:: www.maibhaas.com - ಮಂಗ್ಳುರ್‍ಚೆ ನಳೆ (Mangalore Tiles) ::

ಬರಯ್ಣಾರಾ ವಿಶಿಂ ಜಾಣಾ ಜಾ...

5/1/2016
ಫ್ರಾನ್ಸಿಸ್ ಫೆರ್ನಾಂಡೀಸ್ ಕಾಸ್ಸಿಯಾ

ಕೊಂಕಣಿ ರಂಗ್‍ಮಾಂಚಿಯೆಂತ್ಲೊ ವಾಗ್ ಮ್ಹಣ್ ಫಾಮಾದ್. ಕೇವಲ್ ನಾಟಕ್ ಆನಿ ನಟನ್ ಮಾತ್ರ್ ನ್ಹಂಯ್ ಆಸ್ತಾಂ ಲೇಖನಾಂ ಆನಿ ಕವಿತಾಂ ಲಿಕ್ಲ್ಯಾಂತ್. ಹಾಚ್ಯಾ ಲೇಖನಾಂನಿ ವಿಶಾಲತಾ ಆನಿ ವಿವಿಧತಾ ಆಸ್ತಾ. ಮಂಗ್ಳುರಿ ಕ್ರೀಸ್ತಾಂವ್ ಸಮಾಜೆಚ್ಯಾ ವೆವೆಗ್ಳ್ಯಾ ಕುಸಾಂಚೆರ್ ಮಾತ್ರ್ ನ್ಹಂಯ್, ಸಗ್ಳ್ಯಾ ದೇಶಾಂತ್ ಥಾವ್ನ್ ವಿಂಚುನ್ ಕಾಡ್ಲೆಲ್ಯಾ ಥೊಡ್ಯಾ ಘಡಿತಾಂವಯ್ರ್ ಲಿಖ್ತಾ. ಸಾಮಾನ್ಯ್ ವಿಶಯಾಂಚೆರ್ ಬರಯ್ತಾನಾಂಯೀ ತಾಂತುಂ ಕಿತೆಂ ತರೀ ನವೆ ಅನುಭವ್ ಹಾಡ್ನ್ ಲೇಖನ್ ಅಭಿರುಚಿಚೆಂ ಕರ್ತಾ. ಆಪುಣ್ ಜಲ್ಮಾಲ್ಲ್ಯಾ ತಶೆಂ ವಸ್ತಿ ಕರ್ನ್ ಆಸ್‍ಲ್ಲ್ಯಾ ಮಂಗ್ಳುರ್, ಮುಂಬಯ್ ಆನಿ ದುಬಾಯ್ ಗಾಂವಾಂ ವಿಷ್ಯಾಂತ್ ತಾಣೆ ಬೋವ್ ಆತ್ಮೀಯತೆನ್ ಆನಿ ಸೊಂಪ್ಯಾ ಶೈಲೆನ್ ಲೇಖನಾಂ ಬರಯ್ಲ್ಯಾಂತ್. ತಾಚಿಂ ಲೇಖನಾಂ ಆನಿ ಕವಿತಾ ಪಯ್ಣಾರಿ, ದಿವೊ, ಕುಟಾಮ್ ಹಫ್ತ್ಯಾಳ್ಯಾಂನಿ ಫಾಯ್ಸ್ ಜಾಲ್ಯಾಂತ್. ತಾಚ್ಯಾ ಉಂಚ್ಲ್ಯಾ ಸಾಹ್ಯ್ ನಟನಾಕ್ ಲಾಗೊನ್ ತಾಕಾ 'ಕೊಮಿಡಿ ಕಿಂಗ್' ಮ್ಹಳ್ಳೆಂ ನಾಂವ್ ಪಡ್ಲಾಂ. ಸಬಾರ್ ಫಾಮಾದ್ ನಾಟಕ್ ಬರವ್ನ್, ದಿಗ್ದರ್ಶುನ್, ನಟನ್ ಸಯ್ತ್ ಕೆಲ್ಯಾಂತ್. ಆಯ್ಲೆವಾರ್ಚೊ 'ಮ್ಹಾತಾರೊ ಚರ್ಬೆಲ್ಯಾ' ನಾಟಕ್ ಸಂಸಾರಾಚ್ಯಾ ಸಬಾರ್ ಜಾಗ್ಯಾಂನಿ ಖೆಳಾಯ್ಲ್ಯಾಂತ್.
ಕೇವಲ್ ಸಾಹಿತ್ಯ್ ಶೆತಾಂತ್ ನಹಿಂ ಆಸ್ತಾಂ, ಸಮಾಜೆ ಸೆವೆಂತ್‌ಯೀ ಜಾಯ್ತೊ ವಾವ್ರ್ ದಿಲಾ. ಮಾಯ್‌ಗಾಂವ್ಚಾ ದುಬ್ಳ್ಯಾ ಕುಟ್ಮಾಂಕ್ ಸಹಾಯ್, ಸಭಾರ್ ಕೊಂಕಣಿ ಪತ್ರಾಂಕ್ ಆನಿ ಕೊಂಕಣಿ ಕಾರ್ಯಾಂಕ್ ಕುಮಕ್ ಕೆಲಾ. 'ಆಮ್ಚಿ ಖುರ್ಸಾಚಿ ವಾಟ್' ಮ್ಹಳ್ಳೊ ಖುರ್ಸಾವಾಟೆಚೊ ಬೂಕ್ ದುಬಾಯ್ಚಾ ಸೈಂಟ್ ಮೇರಿ ಇಗರ್ಜೆಚಾ ಲೊಕಾಂಕ್ ಕಿತೆಂಚ್ ಮುನಾಫೊ ನಾಸ್ತಾಂ ವಾಂಟ್ಲಾ. 'ದಾಯ್ಜಿ ದುಬಾಯಿ' ಹಾಚೊ ಏಕ್ ಪ್ರಮುಖ್ ಖಾಂಬೊ ಜಾಲ್ಯಾರ್‌ಯೀ, ಫ್ರಾನ್ಸಿಸ್ ಫೆರ್ನಾಂಡೀಸ್ ಕಾಸ್ಸಿಯಾ, ಸರ್ವ್ ಕೊಂಕಣಿ ಲೊಕಾಂಚೊ ಲಾಗ್ಸಿಲೊ ಆನಿ ಮೊಗಾಚೊ 'ದಾಯ್ಜಿ'.

