:: www.maibhaas.com - ಗುಂಡ್ಯಡ್ಕ ನ್ಹಂಯ್ಚೆ ಫಾತೊರ್ ಕಾಣಿ ಸಾಂಗ್ತಾತ್..! ::

80.5

User Rating

ಮ್ಹಜ್ಯಾ ಪದ್ವೆಚ್ಯಾ ಅಂತಿಮ್ ವರ್ಸಾ (2012), ಮ್ಹಾಕಾ ಪಾಲಡ್ಕಾಚ್ಯಾ ಗುಂಡೆಡ್ಕಾ ಲಾಗ್ಶಿಲ್ಯಾ ನ್ಹಂಯ್ಚ್ಯಾ ತಡಿಕ್ ಪಾಂವ್ಚೊ ಆಕಸ್ಮಿಕ್ ಥರಾನ್ ಏಕ್ ಅಪೂರ್ವ್ ಅವ್ಕಾಸ್ ಲಾಭ್ಲೊ. ಪಾವ್‌ಲ್ಲೊಂ ಹಾಂವ್ ಥೈಂಸರ್ ಮ್ಹಜೊ ಆಪ್ತ್ ಮಿತ್ರ್ ಆಸ್ಟಿನ್ (ಪಾಲಾಡ್ಕ ) ಸಂಗಿಂ. ಮಾರ್ಚ್ ಮಹಿನೊ ಜಾಲ್ಲ್ಯಾನ್ ವಾಳ್ಚ್ಯಾ ಉದ್ಕಾಚೊ ಆವಾಜ್ ಮೌನ್ ಜಾಲ್ಲೊ ತರ್, ಸಾಂಜೆಚ್ಯಾ ಪ್ರಶಾಂತ್ ವಾರ್‍ಯಾಕ್ ಮನ್ ಪಿಸ್ವೊಂಚೊ ಜಾಗೊ ಮ್ಹಣ್ಚ್ಯಾಂತ್ ದುಬಾವ್ ನಾತ್‌ಲ್ಲೊ. ಪಾವ್ಸಿಲ್ಯಾ ದಿಸಾಂನಿ ಕಾಳ್ಜಾಕ್ ಭಿರಾಂತ್ ದಿಂವ್ಚಿ ಘೊರೊಜ್ ಮಾರ್ನ್ ವಾಳ್ಚಿ ನ್ಹಂಯ್ ತರ್‌ಯೀ, ವ್ಹಡ್ ಜಯ್ತ್ ಫಾಜೆ ಫಾತ್ರಾನಿಂ, ವಾಳ್ಚೆಂ ಉದಕ್ ನಾಸ್ತಾಂ ಶಾಂತ್ ಜಾಲ್ಲಿ. ಫಕತ್ ಪಾಜೆ ಫಾತರ್ ದಿಷ್ಟಿಕ್ ಪಡ್ತಲೆ, ರೆಂವಾಳ್ ಸುವಾತ್ ಥೈಂಸರ್ ನಾತ್ಲಲಿ. ಹಾಂವ್ ಮ್ಹಜ್ಯಾ ಮನಾಂತ್ ನ್ಹಂಯ್ ವಿಶ್ಯಾಂತ್ ವರ್ಣುಂಕ್ ಲಾಗ್ಲೊಂ. ಆಸ್ಟಿನಾನ್ ಕಿತೆಂಗೀ ಸಾಂಗೊಂವ್ಕ್ ಸುರು ಕೆಲೆಂ. "ಆಮಿ ಆಸ್‌ಲ್ಲ್ಯಾ ಹ್ಯಾ ಜಾಗ್ಯಾಕ್ ಏಕ್ ಕಾಣಿ ಆಸಾ. ಹಾಂಗಾಸರ್ ಪಾಂಡವ್ ಆಯ್ಲ್ಯಾತ್....!" ಅಶೆಂ ತೊ ತಾಕಾ ಕಳಿತ್ ಆಸ್‌ಲ್ಲಿ ಆರ್ಧಿ-ಕುರಿ ಕಾಣಿ ಸಾಂಗ್ತಾನಾ ಹಾಂವ್ ಹಾಸಾಲಾಗ್ಲೊಂ. ಶೆಕ್ಡ್ಯಾ ವರ್ಸಾಂ ಆದಿಂ ಜಿಯೆಲ್ಲೆ ಪಾಂಡವ್ ಹಾಂಗಸರ್ ಆಯ್ಲ್ಯಾತ್ ಮ್ಹಳ್ಳೆಂ ಸತ್ ಜಿರೊಂವ್ಕ್ ಮ್ಹಾಕಾ ಕಷ್ಟಾಂಚೆಂ ಜಾಲೆಂ. ಥೈಂಸರ್ ಸ್ಮಾರಕ್ ಜಾವ್ನ್ ಉರ್‍ಲಲೆ ಥೊಡೆ ಫಾತರ್ ಆನಿ ಫಾತ್ರಾಚೆರ್ ಕಾಂತಯ್ಲಲೆ ಥೊಡೆ ಹಿಶಾರೆ ದಾಕಯಿತ್ತ್ ಆಸ್ಟಿನ್ ತಾಜ್ಯಾ ಕಾಣಿಯೆಕ್ ಪೂರ್ಣ್‌ವಿರಾಮ್ ದಿಂವ್ಚ್ಯಾಕ್ ವಿಸ್ರುನ್ ಪಡ್‌ಲ್ಲೊ. ಅಯ್ಕೊಂವ್ಚ್ಯಾ ಕಾಣಿಯೆಕ್ ಫಾತರ್ ಸಾಕ್ಸ್ ದಿತಲೆ ಜಾಲ್ಲ್ಯಾನ್ ಕಾಣಿ ಮ್ಹಾಕಾಯಿ ರುಚ್ಲಿ. ಹಾಂವೆಂ ಪ್ರಸ್ತಾಪ್ ಕೆಲೊ "ಹ್ಯಾ ಜಾಗ್ಯಾ ವಿಶಿಂ ಮಾಹೆತ್ ಏಕ್ ಕೆಲ್ಯಾರ್ ಕಶೆಂ?" ಆಸ್ಟಿನಾನ್ ಸಹಿ ಘಾಲಿಚ್. ಮುಕ್ಲ್ಯಾ ಕಾಮಾಕ್ ಆಮಿ ಜೇಸನಾಚಿ (ನೆಕ್ಕರೆ, ಪಾಲಾಡ್ಕಾ) ಮಜತ್ ಮಾಗ್ಲಿ ಆನಿ ಅಶೆಂ ಆಮಿ ತೇಗ್ ಮ್ಹಾನಾಯ್ (ಸನ್ನು, ನಿಡ್ಡೋಡಿ. ಜೇಸನ್ ಆನಿ ಆಸ್ಟಿನ್ ಪಾಲಾಡ್ಕಾ) ಸಂಗಿಂ ಮೆಳೊನ್ ಮಾಹೆತ್ ಎಕ್ಟಾಂಯ್ ಕರ್‍ಚ್ಯಾಕ್ ಲಾಗ್ಲ್ಯಾಂವ್. ಅಶೆಂ ಆಮಿಂ ತೆಗಾಂ ಜಣಾಂನಿ ಮೆಳೊವ್ನ್ ಎಕ್ಟಾಂಯ್ ಕೆಲ್ಲಿ ಮಾಹೆತ್ ತಸ್ವಿರೆಸಂಗಿಂ ಉಜ್ವಾಡ್.ಕೊಮ್ ಚೆರ್ ಫಾಯ್ಸ್ ಜಾಲ್ಲಿ.

