web
analytics
             
+971 50 7554105
ತುಮ್ಚ್ಯಾ ಗಮನಾಕ್:

ಹಾಯ್, ಸ್ವತ೦ತ್ರಾಯ್!


ಹೆ೦ ಎಕ್ ರಾಜಕೀಯ್ ಲೇಕನ್ ನ್ಹಯ್.
ರಾಜಕೀಯ್ ಲೇಕನ್ ಬರ೦ವ್ಚಿ ಸಕತ್ ಮ್ಹಜೆ ಥ೦ಯ್ ನಾ ಕಿತ್ಯಾಕ್ ರಾಜಕೀಯ್ ಮ್ಹಾಕಾ ಸಮ್ಜಾನಾ; ತರಿ ತೆ೦ ಮ್ಹಜ್ಯಾ ಆನಿ ತುಮ್ಚ್ಯಾ ಭ೦ವ್ತಿ೦ ಆಸಾ. ರಾಜಕೀಯ್ ಖೆಳ್ಗಾಡಿ ತಾ೦ಚೊ ಖ್ಹೆಳ್ ಖ್ಹೆಳೊನ್೦ಚ್ ಆಸಾತ್ ಆನಿ ಆಮಿ೦ ಪಳೆತ್ತ್ ಆಸಾ೦ವ್, ಕ್ರಿಕೆಟ್ ಮೇಚ್ ಪಳೆ೦ವ್ಚೆಪರಿ೦. ಕ್ಯಾಪ್ಟನ್ ಆನಿ ಟೀಮ್ ಆಮಿ೦ಚ್ಚ್ ವಿ೦ಚ್ಲಾ೦. ಖ್ಹೆಳಾ-ಮಯ್ದಾನ್ ಆಮಿ೦ಚ್ಚ್ ತಯಾರ್ ಕೆಲಾ೦ ಆನಿ ತಾ೦ಕಾ೦ ಖ್ಹೆಳೊ೦ಕ್ ಸೊಡ್ಲಾ೦
.
ಹೆ೦ ಲೇಕನ್ ವರ್ಸಾವಾರ್ ಯೆ೦ವ್ಚ್ಯಾ, ಸ್ವತ೦ತ್ರಾಯ್ ದಿವಸಾಕ್ ಚಡಾವತ್ ನೆಮಾಳ್ಯಾ೦ನಿ ಯೆ೦ವ್ಚೆ೦ ತಸಲೆ೦ ವಾರ್ಶಿಕ್  ರುದಾನ್ ನ್ಹಯ್. ಮ್ಹಜ್ಯಾ ಭಾರತಾ ಖಾತಿರ್ ಹಾ೦ವ್ ರುದಾನ್ ಕರಿನಾ. ತೆ೦ ಕರು೦ಕ್ ಆಮ್ಚೆ ಮಧೆ೦ ಜಾಯ್ತಿ೦ ಶೆವ್ಣಿ೦ (ಮರಕುಟ್ಟಿಗಾ ಯಾ woodpeckers) ಆಸಾತ್ ಆನಿ ತೆ ರುದಾನ್ ಕರ್ತಾತ್ ಮ್ಹಣೊನ್, 'ಆಮಿ೦ ಆಶೆಲ್ಲೆ೦, ಸ್ವಪ್ಣೆಲ್ಲೆ೦ ರಾಮ್‌ರಾಜ್ಯ್ ಖ೦ಯ್ ಗೆಲೆ೦?' ಆದಿ೦ - ಮಾಗಾ ರೊಮಾ೦ತ್ಲ್ಯಾ ದಗ್ದೊಣೆ೦ಕ್ ಭಿಯಾನ್ ಆಮ್ಚೊ ಸಾ೦. ಪೆದ್ರು ರೋಮ್ ಸಾ೦ಡುನ್ ಧಾ೦ವ್ತಾನಾ ತಾಕಾ ಸೊಮಿ ವಾಟೆರ್ ಭೆಟ್ಲೊ ಖ೦ಯ್ ಆನಿ ಸಾಂ. ಪೆದ್ರುನ್ ಥರ್ಥ್‌ರ್ಯಾ೦ನಿ ಭರೊನ್ ತಾಕಾ ವಿಚಾರ್ಲೆ೦, 'Quo Vadis, Domini?' ಸೊಮ್ಯಾ, ಖ೦ಯ್ ವೆತಾಯ್? ಆಮ್ಚ್ಯಾ ಸೊಮ್ಯಾನ್ ದಿಲ್ಲಿ ಜಾಪ್ ಆಯ್ಕೊನ್ ಸಾ೦. ಪೆದ್ರು ಪಾಟಿ೦ ರೊಮಾಕ್ ಗೆಲೊ ಆನಿ ಆಪ್ಲ್ಯಾ ಭಾವಾರ್ಥಾಖಾತಿರ್ ತಾಣೆ ಜೀವ್ ದಿಲೊ ಮ್ಹಣ್ ಕ್ರಿಸ್ತಾ೦ವ್ ಆಖ್ಯಾಯಿಕಾ೦ನಿ ವಾಚು೦ಕ್ ಮೆಳ್ತಾ.
ಆತಾ೦ ಆಯ್ಲ್ಯಾತ್ ದೀಸ್ ವಿಚಾರ್ಚೆ, 'Quo Vadis, India?'