80.5

User Rating

ಎಕಾ ತೆಂಪಾರ್ ತಾಂಬ್ಡೆ ನಳೆ ಜಾವ್ನಾಸ್‍ಲ್ಲೆ ಗ್ರೇಸ್ತ್ ಕಾಯೆಚೊ ಘುರ್ತ್. ಗ್ರೇಸ್ತ್ ಮನ್ಶಾಂಚಿಂ ಘರಾಂ ಮಾತ್ರ್ ನಳ್ಯಾಂಚಿಂ ಜಾವ್ನಾಸ್‍ಲ್ಲಿಂ ಆನಿಂ ದುಬ್ಳ್ಯಾಂಚಿಂ ಕೊಲ್ವಾಚಿಂ. ತ್ಯಾ ತೆಂಪಾರ್ ಸಿಮೆಂಟಿಚೆಂ ಟೆರೆಸ್ ಮ್ಹಳ್ಳೆಂ ನಾತ್‍ಲ್ಲೆಂ.

ಉಪ್ರಾಂತ್ ಸಿಮೆಂಟ್^ವೆಗಾನ್ ಪ್ರಮುಖ್ ಜಾವ್ನ್ ಯೆತಾನಾ, ನಳೆ ಸವ್ಕಾಸ್ ಮಾಯಾಗ್ ಜಾಂವ್ಕ್ ಲಾಗ್ಲೆ ಆನಿ ಹರ್ಯೆಕ್ ಕಡೆಂಯಿ ಟೆರೆಸಾಚಿಂ ಘರಾಂ ದಿಸೊಂಕ್ ಲಾಗ್ಲಿಂ. 'ತಾಣೆಂ ಟೆರೆಸಾಚೆಂ ಘರ್ ಬಾಂಧ್ಲೆಂ...', 'ಹಾಣೆಂ ಟೆರೆಸಾಚೆಂ ಘರ್ ಬಾಂಧ್ಲೆಂ...' ಮ್ಹಣ್ ಆಯ್ಕೊಂಕ್ ಮೆಳ್ತಾಲೆಂ. ಆನಿ ಹೆಂ ಪೂರಾ ಘಡ್ಲೆಂ ಗಲ್ಫಾಚ್ಯಾ ಪಯ್ಶಾಂಚ್ಯಾ ದರ್ಬಾರಾನ್. ಪುಣ್ ಕಿತೆಂ ಉಪ್ಕಾರ್? 'ಅರ್ಧ್ಯಾರ್ ಆಯಿಲ್ಲಿ ವ್ಹಡ್ವಿಕಾಯ್ ಶಾಶ್ವಿತ್ ನ್ಹಂಯ್' ಮ್ಹಳ್ಳ್ಯಾಬರಿಂ ಸಿಮೆಂಟಿಚಿಂ ಟೆರೆಸಾಂ ಫುಟೊಂಕ್ ಲಾಗ್ಲಿಂ, ಪಾವ್ಸಾಂತ್ ಉದಾಕ್ ಗಳೊಂಕ್ ಲಾಗ್ಲೆಂ. ಗರ್ಮೆಂತ್ ಧಗ್ ಸೊಸಾನಾ ಜಾಲೊ ಆನಿ ಜಾಯ್ತ್ಯಾಂಕ್ ಭೊಗ್ಲೆಂ ನಳೆಚ್ ಬರೆ ಮ್ಹಣ್ ಆನಿ ಆತಾಂ ಪರತ್ ನಳೆ ಝಳ್ಕೊಂಕ್ ಲಾಗ್ಲೆ.

ಪುಣ್ ನಳೆ ಕೆದಾಳಾ ಝಳ್ಕೊಂಕ್ ಲಾಗ್ಲೆ, ತಾಕಾ ಭಾರತಾಂತ್ ಕೆದಾಳಾ ಜಲ್ಮ್ ದಿಲೊ, ಹೆಂ ಜಾಯ್ತೆ ನೆಣಾಂತ್. ಪಾಕ್ಯಾ ಪಂದಾ ರಾಂವ್ಚೆ, ತಾಂಚ್ಯಾಚ್ ಪಾಕ್ಯಾರ್ ಆಸ್ಚ್ಯಾ ನಳ್ಯಾಂಕ್ ವಳ್ಕನಾಂತ್.

2016 ಇಸ್ವೆಂತ್ ಮಂಗ್ಳುರ್ಚ್ಯಾ ನಳ್ಯಾಂಕ್ ಸುಮಾರ್ 150-151 ವರ್ಸಾಂ ಜಾತಾತ್. ಆನಿ ಹ್ಯಾ ನಳ್ಯಾಂಕ್ ಮಂಗ್ಳುರ್ಚೆ ನಳೆ ಮ್ಹಣ್ ನಾಂವ್ ದೀಂವ್ಕ್ ಪ್ರಮುಖ್ ಕಾರಣ್, ಏಶಿಯಾಂತ್ ಪ್ರಥಮ್ ನಳೆ ಉತ್ಪಾದನ್ ಜಾಲ್ಲೆ ಮಂಗ್ಳುರಾಂತ್. ಆಮ್ಚ್ಯಾ ಪಶ್ಚಿಮ್ ಕರಾವಳಿಂತ್ ಕಿತ್ಲೆಯಿ ನಳ್ಯಾಂ ಕಾರ್ಖಾನೆ ಉಬ್ಜಾತಾತ್ ಆನಿ ನಳೆ ತಯಾರ್ ಕರ್ತಾತ್ ತರೀ, 'ಮಂಗ್ಳುರ್ಚೆ ನಳೆ' ಮ್ಹಣ್ ವೊಲಾಯ್ತಾತ್. ಎಕಾ ತೆಂಪಾರ್, ಹ್ಯಾ ನಳ್ಯಾ ಕಾರ್ಖಾನ್ಯಾಂನಿ ತೀನ್ ಲಾಖಾಂ ವಯ್ರ್ ಲೋಕ್ ಕಾಮ್ ಕರ್ನ್ ಆಪ್ಲೊ ದಿಸ್ಪಡ್ತೊ ಗ್ರಾಸ್ ಜೊಡ್ತಾಲೊ.