ಪಾಲಾಡ್ಕಾ ಸಾಂ. ಇಗ್ನೇಷೀಯಸ್ ಲೊಯೊಲಾ ಇಗರ್ಜಿ ಥಾವ್ನ್ ಸುಮಾರ್ 2 ಮಯ್ಲಾಂ ಚಲ್ಲ್ಯಾಂವ್ ಥರ್ ಗುಂಡೆಡ್ಕಾಲಾಗಿಂ ನ್ಹಂಯ್ಚ್ಯಾ ತಡಿಕ್ ಪಾವ್ತಾಂವ್. ಹ್ಯಾ ನ್ಹಂಯ್ಕ್ ನಾಗು ಹೊಳೆ ಮ್ಹಣ್ ವೊಲಾಯ್ಲಾಂ. ಪುತ್ತಿಗೆಲಾಗಿಂ ಜಲ್ಮ್ ಘೆವ್ನ್ ಆಪ್ಲಿಚ್ ಸೊಭಾಯೆಚಿ ಚಾಲ್ ಘೆವ್ನ್ ವಾಳ್ಚಿ ಹಿ ನ್ಹಂಯ್ ಎಕ್ ವಿಶಿಷ್ಟ್ ರಿತಿಚಿ ವೈಶಿಷ್ಟತಾ ವರ್ಣಿತಾ. ಕೊಂಕಣ್ ಕರಾವಳಿಚ್ಯಾ ಹಜಾರ್ ನಿವಾಸಿಂಕ್ ಉದ್ಕಾ ಆಸ್ರೊ ಜಾವ್ನ್ ಆಸ್ಚಿ ಹಿ ನ್ಹಂಯ್, ಪೊಸ್ರಾಲ್ ದಿವ್ಳಾಲಾಗಿಂ ಶಾಂಭವಿ ನ್ಹಂಯ್ಕ್ ಕುಡ್ಸತಾ. ನ್ಹಂಯ್ ವಾಳ್ಚ್ಯಾ ಗುಂಡೆಡ್ಕಾ ಲಾಗ್ಶಿಲ್ಯಾ ಎರು ಗುಂಡಿಯೆಲಾಗಿಂ ಪಳೆಂವ್ಕ್ ಮೆಳ್ಚ್ಯಾ ಹ್ಯಾ ಜಾಗ್ಯಾವಿಶಿಂ ಲಿಖಿತ್ ಬರ್‍ಪಾಂ ವಾಚುಂಕ್ ಮೆಳಾನಾಂತ್. ಖೈಂಚ್ಯಾಯಿ ಪ್ರತಿಯೆರ್ ತಿಂ ಲಿಖುಂಕ್ ನಾಂತ್. ಹ್ಯಾ ಜಾಗ್ಯಾಚಿ ವೈಷಿಷ್ಟತಾ ಮ್ಹಳ್ಯಾರ್ ಹಾಂಗಸರ್ ಶೆಕ್ಡ್ಯಾ ವರ್ಸಾಂ ಆದಿಂ ಪಾಂಡಾಂವ್ ದೀವ್ಳ್ ಬಾಂಧುಕ್ ಆಯಿಲ್ಲೆ ಮ್ಹಣ್ ಗುಂಡೆಡ್ಕಾ ನಿವಾಸಿಂಚಿ ಖೂಬ್ ಪಾತ್ಯೆಣಿ! ಹಾಂಗಾಸರ್ ಪಳೆಂವ್ಕ್ ಮೆಳ್ಚೆ ಥೊಡೆ ಹಿಶಾರೆ ಆನಿ ಸ್ಮಾರಕ್ ಜಾವ್ನ್ ಉರ್‍ಲಲೆ ವ್ಹಡ್ ಜಯ್ತ್ ಉಬರ್‍ಲಲೆ ಫಾತರ್ ಸಬಾರ್ ಅಭಿಪ್ರಾಯಾಂಕ್ ಸಾಕ್ಸ್ ಜಾತಾತ್.