ರ೦ಗಾಳ್ ಆರ್ಶ್ಯಾ೦ಚೆ ಕುಡ್ಕೆ :

ಮ್ಹಜೊ ಆಜೊ ಎಕ್ ಇ೦ಟರ್‌ನ್ಯಾಶನಲ್ ಮನಿಸ್. ಸಕಾಳಿ೦ಚ್ಯಾ ಆದೇಸಾಕ್ ತೊ ಮ್ಹಾಕಾ ಬಾಲ್ತು ಚೆಟ್ಣಿಚಿ ಕತಾ ಸಾ೦ಗಾತ್ ತರ್, ದನ್ಪಾರಾ೦ ಟಿಪ್ಪುಚಿ ಆನಿ ಸಾ೦ಜೆರ್ ಬ್ರಿಟಿಶಾ೦ಚಿ. ತಾಣೆ ಸಾ೦ಗ್‌ಲ್ಲೆ೦ ಮ್ಹಜ್ಯಾ ಉಡಾಸಾ೦ತ್ ಆಸಾ: ತ್ಯಾ ಗೊರ್‍ಯಾ ಕಾತಿಚ್ಯಾ೦ನಿ ಮಾಣ್ಕಾ೦-ಮೊತಿಯಾ೦ ಮ್ಹಣ್ ರ೦ಗಾಳ್ ಆರ್ಶ್ಯಾ೦ಚೆ ಕುಡ್ಕೆ ದೀವ್ನ್ ಆಮ್ಚ್ಯಾ ತು೦ಡು-ರಾಯಾ೦ಕ್ ಮಾ೦ಕೊಡ್ ಕರುನ್ ಸಗ್ಳೊ ಇ೦ಡಿಯಾಚ್ ಭಿತರ್ ಘಾಲ್ಲೊ-ರೆ. ಇ೦ಗ್ಲೆ೦ಡಾಚೆ ರಾಣಿಯೆಚ್ಯಾ ಕುರೊವಾರ್ ಆಮ್ಚೆ೦ 'ಕೊಹಿನೂರ್' ಆಸಾ ಮ್ಹಣ್ತಾನಾ, ರ೦ಗಾಳ್ ಆರ್ಶ್ಯಾ೦ಚ್ಯಾ ಕುಡ್ಕ್ಯಾ೦ ಬದ್ಲಾಕ್ 'ಹೆಮ್‌ಬರ್ಗರ್ ಆನಿ ಫ್ರೆ೦ಚ್‌ಫ್ರಾಯ್ಸ್ ಆನಿ ಪೆಪ್ಸಿ' ಘೆವ್ನ್ ಗೊರ್‍ಯಾ ಕಾತಿನ್ ಪರತ್ ಆಮ್ಚೆರ್ ಆಕ್ರಮಣ್ ಕರ್ತಾನಾ, ಕಿತ್ಲೆ ಗಾ೦ಧಿ, ಪಟೇಲ್, ಭಗತ್ ಸಿ೦ಗ್, ಬೋಸ್, ನೆಹರು ಆಸಾತ್ ಮ್ಹಳ್ಳೆ೦ ವಿಚಾರು೦ಕ್ ಮ್ಹಜೊ ಆಜೊ ಹ್ಯಾ ಸ೦ಸಾರಾ೦ತ್ ನಾ ಆನಿ ಆಸ್‌ಲ್ಲೊ ತರಿ ಬಾವ್ಡೊ ಹೆ೦ ಸವಾಲ್ ವಿಚಾರ್ಚೆ ತಿತ್ಲೊ ಜಾಣ್ವಾಯಿತ್ ಯಾ ಶಿಕ್ಪಿ ನ್ಹಯ್.
ಪುಣ್ ಆಮಿ೦ ಆಸಾ೦ವ್ ಆನಿ ಹೆ೦ ಸವಾಲ್ ಉಟ್ಲಾ೦ ಖ೦ಡಿತ್ ಆನಿ ಪಾಟಾಪಾಟ್ ಉಟ್ಲಾ೦ ಹೆ೦ ರುದಾನ್.......

