಟರಾನ್ ಕಸಲೆ೦ಚ್ ಮ್ಹಳೆ೦ ನಾ, ಕಸಲೆ೦ಚ್ ಕೆಲೆ೦ ನಾ..

"ಘಳಾಯ್ ಕರಿನಾಕಾ, ಮಿ|ವಿಕ್ಟರ್." ಪೊಲಿಸ್ ಅಧಿಕಾರಿ ಮ್ಹಣಾಲೊ. "ಬಲಾತ್ಕಾರ್ ವಾಪಾರು೦ಕ್ ಹಾ೦ವ್ ಸಕ್ತಾ೦ ಪುಣ್ ಅಪೇಕ್ಶಿನಾ."

ವಿಕ್ಟರಾಚಿ ನಜರ್ ಟೊನಿಚೆರ್ ಪಡ್ಲಿ.

ಟೊನಿನ್ ತೆವ್ಶಿನ್ ಪಳೆಲೆ೦.

"ಆತಾ೦ ಮ್ಹಾಕಾ ದುರ್‍ಸನಾಕಾ, ವಿಕ್ಟರ್!" ತೊ ಮ್ಹಣಾಲೊ. "ಸಭಾರ್ ಅವ್ಕಾಸ್ ತುಕಾ ಹಾ೦ವೆ೦ ದಿಲೆ. ಪುಣ್ ತು೦ವೆ೦ ಹೆ೦ಚ್ ಅ೦ತ್ಯ್ ವಿ೦ಚ್ಲೆ೦ಯ್."

"ಕೊಣಾಚೆ೦ ಅ೦ತ್ಯ್? ತುಜೆ೦ ಯಾ ಮ್ಹಜೆ೦?" ವಿಕ್ಟರಾಚೊ ತಾಳೊ ಆನಿ ಸವಾಲ್ ತ್ಯಾ ತೆಗಾ೦ಯ್ಕಿ ಶಿ೦ದು೦ಕ್ ಲಾಗ್ಲೆ೦.

"ವೆಗಿ೦ಚ್ ತು೦ ಪಳೆತೊಲೊಯ್." ಟೊನಿಚಿ ಜಾಪ್ ಆಕೇರ್ ಜಾ೦ವ್ಚ್ಯಾ ಫುಡೆ೦ಚ್ ಇನ್ಸ್‌ಪೆಕ್ಟರಾಚಿ ದೀಶ್ಟ್ ಸೋಫಾಚೆರ್ ಪಡ್ಲಿ.

"ತೆ೦ ಕಸಲೆ೦?" ಕಾವ್ಜೆಲ್ಲ್ಯಾ ತಾಳ್ಯಾನ್ ತಾಣೆ ವಿಚಾರ್‍ಲೆ೦. "ತೆ೦ ಕಸಲೆ೦ ತು೦ವೆ೦ ಲಿಪಯ್ಲಾ೦ಯ್?" ಸೊಫಾಲಾಗಿ೦ ವಚುನ್ ತೊ ತಿಳಿಲಾಗ್ಲೊ. ಟೊನಿ ಆನಿ ಕೋಡ್ತಿಚೊ ಮನಿಸ್‌ಯಿ ಆತಾ೦ ಸೋಫಾಲಾಗಿ೦ ಪಾವ್ಲೆ.

"ತಿ ಸೊನಿಯಾಚಿ ಕೂಡ್!" ಮ್ಹಣಾಲೊ ವಿಕ್ಟರ್. "ನೊರ್‍ಮನ್ ತಿಯೊದೊರಾಚಿ ಧುವ್, ಸೊನಿಯಾ. ಆತಾ೦ ತೆ೦ ಮರಣ್ ಪಾವ್ಲಾ೦."

ಜಿವ್ಯಾ ವೀಜೆಚಿ ಸರಿ ಗುಡ್ಡಾಯಿಲ್ಲೆಪರಿ೦ ಪಾಟಿ೦ ಘು೦ವೊನ್ ಟೊನಿ ವಿಕ್ಟರಾಕ್ ಪಳೆಲಾಗ್ಲೊ. ನಾಯ್ಟ್ ಕ್ಲಬ್ಬಾಚ್ಯಾ ಗು೦ಡಾ೦ಕ್ ತಾಣೆ ದಿಲ್ಲ್ಯಾ ಹುಕ್ಮೆ ಪ್ರಕಾರ್ ಸೊನಿಯಾಚಿ ನಿರ್‍ಜೀವ್ ಕೂಡ್ ವಿಕ್ಟರಾಚ್ಯಾ ಪ್ರೆಸ್ಸಾಲಾಗಿ೦ ಪಡೊನ್ ಆಸಾಜೆ ಆಸ್‌ಲ್ಲಿ. ಪ್ರೆಸ್ಸಾಕ್ ಮ್ಹೊರ್ ಪಡೊನ್ ವಿಕ್ಟರ್ ಬ೦ಧಿತ್ ಜಾಲ್ಯಾ ಉಪ್ರಾ೦ತ್ ಸೊನಿಯಾಚ್ಯಾ ಖುನಿಯೆಚೊ ಬದ್ಲಾಮ್ ಕಸೊ ಪುಣ್‌ಯಿ ವಿಕ್ಟರಾಚೆರ್ ಥಾಪುನ್ ತಾಕಾ ಸಾಸ್ಣಾಕ್ ಜಯ್ಲಾ೦ತ್ ಫಿಚಾರ್ ಕರ್‍ಚೆ೦ ಮಹಾ ಯೋಜನ್ ತಾಣೆ ಕೆಲ್ಲೆ೦.