ನಂಯ್ಚ್ಯಾ ಉಜ್ವ್ಯಾ ಬಗ್ಲೆಕ್ ಉಬರ್‍ಲಲೆ ದೋನ್ ಫಾತರ್ ಮುಖ್ ಮಂಟಪ್ ಕರುಂಕ್ ಆಯ್ತೆ ಕೆಲ್ಲೆ ಮ್ಹಣ್ಚಿ ಆಭಿಪ್ರಾಯ್. ಹ್ಯಾ ಫಾತ್ರಾಂಕ್ ಕುದುರೆ ಕಲ್ಲು ಮ್ಹಣ್ ನಾಂವ್ ಪಡ್ಲಾಂ.

ಬಗ್ಲೆಕ್‌ಚ್ ಪಳೆಂವ್ಕ್ ಮೆಳ್ತಾ ಆನ್ಯೇಕ್ ಫಾತರ್, ಹಾಕಾ ಜಾಗಂಟೆ ಕಲ್ಲು ಮ್ಹಣ್ ನಾಂವ್ ದಿಲಾಂ. ಹೊ ಫಾತರ್ ದಿವ್ಳಾಚಿ ಘಾಂಟ್ ಕರುಂಕ್ ಹಾಡ್ಲಲೊ ಖಂಯ್. ಜರ್ ಹಾತಿಂ ಏಕ್ ಲ್ಹಾನ್ ಫಾತರ್ ಘೆವ್ನ್ ಜಾಘಂಟೆ ಕಲ್ಲುಕ್ ಮಾರ್‍ಲೆಂ ಥರ್ ಘಾಂಟಿಚೊ ನಾದ್ ಆಯ್ಕಾತಾ .

ಹ್ಯೆ ದೊನೀ ಫಾತರ್ ನ್ಹಂಯ್ ದೆಗೆಕ್ ಆಸೊನ್ ಪಾವ್ಸಿಲ್ಯಾ ದಿಸಾಂನಿಂಯೀ ಪಳೆಂವ್ಕ್ ಮೆಳ್ತಾತ್.

ಚಾರ್ ಮೆಟಾಂ ಮುಖಾರ್ ಚಲ್ಲ್ಯಾಂವ್ ತರ್ ನ್ಹಂಯ್ಚ್ಯಾ ಮಧ್ಗತ್ ಪಾವ್ತಾಂವ್ (ಉದಕ್ ವಾಳ್ತಾನಾ ಹಾಂಗಾಸರ್ ವಸೊಂಕ್ ಜಾಯ್ನಾ). ಹಾಂಗಾಸ್ರ್ ಆಮ್ಕಾಂ ಫಾತ್ರಾಚೆರ್ ಏಕ್ ಪಾಂಯಾಚಿ ಆಕೃತಿ ಪಳೆಂವ್ಕ್ ಮೆಳ್ತಾ. ಲೊಕಾಚಿ ಪಾತ್ಯೆಣಿ, ಹೊ ಭೀಮಾಚೊ ಪಾಯ್ ಮ್ಹಣ್!.

ಥಂಯ್ಚ್ ಲಾಗ್ಸಾರ್ ಪಳೆಂವ್ಕ್ ಮೆಳ್ತಾತ್ ಫಾತ್ರಾಚೆರ್ ಕಾಂತಯ್ಲಲಿಂ ದೋನ್ ಮೊರ್ಗುಲಾಂ . ದಿವ್ಳಾಚ್ಯಾ ಮನ್ಜಾತಿಂಚಿ ಖಾಣಾ-ವರ್ವೆಚಿ ಗರ್ಜ್ ತಿರ್‍ಸುಂಚ್ಯಾಕ್ ಹಿಂ ರೂಪಿತ್ ಜಾಲ್ಲಿಂ ಜಾಂವ್ಕ್ ಪುರೊ ಮ್ಹಣ್ಚಿ ಆಭಿಪ್ರಾಯ್.

ಥಂಯ್-ಹಾಂಗಾ ಶಿಂಪಡ್ಲಲ್ಯಾ ಫಾತ್ರಾಂಚೆರ್ ನಂಗ್ರಾಚೆರ್ ಗಾದೆ ಕೊಸ್‌ಲ್ಲ್ಯಾ ಜಶೆಂ ಪಳೆಂವ್ಕ್ ಮೆಳ್ತಾ, ಭೀಮಾನ್ ಹಾಂಗಾಸರ್ ಕೊಸುನ್ ಅಶೆಂ ಜಾಲ್ಲೆಂ ಮ್ಹಣ್ ಸಾಂಗ್ತಾತ್.

ನ್ಹಂಯ್ತ್ ವ್ಹಾಳ್ಚೆಂ ಉದಕ್ ಸಂಪೂರ್ಣ್ ರಾವ್ಲೆಂ ತರ್ ನ್ಹಂಯ್ ಮಧ್ಗತ್ ದೋನ್ ಫಾತ್ರಾಂ ಮಧೆಂ ಏಕ್ ಉದ್ಕಾ ಝರ್ ಪಳೆಂವ್ಕ್ ಮೆಳ್ತಾ . ಹ್ಯಾ ಫಾತ್ರಾಂಕ್ ಗೋಮುಖ ಕಲ್ಲು ಮ್ಹಣ್ ಒಳ್ಕತಾತ್. ಘರಾಂತ್ ದೆವಾಚಿ ಪುಜಾ ಕರುಂಕ್ ಹ್ಯೆಚ್ ಝರಿಚೆಂ ಉದಕ್ ಹಾಡ್ಚೆಂ ಆಸ್‌ಲ್ಲೆಂ ಖಂಯ್.

