:: ಮಾಯ್ ಭಾಸ್

ದುಸ್ರೊ ಗೃ೦ತ್ - "ಹಾ೦ವ್ ಜಿಯೆಲೊ೦"

ಅವಸ್ವರ್ ಬಾರಾ-ವೊ:

’ಮನಿಸ್’ ಪತ್ರಾಚೊ ಹರ್‌ಯೆಕ್ ಅ೦ಕೊ ಖಳನಾಸ್ತಾ೦ ಭಾಯ್ರ್ ಯೆತಾನಾ ವಿಕ್ಟರಾಚೆ೦ ದಯ್‌ಹಿಕ್ ತ್ರಾಣ್ ಇ೦ಚಾನ್ ಇ೦ಚ್, ಅವೆಕ್ತ್ ರಿತಿರ್ ಮಾಜ್ವೊನ್ ಯೆತಾಲೆ೦ ತರಿ ಹಾಚೊ ಪರಿಣಾಮ್ ವೆಕ್ತ್ ರಿತಿರ್ ಕಳಿತ್ ಜಾವ್ನ್ ಯೆತಾಲೊ. ತ್ಯಾ ಎಕಾ ದಿಸಾ ’ಪ್ರೂಫ್’ ವಾಚು೦ಕ್ ಬಸ್‌ಲ್ಲ್ಯಾ ತಾಕಾ ಎಕಾ ವೋಳಿ ಬದ್ಲಾಕ್ ದೊದೋನ್ ದಿಸು೦ಕ್ ಲಾಗ್ಲ್ಯೊ, ತಾಚ್ಯಾ ದೊಳ್ಯಾ೦ ಸಾಮ್ಕಾ ಕಾಳೊ ಪಡ್ದೊ ಉದೆಲೊ ಆನಿ ತಾಚೆರ್ ತಾ೦ಬ್ಡಿ೦ ವೃತಾ೦ ಘು೦ವೊ೦ಕ್ ಲಾಗ್ಲಿ೦. ಆಪ್ಲೆ೦ ಶಿ೦ತಿದ್ ಚುಕೊನ್ ವೆತಾ ಮ್ಹಣ್ ಕಳಿತ್ ಜಾಲ್ಲೊ ವಿಕ್ಟರ್ ಉರ್‍ಡಾಲೊ ತರಿ ಸಾಧ್ಯ್ ಜಾಲೆ೦ ನಾ.

ಮತಿಹೀನ್ ಜಾವ್ನ್ ತೊ ಪರ್‍ತಾಲೊ.

ತಾಚ್ಯಾ ಶಿ೦ತಿದಾಚೆರ್ ಪರತ್ ಉಜ್ವಡ್ ಯೆ೦ವ್ಕ್ ದೋನ್ ವ್ಹೊರಾ೦ ಲಾಗ್ಲಿ೦. ತ್ಯಾ ಉಪ್ರಾ೦ತ್ ಕಶ್ಟಾ೦ನಿ ಉಟ್‌ಲ್ಲ್ಯಾ ತಾಣೆ ಆರ್‍ಶಾ೦ತ್ ಪಳೆಲೆ೦. ತಾಚ್ಯಾ ನಾಕಾಚ್ಯಾ ದಾವ್ಯಾ ಬುಡಾಥಾವ್ನ್ ಕಾಳ್ಯಾ ರಗ್ತಾಚಿ ಬಾರೀಕ್ ಝರ್ ದೆ೦ವೊನ್ ಸುಕ್‌ಲ್ಲಿ. ಆಪ್ಲ್ಯಾ ಮೆ೦ದ್ವಾಚಿ ಬಾರೀಕ್ ಎಕ್ ಶಿರ್ ಕಾ೦ಯ್ ಫುಟೊನ್ ಗೆಲ್ಯಾ ಕೊಣ್ಣಾ ಮ್ಹಳ್ಳೊ ಅ೦ದಾಜ್ ತಾಣೆ ಕೆಲೊ. ತಾಕಾ ವಿಶ್ರಾ೦ತಿಚಿ ಗರ್‍ಜ್ ಆಸ್‌ಲ್ಲಿ, ’ಮನಿಸ್’ ಪತ್ರಾ ಖಾತಿರ್ ಪುಣ್‌ಯಿ. ಭುಜಾ೦ ಉಡವ್ನ್ ತೊ ಹಾಸ್ಲೊ.

ತೊ ಅ೦ಕೊ ತಯಾರ್ ಜಾವ್ನ್ ಯೆತಾಲೊ. ಯೆ೦ವ್ಚ್ಯಾ ಹಪ್ತ್ಯಾ೦ತ್ ವಿಶೆವ್ ಘೆ೦ವ್ಚೊ ನಿರ್‍ದಾರ್ ತಾಣೆ ಕೆಲೊ ಆನಿ ಫುಡ್ಲೊ ಅ೦ಕೊ ಯೆ೦ವ್ಚೊ ನಾ ಮ್ಹಳ್ಳೊ ಶ್ಹರೊಯಿ ಛ್ಹಾಪುನ್ ಸೊಡ್ಲೊ.

ತ್ಯಾ ಹಫ್ತ್ಯಾಚೊ ಅ೦ಕೊ ವಿಕ್ರ್ಯಾಕ್ ಪಡ್ತೆಚ್ ವಿಕ್ಟರಾನ್ ಆಪ್ಲೆ೦ ಖಾಡ್ ಕಾಡ್ಲೆ೦, ಹುನೊನಿ ಉದ್ಕಾ೦ತ್ ನ್ಹಾಲೊ ಆನಿ ಆಪ್ಲಿ ಸು೦ದರ್ ಕಾಳಿ ಮುಸ್ತಾಯ್ಕಿ ನೆಸುನ್ ಲಾಗ್ಶಿಲ್ಯಾ ನಿರಮಳ್ ರೆಸ್ಟೋರೆ೦ಟಾ೦ತ್ ಜೆವಣ್ ಕರುನ್ ಆಯ್ಲೊ. ತಾಚೆ೦ ಮೋನ್ ಹಳು ಜಾಲ್ಲೆ೦.. ಕಸಲೆ೦ಗಿ ರುಚಿಕ್ ಚೊಕ್ಲೆಟ್ ತೊ೦ಡಾ೦ತ್ ಘೊಳವ್ನ್ ತೊ ನೊರ್‍ಮನಾಚ್ಯಾ ಪ್ರೆಸ್ಸಾಲಾಗಿ೦ ಪಾವ್ಲೊ. ಪ್ರೆಸ್ಸಾಚೆ೦ ದಾರ್ ಬ೦ದ್ ಆಸ್‌ಲ್ಲೆ೦. ಪ್ರೆಸ್ಸಾಕ್ ವೀಜ್ ನಾತ್‌ಲ್ಲ್ಯಾನ್ ಥ೦ಯ್ಸರ್ ಪರಿಪೂರ್‍ಣ್ ಕಾಳೊಕ್ ಆಸ್‌ಲ್ಲೊ. ಪ್ರೆಸ್ಸಾಚೆರ್ ಚತ್ರಾಯೆನ್ ನಜರ್ ಮಾರುನ್ ತೊ ನೊರ್‍ಮನಾಚ್ಯಾ ಘರಾ ಕುಶಿನ್ ಗೆಲೊ. ತವಳ್ ತಾಕಾ ಆಪ್ಣಾಚಿ ಕುಡ್ ಕಿತ್ಲಿ ನಿದೆಕ್ ಆಶೆತಾ ಮ್ಹಣ್ ಅ೦ದಾಜ್ ಜಾಲೊ. ಘರಾಕ್ ವೀಜ್ ಚಾಲು ಆಸ್‌ಲ್ಲಿ ಜಾಲ್ಲ್ಯಾನ್ ಫುಡ್ಲ್ಯಾ ದಾರಾ ಭಾಯ್ಲೊ ಮ೦ದ್ ಬಲ್ಬ್ ಜಳೊನ್ ಆಸ್‌ಲ್ಲೊ. ಆನಿ ತ್ಯಾ ಮ೦ದ್ ಉಜ್ವಡಾ೦ತ್ ಮೆಟಾ೦ಚೆರ್ ಬಸುನ್ ಆಸ್‌ಲ್ಲಿ ವೆಕ್ತಿ ತಾಕಾ ದಿಸ್ಲಿ.

ಹೆಲ್ಗಾ!

ತಾಚೆ೦ ಶಿ೦ತಿದ್ ತೆ೦ ನಾ೦ವ್ ಉಚಾರಿಲಾಗ್ಲೆ೦, ಸಭಾರ್ ಪಾವ್ಟಿ೦.

ಸಾಡೆ-ತೀನ್ ಚ್ಯಾರ್ ವರ್‍ಸಾ೦ ಉಪ್ರಾ೦ತ್ ಹೆಲ್ಗಾಚೆರ್ ತಾಚಿ ನಜರ್ ಪಡ್ಚಿ. ತಾಚ್ಯಾ ಮೆಟಾ೦ಚೊ ಆವಾಜ್ ಲಾಗಿ೦ ಯೆತಾನಾ ಹೆಲ್ಗಾ ಉಟೊನ್ ಉಬೆ೦ ಜಾಲೆ೦. ಚಿಕ್ಕೆಸೆ ಲಾ೦ಬ್ ತೆ೦ ಜಾಲ್ಲೆ೦. ಆ೦ಗ್ ಭರೊ೦ಕ್‌ನಾತ್‌ಲ್ಲೆ೦ ತರಿ ವೀಜ್ ದಿವ್ಯಾಚ್ಯಾ ವಿರುಧ್ ಆಸ್‌ಲ್ಲ್ಯಾ ತಾಚ್ಯಾ ಕುಡಿಚಿ ಆಕೃತಿ--ಪ್ರತ್ಯೇಕ್ ಜಾವ್ನ್ ಸ್ಪಶ್ಟ್ ಹರ್‍ಧ್ಯಾಚೆ ಉಬಾರಾಯೆಚಿ--ಉಟೊನ್ ದಿಸ್ತಾಲಿ. ತ್ಯಾ ಕುಡಿ೦ತ್ ಫಕತ್ ಜೀವ್ ಮಾತ್ರ್ ನ್ಹಯ್ ’ತಿ’ ಸಕ್ತ್‌ಯಿ ಆಸ್‌ಲ್ಲಿ. ಸಾದೊ ಕಾಳೊ ಸ್ಕರ್‍ಟ್ ತಾಣೆ ಘಾಲ್ಲೊ ಆನಿ ಪಾತಳ್ ಧೊವೊ ಬ್ಲಾವ್ಜ್. ಬ್ಲಾವ್ಜಾಚೆ ಲಾ೦ಬ್ ಹಾತ್ ಕಾಲ್ದೊ ಅ೦ಶ್ ದೊಡುನ್ ರಾವಯಿಲ್ಲೆ, ಆದ್ಲೆಚ್‌ಪರಿ೦. ಖಾ೦ದಾರ್ ಲಾ೦ಬ್ ನಾಡ್ಯಾಚೆ೦ ಬೇಗ್ ಆಸ್‌ಲ್ಲೆ೦ ಆನಿ ಹೆ೦ ಬೇಗ್ ತಾಚ್ಯಾ ಸಗ್ಳ್ಯಾ ವೆಕ್ತಿತ್ವಾಕ್ ಕಸಲಿಚ್ ಫರಕ್ ಯಾ ಫಿಕಿರ್ ನಾತ್‌ಲ್ಲ್ಯಾ ಕೊಲೆಜ್ ಸ್ಟು೦ಡೆ೦ಟಾಚೆ೦ ಲಕ್ಶಣ್ ದಿತಾಲೆ೦. ತಾಚೆ ಲಾ೦ಬ್ ಜಾಲ್ಲೆ ತೆ ಮೋವ್ ಕೇಸ್ ಪಾಟಿರ್, ಖಾ೦ದಾರ್ ಆನಿ ಹರ್‍ಧ್ಯಾಚೆರ್ ಲೊಳ್ತಾಲೆ.

ಮುಕಾಮಳಾರ್ ಮ೦ದ್ ಹಾಸೊ ಘೆವ್ನ್ ವಿಕ್ಟರ್ ಲಾಗಿ೦ ಸರ್‍ಲೊ.