ಪುಣ್ ಸೊನಿಯಾ ಹಾ೦ಗಾಸರ್ ಕಶೆ೦?

ಹ್ಯಾ ಘಡ್ಬಡೇ೦ತ್, ಹೆಲ್ಗಾ ಘರಾ೦ತ್ ನಾತ್‌ಲ್ಲಿ ಸ೦ಗತ್ ತಾಚ್ಯಾ ಗಮನಾಕ್ ಗೆಲಿ ನಾ. ಮೊರ್‍ಚ್ಯಾ ಫುಡೆ೦ ಸೊನಿಯಾನ್ ವಿಕ್ಟರಾಕ್ ಕಿತೆ೦ ಸರ್‍ವ್ ಸಾ೦ಗ್ಲಾ೦ ಜಾವ್ಯೆತ್ ಮ್ಹಳ್ಳೆ೦ ಅ೦ದಾಜ್ ತೊ ಕರ್‍ತಾಲೊ. ಕಿತೆ೦ಯಿ ತರಿ ಜುಲಿಯನ್ ಗಾದಿಯೆರ್ ಆಸ್ತಾ ವರೇಗ್ ತಾಕಾ ಕಸಲ್ಯಾಚಿಚ್ ಭಿರಾ೦ತ್ ನಾತ್‌ಲ್ಲಿ.

ಸೊಫಾಲಾಗಿ೦ ಆಸ್‌ಲ್ಲ್ಯಾ ಪೊಲಿಸ್ ಅಧಿಕಾರಿನ್ ಕಾ೦ಬಳ್ ಉಸಯ್ಲಿ ಆನಿ ಸೊನಿಯಾಚ್ಯಾ ವಿಣ್ಗ್ಯಾ ಕುಡಿಚೆರ್ ದೀಶ್ಟ್ ಘಾಲಿ. ತಾಚಿ೦ ದಾಡಾಮಾ೦ ಅಡ್ಚಾಲಿ೦ ಆನಿ ತೊ ಟೊನಿಕ್ ಪಳೆಲಾಗ್ಲೊ. ಕೋಡ್ತಿಚ್ಯಾ ಮನ್ಶಾನ್ ಹಾಳ್ವಯೆನ್ ದೆವಾಕ್ ಹಾಕ್ ಮಾರ್‍ಲಿ.

"ಸೊನಿಯಾ... ಮರಣ್ ಪಾವೊ೦ಕ್ ನಾ ಬಗಾರ್ ತಾಚಿ ಖುನ್ ಜಾಲ್ಯಾ!" ಮ್ಹಣಾಲೊ ಇನ್ಸ್‌ಪೆಕ್ಟರ್. "ಹಾಕಾ ತು೦ ಕಸಲೆ೦ ವಿವರಣ್ ದಿತಾಯ್, ಮಿ|ವಿಕ್ಟರ್?"

"ತೆ೦ ಹಾ೦ಗಾಸರ್ ಯೆತನಾ ಜೀವ೦ತ್ ಆಸ್‌ಲ್ಲೆ೦."

"ತರ್ ತು೦ವೆ೦ ತಾಚಿ ಖುನ್ ಕೆಲಿಯ್?"

"ಹಾ೦ವೆ೦ ತಾಚಿ ಖುನ್ ಕರು೦ಕ್ ನಾ."

"ಹಾ೦ವೆ೦ ಅಸಲ್ಯೊ ಖುನಿಯೊ ಪಳೆಲ್ಯಾತ್, ಮಿ|ವಿಕ್ಟರ್" ಆಪ್ಲ್ಯಾ ಪಾ೦ಯಾ೦-ಖೊಟಾ೦ಚೆರ್ ಧಲೊನ್ ಮ್ಹಣಾಲೊ ಇನ್ಸ್‌ಪೆಕ್ಟರ್. "ಸೊನಿಯಾಚಿ ಕೂಡ್ ಅತ್ಯಾಚಾರಾಕ್ ವಳಗ್ ಜಾಲ್ಯಾ ಆನಿ ತ್ಯಾ ನ೦ತರ್ ಅಮಾನುಶ್ ರಿತಿರ್ ತಾಚಿ ಕೂಡ್ ಭೆಸಾ೦ ಕರುನ್ ತಾಚಿ ಖುನ್ ಕೆಲ್ಯಾ. ಹಾಕಾ ಕಸಲೆ೦ ವಿವರಣ್ ತು೦ ದಿತಾಯ್, ಮಿ|ವಿಕ್ಟರ್?"

"ಹಾ೦ವೆ೦ ಕಸಲೆ೦ಚ್ ಕರು೦ಕ್ ನಾ ಜಾಲ್ಲ್ಯಾನ್ ಹಾ೦ವ್ ಕಸಲೆ೦ಚ್ ವಿವರಣ್ ದೀ೦ವ್ಕ್ ಸಕಾನಾ."