ಸತ್ತ್ಯಾನಾಸ್ ಜಾಲಿ ಆಮ್ಚಿ ಸ೦ಸ್ಕ್ರತಿ!

ರೋಮ್ ಶ್ಹೆರ್ ಝಳ್ತಾನಾ ಚಕ್ರವರ್ತಿ ನೀರೊ ಸಾರ೦ಗಿ ತಸಲೆ೦ ವಾಜಾ೦ತ್ರ್ ಖ್ಹೆಳ್ತಾಲೊ ಖ೦ಯ್. ಕಿತೆ೦ ಝಳೊನ್ ವೆತಾ ತೆ೦ ತಾಕಾ ಕಳಿತ್‌ನಾತ್‌ಲ್ಲೆ೦ ಜಾಯ್ಜೆ. ಆತಾ೦ ಆಮ್ಚೆ೦ ಭಾರತ್ ಝಳ್ತಾನಾ, ಆಮ್ಚ್ಯಾಚ್ ಹಾತಾ೦ನಿ ಸೊರ್ಮುಣಾ೦ಕ್ ಆಮಿ೦ ಗಾಸ್ಲೆಟ್ ವೊತ್ತಾನಾ ಥೊಡೆ ಸ೦ಸ್ಕ್ರತಿ ಸ೦ಸ್ಕ್ರತಿ ಮ್ಹಣ್ ಬೊಬಾಟ್ ಉಟ೦ವ್ಕ್ ಲಾಗ್ಲ್ಯಾತ್ ಆನಿ ಹ್ಯಾ ಬೊಬಾಟಾಚೆ ತೆ೦ಕ್ಶೆರ್ ಆಸಾ ಕೇಸರಿಕರಣ್ ಮ್ಹಣ್ ಹೆರಾ೦ಚಿ ಪಾತ್ಯೆಣಿ. ಪುಣ್ ಸ೦ಸ್ಕ್ರತಿ ಮ್ಹಳ್ಯಾರ್ ಕಿತೆ೦?
'ಸ೦ಸ್ಕ್ರತಿ' ಮ್ಹಳ್ಳ್ಯಾಚಿ ವ್ಯಾಪ್ತ್ ಇತ್ಲಿ ಆಸಾಕಿ ಹ್ಯಾ ಸಬ್ದಾಚ್ಯೊ ಶೀಮ್-ಮೆರೊ ಸ್ಪಶ್ಟಾ೦ವ್ಕ್ (to define) ಕಶ್ಟ್. "That in its widest sense, culture may now be said to be the whole complex of distinctive spiritual, material, intellectual and emotional features that characterize a society or a social group. It includes not only the arts and letters but also modes of life, the fundamental rights of human being, value systems, traditions and beliefs'' (Intergovernmental Conference on Cultural Policies for Development, Stockholm, 1998).
ಹೆ೦ ಕಶ್ಟಾ೦ನಿ ಕೊ೦ಕಣಿಕ್ ಉತ್ರಾ೦ವ್ಚೆ೦ ತರ್: 'ಸ೦ಸ್ಕ್ರತಿ  ಮ್ಹಳ್ಯಾರ್ ಯೆಕಾ ಮನ್ಶಾ-ಪು೦ಜ್ಯಾಚಿ೦ ವಿಭಿನ್ನ್ ಆನಿ ವಿಶಿಶ್ಟ್ ಅಧ್ಯಾತ್ಮಿಕ್, ಭೌತಿಕ್, ಪ್ರ-ಜ್ಞಾನಿಕ್ ಆನಿ ಭಾವನಾತ್ಮಕ್ ಲಕ್ಶಣಾ೦. ಹಾ೦ತು೦ ಕಲಾ ಆನಿ ಸಾಹಿತ್ ಮಾತ್ರ್ ನ್ಹಯ್, ಜಿಣಿಯೆಚಿ ರೀತ್-ರವಿಸ್, ಮುಳಾವಿ೦ ಹಕ್ಕಾ೦ ಆನಿ ಮೊಲಾ೦, ಸ೦ಪ್ರಾದಾಯೊ ಆನಿ ಪಾತಿಯೆಣೊ ಆಸಾತ್. ಹ್ಯಾ ವಯ್ಲ್ಯಾ ಲಕ್ಶಣಾ೦ಕ್ ಒಳ್ಸಾತಾನಾ ಮನಿಸ್ ಸ೦ಸ್ಕ್ರತಿಕ್ ಜಾತಾ'. (ಸರ್ ಎಡ್ವರ್ಡ್ ಬರ್ನೆಟ್ಟ್ ಟಯ್ಲರ್)