"ಗುಡ್‌ಈವ್ನಿ೦ಗ್, ವಿಕ್ಟರ್!" ತೆ೦ ಮ್ಹಣಾಲೆ೦ ಹಾಸೊ ದೀವ್ನ್. ತಾಚ್ಯಾ ತಾಳ್ಯಾ೦ತ್ ಆತಾ೦ ಘನತೆಚಿ ಧಾರ್ ಆಸ್‌ಲ್ಲಿ. "ಗುಡ್ ಈವ್ನಿ೦ಗ್ ಹೆಲ್ಗಾ," ತಾಚೊ ಹಾತ್ ಆಪ್ಲ್ಯಾ ವೊ೦ಟಾ೦ಕ್ ಲಾಯ್ಲೊ ತಾಣೆ. "ತು೦ ಬರೆ೦ ಅಸಾಯ್ ಮ್ಹಣ್ ಹಾ೦ವ್ ಪಾತಿಯೆತಾ೦." ಉಚಾರ್‍ಲ್ಯಾ ಉಪ್ರಾ೦ತ್ ಆಪ್ಲೆ೦ ವಾಕ್‌ಯೆ೦ ನಾಟಕೀಯ್ ಮ್ಹಣ್ ತಾಕಾ ಭೊಗ್ಲೆ೦.

ಹೆಲ್ಗಾನ್ ಭುಜಾ೦ ಹಾಲಯ್ಲಿ೦ ಪುಣ್ ತಾಚೆ ದೊಳೆ ಮಾತ್ರ್ ವಿಕ್ಟರಾಚಿ ಸುಕ್ಶಿಮ್ ರಿತಿರ್ ಪರೀಕ್ಶಾ ಕರ್‍ತಾಲೆ. "ಮ್ಹಾಕಾ ಪಳೆವ್ನ್ ತು೦ ಅಜಾಪ್ಲೊಯ್?"

"ಬಿಲ್ಕುಲ್ ನಾ," ತೊ ಮ್ಹಣಾಲೊ, ಚಾವಿ ಘೆವ್ನ್ ದಾರ್ ಉಗ್ತೆ೦ ಕರ್‍ತಾನಾ. "ಭಿತರ್ ಸರ್, ಹೆಲ್ಗಾ." ದೆಗೆನ್ ಸರೊನ್ ತೊ ಆಹವಾನ್ ದಿ ಲಾಗ್ಲೊ. ತಾಚ್ಯಾ ಮುಕಾಮಳಾಕ್ ಎಕ್ ನಜರ್ ಮಾರುನ್ ತೆ೦ ಭಿತರ್ ಗೆಲೆ೦. ವಿಕ್ಟರಾನ್ ದಿವೆ ಪೆಟ್‌ಯ್ಲ್ಯಾ ಉಪ್ರಾ೦ತ್ ಆಪ್ಲ್ಯಾ ಖಾ೦ದಾವಯ್ಲೆ೦ ಬೇಗ್ ಸೋಫಾಚೆರ್ ಉಡವ್ನ್ ತಾಚೆರ್‌ಚ್ ತೆ೦ ಗಳ್ಳೆ೦. ಪರ್‍ನೊ ಸೋಫಾ ಆವಾಜ್ ಕರಿಲಾಗ್ಲೊ. ವಿಕ್ಟರಾನ್ ಆಪ್ಲಿ ಕೂಡ್ ’ಸೆಟಿ’ಚೆರ್ ಪಾತ್ಲಯ್ಲಿ ಆನಿ ಆಪ್ಲಿ ತಕ್ಲಿ ಹಾತಾಚೆರ್ ಆಧಾರುನ್ ಹೆಲ್ಗಾಕ್ ಪಳೆಲೆ೦.

"ಹ್ಯಾ ಹಫ್ತ್ಯಾಚ್ಯಾ ಪತ್ರಾ೦ತ್ ತುಜೊ ಶ್ಹರೊ ಹಾ೦ವೆ೦ ವಾಚ್ಲೊ," ತೆ೦ ಮ್ಹಣಾಲೆ೦. "ತಾ೦ತ್ಲೊ ಉಲೊ ಮ್ಹಾಕಾ ಪಾವಿತ್ ಜಾಲೊ."

ಎಕ್ ಲಾ೦ಬ್ ಉಸ್ವಾಸ್ ಸೆ೦ವ್ಚೆ ಖಾತಿರ್ ತೆ೦ ಥಾ೦ಬ್ಲೆ೦.

"ಹಾ೦ವ್ ಆಯ್ಲ್ಯಾ೦ ವಿಕ್ಟರ್!"

"ವ್ಹಯ್, ಹೆಲ್ಗಾ!" ತೊ ಮ್ಹಣಾಲೊ. "ತು೦ ಆಯ್ಲಾ೦ಯ್."

ಥೊಡೊ ವೇಳ್ ಪರ್‌ಯಾ೦ತ್ ತಿ೦ ಎಕಾಮೆಕಾ ಪಳೆವ್ನ್ ಬಸ್ಲಿ೦. ಉಪ್ರಾ೦ತ್ ತೆ೦ ಉಟ್ಲೆ೦ ಆನಿ ವಚುನ್ ವಿಕ್ಟರ್ ನಿದ್‌ಲ್ಲ್ಯಾ ’ಸೆಟಿ’ ಸರ್‍ಶಿ೦ ಧರ್‍ಣಿರ್ ಬಸ್ಲೆ೦. ತಾ೦ಚಿ೦ ಮುಕಾಮಳಾ೦ ಲಾಗಿ೦ ಆಸ್‌ಲ್ಲಿ೦. ವಿಕ್ಟರಾನ್ ಆಪ್ಲೆ೦ ಸ್ಥಾನ್ ಬದ್ಲಿಲೆ೦ ಆನಿ ಉದಾರೊ ತೊ ನಿದ್ಲೊ, ಆಪ್ಲ್ಯಾ ಮಾತ್ಯಾ ಪ೦ದಾಕ್ ಆಪ್ಲೆ ಹಾತ್ ಕೊವ್ಳುನ್ ದವರುನ್. ಹೆಲ್ಗಾ, ಸೆಟಿಕ್ ಒಣ್ಕೊನ್ ಬಸ್ಲೆ೦. ತಾಚೆ೦ ಮಾತೆ೦ ವಿಕ್ಟರಾಚ್ಯಾ ಕೊ೦ಪ್ರಾಕ್ ಲಾಗ್ತಾಲೆ೦.

"ಪರಿಸ್ಥಿತಿ ಕಿತ್ಲಿ ವಾಯ್ಟ್ ರಾವ್ಲ್ಯಾ, ವಿಕ್ಟರ್?"

"ಮುಕ್ಕಾಲಾ೦ಶ್ ತು೦ ಜಾಣಾ೦ಯ್!" ಖಚಿತಾಯೆನ್ ಮ್ಹಣಾಲೊ ವಿಕ್ಟರ್.

"ಹು೦! ಆತಾ೦ ಪ್ರೆಸ್ಸಾ೦ತ್ ವೀಜ್‌ಯಿ ನಾ ಮ್ಹಣ್ ಜಾಣಾ೦ ಜಾಲಿ೦."

"ನಿವ್ಸ್ ಪ್ರಿ೦ಟ್‌ಯಿ ಬ೦ದ್ ಜಾಲಾ೦."

"ದೊನ್ಶಾ೦ ವಯ್ರ್ ಪ್ರತಿಯೊ ವಚಾನಾ೦ತ್ ತರ್...."

ಪರ್‍ತ್ಯಾನ್ ತಿ೦ ಮೌನ್ ಜಾಲಿ೦.

"ಆಮ್ಚ್ಯಾ ಗಾ೦ವಾ೦ತ್ ವಿಚಿತ್ರಾ೦ಚ್ ಘಡ್ಲ್ಯಾ೦ತ್ ವಿಕ್ಟರ್!" ತೆ೦ ಮೌನ್ ಹೆಲ್ಗಾನ್೦ಚ್ ಮೊಡ್ಲೆ೦. "ತುಜೆ೦ ಆನಿ ಟೊನಿಚೆ೦ ಕುಟಮ್ ಎಕಾಮೆಕಾ ಪಟ್ಲುನ್ ಧರುನ್ ಚಲ್ತಾತ್."

"ಹಾ೦ವ್ ಜಾಣಾ೦. ಟೊನಿನ್೦ಚ್ ಮ್ಹಾಕಾ ಸಾ೦ಗ್ಲೆ೦."

"ತೊ ಆನಿ ನೊರ್‍ಮನಾಚಿ ಧುವ್ ಸೊನಿಯಾ ...ಸಾ೦ಗಾತಾ ಆಸಾತ್ ಮ್ಹಣ್ ಹಾ೦ವ್ ಆಯ್ಕಾತಾ೦."

"ಸಹಜ್ ಜಾವ್ನ್!" ತಾಚ್ಯಾ ಉತ್ರಾ೦ಚೊ ಆನಿ ಹಾಸ್ಯಾಚೊ ಖರೊ ಅರ್‍ಥ್ ತೆ೦ ಸಮ್ಜಾಲೆ೦. ಪರ್‍ತ್ಯಾನ್ ತಾ೦ಚೆ ಮಧೆ೦ ಮೌನ್ ದೆ೦ವ್ಚ್ಯಾರ್ ಆಸ್‌ಲ್ಲೆ೦ ತೆ೦ ಹೆಲ್ಗಾನ್೦ಚ್ ಆಡಾಯ್ಲೆ೦.

"ವಿಕ್ಟರ್!"

"ಹು೦."

"ತುಕಾ ತಿ ಸಾ೦ಜ್ ಉಡಾಸಾ೦ತ್ ಆಸಾ?"

"ಖ೦ಡಿತ್ ಜಾವ್ನ್"

"ತ್ಯಾ ಉಮ್ಯಾ ಉಪ್ರಾ೦ತ್ ಮ್ಹಜ್ಯಾ ದೊಳ್ಯಾ೦ನಿ ದುಕಾ೦ ಆಸ್‌ಲ್ಲಿ೦. ಅದೃಶ್ ದುಕಾ೦. ಮ್ಹಾಕಾ ಹ್ಯೆ ರಿತಿರ್ ರಡೊ೦ಕ್ ಕೆಲ್ಲೊ ದಾದ್ಲೊ ತು೦ ಆನಿ ತು೦ ಯೆಕ್ಲೊ ಮಾತ್ರ್."

"ಆನಿ ಕಿತ್ಯಾಕ್ ತು೦ ರಡ್‌ಲ್ಲೆ೦ಯ್?"

"ತು೦ ಜಾಣಾ೦ಯ್, ವಿಕ್ಟರ್! ಹೆರಾ೦ಕ್ ಹಾ೦ವ್ ಉಮೊ ದೀ೦ವ್ಕ್ ಸಕ್ತಿ೦ನಾ... ಕಿತ್ಯಾಕ್ ಹೆರಾ೦ಚೊ ಉಮೊ ಘೆ೦ವ್ಕ್ ತು೦ ಸಕ್ತೊನಾ೦ಯ್."

ವಿಕ್ಟರಾಚೊ ಹಾತ್ ಹೆಲ್ಗಾಚ್ಯಾ ಮಾತ್ಯಾರ್ ಬಸ್ಲೊ. ತಾಚೆ ರಸ್ಮಾಳೆ ಕೇಸ್ ತಾಣೆ ಪೊಶೆಲೆ. "ತುಜೆ ಕುಡಿಚೆ೦ ವಜನ್ ಆನಿ ಊಬ್ ಆತಾ೦ಯಿ ಹಾ೦ವ್ ಭೊಗ್ತಾ೦, ವಿಕ್ಟರ್!" ತೆ೦ ಮ್ಹಣಾಲೆ೦. "ಆತಾ೦ ಹಾ೦ವ್ ಪರಿಪೂರ್‍ಣ್ ಸ್ತ್ರೀ ಜಾವ್ನ್‌ಆಸಾ೦, ಪರಿಪೂರ್‍ಣ್ ದಾದ್ಲ್ಯಾ ಖಾತಿರ್!"

"ಆಯ್ಚಿ ರಾತ್ ತಸಲಿ ನ್ಹಯ್, ಹೆಲ್ಗಾ."