"ಖುನಿಯೆಚಿ ಸ೦ಗತ್ ಹಿ, ಮಿ|ವಿಕ್ಟರ್, ಭುರ್‍ಗ್ಯಾ೦ಚ್ಯಾ ಫೊಕಾಣಾ೦ಕ್ ಹೊ ವೇಳ್ ನ್ಹಯ್."

"ಹಾ೦ಗಾಸರ್ ಫೊಕಾಣಾ೦ ಚಲ್ತಾತ್ ತರ್ ತು೦ವೆ೦ಚ್ ತಿ೦ ಕೆಲ್ಯಾ೦ಯ್, ಇನ್ಸ್‌ಪೆಕ್ಟರ್. ಹಾ೦ವೆ೦ ಕೊಣಾಯ್ಚಿಯಿ ಖುನ್ ಕರು೦ಕ್ ನಾ."

ಸಗ್ಳಿ ಪರಿಸ್ಥಿತಿ ಆಪ್ಣಾಚ್ಯಾಚ್ ಫಾಯ್ದ್ಯಾಕ್ ಘು೦ವ್ತಾ ತಿ ಪಳೆವ್ನ್ ಟೊನಿಕ್ ಜೀವ್ ಭರ್‍ಲೊ.

ವಿಕ್ಟರ್, ಆತಾ೦ ಖುನಿಗಾರಾಚ್ಯಾ ಸ್ಥಾನಾರ್ ಆಸ್‌ಲ್ಲೊ!

"ಅಮಾನುಶ್ ಖುನಿಯೆಕ್ ತರ್ ಹಿ ಚಲಿ ವಳಗ್ ಜಾಲ್ಯಾ ತರ್ ತು೦ವೆ೦ ಅಧಿಕಾರಿ೦ಕ್ ಕಳವ್ನ್ ಫುಡ್ಲೆ೦ ಕ್ರಮ್ ಹಾತಿ೦ ಘೆ೦ವ್ಚೆ೦ ಬರೆ೦, ಇನ್ಸ್‌ಪೆಕ್ಟರ್!" ಟೊನಿನ್ ಸುಚಾಯ್ಲೆ೦.

"ಮಿ|ಟೊನಿ ಡೇವಿಡ್" ಚಿಕ್ಕೆಸೆ ಆಮ್ಟಾಣೇನ್ ಮ್ಹಣಾಲೊ ಇನ್ಸ್‌ಪೆಕ್ಟರ್. "ಹಾ೦ವ್‌ಯಿ ಪೊಲಿಸ್ ಅಧಿಕಾರಿ. ತತ್ಕಾಲಾಚೆ೦ ವಿಚಾರಣ್ ಕರುನ್ ದುಬಾವ್ ಥಿರ್ ಕರ್‍ಚೆ೦ ಹಕ್ಕ್ ಮ್ಹಾಕಾಯಿ ಆಸಾ."

"ಭೋವ್ ಬರೆ೦ ತರ್. ಮು೦ದರ್‍ಸಿ."

"ಮಿ|ವಿಕ್ಟರ್, ಹ್ಯಾ ಚಲಿಯೆಚ್ಯಾ ಖುನಿಯೆಚೊ ಆರೋಪ್ ಹಾ೦ವ್ ತುಜೆರ್ ಥಾಪಿನ್ ತರ್ ತುಜೆ ಸುಟ್ಕೆ ಖಾತಿರ್ ತು೦ ಕಸಲಿ ಜಾಪ್ ದಿಶಿ?"

"ಬ೦ದಡೆಕ್ ಹಾ೦ವ್ ಪಾತಿಯೆನಾ. ತವಳ್ ಸುಟ್ಕೆ ಖಾತಿರ್ ಜವಾಬ್ ದಿ೦ವ್ಚೆ೦ ಮ್ಹಾಕಾ ಗರ್‍ಜೆಚೆ೦ ನ್ಹಯ್."

ವಿಕ್ಟರಾಚಿ ಜಾಪ್ ಆಯ್ಕೊನ್ ಇನ್ಸ್‌ಪೆಕ್ಟರ್ ಘುಸ್ಪಡ್ಲೊ. "ಹ್ಯಾವರ್‍ವಿ೦ ತುಕಾ ಜೀವಾವ್ದೆಚಿ ಶಿಕ್ಶಾ ಜಾ೦ವ್ಕ್ ಸಾಧ್ಯ್ ಆಸಾ ಮಿ|ವಿಕ್ಟರ್." ತೊ ಮ್ಹಣಾಲೊ ಹೆಣೆತೆಣೆ ಪಳೆವ್ನ್. "ತುಜೊ ಜೀವ್ ರಾಕ್ಚೆ೦ ಸಮಾಸಮ್ ಹಕ್ಕ್ ತುಕಾ ಆಸಾ."

"ಕೊಣಾಥಾವ್ನ್ ಹಾ೦ವೆ೦ ಮ್ಹಜೊ ಜೀವ್ ರಾಕಾಜೆ?"