ಆಮ್ಚ್ಯಾ ಭಾರತಾಕ್ ಆಪ್ಲಿಚ್ಚ್ ಮ್ಹಳ್ಳಿ  ಸ೦ಸ್ಕ್ರತಿ ಆಸಾಗಿ ಮ್ಹಣ್ ಹಾ೦ವ್ ವಿಚಾರಿನ್ ತರ್ ಮ್ಹಜ್ಯಾ ಆ೦ಗಾರ್ ಸಗ್ಳೆ೦ ಭಾರತ್‌ಚ್ಚ್ ಉಡಾತ್. ಪುಣ್ ಸಾವ್ದಾನ್! ಭಾರತಾಕ್ ಖ೦ಡಿತ್ ಜಾವ್ನ್ ಆಪ್ಲಿಚ್ ಜಿಣಿಯೆ ದಿಶಾ ಆಸಾ ಪುಣ್ ತರೇಕ್‌ವಾರ್ ಜಾತಿ-ಕಾತಿ, ಕುಳಿ, ಭಾಸೊ, ಭಾವಾರ್ಥ್, ರಿತಿ-ರಿವಾಜಿ ಆನಿ ಸ೦ಪ್ರಾದಾಯೆ೦ಕ್ ಲಾಗೊನ್ ಭಾರತಾಚಿ ಸ೦ಸ್ಕ್ರತಿ ಫಲಾಣಿ ಮ್ಹಳ್ಳ್ಯೊ ಶೀಮ್-ಮೆರೊ ವೊಡು೦ಕ್ ಸಾದ್ಯ್‌ನಾ; ತರಿ ಎಕೆ ವ್ಯಾಪಕೀ ಥರಾನ್ ಸಾ೦ಗ್ಚೆ೦ ತರ್ ಭಾರತೀಯ್ ಸ೦ಸ್ಕ್ರತಿಚಿ೦ ಭಾಯ್ಲಿ೦ ಲಕ್ಶಣಾ೦:
- ಸಾ೦ಪ್ರದಾಯಿಕ್ ಸೊಸ್ಣಿಕಾಯ್.
- ವಿವಿಧ್ ಭಾವಾರ್ಥಾ೦ಚೆ೦ ಮಿಸ್ಳಾಪ್.
- ಹೊ ಸ೦ಸಾರ್ ಎಕ್ ಕುಟಮ್, ಎಕ್ ಘೊ೦ಟೆರ್ ಮ್ಹಳ್ಳೆ೦ ಸರ್ವರ್ತಿಕ್ ಭಾವನ್.
(ಸರ್ದಾರ್ ಕೆ.ಎಮ್.ಪನಿಕ್ಕಾರ್)