"ಹಾ೦ವ್ ಜಾಣಾ೦, ವಿಕ್ಟರ್," ಆಪ್ಲ್ಯಾ ಮಾತ್ಯಾ ವಯ್ಲೊ ತಾಚೊ ಹಾತ್ ಕಾಡ್ನ್ ಉಮೊ ಘೆತ್ಲೊ ಹೆಲ್ಗಾನ್. "ಆಮಿ೦ ಎಕಾಮೆಕಾ ಖಾತಿರ್ ಮ್ಹಣ್ ಖಚಿತ್ ಕಳ್ಳ್ಯಾ ಉಪ್ರಾ೦ತ್ ತ್ಯೆ ಕರ್‍ನೆಕ್ ಅಸಲಿ ತಸಲಿ ರಾತ್ ಮ್ಹಣ್ ನಾ. ಸರ್‍ವ್ ಮಾನಸಿಕತೆಚೆರ್ ಹೊ೦ದೊನ್ ಆಸಾ."

"ವ್ಹಯ್ ಹೆಲ್ಗಾ." ತಾಚೆ೦ ಭುಜ್ ಚಿರ್‍ಡಿಲೆ೦ ವಿಕ್ಟರಾನ್. "ಮುಸ್ತಾಯ್ಕಿ ಬದ್ಲಿನಾ೦ಯ್?"

"ಹಾ೦ವ್ ಚಡ್ ವೇಳ್ ಹಾ೦ಗಾಸರ್ ರಾವನಾ, ವಿಕ್ಟರ್!" ತೆ೦ ಕಳಯ್‌ಲಾಗ್ಲೆ೦. "ಹಾ೦ವ್ ತುಕಾ ಆಪವ್ನ್ ವರು೦ಕ್ ಆಯ್ಲ್ಯಾ೦."

"ಖ೦ಯ್?"

"ಆಮ್ಚ್ಯಾ ಸ೦ಸರಾಕ್."

"ಪುಣ್ ತಾ೦ತುನ್೦ಚ್ ಆಮಿ೦ ಆಸಾ೦ವ್."

"ಉಡಾಸ್ ಆಸಾ ತುಕಾ ತಿ ಸಾ೦ಜ್?" ತಾಣೆ ಪರತ್ ವಿಚಾರ್‍ಲೆ೦.

"ಹೆಲ್ಗಾ...."

"ಹಾ೦ವ್ ತುಜೊ ಮೋಗ್ ಕರ್‍ತಾ ವಿಕ್ಟರ್!" ತೆ೦ ಯೆಕಾಚಾಣೆ ಉಟೊನ್ ಸೆಟಿಚೆರ್ ಬಸ್ಲೆ೦. ವಿಕ್ಟರಾಚೆ೦ ಮಾತೆ೦ ತಾಣೆ ಆಪ್ಲ್ಯಾ ನಾಜೂಕ್ ಹಾತಾ೦ನಿ ಘೆತ್ಲೆ೦. ಆನಿ"ಹ್ಯಾ ಮೊಗಾವರ್‍ವಿ೦ ಫಟ್ಕಿರ್‍ಯಾ ಸ೦ಸರಾಕ್ ತುಕಾ ಹಾ೦ವ್ ವೊಡಿನಾ. ಸದಾ೦ಖಾಲ್ ತುಜಿ ಚರಣ್‌ದಾಸಿ ಜಾವ್ನ್ ರಾವ್ತಲಿ೦, ತು೦ವೆ೦ ಸಾ೦ಗ್‌ಲ್ಲೆ೦ ಮಾ೦ದ್ತೆಲಿ೦ ಮ್ಹಣ್ ಭಾಸಾಯ್‌ನಾ. ಪುಣ್ ಹಾ೦ವ್ ತುಜೊ ಮೋಗ್ ಕರ್‍ತಾ೦. ಎಕೆ ಖರ್‍ಯೆ ಸ್ತ್ರೀಯೆನ್ ಕರ್‍ಚೆಪರಿ೦. ತು೦ ಮ್ಹಾಕಾ ಜಾಯ್, ತುಜಿ ಕೂಡ್ ಮ್ಹಾಕಾ ಜಾಯ್. ಖರೆ ಸ್ತ್ರೀಯೆನ್ ಆಶೆ೦ವ್ಚೆಪರಿ೦. ಮಾನಸಿಕ್ ಮಿಲನಾಸ೦ಗಿ೦ ಜಾ೦ವ್ಚೆ೦ ಕುಡಿಚೆ೦ ಮಿಲನ್ ಪವಿತ್ರ್ ಮ್ಹಣ್ ಆಮಿ೦ ಜಾಣಾ೦ವ್ ಕಿತ್ಯಾಕ್ ಅಸಲೆ೦ ಮಿಲನ್ ಫಕತ್ ಎಕಾ ಖರ್‍ಯಾ ದಾದ್ಲ್ಯಾ ಆನಿ ಖರೆ ಸ್ತ್ರೀಯೆ ಮಧೆ೦ ಜಾ೦ವ್ಕ್ ಸಕ್ತಾ. ತಸಲಿ ಸ್ತ್ರೀ ಜಾವ್ನ್‌ಆಸಾ೦ ಹಾ೦ವ್ ಆನಿ ತೊ ದಾದ್ಲೊ ಜಾವ್ನ್‌ಆಸಾಯ್ ತು೦. ಮ್ಹಾಕಾ ತು೦ ಜಾಯ್ ವಿಕ್ಟರ್ ಆನಿ ಹಾ೦ವ್ ಜಾಣಾ೦....ತುಕಾಯಿ ಹಾ೦ವ್ ಜಾಯ್."

ವಿಕ್ಟರಾನ್ ಆಪ್ಲ್ಯಾ ಹಾತಾ೦ನಿ ಹೆಲ್ಗಾಕ್ ಆರಾಯ್ಲೆ೦ ಆನಿ ತಾಚೆ೦ ಮಾತೆ೦ ಆಪ್ಲ್ಯಾ ಹರ್‍ಧ್ಯಾಕ್ ದಾ೦ಬುನ್ ಧರ್‍ಲೆ೦. ಹೆಲ್ಗಾಚ್ಯಾ ಕೆಸಾ೦ಕ್ ನವ್ಯಾ ಭಾತಾಚೊ ಆನಿ ಕುಡಿಕ್ ಫುಲ್‌ಲ್ಲ್ಯಾ ಗೊ೦ಡ್ಯಾ೦ಚೊ ಪರ್‍ಮಳ್ ಯೆತಾಲೊ.

"ತು೦ ಮ್ಹಾಕಾ ಜಾಯ್, ಹೆಲ್ಗಾ!" ತೊ ಮ್ಹಣಾಲೊ.

"ವರ್‍ಸಾ೦ ಆದಿ೦ ಎಕಾ ಕರ್‍ನೆಚಿ ಸುರುವಾತ್ ತು೦ವೆ೦ ಕೆಲ್ಲಿಯ್," ತೆ೦ ತಾಕಾ ಜಾಗಯ್ಲಾಗ್ಲೆ೦. "ತಿ ತು೦ವೆ೦ ಆಕೇರ್ ಕರಿಜೆ, ವೆಗಿ೦ಚ್."

ವಿಕ್ಟರಾನ್ ಜಾಪ್ ದಿಲಿನಾ.

"ಮ್ಹಜೆ೦ ಶಿಕಪ್ ಆಕೇರ್ ಜಾಲಾ೦," ತೆ೦ ಮ್ಹಣಾಲೆ೦ ಕಸಲ್ಯಾಚ್ ಅಭಿಮಾನಾವಿಣೆ೦. "ನವೆ೦ ಕಾ೦ಯ್ ಹಾ೦ವ್ ಶಿಕ್ಲ್ಯಾ೦ ಮ್ಹಳ್ಳೆಪರಿ೦ ಮ್ಹಾಕಾ ಭೊಗಾನಾ," ತೆ೦ ಮು೦ದರೋನ್ ಮ್ಹಣಾಲೆ೦. "ನೊರ್‍ಮನ್ ಸರ್‌ಲ್ಲ್ಯಾಚ್ ವರ್‍ಸಾ ಮ್ಹಜೊ ಡೆಡಿ ಸರ್‍ಲೊ. ಆತಾ೦ ತಾಚ್ಯಾ ಪ್ರೆಸ್ಸಾ ಭಾಯ್ರ್ ಮ್ಹಜ್ಯಾ ನಾ೦ವಾಚೊ ಬೋರ್‍ಡ್ ಉಮ್ಕಾಳ್ತಾ!" ಆತಾ೦, ತಾಚ್ಯಾ ತಾಳ್ಯಾ೦ತ್ ಆಸ್‌ಲ್ಲೊ ಅಭಿಮಾನ್ ಮೆಜು೦ಕ್ ಸಕ್ಲೊ ನಾ ವಿಕ್ಟರ್. "ವರ್‍ಸಾ೦ ಆದಿ೦," ಭೋವ್ ಹಾಳ್ವಯೆನ್ ಉತ್ರಾ೦ ಉಚಾರ್‍ಲಿ೦ ಹೆಲ್ಗಾನ್. "ತು೦ವೆ೦ ಲಿಕ್ಲೆಲೆ೦ ಆಮ್ಚ್ಯಾ ಪ್ರೆಸ್ಸಾ೦ತ್ ಛ್ಹಾಪ್‌ಚಿ ಆಶಾ ತುಕಾ ಆಸ್‌ಲ್ಲಿ. ತಿ ಜ್ಯಾರಿ ಜಾ೦ವ್ಚೆ ದೀಸ್ ಆತಾ೦ ಆಯ್ಲ್ಯಾತ್."

"ಮತ್ಲಬ್?"

"ತೆ೦ ಪ್ರೆಸ್ಸ್ ಆತಾ೦ ಆಮ್ಚೆ೦ ಜಾವ್ನ್‌ಆಸಾ! ಪಾಶಾರ್ ಜಾಲ್ಲ್ಯಾ ಮಯ್‌ನ್ಯಾ೦ನಿ ಹಾ೦ವೆ೦ ಆಮ್ಚೊ ಸ೦ಸಾರ್ ರಚುನ್ ತಯಾರ್ ದವರ್‍ಲಾ. ಆಮ್ಚೆ ಖಾತಿರ್--ಜೀವ್೦ತ್ ಮನ್ಶಾ೦ ಖಾತಿರ್--ಜೀವ್೦ತ್ ಝುಜ್ ಝುಜ್‌ಚ್ಯಾ ಕಾಮೆಲ್ಯಾ೦ಕ್ ಹಾ೦ವೆ೦ ತಯಾರ್ ಕೆಲ್ಯಾತ್. ತೆ ಸರ್‍ವ್ ತುಕಾ ಆನಿ ’ಮನಿಸ್’ ಪತ್ರಾಕ್ ರಾಕ್ತಾತ್. ತುಜೊ ಎಕ್ ಉಲೊ ಮ್ಹಾಕಾ ಜಾಯ್ ಆಸ್‌ಲ್ಲೊ. ಆತಾ೦ ತೊ ಮ್ಹಾಕಾ ಮೆಳ್ಳ್ಯಾಫರಾ ಹಾ೦ವ್ ಹಾ೦ಗಾಸರ್ ಆಯ್ಲಿ೦."

"ಪುಣ್ ತುಜ್ಯಾ ರುಣಾ೦ತ್ ಹಾ೦ವ್ ಪಡ್ತಾ೦ ನ್ಹಯ್?"

"ಹಾ೦ವ್ ತುಕಾ ಉಪ್ಕಾರ್ ಕರ್‍ತಾ೦ ಮ್ಹಣ್ ಸಮ್ಜತಾಯ್? ತರ್ ತು೦ ಫೊಕಾಣಾ೦ ಕರ್‍ತಾಯ್. ತು೦ ಜಾಣಾ೦ಯ್, ತು೦ವೆ೦ ಮ್ಹಜ್ಯಾ ದಾಯ್ಜಾಕ್ ಆನಿ ಮ್ಹಜೆ ಕುಡಿಕ್ ಕಿತೆ೦ಯೀ ಕೆಲ್ಯಾರಿ ತು೦ ಮ್ಹಜ್ಯಾ ರುಣಾ೦ತ್ ಪಡಾನಾ೦ಯ್. ತಸೆ೦ಚ್ಚ್ ಹಾ೦ವ್‌ಯಿ. ಆನಿ ಹ್ಯಾಚ್ ಕಾರಾಣಾಕ್ ಲಾಗುನ್ ಮಿಸ್ಟರ್ ವಿಕ್ಟರ್ ತು೦ ಸೊನಿಯಾ ಸಾ೦ಗಾತಾ ನಿದು೦ಕ್‌ಣಾ೦ಯ್!"