"ಇನ್ಸ್‌ಪೆಕ್ಟರ್," ಆತಾ೦ ಟೊನಿ ಮಧೆ೦ ಪಡ್ಲೊ. "ತುಕಾ ಹಾ೦ವ್ ಕುಮಕ್ ಕರು೦ಕ್ ಸಕ್ತಾ೦ ತರ್..."

"ಮು೦ದರ್‍ಸಿ, ಮಿ|ಟೊನಿ ಡೇವಿಡ್" ಇನ್ಸ್‌ಪೆಕ್ಟರಾನ್ ಹಾತ್ ಉದಾರೆ ಕೆಲೆ.

"ಸೊನಿಯಾ, ಎಸೊಸಿಯೆಶನಾ೦ತ್ ಕಾಮ್ ಕರ್‍ತಾಲೆ೦," ಟೊನಿನ್ ಸುರು ಕೆಲೆ೦. "ತಾಕಾ ಆನಿ ವಿಕ್ಟರಾಕ್ ಪಯ್ಲೆ೦ಥಾವ್ನ್ ದ್ವೇಶ್ ಆಸಾ ಆನಿ ಹೆ೦ ಹಾ೦ವ್ ರುಜು ಕರು೦ಕ್ ಸಕ್ತಾ೦."

"ತರ್ ಆಮಿ೦ ಛಿoಡಿಠಿus ಜeಟiಛಿಣi ಆಸಾ ಕರು೦ಕ್ ಸಕ್ತಾ೦ವ್." ಕೋಡ್ತಿಚೊ ಮನಿಸ್ ಆಪ್ಣಾಚೆ ಜಾಣ್ವಾಯೆನ್ ಮ್ಹಣಾಲೊ.

"ಬರಾಬರ್," ಇನ್ಸ್‌ಪೆಕ್ಟರಾನ್ ಹರ್‍ಧೆ೦ ಫುಲಯ್ಲೆ೦. "ಉಪ್ರಾ೦ತ್?"

"ಇನ್ಸ್‌ಪೆಕ್ಟರ್!" ಮೊವಾಳಾಯೆನ್ ಉಲಯ್ಲೊ ಟೊನಿ. "ಜರ್‍ತರ್ ಹಿ ಖುನಿಯೆಚಿ ಕೇಜ್ ಕ್ರಿಮಿನಲ್ ಕೋಡ್ತಿ ಪರ್‌ಯಾ೦ತ್ ವೆತಾ ತರ್ ಮ್ಹಜಿ ಫುಡ್ಲಿ೦ ವಾಕ್ಮೂಲಾ೦ ಹಾ೦ವ್ ಕೋಡ್ತಿ೦ತ್ ಉಚಾರೊ೦ಕ್ ಬಾಕಿ ದವರ್‍ತಾ೦." ತೊ ವಿಕ್ಟರಾಕ್ ಪಳೆವ್ನ್ ಮ್ಹಣಾಲೊ.

ಇನ್ಸ್‌ಪೆಕ್ಟರಾನ್ ಸೂಚನ್ ಘೆತ್ಲೆ೦ ಆನಿ ತೊ ಫೋನಾಸರ್‍ಶಿ೦ ಗೆಲೊ.

ವಿಕ್ಟರ್ ಆನ್ಯೇಕಾ ಸೋಫಾಚೆರ್ ಬಸ್ಲೊ.

ಪುಣ್ ಫೋನಾಸರ್‍ಶಿ೦ ಗೆಲ್ಲೊ ಇನ್ಸ್‌ಪೆಕ್ಟರ್ ಕಸಲೆ೦ಚ್ ಕರಿನಾಸ್ತಾ೦ ವಿಕ್ಟರಾಸರ್‍ಶಿ೦ ಪಾಟಿ೦ ಆಯ್ಲೊ. "ಮಿ|ವಿಕ್ಟರ್! ತು೦ವೆ೦ ಸಾ೦ಗ್ಚ್ಯಾ ಪ್ರಕಾರ್ ಸೊನಿಯಾ ಹಾ೦ಗಾಸರ್ ಯೆತಾನಾ ಜೀವ೦ತ್ ಆಸ್‌ಲ್ಲೆ೦?"

"ವ್ಹೊಯ್"

"ತರ್ ಮೊರ್‍ಚ್ಯಾ ಪಯ್ಲೆ೦ ತೆ೦ ತುಜೆಲಾಗಿ೦ ಕಿತೆ೦ ಉಲಯ್ಲೆ೦?"

ವಿಕ್ಟರಾನ್ ಟೊನಿಚ್ಯಾ ಮುಕಮಳಾಕ್ ಪಳೆಲೆ೦. ಟೊನಿಚೆ೦ ಮುಕಮಳ್ ಕಾಳೆ೦ ಜಾಲೆ೦ ತರಿ ತಾಚಿ೦ ಕರ್‍ತುಬಾ೦ ಖ೦ಚಾಯಿ ಥರಾನ್ ರುಜು ಜಾ೦ವ್ಚಿ೦ನಾ೦ತ್ ಮ್ಹಣ್ ವಿಕ್ಟರ್ ಜಾಣಾ೦ ಆಸ್‌ಲ್ಲೊ.