ಹ್ಯೆ ಝರಿಚೆಂ ಉದಕ್ ಪವಿತ್ರ್ ಮ್ಹಣ್ ಲೆಕ್ತಾತ್. ಉದಕ್ ನಾಸ್ತಾಂ ಸಂಪೂರ್ಣ್ ದುಕೊಳ್ ಪಡ್ಲೊ ತರೀ ಹ್ಯಾ ಫಾತ್ರಾಂ ಮಧ್ಲಿ ಝರ್ ಸುಕಾನಾ ಮ್ಹಳ್ಳಿ ಖೂಬ್ ಪಾತ್ಯೆಣಿ ಮಾಲ್ಗಡ್ಯಾಂಚಿ.

ನ್ಹಂಯ್ ವಾಳ್ಚ್ಯಾ ದಾವ್ಯಾ ಬಗ್ಲೆಕ್ ಆಸಾ ಏಕ್ ವಿಶಾಲ್ ಉಬಾರಾಯೆಚೊ ವಿಸ್ತಾರ್ನ್ ರಾವ್‌ಲ್ಲೊ ಗುಡೊ. ಹ್ಯಾ ಗುಡ್ಯಾಕ್ ಒರ್ಕು ಗುಡೊ ಮ್ಹಣ್ ನಾಂವ್ ದಿಲಾಂ. ಪುತ್ತಿಗೆ ಆನಿ ಕಲ್ಲಮುಂಡ್ಕೂರ್ ಗ್ರಾಮ ವೆಗ್ಳೊ ಕರ್‍ಚೊ ಹೊ ಗುಡೊ ಪಾಂಡವಾನಿಂಚ್ ರಚ್ಲಾ ಮ್ಹಳ್ಳಿ ಸಾಂಗ್ಣಿ ಗುಂಡೆಡ್ಕಾಚ್ಯಾ ಮಾಲ್ಗಾಡ್ಯಾಂಚಿ. ಏಕ್ ಮುಡೊ ಕುಳಿತ್ ಕಾಷ್ಟೆ ಲೆಸಾಂತ್ ಬಾಂಧುನ್ ಕೊರ್‍ಯಾಂತ್ ಏಕ್-ಏಕ್ ಕೊರೆಂ ಮಾತಿ ಕಾಡ್ನ್ ಪಾಂಚ್ ಪಾಂಡವಾಂನಿ ಉಬರ್ಲಲೊ ಗುಡೊ ಖಂಯ್ ಹೊ!

ಹೆಂ ವಾಚ್ತಾನಾ ತುಮ್ಚ್ಯಾ ಮತಿಂತ್ ಏಕ್ ಸವಾಲ್ ಉಭ್ಜಂವ್ಕ್ ಪುರೊ. ಥರ್ ಹಾಂಗಾಸರ್ ದೀವ್ಳ್ ಕಿತ್ಯಾಕ್ ಉಬಾರ್‍ಲೆಂ ನಾ? ಜಾಪ್ ಜಾವ್ನ್ ಮಾಲ್ಗಡ್ಯಾಂಚಿ ಅಭಿಪ್ರಾಯ್ ಅಶಿ.

ಏಕ್ ದೀವ್ಳ್ ಉಬಾರಿಜಯ್ ತರ್ ದಿವ್ಳಾಚ್ಯಾ ಕಾಮಾಕ್ ಸುರ್‍ವಾತ್ ಸಾಂಜೆರ್ ಘಾಲ್ನ್ ಪಾಂತ್ಯಾ ಫಾರಾರ್ ಕೊಂಬ್ಯಾನ್ ಸಾದ್ ಘಾಲ್ಚ್ಯಾ ಫುಡೆಂ ದಿವ್ಳಾಚೆಂ ಶಿಖರ್ ಉಬಾರುಂಕ್ ಜಾಯ್. ಅಶೆಂ ಆಸ್ತಾಂ ಹ್ಯಾ ಜಾಗ್ಯಾರ್‌ಯೀ ಕಾಮ್ ಸುರ್‍ವಾತ್ಲೆಂ. ಪುತ್ತಿಗೆ ಶ್ರೀ. ಸೋಮಾನಾಥೇಶ್ವರ ದೀವ್ಳ್ ಗುಂಡೆಡ್ಕಾಕ್ ಲಾಗಿಂ ಆಸ್‌ಲ್ಲ್ಯಾನ್ ಗುಂಡೆಡ್ಕಾಂತ್ ದೀವ್ಫ್ ಉಬಾರ್‍ಲ್ಯಾರ್ ಆಪ್ಣಾಶಿಂ ಯೆಂವ್ಚೆ ಭಕ್ತ್ ಉಣೆ ಜಾತಿತ್ ಮ್ಹಳ್ಳ್ಯಾ ಉದ್ದೇಶಾನ್ ಶ್ರೀ ಸೊಮಾನಾಥೇಶ್ವರ ದೇವಾನ್ ಕೊಂಬ್ಯಾ ರೂಪ್ ಘೇವ್ನ್ ದಿವ್ಳಾಚೆಂ ಶಿಖರ್ ಉಬಾರ್‍ಚ್ಯಾ ಫುಡೆಂ ಸಾದ್ ಘಾಲೊ ಖಂಯ್. ಆಶೆಂ ಪಾಂಡವ್ ಗುಂಡೆಡ್ಕಾಂತ್ ದೀವ್ಳ್ ಬಾಂದ್ಚೆಂ ಸೋಡ್ನ್ ಕಟೀಲಾಕ್ ಪಾವ್ಲೆ ಮ್ಹಣ್ಚಿ ಕಾಣಿ ಆಜೂನ್ ಚಾಲ್ತೆರ್ ಆಸಾ.