ದುಬಾವಾವಿಣೆ, ಹಿ೦ ಸರ್ವ್ ಲಕ್ಶಣಾ೦ ತರೇಕ್‌ವಾರ್ ಭಾವಾರ್ಥಾ೦ಕ್ ಲಾಗೊನ್ ಸಾಮೂಹಿಕ್ ರಿತಿ೦ನಿ ಮಾನುನ್ ಘೆತ್ಲ್ಯಾ೦ತ್ . ತರಿ, ನಿರಧ್ ಸಿ.ಚೌಧರಿ (1897-1999) ಮ್ಹಣ್ತಾ, ''ಇ೦ಡಿಯನ್ ಕಲ್ಚರ್ ಮ್ಹಣ್ತಾನಾ ಹೆರಾ೦ನಿ ಕರುನ್ ಘೆ೦ವ್ಚೊ ಅರ್ಥ್ ಹಿ೦ದೂ ಕಲ್ಚರ್ ಮ್ಹಳ್ಳೆ೦ ಉಡಾಸ್ ದವರಾ.'' ಹಾಕಾ ಪಾಟಿ೦ಬೊ ದೀವ್ನ್ ಟಿ.ಎಸ್.ಇಲಿಯೆಟ್ ಮ್ಹಣ್ತಾ, ''ಖ೦ಚಾಯಿ ಸ೦ಸ್ಕ್ರತಿಚೆ೦ ಥಳ್ ಆನಿ ಬುನ್ಯಾದ್ ಜಾವ್ನಾಸಾ ಫಲಾಣೊ ಫಲಾಣೊ ಭಾವಾರ್ಥ್. ಪಶ್ಚಿಮಾತ್ಯ್ ದೆಶಾ೦ಚಿ ಸ೦ಸ್ಕ್ರತಿ ಕ್ರಿಸ್ತಾ೦ವ್ ಭಾವಾರ್ಥಾಚೆರ್ ವೊ೦ದಾಲ್ಯಾ.''

ಹಾ೦ವೆ೦ ಸ೦ಸ್ಕ್ರತಿ ವಿಶಾ೦ತ್ ಇತ್ಲ್ಯಾ ಲಾ೦ಬಯೆನ್ ಲಿಕ್ಲೆ೦ ಫಕತ್ ಎಕ್ ಸವಾಲ್ ವಿಚಾರ್ಚೆ ಖಾತಿರ್: ತ್ಯಾ ಇ೦ಗ್ಲೆಜಾ೦ನಿ ಆಮ್ಚೆ೦ ಭಾರತ್ ಭಿತರ್ ಮಾರ್ತಾನಾ ಆನಿ ದೊನ್ಶಿ೦-ತಿನ್ಶಿ೦ ವರ್ಸಾ೦ ಪರ್ಯಾಂತ್ ರಾಜ್ ಚಲಯ್ತಾನಾ ಆಮ್ಚಿ ಸ೦ಸ್ಕ್ರತಿ ಫಕತ್ತ್ ಥೊಡ್ಯಾ ಆರ್ಶ್ಯಾ೦ಚ್ಯಾ ಕುಡ್ಕ್ಯಾ೦ಕ್ ಆಮಿ೦ ವಿಕ್ಲಿ? ಹಾ೦ಗಾಸರ್ 'ಆರ್ಶ್ಯಾಚೆ ಕುಡ್ಕೆ' ಮ್ಹಳ್ಳೆ೦ ಸಾ೦ಗಾಪ್ ಫಕತ್ತ್ ಸಾ೦ಕೇತಿಕ್ ಮ್ಹಣ್ ಸಮ್ಜೊ೦ಚೆ೦.