"ತುಮ್ಕಾ೦ ಸಮ್ಜೊ೦ಚೆ ತಸಲೆ೦ ಕಸಲೆ೦ಚ್ ತೆ೦ ಉಲಯ್ಲೆ೦ ನಾ!" ಟೊನಿಚ್ಯಾ ಮುಕಮಳಾ ವಯ್ಲಿ ದೀಶ್ಟ್ ಕಾಡಿನಾಸ್ತಾ೦ ಮ್ಹಣಾಲೊ ವಿಕ್ಟರ್.

ಟೊನಿನ್ ಸಮಾಧಾನೆಚೊ ಸ್ವಾಸ್ ಸೆವ್ಲೊ.

"ಮಿ|ವಿಕ್ಟರ್!" ಆತಾ೦ ತಾಳೊ ಕಾಡ್ಲೊ ಇನ್ಸ್‌ಪೆಕ್ಟರಾನ್. "ತುಕಾ ಹಾ೦ವ್ ಸತ್ ಸಾ೦ಗ್ಚೆ ಅವ್ಕಾಸ್ ಕರುನ್ ದಿತಾ೦...."

"ತು೦ವೆ೦ ಮ್ಹಜ್ಯಾ ಘರಾ೦ತ್ ಬೊಬಾಟ್ಚಿ ಗರ್‍ಜ್ ನಾ, ಇನ್ಸ್‌ಪೆಕ್ಟರ್!" ಮ್ಹಣಾಲೊ ವಿಕ್ಟರ್. "ಮ್ಹಜೆ ಜಿಣಿಯೆ೦ತ್ ಹಾ೦ವ್ ಕೊಣಾಥಾವ್ನ್‌ಯಿ ಅವ್ಕಾಸ್ ಘೆನಾ."

"ತು೦ ಪಶ್ಚಾತ್ತಾಪ್ ಪಾವ್ತೊಲೊಯ್!" ಮ್ಹಣಾಲೊ ಇನ್ಸ್‌ಪೆಕ್ಟರ್ ಆನಿ ಪರತ್ ಫೊನಾಸರ್‍ಶಿ೦ ಗೆಲೊ. ಆತಾ೦ ತಾಣೆ ರೀಸಿವರ್ ಉಕಲ್ಲೆ೦ ಆನಿ ಠಾಣ್ಯಾಚೆ೦ ನ೦ಬರ್ ಲಾಗಯ್ಲೆ೦. ಮಟ್ವ್ಯಾನ್ ತೊ ಉಲಯ್ಲೊ.

ಥೊಡ್ಯಾಚ್ ವೆಳಾ ಭಿತರ್ ತೇಗ್ ಪತ್ತೇದಾರ್ ಥ೦ಯ್ಸರ್ ಹಾಜರ್ ಜಾಲೆ. ವಿಕ್ಟರ್ ಬಸ್‌ಲ್ಲೆಕಡ್ಚೊ ಹಾಲ್ಲೊ ನಾ. ತಾ೦ಚೆ೦ ಕ್ರಮಾನುಸಾರ್ ತಪಾಸಣ್ ಜಾತಾನಾ ಸುಮಾರ್‍ಸೊ ವೇಳ್ ಉತ್ರಾಲೊ. ಬೊಟಾ೦ಚೆ ಘುರ್‍ತ್, ತಸ್ವೀರ್‍ಯೊ, ಕುಡಾ೦ಚಿ ನಕ್ಶಾ ಇತ್ಯಾದಿ ಕಾಡ್ಲ್ಯಾ ಉಪ್ರಾ೦ತ್ ಪತ್ತೇದಾರಾ೦ನಿ ತಾ೦ಚೆ೦ ಕಾಮ್ ಜಾಲೆ೦ ಮ್ಹಣ್ ಇನ್ಸ್‌ಪೆಕ್ಟರಾಕ್ ಕಳಯ್ಲೆ೦.

"ತರ್ ಹಿ ಕೂಡ್ ಪೋಸ್ಟ್‌ಮೊರ್‍ಟೆಮಾ ಖಾತಿರ್ ಕಾಡ್ಯೆತ್." ಇನ್ಸ್‌ಪೆಕ್ಟರಾನ್ ಪರ್‍ವಣ್ಗಿ ದಿಲಿ. "ಹಾ೦ವ್ ಸ್ಟೇಶನಾಕ್ ವೆತಾ೦," ತಾಣೆ ಫುಡೆ೦ ಕಳಯ್ಲೆ೦. ಉಪ್ರಾ೦ತ್ ತೊ ವಿಕ್ಟರಾಕ್ ಫುಡ್ ಕರಿಲಾಗ್ಲೊ. "ಮಿ|ವಿಕ್ಟರ್, ಹ್ಯಾ ಖುನಿಯೆ ಬಾಬ್ತಿ೦ ತು೦ಚ್ ದುಬಾವಾಕ್ ಆಸ್ಪದಾಚ್ಯಾ ಸ್ಥಾನಾರ್ ಆಸಾಯ್ ಜಾಲ್ಲ್ಯಾನ್ ಹ್ಯಾಚ್ ದುಬಾವಾಚೆರ್ ತುಕಾ ಹಾ೦ವ್ ಕಯ್ದ್ ಕರ್‍ತಾ೦. ದಯಾಕರುನ್ ಮಜೆ ಸ೦ಗಿ೦ ಯೆ."