ಜರ್ ತುಮಿಂ ಹಾಂಗಾಸರ್ ಪಾವ್ಲ್ಯಾತ್ ತರ್ ತುಮ್ಕಾಂ ಪಳೆಂವ್ಕ್ ಮೆಳ್ತಾತ್ ಸಬಾರ್ ಗುಂಡಿಯೊ (ವ್ಹಾಳೊನ್ ವೆಚೆಂ ಉದಕ್ ರಾವ್‌ಲ್ಲೆಂ ತವಳ್ ಉದಕ್ ಭರೊನ್ ರಾಂವ್ಚೆ ಜಾಗೆ) ಪಳೆಂವ್ಕ್ ಮೆಳ್ತಾತ್. ನಾಗು ನಂಯ್ತ್ ಅಸಲ್ಯೊ ಸಬಾರ್ ಗುಂಡಿಯೊ ಪಳೆಂವ್ಕ್ ಮೆಳ್ತಾತ್. ಹರ್‍ಯೇಕಾ ಗುಂಡಿಯೆಕ್ ನಾಂವ್ ದೀವ್ನ್ ವೊಲಾಯ್ಲಾಂ. ತ್ಯಾ ತ್ಯಾ ನಾಂವಾಂಕ್ ಸರಿ ಜಾವ್ನ್ ಹರ್‍ಯೇಕ್ ಗುಂಡಿಯೆಕ್ ಆಪ್ಣಾಚಿಚ್ ಮ್ಹಳ್ಳಿ ಚರಿತ್ರಾ ಆಸಾ. ಪಾಂಡವಾಚೆ ದೀವ್ಳ್ ಬಾಂದ್ಚ್ಯಾಕ್ ಆಯಿಲ್ಲ್ಯಾ ಜಾಗ್ಯಾ ಲಾಗ್ಶಿಲ್ಯಾ ಪ್ರಮುಖ್ ತೀನ್ ಗುಂಡಿಯಾಚಿಂ ಚರಿತ್ರಾ ಹ್ಯೆ ಪರಿಂ ಅಸಾ.

ಎರುಗುಂಡಿ :

ಸಾಗೊಳೆಚೆಂ ಕಾಮ್ ಸಂಪ್ತಂಚ್ ಥಕ್‌ಲ್ಲ್ಯಾ ರೆಡ್ಯಾಂಕ್ ಹ್ಯಾ ಗುಂಡಿಯೆಂತ್ ನ್ಹಾಣಾಯ್ತಾನಾ ರೆಡೆ ಮಾಯಾಗ್ ಜಾಲ್ಲೆ ಖಂಯ್. ರೆಡ್ಯಾಂಕ್ ತುಳು ಭಾಶೆನ್ ಎರು ಮ್ಹಣ್ ಆಪಯ್ತಾತ್ ಜಾಲ್ಲ್ಯಾನ್ ಹ್ಯಾ ಗುಂಡಿಯೆಕ್ ಎರು ಗುಂಡಿ ಮ್ಹಣ್ ನಾಂವ್ ಪಡ್ಲಾಂ. ಎರು ಗುಂಡಿಯೆಂತ್ಲೆಂ ಉದಕ್ ಜರ್ ಸಂಪೂರ್ಣ್ ಸುಕ್ಲ್ಯಾರ್, ರೆಡ್ಯಾಚ್ಯಾ ಪಾಟಿಂ ಸಾರ್ಕೆ ದೋನ್ ಫಾತರ್ ಹಾಂಗಾಸರ್ ಪಳೆಂವ್ಕ್ ಮೆಳ್ತಾತ್ ಖಂಯ್.

ಕೋರಿಗುಂಡಿ

ಶ್ರೀ ಸೋಮನಾಥ ದೆವಾನ್ ಕೊಂಬ್ಯಾ ರುಪಿಂ ಯೇವ್ನ್ ಸಾದ್ ಹ್ಯಾ ಗುಂಡಿಯೆಲಾಗಿಂ ಘಾಲ್ಲೊ ಖಂಯ್. ಅಶೆಂ ಹ್ಯಾ ಗುಂಡಿಯೆಕ್ ಕೋರಿ ಗುಂಡಿ ಮ್ಹಣ್ ನಾಂವ್ ದಿಲಾಂ. ಕೋರಿ ಗುಂಡಿಯೆಚಿ ವಿಶೇಷತಾ ವೆಗ್ಳಿಚ್. ನ್ಹಂಯ್ ವಾಳ್ಚ್ಯಾ ದಾವ್ಯಾ ಬಗ್ಲೆಕ್ ಏಕ್ ಮಯ್ಲ್ ಪಯ್ಸ್ ಕಳಸಬೈಲು ಲಾಗಿಂ ಆಸ್ಚ್ಯಾ ಮಹಾಮ್ಮಾಯಿ ದಿವ್ಳಾಕ್ ಆನಿ ಕೋರಿಗುಂಡಿಯೆಕ್ ಲಾಗ್ಶಿಲೊ ಸಂಬಂಧ್. ಹೆಂ ದೀವ್ಳ್ ನಾಯ್ಕಾಂಚ್ಯಾ ಮೆಳಿಕ್ ಮೆಳ್‌ಲ್ಲೆಂ ಜಾವ್ನಾಸಾ. ಫೆಭ್ರವರಿ ಯಾ ಮಾರ್ಚ್ ಮಹಿನ್ಯಾಂತ್ 3 ಯಾ 5 ಯಾ 7 ದೀಸ್ ಮಹಾಮ್ಮಾಯಿ ದೀವ್ಳಾಚ್ಯಾ ಆಂಗ್ಣಾಂತ್ ನಾಯ್ಕಾಂಚ್ಯಾ ಸಂಸ್ಕ್ರತೆಕ್ ಸರಿ ಜಾಲ್ಲೊ ಕೋಲಾಟ ನಾಚೊನ್, ಕೋರಿ ಗುಂಡಿಯೆಕ್ ಯೇವ್ನ್ ಉಡ್ಚಿ ಮಾಲ್ಘಡ್ಯಾಂ ಥಾವ್ನ್ ಪಾಳ್ನ್ ಆಯಿಲ್ಲಿ ಆಜೂನ್ ಚಾಲ್ತೆರ್ ಆಸ್ಚಿ ಏಕ್ ವಿಶಿಷ್ಟ್ ಸಂಪ್ರದಾಯ್. ಹ್ಯಾ ವೆಳಾ ಸುದೆ ಪೂಜೆ (ನ್ಹಂಯ್ ಪೂಜಾ) ಚಲ್ತಾ.