1939 ಇಸ್ವೆಂತ್ ದುಸ್ರೆಂ ಮಹಾ ಝುಜ್ ಸುರ್ವಾತ್ ಜಾಲ್ಲೆಂಚ್ ಹ್ಯಾ ಮಂಗ್ಳುರ್ ನಳ್ಯಾಂಕ್ ಎಕ್‍ಚ್ ಪಾವ್ಟಿಂ ಖಾಯ್ಸ್ ವಾಡ್ಲಿ. ಭಾರತಾಚ್ಯಾ ಹಜಾರೊಂ ಜಾಗ್ಯಾಂನಿ ಸೈನಿಕ್ ಠಾಣಿಂ ಬಾಂದ್ಚಿ ಗರ್ಜ್ ಪಡ್‍ಲ್ಲ್ಯಾನ್ ನಳ್ಯಾಂಚೊ ವಹಿವಾಟ್ ಆನಿ ದಂಧೊ ವಾಡ್ಲೊ.

ಮಂಗ್ಳುರ್ಚೆ ನಳೆ 1865 ಇಸ್ವೆಂತ್ ಜಲ್ಮಾಲೆ. ತ್ಯಾ ವರ್ಸಾ ತಯಾರ್ ಜಾಲ್ಲ್ಯಾ ನಳ್ಯಾಂಚೆರ್ 'ಬಾಸೆಲ್ ಮಿಶನ್ ನಳೆ' ಮ್ಹಣ್ ಛಾಪೊ ಆಸ್‍ಲ್ಲೊ. ಮಂಗ್ಳುರಾಂತ್ ಯೇವ್ನ್ ವಸ್ತಿ ಕೆಲ್ಲ್ಯಾ ಜರ್ಮನ್ ಧರ್ಮ್‍ಪ್ರಚಾರಕ್ ಕ್ರೀಸ್ತಾಂವ್ ಧರ್ಮಾಂತ್ ಸೆರ್ವಾಲ್ಲ್ಯಾ ನವ್ಯಾ ಕ್ರೀಸ್ತಾಂವಾಂಕ್ ಕಾಮ್ ದಿಂವ್ಚ್ಯಾ ಖಾತಿರ್ ಚಿಂತುಂಕ್ ಪಡ್ಲೊ. ತಾಚ್ಯಾಲಾಗಿಂ ಆರ್ಥಿಕ್ ಪರಿಸ್ಥಿತಿ ಬರಿ ನಾತ್‍ಲ್ಲ್ಯಾನ್ ಲಾಗ್ಸಾರ್ ಆಸ್‍ಲ್ಲ್ಯಾ ಕಚ್ಚಾ ವಸ್ತು ಆನಿ ಮಾತ್ಯೆನ್ ಸುರ್ವಾತ್ ಕರ್ಚೆಂ ತಸಲೆಂ ಕಾಮ್ ಮ್ಹಳ್ಯಾರ್ ಫಕತ್ ನಳ್ಯಾಂಚೆಂ ಮಾತ್ರ್ ಆಸ್‍ಲ್ಲೆಂ, ಉಪ್ರಾಂತ್ ತಾಣೆ ಯಾಂತ್ರಿಕ್ ವಸ್ತ್ರಾಂ-ಮಾಗ್, ಮಿಶನ್ ಸತ್ರ್ಯೊ, ವ್ಹಡ್ಲ್ಯಾ ಪ್ರಿಂಟಿಂಗ್ ಪ್ರೆಸ್ಸಾಚಿ ವ್ಯವಸಾಯ್ ಸುರ್ವಾತ್ ಕರ್ನ್ ಹಜಾರೊಂ ಲೊಕಾಕ್ ಮರ್ಯಾದಿಚೆಂ ಕಾಮ್ ದಿಲೆಂ. ಪುಣ್ ಹಾಂತ್ಲೆಂ ಅತಿ ವ್ಹಡ್ ಉದ್ಯಮ್ ಮ್ಹಳ್ಯಾರ್ ನಳ್ಯಾಂಚೆ ಕಾರ್ಖಾನೆ ಜಾಂವ್ಕ್ ಪಾವ್ಲೆ.