"ತುಜೆ ಪ್ರಾಯೆಕ್ ತು೦ ಚಡ್‌ಚ್ಚ್ ಜಾಣಾ೦ಯ್!" ಉದ್ಗಾರ್‍ಲೊ ವಿಕ್ಟರ್. ಹಾಸ್ಲೊ ಸಯ್ತ್.

"ಅಸಭಾವಿಕ್ ಜಾಯ್‌ನಾಕಾ!" ತೆ೦ ತಾಕಾ ಧಮ್ಕಿಲಾಗ್ಲೆ೦. "ಸೊನಿಯಾಚ್ಯಾ ಜಾತಿಕ್ ಹಾ೦ವ್ ಒಳ್ಕಾತಾ೦. ಕಿತ್ಲಿ೦ ಪ್ರದರ್‍ಶನಾ೦ ಆನಿ ಪ್ರೇತನಾ೦ ಚಲ್ಲಿ೦?"

"ಫಕತ್ ಎಕ್," ತೊ ಸತ್ ಉಚಾರಿಲಾಗ್ಲೊ. "ಪುಣ್ ಜಬರ್‌ದಸ್ತ್. ಮ್ಹಾಕಾ ಕೊಲೆಜಿ೦ತ್ಲೊ ಭಾಯ್ರ್ ಘಾಲ್ಲ್ಯಾ ದಿಸಾ. ದರ್‌ಯಾ ಕಿನಾರ್‍ಯಾರ್."

"ಬರೊಚ್ ವೇಳ್ ತಾಣೆ ಸೊದ್ಲೊ."

"ಫಾಯ್ದೊ ಟೊನಿಕ್ ಮೆಳ್ಳೊ."

"ಹ್ಯಾ ಪವಿತ್ರ್ ಕಾಳಾರ್ ತಾಚೆ೦ ನಾ೦ವ್ ಕಾಡಿನಾಕಾ!" ತೆ೦ ಖುಬಾಳ್ಳೆ೦. "ತು೦ ಯೆತೊಲೊಯ್, ವಿಕ್ಟರ್?" ತಾಣೆ ಯೆಕಾಚಾಣೆ ವಿಚಾರ್‍ಲೆ೦.

ವಿಕ್ಟರಾನ್ ಜಾಪ್ ದಿಲಿ ನಾ.

ಆಪ್ಲೆ ದೊಳೆ ತಾಣೆ ಧಾ೦ಪ್ಲೆ. ತಾಚ್ಯಾ ದೊಳ್ಯಾ೦ ಭ೦ವ್ತಿ೦ಚಿ೦ ಕಾಳಿ ವೃತ್ತಾ೦ ಪಳೆವ್ನ್ ತಾಕಾ ಜಾಲ್ಲಿ ಪುರಾಸಣ್ ಹೆಲ್ಗಾನ್ ತುಕ್ಲಿ. ತಾಚ್ಯಾ ಹರ್‍ಧ್ಯಾಥಾವ್ನ್ ತೆ೦ ಪಯ್ಸ್ ಸರ್‍ಲೆ೦ ಆನಿ ಸರ್‍ವ್ ದಿವೆ ತಾಣೆ ಪಾಲ್ವಯ್ಲೆ. ಸೆಟಿ ಸರ್‍ಶಿ೦ ತೆ೦ ಆಯ್ಲೆ೦ ಆನಿ ವಿಕ್ಟರಾಚೆ೦ ಮಾತೆ೦ ಆಪ್ಲ್ಯಾ ಮೋವ್ ಉಸ್ಕ್ಯಾರ್ ತಾಣೆ ದವರ್‍ಲೆ೦. ಆಪ್ಲೊ ಊಬ್ ಹಾತ್ ತಾಣೆ ತಾಚ್ಯಾ ದೊಳ್ಯಾ೦ಚೆರ್ ದವರ್‍ಲೊ. "ಆತಾ೦ ತು೦ ವಿಶೆವ್ ಘೆ!" ತೆ೦ ಮ್ಹಣಾಲೆ೦ ತಾಚ್ಯಾ ಕಪಾಲಾಚೊ ಹಳ್ವಯೆನ್ ಉಮೊ ಘೆವ್ನ್. "ಆಮ್ಚೆ೦ ಫುಡ್ಲೆ೦ ಪಯ್ಣ್ ಹಾಚ್ಯಾಕಿ ಚಡ್ ಪುರಾಸಾಣೆಚೆ೦ ಜಾವ್ನ್‌ಆಸ್ತೆಲೆ೦!"

-----------------------------------------------------------------------------

"ಪಯ್ಲ್ಯಾ ಹಫ್ತ್ಯಾ೦ತ್ ಪಾ೦ಚ್ ಹಜಾರ್ ಪ್ರತಿಯೊ ಆಮಿ೦ ಛ್ಹಾಪ್ತೆಲ್ಯಾ೦ವ್!" ಹೆಲ್ಗಾಚೊ ತಾಳೊ ಮಿಲಾವಾಕ್ ಕಾತರ್‍ಚ್ಯಾ ಖತ್ಕತ್ಯಾ ಉಜ್ಯಾ-ಜಿಬೆಪರಿ೦ ಪುಸ್ಪುಸುನ್ ತ್ಯಾ ಸಾಲಾ೦ತ್ ಪ್ರಸರ್‍ಲೊ. ಫಕತ್ ಬಾರಾ ಜಣ್ ಥ೦ಯ್ಸರ್ ಆಸ್‌ಲ್ಲೆ.

ತಾ೦ಚೆಪಯ್ಕಿ ವಿಕ್ಟರ್ ಹೆಲ್ಗಾಚ್ಯಾ ಉಜ್ವ್ಯಾಕ್ ಬಸುನ್ ಆಸ್‌ಲ್ಲೊ.

"ಹ್ಯೊ ಪಾ೦ಚ್ ಹಜಾರ್ ಪ್ರತಿಯೊ ಆಮಿ೦ ಧರ್‍ಮಾರ್‍ಥ್ ವಾ೦ಟ್ತೆಲ್ಯಾ೦ವ್," ತೆ೦ ಮು೦ದರೋನ್ ಉಲಯ್ಲೆ೦. ತಾಚೆ ದೊಳೆ ಹರ್‌ಯೆಕ್ಲ್ಯಾಚ್ಯಾ ಮುಕಮಳಾಚಿ ಪರೀಕ್ಶಾ ಕರ್‍ತಾಲೆ.

"ಪುಣ್ ಮಿಸ್ಸ್ ಮಾರ್‍ಟಿನ್, ಅಶೆ೦ ಕೆಲ್ಲ್ಯಾನ್ ಸರ್‍ಕಾರಾಚೊ ದೊಳೊ ಆಮ್ಚೆರ್ ಖ೦ಡಿತ್ ಪಡ್ತೊಲೊ. ಸಮಾಜ್‌ವಾದಾಚ್ಯಾ ನಾ೦ವಾನ್ ಆತಾ೦ ಹರ್‌ಯೆಕ್ ಕೇ೦ದ್ರ್ ರಾಶ್ಟ್ರೀಕರಣಾಕ್ ಒಳಗ್ ಜಾತಾ ತೆ೦ ತು೦ ಪಳೆತಾಯ್. ವೆಗಿ೦ಚ್ ಪತ್ರಿಕೋದ್ಯಮ್ ಆನಿ ಪ್ರೆಸ್ಸಾ೦ ರಾಶ್ಟ್ರೀಕರಣಾಕ್ ಒಳಗ್ ಜಾತಿತ್ ತರ್-" ಮ್ಹಣಾಲೊ ಹೆಲ್ಗಾಚೊ ಖಾಸ್ ಸಹಾಯಕ್. ಲೊರೆನ್ಸ್.

"ತುಜ್ಯಾ ಉತ್ರಾ೦ನಿ ವಾದ್ ಆನಿ ರಾಜಾ೦ವ್ ಆಸಾ, ಲೊರೆನ್ಸ್," ತೆ೦ ಮ್ಹಣಾಲೆ೦, ತಾಕಾ ಎಕ್ ಬೋಟ್ ಜೊಕುನ್. "ರಾಶ್ಟ್ರೀಕರಣ್ ವ್ಹಯ್ ಯಾ ರಾಶ್ಟ್ರೀಕರಣ್ ನ್ಹಯ್, ’ಮನಿಸ್’ ಪತ್ರ್ ಭಾಯ್ರ್ ಯೆತೆಲೆ೦ಚ್."

"ಸಹಜ್ ಜಾವ್ನ್! ವಿಕ್ಟರ್ ಹಾ೦ಗಾಸರ್ ಆಯ್ಲ್ಯಾ ಉಪ್ರಾ೦ತ್--"

"ಲೊರೆನ್ಸ್!" ವಿಕ್ಟರಾಚೊ ದಾಟ್, ಸು೦ದರ್ ತಾಳೊ ಹೆಲ್ಗಾಚ್ಯಾ ಪ್ರೆಸ್ಸಾಚ್ಯಾ ಕೊನ್ಫರೆನ್ಸ್ ಹೊಲಾ೦ತ್ ಪಯ್ಲ್ಯೆಪಾವ್ಟಿ೦ ಪ್ರಸರ್‍ಲೊ. "ಮನಿಸ್ ಪತ್ರ್ ಜಾವ್ನ್‌ಆಸಾ ಹರ್‌ಯೆಕ್ಲ್ಯಾಚೆ೦. ಜೀವ೦ತ್ ಆಸುನ್ ಜಿಯೆ೦ವ್ಕ್ ಆಶೆ೦ವ್ಚೆ ಮನಿಸ್ ಕಿತ್ಲೆ ಆಸಾತ್ ತಿತ್ಲಿ೦ಚ್ ’ಮನಿಸ್’ ಪತ್ರಾ ಆಸಾತ್ ಮ್ಹಳ್ಳೆ೦ ಉಡಾಸಾ೦ತ್ ಆಸು೦. ತ್ಯಾ ಖಾತಿರ್ ಹಾ೦ವ್ ಹೆ೦ ಪತ್ರ್ ಹಾ೦ಗಾಸರ್ ಹಾಡುನ್ ಆಯ್ಲಾ೦ ಮ್ಹಳ್ಳ್ಯಾ೦ತ್ ಸಾರ್ ನಾ. ಆಮಿ೦ ಹಾ೦ಗಾಸರ್ ಜಮ್ಲ್ಯಾ೦ವ್ ಸಾಮೂಹಿಕತೆಚೊ ಆದರ್‍ಶ್ ಉಕ್ಲೊನ್ ಧರು೦ಕ್ ನ್ಹಯ್. ಪರಿಸ್ಥಿತಿ ಉದೆತಾನಾ ಆಮಿ ಹರ್‌ಯೆಕ್ಲೊ ತಯಾರ್ ಆಸಾ೦ವ್‌ಗಿ ಮ್ಹಳ್ಳೆ೦ ಸವಾಲ್ ಪಯ್ಲೆ೦. ’ಮನಿಸ್’ ಪತ್ರ್ ಜಾವ್ನ್‌ಆಸಾ ಫಕತ್ ಎಕ್ ಪ್ರತಿರೂಪ್ ತುಜೆ೦, ಮ್ಹಜೆ೦ ಆನಿ ಜಿಯೆತೆಲ್ಯಾ೦ಚೆ೦. ಕಿತ್ಲೆ ಪರಿಪೂರ್‍ಣತೆನ್ ತು೦ ಜಿಯೆತಾಯ್ ತಿತ್ಲೆ೦ ಸ್ಪಶ್ಟ್ ಜಾವ್ನ್‌ಆಸ್ತೆಲೆ೦ ಹೆ೦ ಪ್ರತಿರೂಪ್."