ಭೂತ ಗುಂಡಿ

ನಾಂವ್ ಆಯ್ಕಾತಾನಾಂಚ್ ಸಮ್ಜಾತಾಗೀ ಹ್ಯಾ ಗುಂಡಿಯೆಕ್ ಆನಿ ಭುತಾಕ್ ಸಂಬಂಧ್ ಆಸಾ ಮ್ಹಣ್. ಮಾಲ್ಘಡ್ಯಾಂಚ್ಯಾ ಆಬಿಪ್ರಾಯೆ ಪ್ರಕಾರ್ ಹ್ಯಾ ಗುಂಡಿಯೆಂತ್ ಭುತ್ ಆಸ್‌ಲ್ಲೊ ಖಂಯ್. ನ್ಹಂಯ್ತ್ ಆಸ್‌ಲ್ಲೊ ಹೊ ಭುತ್ ನ್ಹಂಯ್ ವಾಳ್ಚ್ಯಾ ಉಜ್ವ್ಯಾ ಬಗ್ಲೆಕ್ ಆಸ್ಚ್ಯಾ ಸರ್ವ್ ಪರ್ಬುಂಗೆಲ್ಯಾ (ಕ್ರೀಸ್ತಾಂವ್) ಜಾತಿಚ್ಯಾಂಕ್ ಉಪದ್ರ್ ದಿತಲೊ, ದೆಕುನ್ ಹ್ಯಾ ಭುತಾಕ್ ಕಳಸಬೈಲು ಲಾಗಿಂ ಆಸ್ಚ್ಯಾ ಮಹಮ್ಮಾಯಿ ದಿವ್ಳಾ ಬಗ್ಲೆಕ್ ಏಕ್ ಭುತಾ ಕೊಡ್ಕೆಂ ಬಾಂದುನ್ ಜಾಗೊ ದಿಲಾ.

ಅಜೂನ್ ಹ್ಯಾ ಭುತಾಚಿ ಪುಜಾ ಚಲ್ತಾ ಆನಿ ಆಮ್ಕಾಂ ಪಳೆಂವ್ಕ್ ಮೆಳ್ತಾ.

ಹೆರ್ ಸಬಾರ್ ಅಸಲ್ಯೊ ಗುಂಡಿಯೊ ಹಾಂಗಸರ್ ಪಳೆಂವ್ಕ್ ಮೆಳ್ತಾತ್. ಮದ್ಮಲ್‌ಗುಂಡಿ, ಭಾಂಗಾರ್ ಗುಂಡಿ, ಮೀಪು ಗುಂಡಿ, ಎರ್ಮಾಳ್ ಗುಂಡಿ. ಎರ್ಪಲೆ ಗುಂಡಿ... ಹ್ಯಾ ಗುಂಡಿಯೆನಿಂ ಖೆಳ್ಚೆಂ ಸಲೀಸಾಯೆಚೆಂ ನಂಯ್. ಪಾಟ್ಲ್ಯಾ ವರ್ಸಾನಿಂಚ್ ಹ್ಯಾ ಗುಂಡಿಯಾಂನಿ ಪಡೊನ್ ಸಬಾರ್ ಜಣಾಂ ನಿರ್ಜೀವ್ ಜಾಲ್ಯಾಂತ್. ಗುಂಡಿಯೆಲಾಗಿಂ ಪಾವ್ತಾನಾ ಜಾಗ್ರುತ್ಕಾಯ್ ಗರ್ಜೆಚಿ.

ಅಸಲಿ ಏಕ್ ಅಪೂರ್ವ್ ಮಾಹೆತ್ ಆಪ್ಣಾಂವ್ಕ್ ಸಬಾರ್ ಮಾಲ್ಘಡ್ಯಾಂಚೆಂ ಸಂದರ್ಶನ್ ಗರ್ಜೆಚೆಂ ಪಡ್ಲೆಂ. ಥೊಡ್ಯಾ ಮಾಲ್ಘಡ್ಯಾ ವ್ಯಕ್ತಿಂನಿಂ ಆಮ್ಕಾಂ ಹ್ಯೆ ದಿಶಿಂ ಕುಮಕ್ ಕೆಲ್ಯಾ. ಹ್ಯಾ ವೆಳಾ ತಾಂಚೊ ಉಪ್ಕಾರ್ ಭಾವುಡ್ತಾಂವ್ ಆನಿ ತಾಂಚೆ ವಿಶಿಂ -

ಸೀತಮ್ಮ , ಗುಂಡೆಡ್ಕಾ ನಿವಾಸಿ:

ಪ್ರಸ್ತುತ್ ಗುಂಡೆಡ್ಕಾಂತ್ ವಸ್ತಿ ಕರ್ನ್ ಆಸ್ಚ್ಯಾ ಸೀತಮ್ಮಾನ್ ಜಾಯ್ತಿ ಮಾಹೆತ್ ಸಾಂಗ್ಲಿ. ಪ್ರಮುಖ್ ಜಾವ್ನ್ ಗೋಮುಖ ಕಲ್ಲು, ಜಾಗಂಟೆ ಕಲ್ಲು ಆನಿ ಕುದುರೆ ಕಲ್ಲು ವಿಶಿಂ ಮಾಹೆತ್ ದಿಲ್ಲಿ ವ್ಯಕ್ತಿ ಜಾವ್ನಾಸಾ.

ಹಾಂಗಸರ್ ಪಾಂಡವ್ ಆಯಿಲ್ಲೆ ಸತ್‌ಗೀ? ಮ್ಹಳ್ಳ್ಯಾ ಸವಾಲಾಕ್ ತಿಜಿ ಜಾಪ್ "ಆಮಿಂ ಪಳೆಂವ್ಕ್ ನಾ. ಆಮ್ಚಿಂ ಮಾಲ್ಘಡಿಂ ಸಾಂಗ್ತಾನಾ ಆಮಿಂ ಆಯ್ಕಾಲ್ಲೆಂ ತಿತ್ಲೆಂಚ್. ಫಕತ್ ಪಾತ್ಯೆಣಿ! ಜೆಂ ಕಿತ್ಂ ಆಯ್ಕಾಲಾಂ ತಿತ್ಲೆಂಚ್ ರುಜ್ವಾತ್ ದಿಂವ್ಚ್ಯಾಕ್ ಕಿತೆಂಯೀ ನಾಂ. ಮ್ಹಜ್ಯಾಕೀ ಚಡ್ ಮಾಹೆತ್ ವ್ಹಡಿಲಾಂಕ್ ಕಳಿತ್ ಆಸ್‌ಲ್ಲಿ ಪೂಣ್ ಆಜ್ ತಿಂ ನಾಂತ್ ಜಾಲ್ಲ್ಯಾನ್ ಮಾಹೆತ್ ಆಪ್ಣಾಂವ್ಚಿ ಕಷ್ಟಾಂಚಿ."

ಕ್ಲೆಮೆಂಟ್ ಡಿ�ಸಿಲ್ವ, ಗುಂಡೆಡ್ಕಾ:

ಹಾಂಗಸರ್ ಪಾಂಡವ್ ಆಯಿಲ್ಲೆ ಸತ್‌ಗೀ? ಮ್ಹಣ್ ವಿಚಾರ್‍ಲೆಲ್ಯಾ ಸವಾಲಾಕ್ ಜಾಪ್ ಜಾವ್ನ್ "ಮ್ಹಾಕಾ ಕಳಿತ್ ಆಸ್ಚಾ ಪ್ರಕಾರ್ ರುಪ್ಯಾಕ್ ವೀಸ್ ಪಯ್ಶೆ ಮಾತ್ರ್ . ಪಾಂಡವ್ ಆಯಿಲ್ಲೆ ಮ್ಹಣ್ಚಿ ಪಾತ್ಯೆಣಿ. ಕೋರಿ ಗುಂಡಿಯೆಂತ್ ಕೊಂಬ್ಯಾನ್ ಸಾದ್ ಘಾಲ್ತಾನಾ ಧಾಂವ್ಲೆ ಮ್ಹುಣ್ತಾತ್!" ಒರ್ಕು ಗುಡ್ಯಾವಿಶಿಂ ಮಾಹೆತ್ ದಿಲ್ಲಿ ಹಾಣಿಂಚ್.

ಹರೀಶ್ ನಾಯ್ಕ್ , ಕಳಸಬೈಲು. ಪ್ರಸ್ತುತ್ ಹೋಟೆಲ್ ವೆವಹಾರ್, ಬೊಂಬಯಿ:

ಕೋರಿಗುಂಡಿ ಆನಿ ಭೂತಗುಂಡಿ ವಿಶಿಂ ಸಂಪೂರ್ಣ್ ಮಾಹೆತ್ ದಿಲ್ಲೆ ಜಾವ್ನಾಸಾತ್. ಕಳಸಬೈಲುಲಾಗಿಂ ಆಸ್ಚ್ಯಾ ಮಹಮ್ಮಾಯಿ ದಿವ್ಳಾಕ್ ಪಾವ್‌ಲ್ಲ್ಯಾ ತವಳ್ ಮೊಗಾಚೊ ಎವ್ಕಾರ್ ಹಾಂಚ್ಯಾ ಕುಟ್ಮಾಥಾವ್ನ್ ಲಾಭ್ಲೊ.

ಪಾಂಡುರಂಗ ಭಟ್ , ಗುಂಡೆಡ್ಕಾ:

ಪಾಟ್ಲ್ಯಾ ಚಾಳೀಸ್ ವರ್ಸಾಂ ಥಾವ್ನ್ ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ದಿವ್ಳಾಂತ್ ಆಪ್ಲಿ ಸೆವಾ ಅರ್ಪುನ್ ಆಸಾತ್.