ಮಂಗ್ಳುರ್ಚಾ ಬಲ್ಮಠಾಂತ್ ನಳ್ಯಾಂಕ್ ಫಾವೊ ಜಾಲ್ಲಿ ತಾಂಬ್ಡಿ ಮಾತಿ ಧಾರಾಳ್ ಆಸ್‍ಲ್ಲ್ಯಾನ್ ಫ್ಲೆಬಿಸ್ಟ್ ಮ್ಹಳ್ಳ್ಯಾ ಜರ್ಮನ್ ಧರ್ಮ್‍ಪ್ರಚಾರಕಾನ್ ಸ್ವತಾಚ್ಯಾ ಜವಾಬ್ದಾರೆನ್ ಸಂಪೂರ್ಣ್ ಏಕ್ ನಳ್ಯಾ ಕಾರ್ಖಾನೊ 1865 ಇಸ್ವೆಂತ್ ಉಘಡ್ಲೊ. ತ್ಯಾ ದಿಸಾಂನಿ ಮಂಗ್ಳುರಾಂತ್ ಉತ್ಪಾದನ್ ಜಾಂವ್ಚೆ ತಸಲೆ ಬರೆ ನಳೆ ಕೇವಲ್ ಫ್ರಾನ್ಸಾಂತ್ ಮಾತ್ರ್ ತಯಾರ್ ಜಾತಾಲೆ! ಪುಣ್ ಹ್ಯಾ ಧರ್ಮ್‍ಪ್ರಚಾರಕಾಕ್ ಹ್ಯಾ ದಂದ್ಯಾಂತ್ ಲಾಬ್ ಜಾಂವ್ಕ್ ನಾ. ತಾಕಾ ಪರತ್ ಆಪ್ಲ್ಯಾ ಮಾಯ್‍ಗಾಂವಾಕ್ ಪಾಟಿಂ ವಚಾಜೆ ಪಡ್ಲೆಂ. ತಾಚೊ ಕಾರ್ಖಾನೊ ಬಂದ್ ಪಡ್ಲೊ. ತೊ ಬಾಸೆಲ್ ಗಾಂವಾಕ್ ಪರತ್ ವೆತಚ್ ಫ್ರಾನ್ಸಾಚ್ಯಾ ಆಲ್ಸೆಸ್ ಗಾಂವಾಂತ್ ವಚುನ್ ಥಂಯ್ಸರ್ ನಳೆ ಕರ್ಚ್ಯಾ ವಿಷ್ಯಾಂತ್ ಸಂಪೂರ್ಣ್ ಮಾಹೆತ್ ಜೋಡ್ನ್ ಪರತ್ ಮಂಗ್ಳುರಾಕ್ ಪಾಟಿಂ ಆಯ್ಲೊ. ಯೆತಾನಾ ಆಪ್ಣಾ ಸಂಗಿಂ ಕಾರ್ಖಾನ್ಯಾಚಿಂ ಥೊಡಿಂ ಯಂತ್ರೋಪಕರಣಾಂ ಹಾಡ್ನ್ ಆಯ್ಲೊ. ತಶೆಂಚ್ 1868 ಇಸ್ವೆಂತ್ ಮಂಗ್ಳುರ್‍ಚಾ ನೇತ್ರಾವತಿ ನ್ಹಂಯ್ಚ್ಯಾ ತಡಿರ್ ಆಪ್ಲೊ ಕಾರ್ಖಾನೊ ಬಾಂದ್ಲೊ. ಆಜ್ ತೊ ಭಾರತಾಂತ್ ಅತಿ ವ್ಹಡ್ ನಳ್ಯಾ ಕಾರ್ಖಾನೊ ಜಾವ್ನಾಸಾ.