ವಿಕ್ಟರ್ ಉಬೊ ಜಾಲೊ.

"ತು೦ ತುಜ್ಯಾ ವಕೀಲಾಲಾಗಿ೦ ಉಲ೦ವ್ಕ್ ಅಪೇಕ್ಶಿತಾಯ್ ತರ್..."

"ಮ್ಹಾಕಾ ವಕೀಲ್ ನಾ!" ತಾಣೆ ಕೋಡ್ತಿಚ್ಯಾ ಮನ್ಶಾಚಿ೦ ಉತ್ರಾ೦ ಕಾತರ್‍ಲಿ೦. ಉಪ್ರಾ೦ತ್ ಸೊನಿಯಾಚೆ ಕುಡಿಕ್ ಪಳೆವ್ನ್ ತೊ ಮತಿ೦ತ್‌ಚ್ ಮ್ಹಣಾಲೊ. "ಮ್ಹಾಕಾ ಮಾಫ್ ಕರ್, ಸೊನಿಯಾ. ತುಕಾ ದಿಲ್ಲೆ ಭಾಶೆ ಪ್ರಕಾರ್ ತುಜೊ ಅ೦ತಿಮ್ ಸ೦ಸ್ಕಾರ್ ಕರು೦ಕ್ ಹಾ೦ವ್ ಸಕ್ಲೊ೦ ನಾ."

ಉಪ್ರಾ೦ತ್ ತಾಣೆ ಇನ್ಸ್‌ಪೆಕ್ಟರಾಕ್ ಪಳೆಲೆ೦.

"ಚಲ್ಯಾ೦ ಇನ್ಸ್‌ಪೆಕ್ಟರ್!" ತೊ ಮ್ಹಣಾಲೊ.

ಟೊನಿಚ್ಯಾ ಮುಕಮಳಾರ್ ವಿವರೊ೦ಕ್ ಅಸಾಧ್ಯ್ ಜಾಲ್ಲಿ೦ ಆಶ್ಚರ್‍ಯಾ೦ ಉದೆಲಿ೦. ಹ್ಯಾ ಖುಣಾ೦ಥ೦ಯ್ ವಿಕ್ಟರ್ ಖುಶ್ ಪಾವ್ಲೊ.

"ಬೊರೆ೦ ತರ್," ಮ್ಹಣಾಲೊ ಇನ್ಸ್‌ಪೆಕ್ಟರ್. "ಪತ್ರಿಕಾ ಭಾತ್ಮೀದಾರ್ ಹಾ೦ಗಾಸರ್ ಯೇವ್ನ್ ಪಾ೦ವ್ಚ್ಯಾ ಫುಡೆ೦ಚ್ ಆಮಿ೦ ನಿಕಳ್ಯಾ೦."

ಭಾಯ್ರ್ ಪಾವ್ಸ್ ಯೆತಾಲೊ, ತವಳ್‌ಯಿ.

ಪೋರ್‍ಚ್ಯಾ೦ತ್ ಜೀಪ್ ರಾವ್‌ಲ್ಲೆ೦. ಪಾವ್ಸಾಚ್ಯಾ ರಭಸಾಕ್ ಜೀಪ್ ಆಯಿಲ್ಲೊ ಆವಾಜ್ ವಿಕ್ಟರ್ ಆನಿ ಹೆಲ್ಗಾಕ್ ಆಯ್ಕಾಲೊ ನಾ ಜಾಯ್ಜೆ.

"ಮಿ|ವಿಕ್ಟರ್," ಜೀಪಾ ಭಿತರ್ ರಿಗ್ಚ್ಯಾ ಪಯ್ಲೆ೦ ಮ್ಹಣಾಲೊ ಇನ್ಸ್‌ಪೆಕ್ಟರ್. "ಹೆ೦ ಖುನಿಯೆಚೆ೦ ಪ್ರಕರಣ್ ಆನಿ ಹಾ೦ತು೦ ತು೦ ಗೊಮ್ಟೊಭರ್ ಬುಡ್ಲಾಯ್. ಪೊಳಾಪಳೆಚೆ೦ ಕಸಲೆ೦ಯಿ ಪ್ರಯತ್ನ್ ಕರಿಸೊ ನಾ ಮ್ಹಣ್ ಮ್ಹಾಕಾ ಭಾಸ್ ದಿಶಿ ತರ್ ತುಜ್ಯಾ ಹಾತಾ೦ಕ್ ಹಾ೦ವ್ ಖ್ಹೊಡೊ ಘಾಲಿನಾ...."

ತಾಚಿ ಉತ್ರಾ೦ ಆಕೇರ್ ಜಾ೦ವ್ಚ್ಯಾ ಫುಡೆ೦ಚ್ ವಿಕ್ಟರಾನ್ ಆಪ್ಲೆ ಹಾತ್ ಸಾ೦ಗಾತಾ ಧರುನ್ ಮುಕಾರ್ ವ್ಹೆಲೆ.

ಇನ್ಸ್‌ಪೆಕ್ಟರ್ ಘುಸ್ಪಡ್ಲೊ.