ಹಾಂಚೆ ಸರ್ಶಿಂ ವೆತಾನಾ ಪ್ರದೀಪ್ ಬರ್ಬೋಜ ಆಮ್ಚೆ ಸಂಗಿಂ ಆಸ್‌ಲ್ಲೆ. ಆಮಿ ಪಾವ್‌ಲ್ಲೆ ತವಳ್ ಹಾಂಗಸರ್ ಸಬಾರ್ ಕಾಜಾರಾಂ ಆಸ್‌ಲ್ಲಿಂ ತರೀ ಆಮ್ಕಾಂ ಮೊಗಾಚ್ಯಾ ಎವ್ಕಾರಾ ಸಂಗಿಂ ಬೊಂಡ್ಯಾ ಉದ್ಕಾಚೊ ಸತ್ಕಾರ್ ಲಾಭ್ಲೊ. ಆಮಿ ಥಂಯ್ಚರ್ ಪಾವ್‌ಲ್ಲೊ ಉದ್ದೇಶ್ ಸಮ್ಜೊನ್ ಭೋವ್ ಖುಶ್ ಜಾಲೆ. ಹಾತಿಂ ಘೆತ್‌ಲ್ಲ್ಯಾ ವಾವ್ರಾಕ್ ಪ್ರೋತ್ಸಾಹಾಚಿಂ ದೋನ್ ಉತ್ರಾಂ ಸಾಂಗುನ್ ತಾಣಿಯೀ ಜಾಯ್ತಿ ಮಾಹೆತ್ ದಿಲಿ. ಮುಕಾರುನ್ ತೆ ಮ್ಹಣಾಲೆ "ಎದೊಳ್ ಮ್ಹಣಾಸರ್ ಲಿಖಿತ್ ರುಪಿಂ ನಾತ್‌ಲ್ಲಿ ಮಾಹೆತ್ ಹಿ. ಶೆಕ್ಡ್ಯಾ ವರ್ಸಾಂ ಆದಿಂ ಪಾಂಡವ್ ಆಯಿಲ್ಲೆ ಮ್ಹಣ್ತಾತ್. ಹೆಂ ಪೂರಾ ಐತಿಹ್ಯ್ ಜಾವ್ನಾಸಾ. ಜಾಗ್ಯಾಶಿಂ ಗೆಲ್ಯಾರ್ ಥೊಡೆ ಹಿಶಾರೆ ಪಳೆಂವ್ಕ್ ಮೆಳ್ತಾತ್, ದುಸ್ರ್ಯೊ ರುಜ್ವಾತಿ ನಾಂತ್..."

ಹಾಂಗಾಸರ್ ದಿಲ್ಲಿ ಜಾಗ್ಯಾ ಮಾಹೆತ್ ಆಮಿಂಚ್ ಎಕ್ಟಾಂಯ್ ಕರ್ನ್ ಬರಯ್ಲಲಿ ಜಾವ್ನಾಸಾ. ಸಾಕ್ಸ್ ಯ್ಯಾ ರುಜ್ವಾತ್ ಥಾವ್ನ್ ಬರಯ್ಲಲಿಂ ಬರ್‍ಪಾಂ ಖಂಚ್ಯಾಯೀ ಚರಿತ್ರೆಂತ್ ಎದೊಳ್ಚ್ಯಾಕ್ ಆಮ್ಕಾಂ ಮೆಳೊಂಕ್ ನಾಂತ್. ಜಾಂವ್ಕ್ ಪುರೊ ಹಿ ಗಜಾಲ್ ಸತ್ ಯಾ ಫಟ್. ಪೂಣ್ ಹೊ ಜಾಗೊ ಮಾತ್ರ್ ಆಪ್ಣಾಚಿಚ್ ಮ್ಹಳ್ಳಿ ವೈಶಿಷ್ಟತಾ ವರ್ಣಿತಾ. ಜಾತಾ ತರ್ ಏಕ್ ಪಾವ್ಟಿಂಚ್ಯಾಕ್ ಭೆಟ್ ದಿಯಾ. ಪೂಣ್ ಪಳೆಂವ್ಕ್ ಸೊಭಿತ್ ದಿಸೊವ್ನ್ ಮನ್ ಪಿಸ್ವೊಂಚ್ಯಾ ಗುಂಡಿಯಾಂವಿಶಿಂ ಚತ್ರಾಯ್ ಸಾಂಬಾಳಾ!

Tags: Sannu Niddodi, Gundyandka, Konkani, Mangalore, Mangalorean, Mother Tongue

From around the world

ಗುಂಡ್ಯಡ್ಕ ನ್ಹಂಯ್ಚೆ ಫಾತೊರ್ ಕಾಣಿ ಸಾಂಗ್ತಾತ್..!

User Rating

0 Comment/s.

Post your comments

ಗುಂಡ್ಯಡ್ಕ ನ್ಹಂಯ್ಚೆ ಫಾತೊರ್ ಕಾಣಿ ಸಾಂಗ್ತಾತ&...

ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...

ನಾಮ್ಣೆಚೊ ಕೊಂಕ್ಣಿ ಸಾಹಿತಿ ಹೆರೊಲ್ಪಿಯುಸ್ ಅಂತರ್...

ಸಾಮಾಜಿಕ್ ಜಾಳಿ ಜಾಗ್ಯಾಂನಿ ಆಮ್ಚೆ ವೈಯುಕ್ತಿಕ್ ವ್...

ಹೆಲಿಕಾಪ್ಟರ್ ಮನಿ...

ಕಾಜಾರ್ ಕೆದಾಳಾ..?...

ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...

'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...

ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...

ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...

ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...

Connect

Our Address
Mangalore

Our Address
Udupi

Our Address
Dubai

From around the world

ಬರಯ್ಣಾರಾ ವಿಶಿಂ ಜಾಣಾ ಜಾ...

0 Comment/s.

Post your comments

Connect

Our AddressMangalore

Our AddressUdupi

Our AddressDubai

Our Address
Mangalore

Our Address
Udupi

Our Address
Dubai