ಥೊಡ್ಯಾ ಕಾಳಾನ್ ಹೆ ನವೆ ನಳೆ ಕರ್ಚೊ ಗುಪಿತ್ ಉಪಾಯ್ ಪ್ರಗಟ್ ಜಾಲೊ. ಆನಿ ಮಿಶನರಿಚ್ಯಾ ಕಾರ್ಖಾನ್ಯಾಂತ್ ಕಾಮ್ ಕರ್ನ್ ಆಸ್‍ಲ್ಲ್ಯಾ ಆಲೆಕ್ಸಾಂಡರ್ ಪಾಯ್ಸ್ ಆಲ್ಬುಕರ್ಕ್ ಮ್ಹಳ್ಳ್ಯಾ ಮಂಗ್ಳೂರಿ ಕ್ರೀಸ್ತಾಂವ್ ಎಕ್ಲ್ಯಾನ್ ಪಾಣೆಮಂಗ್ಳುರಾಲಾಗಿಂ, ನಂದಾವರಾಂತ್ ಆಪ್ಲೊಚ್ ಏಕ್ ಕಾರ್ಖಾನೊ ಉಬೊ ಕೆಲೊ. ತಾಣೆ ಆಪ್ಲೆ ನಳೆ ಗೊಂಯಾಂತ್ ಪೊರ್ಚುಗಿಸಾಂಕ್ ಧಾಡ್ನ್ ಬರೆ ಪಯ್ಶೆ ಕಮಾಯ್ಲೆ. ಆನಿ ಖಾಯ್ಸ್ ವಾಡ್‍ಲ್ಲ್ಯಾನ್ ಮಂಗ್ಳುರ್ ಬೊಳಾರ್-ಚ್ಯಾ ದರ್ಯಾತಡಿರ್ 1875 ಇಸ್ವೆಂತ್ ಆಪ್ಲೊ ಆನ್ಯೇಕ್ ಕಾರ್ಖಾನೊ ಉಬೊ ಕೆಲೊ ತರಿ 1877 ಇಸ್ವೆಂತ್ ವ್ಹಡ್ಲೆಂ ಆವ್ರ್ ಯೇವ್ನ್ ಸಂಪೂರ್ಣ್ ಕಾರ್ಖಾನೊ ನಾಸ್ ಜಾಲೊ. ತಾಣೆ ಧಯ್ರ್ ಸಾಂಡಿನಾಸ್ತಾಂ, ತ್ಯಾಚ್ ಜಾಗ್ಯಾರ್ ಕಾರ್ಖಾನೊ ಪರತ್ ಉಬೊ ಕೆಲೊ. ಆನಿ ಹೊ ಕಾರ್ಖಾನೊ ಧಾ ಎಕ್ರೆ ಸುವಾತೆರ್ ವಿಸ್ತಾರೊನ್ ಆಸ್‍ಲ್ಲೊ. ತಸೆಂಚ್ ಭಾರತಾಚ್ಯಾ ಅತೀ ವ್ಹಡ್ ಕಾರ್ಖಾನ್ಯಾಂ ಪಯ್ಕಿ ಏಕ್ ಜಾಂವ್ಕ್ ಪಾವ್ಲೊ. ಹೆ 'ಆಲ್ಬುಕರ್ಕ್ ನಳೆ' ಪೂರ್ವ್ ಆಫ್ರಿಕಾ, ಆಸ್ಟ್ರೇಲಿಯಾ ಪರ್ಯಾಂತ್ ಪಾವ್ಲೆ!