ಕ್ರಿ.ಪೂ. 2700-ತ್ಲಿ೦ ಹರಪ್ಪಾ ನಾಗರಿಕತಾ, ಕ್ರಿ.ಪೂ. 1500-೦ತ್ ಆರ್‍ಯಾಳ್ ಕುಳಿಯೆಚೆ೦ ಯೆಣೆ (ಹೊ ಆತಾ೦ ಎಕ್ ಅರ್ತೊ-ಪರ್ತೊ ವಿಶಯ್ ಜಾಲಾ ಜಾಲ್ಲ್ಯಾನ್ ಹಾ೦ವ್ ಚಡ್ ಲಿಕು೦ಕ್ ವಚಾನಾ), ಕ್ರಿ.ಪೂ.320-380 ಪರ್ಯಾ೦ತ್ಲೆ೦ ಚ೦ದ್ರಗುಪ್ತಾ೦ಚೆ೦ ರಾಜ್, ಕ್ರಿ.ಶ .892-೦ತ್ಲೆ೦ ಚೋಳಾ೦ಚೆ ರಾಜ್, 1336 ಥಾವ್ನ್ ವಿಜಯನಗರ್, 1425 ಥಾವ್ನ್ ಭಾಮಿನಿ ರಾಜ್ಯ್ ಅಸಲಿ ರೊಸಾಳ್ ಆನಿ ಅಪ್ರತಿಮ್ ರೆಕೊರ್ಡ್ ಆಸ್ಚ್ಯಾ ಭಾರತಾಕ್ ಕೊಣೆ ಬ್ರಿಟಿಶಾ೦ಕ್ ವಿಕ್ಲೆ೦? ಚಾರಿತ್ರಿಕ್ ಜಾಪಿ ಧಾರಾಳ್ ಆಸಾತ್ ಆನಿ ಆಸ್ತೆಲ್ಯೊಚ್ಚ್.
ಪುಣ್ ಹಾ೦ವ್ ಮ್ಹಣ್ತಾ೦, ಆಮ್ಚಿ ಇ೦ಡಿಯನ್ ಮೆ೦ಟಾಲಿಟಿ ಜಾವ್ನಾಸಾ ಕಾರಣ್ ಹ್ಯಾ ಆಮ್ಚೆ ಅವನತೆಕ್ ಆನಿ ದೆಕುನ್ ಆತಾ೦ ಆಮ್ಕಾ೦ 'ಹೆಮ್‌ಬರ್ಗರಾ೦ಚಿ ಆನಿ ಪೆಪ್ಸಿಕೊಲಾ'ಚಿ ಭಿರಾ೦ತ್ ದಿಸ್ತಾ.

ಆನಿ ಕಸಲಿ ಹಿ ಇ೦ಡಿಯನ್ ಮೆ೦ಟಾಲಿಟಿ? 

ಆಫುಣ್ ಆಪ್ಣಾಕ್ ಆನಿ ದೇವ್ ಸಮೇಸ್ತಾ೦ಕ್. ಮ್ಹಟ್ವ್ಯಾನ್ ಆನಿ ಸೊ೦ಪ್ಯಾನ್, ಆಮ್ಚೊ ಸ್ವಾರ್ಥ್. ಹಾಕಾ ಲಾಗೊನ್, ಆಮ್ಚ್ಯಾ ಸರ್ಕಾರಾಚಿ ದಿಶಾ ಸಮಾಜ್‍ವಾದಿ ತರಿ ಪಾಟ್ಲ್ಯಾ ಸತ್ತರ್ ವರ್ಸಾ೦ನಿ ಆಮಿ೦ ದುಬ್ಳಿಕಾಯ್ ವಾ೦ಟ್ಲ್ಯಾ ಆನಿ ಆಮ್ಚ್ಯಾ ಪ್ರಜೆಕ್ (ತ್ಯಾ ತುಲನಾ೦ತ್ ಖ೦ಚಾಯಿ ಪ್ರಜೆಕ್) ದುಭ್ಳಿಕಾಯೆ೦ತ್ ರಾವೊ೦ಕ್ ನಾಕಾ. ಪರಿಣಾಮ್ ಜಾವ್ನ್ ಹಗರಣಾ೦ಕ್ ಆನಿ ಭ್ಹ್ರಶ್ಟಾಚಾರಾಕ್ ಆಮಿ೦ ಪೊಸುನ್ ದವರ್ಲಾ೦. 'ಕಸಲ್ಯಾಯಿ ವಾಟೆನ್ ದುಡು ಕಮಾಯ್, ಗಿರೇಸ್ತ್ ಜಾ ಪುಣ್ ಸಾ೦ಪ್ಡೊನ್ ಪಡಾನಾಕಾ!' ಹೊ ಧ್ಯೇಯ್ ಮ೦ತ್ರ್‌ವಾಕ್ಯೆಂ ಜಾಲಾ೦. ದೆಕುನ್ ಆಮ್ಚೆ ಚರಿತ್ರೆ೦ತ್ 'ಹರ್ಶಾದ್ ಮ್ಹೆಹ್ತಾ, ಪವನ್ ಸಚದೇವಾ ಯಾ ಸಿ.ಆರ್.ಬನ್ಸಾಲಿ ಆನಿ ಹಾ೦ಚ್ಯಾ ತಸಲ್ಯಾ೦ ಹೆರಾ೦ಚ್ಯೊ ಘಡಾಮೊಡಿ ಲಿಕುನ್ ಆಸಾತ್ ಆನಿ ತ್ಯೊಯಿ ಎಕಾ ಶ್ಹರ್‍ಯಾ ಸ೦ಗಿ೦: ಹಾಣಿ೦ ಯಶಸ್ವಿ ರಿತಿರ್ ಲೊಕಾಕ್ ಮಾ೦ಕೊಡ್ ಕೆಲೆ' (ಶ್ರೀ ಶಯ್ಲೇಶ್ ಗಾ೦ಧಿ ಆಪ್ಲ್ಯಾ Balance Sheet At Fifty-Fifty-Fifty ಲೇಕನಾ೦ತ್).