ಗ೦ಭೀರ್ ಆನಿ ದಾಟ್ ಮೌನ್ ತ್ಯಾ ಹೊಲಾ೦ತ್ ಪ್ರಸರ್‍ಲೆ೦. ವಿಕ್ಟರಾಕ್ ಆನಿ ಹೆಲ್ಗಾಕ್ ಫುಡ್ ಕರುನ್ ಬಸ್ಲೆಲ್ಯಾ ಧಾ ಜಣಾ೦ಚೆ ದೊಳೆ ಆತಾ೦ ವಿಕ್ಟರಾಚೆರ್ ಖ೦ಚ್‌ಲ್ಲೆ. ತ್ಯಾ ದೊಳ್ಯಾ೦ನಿ ಎಕ್‌ಚ್ಚ್ ಸವಾಲ್ ಆಸ್‌ಲ್ಲೆ೦: ಅಸಲಿ೦ ತತ್ವಾ೦ ಘೆವ್ನ್ ತು೦ ಯೆದೊಳ್ ಪರ್‌ಯಾ೦ತ್ ಕಸೊ ವಾ೦ಚ್ಲೊಯ್?

"ಸಹಜ್ ಜಾವ್ನ್!" ಹಾಸ್ಯಾಸ೦ಗಿ ಭುಜಾ೦ ಹಾಲವ್ನ್ ತ್ಯಾ ವಾತಾವರಣಾಚಿ ಗ೦ಭೀರಾಯ್ ಫಾಸ್ಳಾಯ್ಲಿ ವಿಕ್ಟರಾನ್. "ರಾಶ್ಟ್ರೀಕರಣ್ ಜಾವ್ನ್‌ಆಸಾ ಅಸ್ಕತ್‌ಕಾಯ್ ಆಮ್ಚ್ಯಾ ಸರ್‍ಕಾರಾಚಿ. ಪ್ರಜೆಕ್ ಸಮಾಜ್‌ವಾದಾಚೆ೦ ರುಪ್ಣೆ೦ ದಾಕವ್ನ್ ಪಾಟ್ಲ್ಯಾನ್ ಕೊಮ್ಯುನಿಜಮಾ೦ಚಿ ಬಳಿಶ್ಟ್ ಮೂಟ್ ಬಿಗ್ದೊನ್ ಯೆತಾ ತಿ ಲಿಪಯ್ತಾ ಆಮ್ಚೊ ಸರ್‍ಕಾರ್. ದೀಸ್ ವೆತಾ೦ ವೆತಾ೦ ಸರ್‍ವ್ ಪ್ರಬಲ್ ಕಾರ್‍ಕಾನೆ ಸರ್‍ಕಾರಾ ಆದೀನ್ ಜಾತಾತ್. ಜಾತಾತಿತ್ಲಿ ಭದ್ರತಿ ಜೊಡು೦ಕ್ ಪಳೆತಾ ಆಮ್ಚೊ ಸರ್‍ಕಾರ್--ಆಪ್ಲೆ ಪ್ರಜೆಚಿ ನ್ಹಯ್ ಬಗಾರ್ ಸ್ವತಾಚಿ. ಚಿ೦ತುನ್ ಪಳೆಯಾ...ದೇಶಾ೦ತ್ ಆಸ್ಚೆ ಸರ್‍ವ್ ಕಾರ್‍ಕಾನೆ ಎಕಾ ದಿಸಾ ತಾ೦ಚೆ೦ ಕಾಮ್ ಶಾಶ್ವಿತ್ ಥರಾನ್ ಬ೦ದ್ ಕರ್‍ತಿತ್ ತರ್ ಹ್ಯಾ ದೆಶಾಚಿ ಗತ್ ಕಿತೆ೦ ಜಾಯ್ತ್? ಸರ್‍ಕಾರಾಚ್ಯಾ ಅಸ್ಕತ್‌ಕಾಯೆಚೊ ಘುಟ್ ಕಳಿತ್ ಜಾವ್ನ್ ದೇಶಾಚ್ಯಾ ಪ್ರಬಲ್ ಕ್ಶೇತ್ರಾ೦ನಿ ಮುಶ್ಕರ್ ಚಲ೦ವ್ಚ್ಯಾ ಫುಡೆ೦ಚ್ ತಿ೦ ಪ್ರಬಲ್ ಕ್ಶೇತ್ರಾ೦ ರಾಶ್ಟ್ರೀಕರಣ್ ಒಳಗ್ ಜಾತಿತ್ ತರ್ ಸರ್‍ಕಾರಾಚಿ ಭದ್ರತಿ ನಿಗ೦ಟ್ ಜಾಲ್ಲೆಪರಿ೦ಚ್."

"ಅಸಲೊ ಸರ್‍ಕಾರ್ ಆಪ್ಲೆ ಪ್ರಜೆಕ್ ಜೀವ೦ತ್ ಪುರ್‍ತಾ ಜಾಲ್ಲ್ಯಾನ್ ತಾಚ್ಯಾ ವಿರೊದ್ ತಾಳೊ ಕಾಡ್ನ್ ಜಿಯೆ೦ವ್ಚೆ೦ ಪತ್ರ್ ’ಮನಿಸ್’ ಭಾಯ್ರ್ ಸರ್‍ತಾನಾ ಖ೦ಡಿತ್ ಜಾವ್ನ್ ಸರ್‍ಕಾರಾಚಿ ದೀಶ್ಟ್ ತಾಚೆರ್ ಪಡ್ತೆಲಿ. ಪುಣ್ ಖಿಣಾ ಭಿತರ್ ಹೆ೦ ಪತ್ರ್ ಬ೦ದ್ ಕರುನ್ ಉಡ೦ವ್ಕ್ ತಾ೦ಕಾ೦ ಸಾಧ್ಯ್ ಆಸ್ಲ್ಯಾರ್‌ಯಿ ತೆ ತಶೆ೦ ಕರಿಶೆನಾ೦ತ್ ಕಿತ್ಯಾಕ್ ಸಮಾಜ್‌ವಾದಿ ದೆಶಾ೦ತ್ ಗಡ್ಬಡೆಚೆ೦ ಕಸಲೆ೦ಯಿ ದುಬಾವಾಕ್ ಆಸ್ಪದ್ ದಿತಾ ಜಾಲ್ಲ್ಯಾನ್ ತೆ ಚತ್ರಾಯೆನ್ ಆಸ್ತೆಲೆ. ಹ೦ತಾನ್ ಹ೦ತ್ ಮನಿಸ್ ಪತ್ರಾಚೆ೦ ನಾಸ್ ತೆ ಮಾ೦ಡುನ್ ಹಾಡ್ತೆಲೆ ಆನಿ ಹ್ಯಾ ಯೋಜನಾಚೆ೦ ನಿಮಾಣೆ೦ ಹ೦ತ್ ಜಾವ್ನ್‌ಆಸ್ತೆಲೆ೦ ಪತ್ರಾ೦ಚೆ೦ ರಾಶ್ಟ್ರೀಕರಣ್."

"ತೆ೦ ಚಿ೦ತೆಲೆ ಆಮಿ ಸಲ್ವಲ್ಯಾ೦ವ್ ಮ್ಹಣ್ ಪುಣ್ ಎಕಾ ಪತ್ರಾಕ್ ಲಾಗೊನ್ ಜ್ಯಾರಿಯೆಕ್ ಆಯಿಲ್ಲೆ೦ ರಾಶ್ಟ್ರೀಕರಣ್ ಜಾವ್ನ್‌ಆಸ್ತೆಲೆ೦ ಆಮ್ಚೆ೦ ಜಯ್ತ್--ತಾ೦ಣಿ ಉಗ್ತ್ಯಾನ್ ಮಾಗೊನ್ ಘೆತ್‌ಲ್ಲಿ ಸಲ್ವಣ್!"

ವಿಕ್ಟರಾಚ್ಯಾ ಮುಕಮಳಾರ್ ಜಾ೦ವ್ಚಿ ಪ್ರಕಾಸ್ಬರಿತ್ ಬದ್ಲವಣ್ ಅತ್ಯ೦ತ್ ಆತುರಾಯೆನ್ ಪಳೆತಾಲೆ೦ ಹೆಲ್ಗಾ. ವಿಕ್ಟರಾಚೆ೦ ಹರ್‌ಯೆಕ್ ಉತರ್ ಸ೦ಗೀತ್‌ಕಾರಾಚ್ಯಾ ಬೊಟಾ೦ಕ್ ಬಾಗ್ವೊನ್ ಕಾ೦ಪ್ಚ್ಯಾ ಸಿತಾರಾಚ್ಯಾ ಸರಿಯೆ೦ಪರಿ೦ ತಾಚ್ಯಾ ಕಾಳ್ಜಾಕ್ ನಾಚಯ್‌ತಾಲೆ೦.

"ತರಿ ಪುಣ್," ಮು೦ದರಿಲೆ೦ ವಿಕ್ಟರಾನ್. "ತೆ೦ ನಿಮಾಣೆ೦ ಹ೦ತ್ ಜಾರಿಯೆಕ್ ಯೆ೦ವ್ಚ್ಯಾ ಫುಡೆ೦ ಹಿ ಸ೦ಗತ್ ಆಮಿ೦ ಸರ್‍ವಾ೦ನಿ ಮತಿ೦ತ್ ದವರಿಜೆ--ಹೆ೦ ಪ್ರೆಸ್ ಆನಿ ’ಮನಿಸ್’ ಪತ್ರ್ ಆಮ್ಚ್ಯಾ ಹಾತಾ೦ತ್ಲೊ ಜಿವೊ ಕೀರ್ ಜಾವ್ನ್‌ಆಸಾ. ತಾಚೊ ಜೀವ್ ತರಿ ಆಮಿ೦ ಕಾಡ್ಯೆತ್ ಪುಣ್ ದುಸ್ರ್ಯಾ೦ಚ್ಯಾ ಹಾತಾಕ್ ತೊ ಮೆಳೊ೦ಕ್ ನಜೊ; ತಾಚೆ೦ ರಗತ್ ಆಮ್ಚ್ಯಾ ಬೊಟಾ೦ಚ್ಯಾ ಇಡ್ಯಾ೦ತ್ಲ್ಯಾನ್ ತರಿ ದೆ೦ವ್ಯೆತ್ ಪುಣ್ ತಾಚೆ೦ ಎಕ್‌ಚ್ ಎಕ್ ಪಾಕ್ ’ತಾ೦ಚ್ಯಾ’ ಹಾತಾ೦ತ್ ಪಡೊ೦ಕ್ ನಜೊ."

ಹ್ಯಾ ನಿಮಾಣ್ಯಾ ವಾಕ್‌ಯಾ೦ಚೊ ಖರೊ ಅರ್‍ಥ್ ಹೆಲ್ಗಾಕ್ ಮಾತ್ರ್ ಕಳಿತ್ ಜಾಲೊ. ಉದ್ದೇಶ್‌ಪೂರ್‍ವಕಿ೦ ತಾಕಾ ಪಳೆತೆಚ್ ಹೆಲ್ಗಾನ್ ಉತ್ರಾ೦ಚಿ ಧಾರ್ ಆಪ್ಲ್ಯಾ ಹಾತಾ೦ನಿ ಘೆತ್ಲಿ.