ಮಂಗ್ಳುರ್ಚೆ ನಳೆ ಆತಾಂ ಸಂಸಾರಾಂತ್ ಉತ್ತಮ್ ಥರಾಚೆ ಜಾವ್ನಾಸಾತ್. ಭಾರತ್ ಆನಿ ಪಾಶ್ಚಾತ್ಯ್ ತಸೆಂ ಪೂರ್ವ್ ದೆಶಾಂನಿ ಮಂಗ್ಳುರ್ಚ್ಯಾ ನಳ್ಯಾಂಚೆಂ ನಾಂವ್ ಆಸಾ ತರೀ ಆತಾಂ ಜಪಾನಾಂತ್‍ಯಿ ಬರೆ ನಳೆ ತಯಾರ್ ಜಾಂವ್ಕ್ ಲಾಗ್ಲ್ಯಾತ್. ಪುಣ್ ಮಂಗ್ಳುರ್ಚೆ ನಳೆ ತೆ ಮಂಗ್ಳುರ್ಚೆ ನಳೆಚ್. ಕಾರ್ಖಾನೊ ಕಾರ್ವಾರ್ ಜಾಂವ್, ಭಟ್ಕಳ್ ಜಾಂವ್ ವ ಗೊಂಯಾಂ ಜಾಂವ್, ಹೊನ್ನಾವರ್, ಕುಂದಾಪುರ್ ವ ಉಡುಪಿ ಜಾಂವ್, ಸಂಸಾರ್ ಮ್ಹಣ್ತಾ 'ಮೆಂಗಲೂರ್ ಟ್ಯಾಲ್ಸ್' (Mangalore Tiles).

ಪುಣ್ ಹ್ಯಾ ಸಿಮೆಂಟಿಚ್ಯಾ ಕಾಳಾರ್ ನಳ್ಯಾಂಕ್ ಲೊಕಾಂನಿ ಪಯ್ಸ್ ದವರ್ಲ್ಯಾರೀ ಸಂಸಾರ್ ನಳ್ಯಾ ಪಾಟ್ಲ್ಯಾನ್ ಧಾಂವ್ತಾ. ಆಮ್ಚ್ಯಾ ಕ್ರೀಸ್ತಾಂವ್ ಧನಿಯಾಂಚ್ಯಾ ಹಾತಾಂತ್ ಆಸ್‍ಲ್ಲೆ ಜಾಯ್ತೆ ನಳ್ಯಾ ಕಾರ್ಖಾನೆ ಪರ್ಕ್ಯಾ ಜಾತಿಚ್ಯಾ ಹಾತಾಂನಿ ಗೆಲ್ಯಾಂತ್. ಆತಾಂಚಿ ಪಿಳ್ಗಿ ಹೊ ವಹಿವಾಟ್ ಮುಂದರ್ಸುಂಕ್ ಸಕಾನಾ. ಪುಣ್ ಹಿಂದು ವ ಕ್ರೀಸ್ತಾಂವ್, ಮುಸ್ಲಿಮ್ ವ ಕೊಂಕ್ಣೆ, ಕೊಣೀ ಚಲಂವ್ದಿ, ನಳೆ ಮಾತ್ರ್ ಮಂಗ್ಳುರ್ಚಾ ನಾಂವಾನ್ ಪರ್ಜಳ್ತಾತ್. ಖಂಯ್ಸರ್ ಹೆ ನಳೆ ಪಾವ್ತಾತ್, ಥಂಯ್ಸರ್ ಮಂಗ್ಳುರ್ಚೆ ನಾಂವ್ ಪರ್ಜಳ್ತಾ.