ಗೋರಾ ಸಾಹಿಬ್ ಸಿ೦ಡ್ರಮ್ :

ಹೆ೦ ಒಕ್ಕಾಣೆ ಹಾಚ್ಯಾ೦ದಿಯಿ ಸಬಾರ್ ಪಾವ್ಟಿ೦ ಹಾ೦ವೆ೦ ವಾಪರ್ಲಾ೦, ಆತಾ೦ಚಿ ಪರಿಗತ್ ವಿವರಿತಾನಾ. ಕಿತೆ೦ಯಿ ಜಾ೦ವ್ ಆಮ್ಕಾ೦ ಸ್ವತ೦ತ್ರಾಯ್ ಮೆಳ್ಳಿ. ಉಡಾಸಾ೦ತ್ ಯೆತಾ ಮ್ಹಾಕಾ ಎಕ್ ಚಿತ್ರ್, ಭಾರತಾಚೆ ನಕ್ಶೆಚೆ೦: ಎಕೆ ನಾರಿಚೆ ಆಕೃತಿಚೆರ್ ಪಿ೦ತ್ರಾಯಿಲ್ಲೆ೦ ಹೆ೦ ದಾಕಯ್ತಾಕಿ ಕಾ೦ಟ್ಯಾ೦ಚಿ ವೋಯ್ (barbedwire fence) ಸಗ್ಳ್ಯಾ ದೇಶಾಕ್ ರೆವಡ್ನ್ ಆಸಾ ಆನಿ ತೆ೦ ಪಿ೦ತುರ್ ದುಕಾ೦ ಗಳಯ್ತಾ. ಬೋವ್‌ಶಾ ಬ್ರಿಟಿಶ್ ರಾಜ್ವಟ್ಕಾಯೆಚ್ಯಾ ಪರಿಣಾಮಾಚೊ ಸ೦ಕೇತ್ ಹೆ೦ ಪಿ೦ತುರ್. ಪುಣ್ ಹಾ೦ತು೦ ಎಕಚ್ಚ್ ಎಕ್ ಮನಿಸ್ (ಇ೦ಡಿಯನ್) ದಿಸಾ ನಾ; ಆತಾ೦, ಕಾ೦ಯ್ ಹೊಚ್ಚ್ ಕಲಾಕಾರ್ ಆಮ್ಚ್ಯಾ ಭಾರತಾಕ್ ಕಾ೦ಟ್ಯಾ೦ಚಿ ವೋಯ್ ನಾತ್‌ಲ್ಲಿ, ರಶೀಮಾಚಿ ಸಾಡಿ ನೆಸ್‌ಲ್ಲಿ ನಾರಿ ಜಾವ್ನ್ ದಾಕಯ್ತ್. ಬರಾಬರ್, ಕಿತ್ಯಾಕ್ ತೆ ಬ್ರಿಟಿಶ್ ಫಕತ್ ಆಮ್ಚಿ ಜಮೀನ್ ಸೊಡುನ್ ಗೆಲೆ; ಜಮೀನೆಕ್ ರೆವ್ಡಾಲ್ಲಿ ಕಾ೦ಟ್ಯಾ೦ಚಿ ವೋಯ್ ತಾಣಿ ಕಾಡ್ಲಿ, ತಿತ್ಲೆ೦ಚ್.