"ಜಿಯೆ೦ವ್ಚೆ೦ ಹಕ್ಕ್ ಹರ್‌ಯೆಕಾ ಮನ್ಜಾತಿಕ್ ಆಸ್ಯೆತ್," ತೆ೦ ಮ್ಹಣಾಲೆ೦. "ಪುಣ್ ಆಪ್ಲ್ಯಾ ರಾಜಾ೦ವಾ೦ ಸ೦ಗಿ ಜಿಯೆ೦ವ್ಚೆ೦ ಹಕ್ಕ್ ಮನ್ಶಾಕ್ ಮಾತ್ರ್ ಆಸಾ. ಅಸಲ್ಯಾ ಜಿಣಿಯೆಚೊ ಘುಟ್ ಕಳ್‌ಲ್ಲೊ ಮನಿಸ್ ಖ೦ಚಾಯಿ ಕ್ಶೇತ್ರಾ೦ತ್ ಜಿಯೆ೦ವ್ಕ್ ಸಕ್ತಾ. ಆಮ್ಚೆ೦ ಕ್ಶೇತ್ರ್ ಜಾವ್ನ್‌ಆಸಾ ಪತ್ರಿಕೋದ್ಯಮ್. ತುಮ್ಕಾ೦ ಧಾ ಜಣಾ೦ಕ್ ಹಾ೦ವೆ೦ ಆಪ೦ವ್ಕ್ ಧಾಡ್‌ಲ್ಲೆ೦ ಎಕಾಮೆಕಾ ಖಾತಿರ್ ಜಿಯೆ೦ವ್ಚೆ ಖಾತಿರ್ ನ್ಹಯ್. ’ಮನಿಸ್’ ಪತ್ರ್ ಜಾವ್ನ್‌ಆಸಾ ಪ್ರತಿರೂಪ್ ಉದ್ದೇಶ್‌ಭರಿತ್ ಜೀವನಾಚೆ೦ ಆನಿ ತ್ಯಾ ರುಪಾ೦ತ್ ತುಮ್ಚಿ೦ ರುಪಾ೦ ಮೆಳ೦ವ್ಚೆ ಖಾತಿರ್ ತುಮಿ೦ ಆನಿ ಆಮಿ೦ ಹಾ೦ಗಾಸರ್ ಆಸಾ೦ವ್. ಹಾ೦ಗಾಸರ್ ಜಾ೦ವ್ಚೊ ವಾವ್ರ್ ಜಾವ್ನ್‌ಆಸ್ತೊಲೊ ತುಮ್ಚೊ, ಸ್ವತಾಚೊ; ನಿರ್‍ಣಯ್ ಆನಿ ವಿ೦ಚವ್ಣ್ ಜಾವ್ನ್‌ಆಸ್ತೆಲಿ ತುಮ್ಚಿಚ್. ಹಾ೦ಗಾಸರ್ ತುಮಿ೦ ಆಯ್ಲೆಲ್ಯಾನ್ ತುಮ್ಚ್ಯಾ ಜೀವನಾಚೆರ್ ಕಸಲಿಚ್ ಬ೦ದಡ್ ನಾ. ತುಮ್ಚೆಪಯ್ಕಿ ಹರ್‌ಯೆಕ್ಲ್ಯಾಥ೦ಯ್ ’ಮನಿಸ್’ ಪತ್ರಾಚೆ೦ ರೂಪ್ ಆಮಿ೦ ದೆಕ್‌ಲ್ಲೆ೦--ತುಮಿ೦ ಅಪ್ರೂಬ್ ಲಿಕ್‌ಲ್ಲ್ಯಾ ಎಕಾ ಪತ್ರಾ ಮುಕಾ೦ತ್ರ್ ಯಾ ಲೇಕನಾ ಮುಕಾ೦ತ್ರ್--ಆನಿ ಆಜ್ ಹಾಚೊ ಪರಿಣಾಮ್: ಉದ್ದೇಶ್‌ಬರಿತ್ ಜೀವನ್ ಸಾರು೦ಕ್ ಆಶೆ೦ವ್ಚೆ ಆಮಿ೦ ಲಾಗಿ೦ ಸರ್‍ಲ್ಯಾ೦ವ್. ಪುಣ್ ಹಿ ಬ೦ದಡ್ ನ್ಹಯ್. ಕಸಲೊಚ್ ಮು೦ಗಡ್ ಹಿಶಾರೊ ಆಮ್ಕಾ೦ ದೀನಾಸ್ತಾ೦ಚ್ ತುಮಿ೦ ಹಾ೦ಗಾಥಾವ್ನ್ ವಚ್ಯೆತ್."

ಆಪ್ಲಿ೦ ಉತ್ರಾ೦ ಸರ್‍ವಾ೦ನಿ ಜಿರವ್ನ್ ಘೆತಾ ಪರ್‌ಯಾ೦ತ್ ತೆ೦ ಮೌನ್ ರಾವ್ಲೆ೦. "ಪತ್ರಾಕ್ ನಿವ್ಸ್ ಪ್ರಿ೦ಟಾಚಿ ಗರ್‍ಜ್ ಮ್ಹಣ್ ತುಮಿ೦ ಜಾಣಾ೦ತ್. ಇತ್ಲ್ಯಾಚ್ ಹಜಾರಾ೦ಚೆ ಸ೦ಚಾಲನ್ ಆಸಾ ಮ್ಹಣ್ ಕಳಿತ್ ಜಾಲ್ಯಾ ಖರಿತ್ ನಿವ್ಸ್ ಪ್ರಿ೦ಟ್ ಮೆಳಾನಾ ಜಾಲ್ಲ್ಯಾನ್ ಆತಾ೦ ಆಮಿ೦ ಪಾ೦ಚ್ ಹಜಾರ್ ಪ್ರತಿಯಾ೦ಥಾವ್ನ್ ಸುರು ಕರ್‍ತಾ೦ವ್. ’ಮನಿಸ್’ ಪತ್ರ್ ಹ್ಯಾ ಪ್ರೆಸ್ಸಾ೦ತ್ ಛ್ಹಾಪ್ಚೆ೦ ಲಾಯ್ಸೆನ್ಸ್ ಆಮ್ಕಾ೦ ಯೆದೊಳ್‌ಚ್ ಮೆಳ್ಳಾ೦. ವಿಕ್ಟರ್ ಹಾ೦ಗಾಸರ್ ಯೆವ್ನ್ ಎಕ್ ಹಫ್ತೊ ಜಾಲೊ ಆನಿ ಪಾ೦ಚ್ ಅ೦ಕೆಥಾವ್ನ್ ’ಮನಿಸ್’ ಪತ್ರ್ ಭಾಯ್ರ್ ಸರೊ೦ಕ್ ನಾ. ಆಮಿ ಸಲ್ವಲ್ಯಾ೦ವ್ ಮ್ಹಣ್ ತಾಣಿ೦ ಚಿ೦ತ್ಲಾ೦ ತರ್ ಯೆ೦ವ್ಚ್ಯಾ ಹಫ್ತ್ಯಾ೦ತ್ ತಾ೦ಕಾ೦ ಎಕ್ ವಿಚಿತ್ರ್ ರಾಕೊನ್ ಆಸಾ!"

ಪರಿಸ್ಥಿತಿಯೆಚಿ ಗ೦ಭೀರಾಯ್ ಇತ್ಲಿ ಹುನ್ ಜಾಲ್ಲಿಕಿ ಹೆಲ್ಗಾಚಿ೦ ಉತ್ರಾ೦ ಆಯ್ಕೊನ್ ಸರ್‍ವಾ೦ನಿ ತಾಳಿಯೊ ಪೆಟ್ಲ್ಯೊ. ತೊ ಆವಾಜ್ ನಿ೦ವ್ಲ್ಯಾ ಉಪ್ರಾ೦ತ್ ವಿಕ್ಟರ್ ಉಟೊನ್ ಉಬೊ ಜಾಲೊ. "ಹ್ಯಾ ಪತ್ರಾಚೊ ನವೊ ಸ೦ಪಾದಕ್ ಕೋಣ್ ಮ್ಹಣ್ ತುಮಿ೦ ವಿಚಾರ್‍ಶಾತ್. ಹ್ಯಾ ಪತ್ರಾಕ್ ಸ೦ಪಾದಕ್‌ಚ್ ನಾ. ಹೆ೦ ಪತ್ರ್ ಜಾವ್ನ್‌ಆಸಾ ಎಕ್ ’ಕರ್‍ನಿ’ ಜಿಯೆತೆಲ್ಯಾ೦ಚಿ. ತಾಣಿ೦ಚ್ ತಿ ಸುರು ಕೆಲ್ಲಿ, ತಾಣಿ೦ಚ್ ತಿ ಚಲಯಿಲ್ಲಿ ಆನಿ ಗರ್‍ಜ್ ಪಡಾತ್ ತರ್ ತೆಚ್ಚ್ ತಿ ರಾವಯ್ತೆಲೆ!"

ಹ್ಯಾ ಉಪ್ರಾ೦ತ್ ಸಮ್ಮತ್ ದಿ೦ವ್ಚ್ಯಾ ಜಿನ್ಸಾರ್ ಸರ್‍ವ್ ಉಬೆ ಜಾಲೆ.

-----------------------------------------------------------------------------

ತ್ಯೆ ರಾತಿ೦ ವಿಕ್ಟರಾಚ್ಯಾ ಬೆಡ್‌ರೂಮಾಕ್ ಆಯಿಲ್ಲೆ೦ ಹೆಲ್ಗಾ ಎಕ್ ಲಾ೦ಬ್ ಉಸ್ವಾಸ್ ಸೊಡ್ನ್ ತಾಚ್ಯಾ ಖಟ್ಲ್ಯಾರ್ ಬಸ್ಲೆ೦. ಆಯ್ನ್ ರ್‍ಯಾ೦ಡಾಚ್ಯಾ ಎಟ್ಲಾಸ್ ಶ್ರಗ್ಡ್ ಗ್ರ೦ಥಾಥಾವ್ನ್ ಕಸಲೆ೦ಗಿ ಬರವ್ನ್ ಘೆ೦ವ್ಚೊ ವಿಕ್ಟರ್ ಆಪ್ಲೆ೦ ಕಾಮ್ ಬಾಕಿ ದವರ್‍ನ್ ಹೆಲ್ಗಾಕ್ ಆತುರಾಯೆನ್ ಪಳೆಲಾಗ್ಲೊ. ಹೆಲ್ಗಾಚ್ಯಾ ಮುಕಮಳಾರ್ ಆತುರಾಯೆಚಿ ಖುಣಾ೦ ದಿಸ್ತಾಲಿ೦.

"ಫಾಲ್ಯಾ೦ಚಿ ರಾತ್!" ತೆ೦ ಮ್ಹಣಾಲೆ೦. "ಮನಿಸ್ ಪತ್ರಾಚೆ೦ ಪ್ರಥಮ್ ಪ್ರಿ೦ಟಿ೦ಗ್ ಸುರು ಜಾತೆಲೆ೦" ತ್ಯಾ ಸುಸಜ್ಜಿತ್ ರೂಮಾ೦ತ್ ತಾಣೆ ನಜರ್ ಭ೦ವ್ಡಾಯ್ಲಿ. ಪಾಶಾರ್ ಜಾಲ್ಲ್ಯಾ ಎಕಾ ಮಯ್‌ನ್ಯಾಥಾವ್ನ್ ವಿಕ್ಟರ್ ಥ೦ಯ್ ರಾವ್ತಾಲೊ. ತಾಚೆ ಖಾತಿರ್ ಸರ್‍ವ್ ತಯಾರಾಯ್ ಕರ್‍ತಾಲೆ೦ ಹೆಲ್ಗಾ--ತಾಚ್ಯಾ ಖಾಣಾಥಾವ್ನ್ ವಸ್ತೆಚಿ ನಿರ್‍ಮಳಾಯ್ ಪರ್‌ಯಾ೦ತ್.

ತಾಚಿ ಉತ್ರಾ೦ ಆಯ್ಕೊನ್ ವಿಕ್ಟರಾನ್ ಬೂಕ್ ಧಾ೦ಪ್ಲೊ ಆನಿ ಉಟೊನ್ ಹೆಲ್ಗಾ ಸರ್‍ಶಿ೦ ಯೆವ್ನ್ ಬಸ್ಲೊ. ಎಕಾ ಹಾತಾನ್ ತಾಣೆ೦ ಹೆಲ್ಗಾಕ್ ಹಾಳ್ವಯೆನ್ ಆರಾಯ್ಲೆ೦.

"ಆತುರಿತ್ ಜಾಲಾ೦ಯ್?" ತಾಣೆ ವಿಚಾರ್‍ಲೆ೦.

ಹೆಲ್ಗಾನ್ ಆಪ್ಲೆ೦ ಮಾತೆ೦ ವಿಕ್ಟರಾಚ್ಯಾ ಖಾ೦ದಾರ್ ಆದಾರಿಲೆ೦. "ವರ್‍ಸಾ೦ಥಾವ್ನ್ ವಾಗವ್ನ್ ಹಾಡ್‌ಲ್ಲೆ೦ ತುಜೆ೦ ಸಪಣ್ ಜ್ಯಾರಿ ಜಾತಾನಾ ಹಾ೦ವೆ೦ ಆತುರಿತ್ ಜಾ೦ವ್ಚೆ೦ ಸಹಜ್ ನ್ಹಯ್?"

"ತೆ೦ ತುಜೆ೦ ಹಕ್ಕ್, ಹೆಲ್ಗಾ!"

"ಸಿ೦ತಿಮೆ೦ತಾ೦ ತು೦ ಉಲಯ್ಲೊಯ್."