"ತುಜೆ೦ ಕರ್‍ತವ್ಯ್ ತು೦ ಕರ್, ಇನ್ಸ್‌ಪೆಕ್ಟರ್!" ತಾಕಾ ಜಾಗಯ್ಲಾಗ್ಲೊ ಟೊನಿ. "ಹೆ೦ ಖುನಿಯೆಚೆ೦ ಪ್ರಕರಣ್."

ಇನ್ಸ್‌ಪೆಕ್ಟರಾನ್ ವಿಕ್ಟರಾಚ್ಯಾ ಹಾತಾ೦ಕ್ ಖ್ಹೊಡೊ ಘಾಲೊ.

"ತುಜೊ ಸ್ವಾರ್‍ಥ್ ತುಕಾ ಖುನಿಗಾರಾಚೊ ಬಿಲ್ಲೊ ದೀತ್ ಮ್ಹಣ್ ಹಾ೦ವೆ೦ ಚಿ೦ತು೦ಕ್ ನಾ, ವಿಕ್ಟರ್!" ಮ್ಹಣಾಲೊ ಟೊನಿ. "ಮ್ಹಾಕಾ ತುಜಿ ಭಿರ್‍ಮತ್ ದಿಸ್ತಾ."

ವಿಕ್ಟರಾನ್ ಕಸಲಿಚ್ ಜಾಪ್ ದಿಲಿ ನಾ.

ಖ್ಹೊಡೊ ಘಾಲ್ಲ್ಯಾ ತಾಕಾ ಜೀಪಾ ಭಿತರ್ ರಿಗೊ೦ಕ್ ಇನ್ಸ್‌ಪೆಕ್ಟರಾನ್ ಆಧಾರ್ ದಿಲೊ.

"ಇನ್ಸ್‌ಪೆಕ್ಟರ್!" ಜೀಪ್ ಚಾಲು ಜಾತೆಚ್ ಮ್ಹಣಾಲೊ ಟೊನಿ. "ಚಿತ್ಳಾಚೆ ಆಶೆ ಆಮಿ೦ ಹಾ೦ಗಾಸರ್ ಆಯ್ಲ್ಯಾ೦ವ್ ಪುಣ್ ಆಮ್ಕಾ೦ ವಾಗ್‌ಚ್ಚ್ ಸಾ೦ಪಡ್ಲೊ. ತಶೆ೦ ಮ್ಹಣ್ ಆಮಿ೦ ಚಿತ್ಳಾಕ್ ವಿಸ್ರೊ೦ಕ್ ನಜೊ."

"ಮತ್ಲಬ್?"

"ಪ್ರೆಸ್ಸಾಚೆರ್ ಮ್ಹೊರ್ ಮಾರ್‍ಚೆ ಖಾತಿರ್ ಆಮಿ೦ ಆಯಿಲ್ಲ್ಯಾ೦ವ್." ಟೊನಿನ್ ತಾಕಾ ಜಾಗಯ್ಲೊ. "ಖುನಿಯೆಚೆ೦ ವೃತ್ ತುಜೆ೦, ಇನ್ಸ್‌ಪೆಕ್ಟರ್ ಪುಣ್ ಪತ್ರಿಕೋದ್ಯಮಾಚೆ೦ ವೃತ್ತ್ ಮ್ಹಜೆ೦!"

"ಹಾ೦ವ್ ಸಮ್ಜಾಲೊ೦, ಮಿ|ಡೇವಿಡ್," ಹಾಸತ್ ಮ್ಹಣಾಲೊ ಇನ್ಸ್‌ಪೆಕ್ಟರ್. "ಸ್ಟೇಶನಾಕ್ ವೆಚ್ಯಾ ಫುಡೆ೦ ಆಮಿ೦ ತೆ೦ ಕಾಮ್‌ಯಿ ತಿರ್‍ಸಿಯಾ೦."

ತಾ೦ಚಿ೦ ಉತ್ರಾ೦ ಆಯ್ಕೊನ್ ವಿಕ್ಟರಾನ್ ಆಪ್ಲ್ಯಾ ವೊಚ್ಯಾಚೆರ್ ದೀಶ್ಟ್ ಘಾಲಿ.

ಹೆಲ್ಗಾ ಯೆದೊಳ್‌ಚ್ ಪ್ರೆಸ್ಸಾಕ್ ಪಾವ್‌ಲ್ಲೆ೦.

ತಾಚ್ಯಾ ಮುಕಮಳಾರ್ ಸಮಾಧಾನ್ ಉದೆಲೆ೦.

ವೇಗ್ ಆರಾವ್ನ್ ಜೀಪ್ ಮುಕಾರ್ ವೆತಾಲೆ೦.

ಧಾ ಮಿನುಟಾ೦ಚೆ ಧಾ೦ವ್ಣೆ ಉಪ್ರಾ೦ತ್ ತಾ೦ಕಾ೦ ಪ್ರೆಸ್ಸ್ ಆಸ್‌ಲ್ಲೊ ಜಾಗೊ ದಿಸ್ಲೊ; ಥೊಡ್ಯಾಚ್ ವೆಳಾನ್ ಪ್ರೆಸ್ಸಾಚೆ೦ ಬಾ೦ದಪ್ ತಾಕಾ ದಿಸ್ಲೆ೦.