2007 ಇಸ್ವೆ ಉಪ್ರಾಂತ್ ಸಬಾರ್ ನಳೆ ಕಾರ್ಖಾನೊಂ ಬಂದ್ ಜಾಲ್ಯಾಂತ್. ಕಚ್ಚಾ ವಸ್ತುಂ ಆತಾಂ ಮೆಳೊಂಕ್ ಕಷ್ಟ್ ಆನಿ ಫಾವೊ ತೆ ಬರೆ ಕಾಮೆಲಿ ಮೆಳಾನಾಂತ್. ಆನಿ ಫ್ಲ್ಯಾಟ್ ಸಿಸ್ಟಮಾಂ ವರ್ವಿಂ ನಳ್ಯಾಂಚ್ಯಾ ಘರ್ಚೆಂ ಖಾಯ್ಸ್ ಮಸ್ತು ಉಣೆಂ ಜಾಲ್ಯಾ.

ಲಾಂಬ್ ಜಿಯೊಂ ಪಾಶ್ಚಾತ್ಯ್ ಧರ್ಮ್ ಪ್ರಚಾರಕ್ ಆನಿ ಲಾಂಬ್ ಜಿಯೊಂ ಮಂಗ್ಳುರ್ ಆನಿ ಮಂಗ್ಳುರ್ಚೆ ನಳೆ.

Tags: Mangalore Tiles. albuquerque tile factory, Mangalorean Tiles, Konkani, Mangalore, Mangalorean, Mother Tongue

From around the world

ಮಂಗ್ಳುರ್‍ಚೆ ನಳೆ (Mangalore Tiles)

User Rating

0 Comment/s.

Post your comments

ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...

'ಪದ್ಮಶ್ರೀ' ಪ್ರಶಸ್ತಿ ಜೊಡ್ಲಲೊ ಅಕ್ಶರ್ ಸಾಂತ್ - ...

ಹೆರೊಲ್ಪಿಯುಸ್: ಏಕ್ ಅವ್ಚಿತ್ ಭೆಟ್...

ಯುವಜಣಾಂಕ್ ಪ್ರೇರಣ್ - ಜೆಸ್ಸಿಕಾ ಆನ್ನಾ ಲಿಝಾ...

ಆಸ್ತ್ ........

ಭಾರತಾಚಿಂ ಖಬ್ರೆ ಟಿವಿ ಚಾನೆಲಾಂ ಮರಣ್ ಪಾವ್ಲ್ಯ...

ನಾಂವ್ ಬದಲ್ಲ್ಯಾನ್ ಗಾಂವ್ ಬದಲ್ನಾಂ...!...

ಮಂಗ್ಳುರ್‌ಚೊ ಖ್ಯಾತ್ ಗ್ರಾಫೊಲೊಜಿಸ್ಟ್, ಸ್ಟೇ&...

ನಗೊರೊ - ಜಪಾನಾಂತ್ಲೊ ವಿಚಿತ್ರ್ ರಿವಾಜೆಚೊ ಬಾವ್...

ಮೊಂತಿ ಫೆಸ್ತ್ ಫರಂಗಿಪೆಟ್ ಮೊಂತೆಮರಿಯಾನೊ ಕೊವ&...

ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...

ನಾಮ್ಣೆಚೊ ಕೊಂಕ್ಣಿ ಸಾಹಿತಿ ಹೆರೊಲ್ಪಿಯುಸ್ ಅಂತರ್...

ಸಾಮಾಜಿಕ್ ಜಾಳಿ ಜಾಗ್ಯಾಂನಿ ಆಮ್ಚೆ ವೈಯುಕ್ತಿಕ್ ವ್...

ಹೆಲಿಕಾಪ್ಟರ್ ಮನಿ...

ಕಾಜಾರ್ ಕೆದಾಳಾ..?...

ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...

'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...

ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...

ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...

ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...

Connect

Our Address
Mangalore

Our Address
Udupi

Our Address
Dubai