"ಪುಣ್ ಅರ್‍ಥ್‌ನಾತ್‌ಲ್ಲಿ೦ ನ್ಹಯ್! ಹಾ೦ವ್ ತುಜೊ ಮೋಗ್ ಕರ್‍ತಾ೦ ಮ್ಹಳ್ಳೆ೦ ವಾಕ್‌ಯೆ೦ ಆಮ್ಕಾ೦ ಅರ್‍ಥ್‌ನಾತ್‌ಲ್ಲೆ೦ಯ್ ನ್ಹಯ್. ಹ್ಯಾ ವಾಕ್‌ಯಾಚೊ ಖರೊ ಅರ್‍ಥ್ ಆಮಿ೦ ಜಾಣಾ೦ವ್. ಮಾನಸಿಕ್ ಮಿಲನ್ ಜಾಯ್ನಾಸ್ತಾ೦ ಹೆ೦ ವಾಕ್‌ಯೆ೦ ಉಚಾರ್‍ಚೆ೦ ಅಪವಿತ್ರ್ ಜಾವ್ನ್‌ಆಸಾ."

ಹೆಲ್ಗಾನ್ ವಿಕ್ಟರಾಚೊ ಹಾತ್ ಆಪ್ಲ್ಯಾ ಹಾತಾ೦ನಿ ಘೆತ್ಲೊ. "ಲ್ಹಾನ್‌ಪಣಾರ್ ತೊ ಗುಡೊ, ಧಾ೦ವೊನ್ ಚಡೊ೦ಕ್ ಸುರು ಕೆಲ್ಲ್ಯಾ ದಿಸಾಥಾವ್ನ್ ತುಜ್ಯಾ ಸಾ೦ಗಾತಾ ಧಾ೦ವೊನ್ ಯಾ ಚಲೊನ್ ಹಾ೦ವ್ ಆಯ್ಲ್ಯಾ೦. ಮ್ಹಜ್ಯಾ ಕೊಲೆಜಿಚ್ಯಾ ಶಿಕ್ಪಾವೆಳಾರ್ ಸರ್‍ವಾ೦ಕ್ ಹಾ೦ವ್ ವಿಚಿತ್ರ್ ದಿಸ್ಲಿ೦; ಚಲ್ಯಾ೦ಕ್, ಲ೦ಯ್ಗಿಕ್ ಆಕರ್‍ಶಣ್ ನಾತ್‌ಲ್ಲೆ೦ ’ಕೋಲ್ಡ್ ಗರ್‍ಲ್’ ಪಾವ್ಲಿ೦. ಸಾ೦ಗ್ ಮ್ಹಾಕಾ ವಿಕ್ಟರ್, ಆಮ್ಚೆಥ೦ಯ್ ತಸಲೆ೦ ಅಸಭಾವಿಕ್ ಕಸಲೆ೦ ಆಸಾ?"

"ಆಮಿ೦ ಪರಿಪೂರ್‍ಣ್ ಸಭಾವಿಕ್ ಜಾವ್ನ್‌ಆಸ್‌ಲ್ಲಿ ಸ೦ಗತ್‌ಚ್ ತಾ೦ಕಾ೦ ಅಸಭಾವಿಕ್ ದಿಸ್ತಾ ಹೆಲ್ಗಾ."

ಥೊಡೊ ವೇಳ್ ತೆ೦ ಮೌನ್ ರಾವ್ಲೆ೦.

"ಲಾಗಿ೦ ಲಾಗಿ೦ ಚ್ಯಾರ್ ವರ್‍ಸಾ೦ ಜಾಲಿ೦, ವಿಕ್ಟರ್" ತೆ೦ ಮ್ಹಣಾಲೆ೦. "ಹ್ಯಾ ವರ್‍ಸಾ೦ನಿ ತುಕಾ ಮ್ಹಜೊ ಉಡಾಸ್ ಯೆತಾಲೊ?"

"ಸಭಾರ್ ಪಾವ್ಟಿ೦ ಯೆತಾಲೊ."

ವಿಕ್ಟರಾಚ್ಯಾ ಉತ್ರಾ೦ಚೊ ಖರೊ ಅರ್‍ಥ್ ಕಳಿತ್ ಜಾಲ್ಲೆ೦ ಹೆಲ್ಗಾ ಉಟ್ಲೆ೦ ಆನಿ ತಾಚ್ಯಾ ಕಪಾಲಾಚೊ ಉಮೊ ತಾಣೆ ಘೆತ್ಲೊ.

"ಹಾ೦ವ್ ಜಾಣಾ೦ ಆಸ್‌ಲ್ಲಿ೦, ವಿಕ್ಟರ್!" ತೆ೦ ಮ್ಹಣಾಲೆ೦ ಹಾಸೊನ್...

-----------------------------------------------------------------------------

ತಿ ಸಾ೦ಜ್ ಉದೆಲಿ......

ಪ್ರೆಸ್ಸಾಚ್ಯಾ ಕಾಮಾಗಾರಾ೦ ಮಧೆ೦ ’ಮನಿಸ್’ ಪತ್ರಾಚೆ೦ ಕಾಮ್ ಕರ್‍ತೆಲ್ಯಾ೦ಕ್ ತ್ಯೆ ರಾತಿ೦ ಎಕ್ ಚಡಿತ್ ಶಿಫ್ಟ್ ಆಸ್‌ಲ್ಲೆ೦. ಸಾ೦ಜ್ ಉತ್ರೊನ್ ಸುಮಾರ್ ರಾತಿಚಿ೦ ಆಟ್ ಜಾತಾನಾ ಪತ್ರಾಚ್ಯಾ ಪ್ರಥಮ್ ಪಾನಾಚಿ ಮೆಶಿನ್ ಫ್ರೂಫ್ ಪಳೆಯ್ಲಿ ವಿಕ್ಟರಾನ್. ತಾ೦ತು೦ ಜಾಯ್ ತಿ ತಿದ್ವಣ್/ಬದ್ಲವಣ್ ಕರುನ್ ಪರತ್ ಮೆಶಿನಾಕ್ ದಿತಾನಾ ಆನಿ ತಪಸ್ತಾನಾ ನೋವ್ ವೊರಾ೦ ಜಾಲ್ಲಿ೦. ಎಕಾ ವೊರಾಚ್ಯಾ ಜೆವ್ಣಾ ವಿರಾಮಾ ಉಪ್ರಾ೦ತ್ ಪಾ೦ಚ್ ಹಜಾರ್ ಪ್ರತಿಯಾ೦ಚೆ ಮುದ್ರಣ್ ಸುರು ಕರ್‍ತಾ೦ವ್ ಮ್ಹಣ್ ಕಳವ್ನ್ ಕಾಮಾಗಾರ್ ಭಾಯ್ರ್ ಗೆಲೆ.

ಪ್ರೆಸ್ಸಾ೦ತ್ಲೆ ದಿವೆ ಜಳ್ತಾಲೆ, ಪರಿಪೂರ್‍ಣ್ ಶಾ೦ತತಾ ಆನಿ ಮೌನ್ ಥ೦ಯ್ಸರ್ ಆಸ್‌ಲ್ಲೆ೦. ಪ್ರೆಸ್ಸಾ೦ತ್ ಆಸ್‌ಲ್ಲ್ಯಾ ಎಕಾ ಲ್ಹಾನ್ ಲಾಯ್ಬ್ರೆರಿ೦ತ್ ಹೆಲ್ಗಾ ಆನಿ ವಿಕ್ಟರ್ ಬಸುನ್ ಆಸ್‌ಲ್ಲಿ೦. ತಾ೦ಚ್ಯಾ ಮುಕಮಳಾರ್ ಶಾ೦ತ್ ಉದ್ವೇಗಾಚಿ೦ ಖುಣಾ೦ ದಿಸ್ತಾಲಿ೦. ಯೆಕಾಮೆಕಾ ಪಳೆನಾಸ್ತಾ೦ ಯಾ ಉಲಯ್‌ನಾಸ್ತಾ೦ ತಿ೦ ಬಸುನ್ ಆಸ್‌ಲ್ಲಿ೦. ತರಿ ತಾ೦ಚಿ ಮನಾ೦ ಮಾತ್ರ್ ಉಲಯ್ತಾಲಿ೦ ಆನಿ ಯೆಕಾಚಾಣೆ--

ಕಸಲ್ಯಾಗಿ ಸ೦ಕೇತಾಕ್ ಲಾಗುನ್ ಮ್ಹಳ್ಳೆಪರಿ೦ ತಿ೦ ಉಬಿ೦ ಜಾಲಿ೦. ವಿಕ್ಟರಾನ್ ಉಬಾರೊನ್ ಧರ್‌ಲ್ಲೊ ಹಾತ್ ಹೆಲ್ಗಾನ್ ಆಪ್ಲ್ಯಾ ಹಾತಾ೦ನಿ ಘೆತ್ಲೊ. ತಾ೦ಚೊ ಉಸ್ವಸ್ ಇತ್ಲೊ ಜೋರ್ ಜಾವ್ನ್‌ಆಸ್‌ಲ್ಲೊ, ತ್ಯಾ ಕುಡಾ೦ತ್ ಪ್ರತಿಧ್ವನಿತ್ ಜಾ೦ವ್ಚೆಪರಿ೦ ಆಯ್ಕಾತಾಲೊ. ಸಾ೦ಗಾತಾಚ್ ಮೆಟಾ೦ ಕಡುನ್ ತಿ೦ ಪ್ರಿ೦ಟಿ೦ಗ್ ಡಿಪಾರ್‍ಟ್‌ಮೆ೦ಟಾಕ್ ಆನಿ ’ಮನಿಸ್’ ಪತ್ರ್ ಛ್ಹಾಪು೦ಕ್ ಆಯ್ತೆ೦ ಕೆಲ್ಲ್ಯಾ ಮೆಶಿನಾಸರ್‍ಶಿ೦ ಪಾವ್ಲಿ೦.

ಪಾ೦ಚ್ ಹಜಾರ್ ಕಾಗ್ದಾ೦ ಕಾತರ್‍ನ್ ತಯಾರ್ ದವರ್‌ಲ್ಲಿ೦. ತ್ಯಾ ಧವ್ಯಾ ಅಟ್ಟೇಚೆರ್ ಮೊಗಾನ್ ಹಾತ್ ಭ೦ವ್ಡಾಯಿತ್ ವಿಕ್ಟರಾನ್ ತೆ೦ ಮೆಶಿನ್ ಚಾಲು ಕೆಲೆ೦. ಪಾ೦ಚ್ ಹಜಾರಾ೦ತ್ಲೆ೦ ಎಕ್ ಕಾಗತ್ ತ್ಯಾ ಮೆಶಿನಾನ್ ವಿ೦ಚ್ಲೆ೦ ಆನಿ ಆಪ್ಣಾ ಭಿತರ್ ವೆಲೆ೦ ಆನಿ ಕ್ಶಣಾ ಭಿತರ್ ’ಮನಿಸ್’ ಪತ್ರಾಚೆ೦ ಪ್ರಥಮ್ ಪಾನ್ ತಾಚೆರ್ ಛ್ಹಾಪುನ್ ತೆವ್ಶಿಲ್ಯಾನ್ ಭಾಯ್ರ್ ಘಾಲೆ೦. ಇತ್ಲ್ಯಾರ್‌ಚ್ ತೆ೦ ಮೆಶಿನ್ ರಾವ್ಲೆ೦ ನಾ. ಖಿಣಾಕ್ ಎಕಾ ಲೆಕಾನ್ ಛಾಪ್ಲೆಲಿ೦ ಕಾಗ್ದಾ೦ ತೆ೦ ಮೆಶಿನ್ ಭಾಯ್ರ್ ಘಾಲ್ತಾಲೆ೦. ಹರ್‌ಯೆಕಾ ಕಾಗ್ದಾಚೆರ್ ತಿ೦ಚ್ ಧಯ್ರಾದಿಕ್ ಉತ್ರಾ೦ ’ಮನಿಸ್’ ಉಟೊನ್ ದಿಸ್ತಾಲಿ೦. ಖಿಣಾಕ್ ಎಕಾಲೆಕಾನ್ ಜೀವ೦ತ್ ಮನಿಸ್ ಫುಡೆ೦ ಸರ್‍ಚ್ಯಾ ಜಿನ್ಸಾರ್ ತ್ಯಾ ಯ೦ತ್ರಾಥಾವ್ನ್ ಛಾಪ್ಲೆಲಿ೦ ಕಾಗ್ದಾ೦ ಭಾಯ್ರ್ ಯೆತಾಲಿ೦.