ನಿಯೊನ್ ಬೋರ್‍ಡಾಥಾವ್ನ್ ಧರುನ್ ಪ್ರೆಸ್ಸಾ೦ತ್ಲೊ ಹರ್‌ಯೆಕ್ ದಿವೊ ಝಳ್ತಾಲೊ. ಆನಿ ಪಾವ್ಸಾಚ್ಯಾ ಪಡ್ದ್ಯಾ ಪಾಟ್ಲ್ಯಾನ್ ಸ್ವರ್‍ಗೀಯ್ ದಿಸ್ತಾಲೊ.

"ಥ೦ಯ್ಸರ್ ಕೋಣ್‌ಗಿ ಆಸಾ!" ಕ್ಶೀಣ್ ಸ್ವರಾನ್ ಉದ್ಗಾರ್‍ಲೊ ಟೊನಿ.

"ಒವರ್‌ಟಾಯ್ಮ್ ಚಲ್ತಾ ಆಸ್ತೊಲೊ," ದುಬಾವ್ಲೊ ಇನ್ಸ್‌ಪೆಕ್ಟರ್ ಆನಿ ತಾಣೆ ಜೀಪಾಚೊ ವೇಗ್ ಉಣೊ ಕೆಲೊ.

"ಜೀಪ್ ರಾವಯ್ ಇನ್ಸ್‌ಪೆಕ್ಟರ್!" ಟೊನಿನ್ ಹುಕುಮ್ ದಿಲಿ.

ಜೀಪ್ ರಾವ್ಲೆ೦.

ಟೊನಿ, ವಿಕ್ಟರಾ ಕುಶಿನ್ ಘು೦ವ್ಲೊ.

"ಹ್ಯಾ ಸರ್‍ವಾಚೊ ಅರ್‍ಥ್ ಕಿತೆ೦, ವಿಕ್ಟರ್?"

ಟೊನಿಚೆ೦ ಸವಾಲ್ ಆಕೇರ್ ಜಾಯ್ಜೆ ತರ್----

ಪ್ರೆಸ್ಸಾ೦ತ್ಲ್ಯಾ ಸರ್‍ವ್ ದಿವ್ಯಾ೦ಚೊ ಉಜ್ವಾಡ್ ಲಾಕಾ೦ನಿ ಗುಣ್ಸಿಲ್ಲ್ಯಾಪರಿ೦ ಚಡ್ಲೊ ಆನಿ ಭಿರಾ೦ಕುಳ್ ಉಜ್ಯಾಚೊ ಗೋಲ್ ಜಾವ್ನ್ ಫಾಸಾಳ್ಳೊ.

ದೋನ್ ಕ್ಶಣಾ೦ ಉಪ್ರಾ೦ತ್ ತಾ೦ಕಾ೦ ಸ್ಫೋಟನ್ ಆಯ್ಕಾಲೆ೦!

ಪ್ರೆಸ್ಸಾಚ್ಯಾ ಬುನ್ಯಾದಿಚಿ ಖುರು ಪರ್‍ಯಾ೦ತ್ ಉರ್‍ಲಿ ನಾ.

ಆತಾ೦ ವಿಕ್ಟರಾನ್ ಟೊನಿಕ್ ಪಳೆಲೆ೦.

"ಅರ್‍ಥ್ ಸಾದೊಚ್ಚ್, ಟೊನಿ!" ತೊ ಮ್ಹಣಾಲೊ ಶಾ೦ತ್ ತಾಳ್ಯಾನ್. "ತು೦ ಸಲ್ವಾಲೊಯ್!"

...ಮುಂದರ್‍ಸಿಲಾಂ...

Tags: Edwin JF Dsouza, Konkani Novel, Vasu Valencia, Konkani, Konkani, Mangalore, Mangalorean, Mother Tongue

From around the world

"ಹಾಂವ್ ಜಿಯೆತಾಂ" - ಕೀರ್

2 Comment/s.

Post your comments

ಧಾ೦ವ್ ವಿಕ್ಟರ್, ಧಾ೦ವ್!

ಸ್ವಾರ್ಥ್, ರೂಣ್ ಆನಿ ದಾವೊ

ಗುಪಿತ್ ವರ್‍ಸಾ೦

ಜಿವೊ ಮನಿಸ್

ತ್ರಿಕೋನ್

ತ್ರಾಸಿಚಿ೦ ಭುಜಾ೦

ಪೃಥ್ವಿಚೊ ಪುತ್ರ್

ವೆಭಿಚಾರಿ-ವೆಭಿಚಾರಿಣ್

ಜುದಾಸ್!

ಮನಿಸ್

ರೆಕಾದ್

ಕರ್‍ನಿ

ಝುಜಾ-ಥಳ್

ಮಿಸ್ಟರ್ ವಿಕ್ಟರ್

ಆಮಾಸ್

"ಸಾಧಿ ಚಲಿ"

ಕೀರ್

ಜಿಣಿಯೆಚೆ೦ ಭುರ್‍ಜ್

Connect

Our Address
Mangalore

Our Address
Udupi

Our Address
Dubai