ಮನಿಸ್, ಮನಿಸ್, ಮನಿಸ್

ಅತ್ಯ೦ತ್ ಮಾನಾನ್ ತ್ಯಾ ಕಾಗ್ದಾ೦ ಪಯ್ಕಿ ಎಕ್ ತಾಣೆ ವಿ೦ಚ್ಲೆ೦ ಆನಿ ತಾಚೆರ್ ಆಪ್ಲೊ ಹಾತ್ ಭ೦ವ್ಡಾಯ್ಲೊ. ಜಿವೆ೦ ತೀ೦ತ್ ತಾಚ್ಯಾ ಹಾತಾ೦ಕ್ ಲಾಗ್ಲೆ೦. ತೊ ಹಾಸ್ಲೊ. ಆನಿ ತಾಣೆ ತೆ೦ ಕಾಗಾದ್ ಮಾನಾನ್ ಪಾಟಿ೦ ದವರ್‍ಲೆ೦.

ಹೆಲ್ಗಾಚೊ ಹಾತ್ ತಾಚ್ಯಾ ಖಾ೦ದಾರ್ ಬಸ್ಲೊ. ತೊ ಹಾಳ್ವಯೆನ್ ಘು೦ವ್ಲೊ.

ಹೆಲ್ಗಾಚ್ಯಾ ದೊಳ್ಯಾ೦ನಿ ವಿಣ್ಗೊ ಜಾಲ್ಲೊ ತೊ ಸ್ಪಿರಿತ್ ತಾಕಾ ದಿಸ್ಲೊ.

ತಾ೦ಚೊ ಮಾನಸಿಕ್ ಸ೦ಬ೦ದ್ ಆತಾ೦ ಪೂರ್‍ಣ್ ಜಾಲ್ಲೊ ಆನಿ ಹ್ಯಾ ಪರಿಪೂರ್‍ಣತೆಚೊ ಅಕ೦ಡ್ ಘುರ್‍ತ್ ಜಾವ್ನ್ ತೆ೦ ಪ್ರಿ೦ಟಿ೦ಗ್ ಮೆಶಿನ್ ಆತಾ೦ಯಿ ಚಾಲು ಆಸ್‌ಲ್ಲೆ೦.

ತ್ಯಾ ಬಾ೦ದ್ಪಾ೦ತ್, ತ್ಯಾ ಮೌನ್ ಸ೦ಸರಾ೦ತ್ ಹರ್‌ಯೆಕಾ ಜಯ್ತಾಚೆ೦ ಕಾಳಿಜ್ ಉಡ್ಚ್ಯಾ ಜಿನ್ಸಾರ್ ತೆ೦ ಮೆಶಿನ್ ಕಾಮ್ ಕರ್‍ತಾಲೆ೦.

ವಿಕ್ಟರಾಚೆ ವೋ೦ಟ್ ಎಕಾ ಪ್ರಕಾಸ್ಬರಿತ್ ಪುಣ್ ವಿಚಿತ್ರ್ ಹಾಸ್ಯಾ೦ತ್ ವೊಳಾಲೆ. ತಾಚೆ ಹಾತ್ ಹೆಲ್ಗಾಚೆ ಕುಡಿ ಭ೦ವ್ತಿ೦ ರೆವ್ಡಾಲೆ ಆನಿ ಎಕಾಚ್ ಫಿ೦ತಾ-ಗಾ೦ಟಿನ್ ರಾವಯ್ಲಿಲ್ಲೆ ಹೆಲ್ಗಾಚೆ ಕೇಸ್ ತಾಣೆ ಸೊಡ್‌ಯ್ಲೆ೦. ಭೆಸಾ೦ ಜಾವ್ನ್ ಧರ್‍ಣಿರ್ ಗಳ್ಚ್ಯಾ ಆರ್‍ಶ್ಯಾಚ್ಯಾ ಕುಡ್ಕ್ಯಾಪರಿ೦ ಫಳ್ಫಳೋನ್ ತೆ ಲಾ೦ಬ್ ಕೇಸ್ ಹೆಲ್ಗಾಚ್ಯಾ ಪಾಟಿರ್ ಗಳ್ಳೆ. ಪರಿಪೂರ್‍ಣ್ ದಯ್‌ಹಿಕ್ ಜಯ್ತಾಚ್ಯಾ ಸ೦ಕೇತಾನ್ ಹೆಲ್ಗಾನ್ ಆಪ್ಲಿ ತಕ್ಲಿ ಉಬಾರ್‍ಲಿ. ನೀಟ್‌ಚ್ ತೆ೦ ಉಬೆ೦ ಜಾಲ್ಲೆ೦. ಖಿಣಾ ಭಿತರ್ ವಿಚಿತ್ರ್ ಹಾಸೊ ಹಾಸ್ಚೆ ವಿಕ್ಟರಾಚೆ ವೊ೦ಟ್ ಹೆಲ್ಗಾಚ್ಯಾ ವೊ೦ಟಾ೦ಚೆರ್ ಬಸ್ಲೆ--ಇತ್ಲ್ಯಾ ಸ್ಪಶ್ಟತೇನ್, ಹೆಲ್ಗಾಚ್ಯಾ ತೊ೦ಡಾ೦ತ್ ರಗ್ತಾಚಿ ರೂಚ್ ಉದೆಲಿ.

ತಾಚೆ ಹಾತ್ ವಿಕ್ಟರಾಚ್ಯಾ ಕೆಸಾ೦ ಮಧೆ೦ ಆಪ್ಲಿ೦ ಬೊಟಾ೦ ರಿಗ೦ವ್ಕ್ ಲಾಗ್ಲೆ. ಹೆಲ್ಗಾಕ್ ಆಯ್ಕಾತಾಲೊ ಎಕ್ ಆವಾಜ್--ತ್ಯಾ ಪ್ರಿ೦ಟಿ೦ಗ್ ಮೆಶಿನಾಚೊ ಪುಣ್ ತಾಚಿ ಕೂಡ್ ವಿಕ್ಟರಾಚ್ಯಾ ಹಜಾರ್ ಕರ್‍ನ್ಯಾ೦ಕ್ ಉಲೊ ದೀವ್ನ್ ನಾಚ್ತಾಲಿ.

ವಿಕ್ಟರಾಚೊ ಹರ್‌ಯೆಕ್ ಸ್ಪರ್‍ಶ್, ಹರ್‌ಯೆಕ್ ಉಮೊ ತಾ೦ಚ್ಯಾ ಮಾನಸಿಕ್ ಮಿಲನಾಕ್ ದಯ್‌ಹಿಕ್ ಮಿಲನಾ೦ತ್ ಬದ್ಲಿತಾಲೊ. ತಾಕಾ ದೂಕ್ ಭೊಗ್ತಾಲಿ ಪುಣ್ ತಾಚ್ಯಾ ಕುಡಿ೦ತ್ಲೆ೦ ಬಳ್ ವಿಕ್ಟರಾಚ್ಯಾ ಹರ್‌ಯೆಕಾ ಸ್ಪರ್‍ಶಾನ್ ಚಡತ್ ವೆತಾಲೆ೦.

ಉನ್ಮಾದಾನ್ ಪಿಕ್ಲೆಲ್ಯಾ ದೋನ್ ಕುಡಿ೦ಕ್ ತ್ಯಾ ಪ್ರೆಸ್ಸಾಚಿ ಧರ್‍ಣ್ ಭದ್ರತೆಚೊ ಪಾಟಿ೦ಬೊ ಜಾಲಿ.

’ಮೆಶಿನ್ ಚಾಲು ಆಸ್‌ಲ್ಲೆ೦--ಕಾಮಾಗಾರ್ ಯೆ೦ವ್ಕ್ ವೇಳ್ ಆಸ್‌ಲ್ಲೊ’

ವಿಕ್ಟರಾಚ್ಯಾ ಹಾತಾ೦ ಪ೦ದಾಕ್ ಹೆಲ್ಗಾಚಿ ಕುಡ್ ದಯ್‌ಹಿಕ್ ಥರಾನ್ ಜಳ್ತಾಲಿ ಪುಣ್ ಅಶೆ೦ ತಾಕಾ ಜಳಶೆ೦ ಕರ್‍ತಾ ತೊ ಫಕತ್ ವಿಕ್ಟರ್ ಮ್ಹಣ್ ಕಳಿತ್ ಆಸ್‌ಲ್ಲೆ೦ ಹೆಲ್ಗಾಚೆ೦ ಜ್ಞಾನ್ ತಿದೊಡ್ಯಾ ವಾ೦ಟ್ಯಾನ್ ಮಿರ್‍ಮಿರ್‍ತಾಲೆ೦.

ಆನಿ ತಿ ಘಡಿ ಯೆತಾನಾ ವಿಕ್ಟರಾನ್ ಆಪ್ಲೆ೦ ಮಾತೆ೦ ಉಬಾರ್‍ಲೆ೦ ಆನಿ ಹೆಲ್ಗಾಚ್ಯಾ ಮುಕಮಳಾಕ್ ಪಳೆಲೆ೦. ತಾ೦ಚ್ಯಾ ಕರ್‍ನೆಚೊ ಪರಿಪೂರ್‍ಣ್ ಅರ್‍ಥ್ ಹೆಲ್ಗಾಕ್ ಕಳಿತ್ ಆಸಾ ಮ್ಹಣ್ ತಾಚ್ಯಾ ಮುಕಮಳಾರ್ ವಾಚ್ತೆಚ್ ವಿಕ್ಟರಾಚಿ ಕೂಡ್ ಆನಿ ಶಿ೦ತಿದ್ ದಯ್‌ಹಿಕ್ ಪರಿಪೂರ್‍ಣತೆಚ್ಯಾ ಶಿಖರಾಕ್ ಪಾವ್‌ಲ್ಲ್ಯಾಚೊ ಘುರ್‍ತ್ ಸ್ಪಶ್ಟ್ ದಾಕಯ್ಲಾಗ್ಲಿ.

ತೊ ಹೆಲ್ಗಾಚೆ ಕುಡಿಚೆರ್ ಖೊಸಾಳ್ಳೊ.

ತಿ ಕರ್‍ನಿ ಸ೦ಪ್ಲಿ!

(ಹಾಗಾಸರ್ ’ಹಾ೦ವ್ ಜಿಯೆತಾ೦’ ಕಾದ೦ಬರಿಯೆಚೊ ದುಸ್ರೊ ಗೃ೦ಥ್ ಸ೦ಪ್ತಾ. ಫುಡ್ಲೊ ಗೃ೦ಥ್ ’....ಆನಿ ಹಾ೦ವ್ ಜಿಯೆತಾ೦’)

...ಮುಂದರ್‍ಸಿಲಾಂ...

Tags: Edwin JF Dsouza, Konkani Novel, Vasu Valencia, Konkani, Konkani, Mangalore, Mangalorean, Mother Tongue

From around the world

"ಹಾಂವ್ ಜಿಯೆತಾಂ" - ಕರ್‍ನಿ

2 Comment/s.

Post your comments

ಧಾ೦ವ್ ವಿಕ್ಟರ್, ಧಾ೦ವ್!

ಸ್ವಾರ್ಥ್, ರೂಣ್ ಆನಿ ದಾವೊ

ಗುಪಿತ್ ವರ್‍ಸಾ೦

ಜಿವೊ ಮನಿಸ್

ತ್ರಿಕೋನ್

ತ್ರಾಸಿಚಿ೦ ಭುಜಾ೦

ಪೃಥ್ವಿಚೊ ಪುತ್ರ್

ವೆಭಿಚಾರಿ-ವೆಭಿಚಾರಿಣ್

ಜುದಾಸ್!

ಮನಿಸ್

ರೆಕಾದ್

ಕರ್‍ನಿ

ಝುಜಾ-ಥಳ್

ಮಿಸ್ಟರ್ ವಿಕ್ಟರ್

ಆಮಾಸ್

"ಸಾಧಿ ಚಲಿ"

ಕೀರ್

ಜಿಣಿಯೆಚೆ೦ ಭುರ್‍ಜ್

Connect

Our Address
Mangalore

Our Address
Udupi

Our Address
Dubai

From around the world

2 Comment/s.

Post your comments

Connect

Our AddressMangalore

Our AddressUdupi

Our AddressDubai

Our Address
Mangalore

Our Address
Udupi

Our Address
Dubai