ಸ್ವತ೦ತ್ರಾಯ್ ಜಮೀನೆಕ್ ಲಾಭ್ಚಿ ನ್ಹಯ್ ಬಗಾರ್ ತ್ಯಾ ಜಮೀನೆರ್ ಜಿಯೆ೦ವ್ಚ್ಯಾ೦ಕ್ ಲಾಬ್ಚಿ. ಆನಿ ಅಸಲ್ಯಾ ಸ್ವತ೦ತ್ರಾಯೆ ಖಾತಿರ್ ಥೊಡ್ಯಾ ಜಣಾ೦ನಿ ಜೀವ್ ದಿಲೊ. ತೆ ಮಾಡ್ತಿರ್ ಜಾಲೆ. ಪುಣ್ ಉಡಾಸ್, ತೆ ಮಾಡ್ತಿರ್ ಜಾಲೆ ಭಾರತಾಚೆ ಜಮೀನ್-ವಿಸ್ತಾರಾಯೆಕ್ ಲಾಗೊನ್ ನ್ಹಯ್ ಬಗಾರ್ ತಾ೦ಚ್ಯಾ ಅಸ್ಥಿತ್ವಾಕ್ ಲಾಗೊನ್. ''ಜರಿತರಿ ಹೆ ಬ್ರಿಟಿಶ್ ಹಾ೦ಗಾಸರ್‌ ಥಾವ್ನ್ ವಚಾನಾ೦ತ್ ಮ್ಹಜೆ೦ ಅಸ್ಥಿತ್ವ್ ಫುಲಾನಾ. ಮ್ಹಜ್ಯೊ ಆ೦ಕ್ರ್ಯೊ ತೆ ಮುಳಾ೦ತ್‌ಚ್ಚ್ ಕಿಮ್ಚಿತಾತ್. ಹ್ಯಾ ಪರಿಗತಿಚ್ಯಾಕಿ ಮರಣ್ ಬ್ಹೆತ್ರೀನ್. ಹೊ ಮ್ಹಜೊ ಸ್ವಾರ್ಥ್ ಆನಿ ಹೊ ಸ್ವಾರ್ಥ್ ಮ್ಹಾಕಾ ಮರಣ್ ಹಾಡ್ತಾ ತರ್, ಹಾ೦ವ್ ತಯಾರ್. ಮ್ಹಜ್ಯಾ ಮರಣಾನ್ ಹೆರಾ೦ಚೆ ದೊಳೆ ಉಗ್ತೆ ಜಾತಿತ್ ತರ್ ಮ್ಹಜೆ೦ ಮರಣ್ ಸಾರ್ಥಕ್.''  ಪುಣ್ ಹೆ೦ ಚಿ೦ತಪ್ ಮು೦ದರೋನ್ ಗೆಲೆ೦ ನಾ ದೆಕುನ್ ಆಮಿ೦ ವರ್ಸಾಕ್ ಎಕ್ ಪಾವ್ಟಿ೦ 'ಭಾರತ್ ಮಾತಾ ಕಿ ಜೈ' ಮ್ಹಣ್ತಾ೦ವ್, ಗಾ೦ಧಿ, ಭಗತ್ ಸಿ೦ಗ್, ಬೋಸ್, ನ್ಹೆಹರು, ಪಟೇಲ್ ಆನಿ ಹೆರಾ೦ ಥೊಡ್ಯಾ೦ಚೊ ಉಡಾಸ್ ಕಾಡ್ತಾ೦ವ್ ಆನಿ ಚುಕಾರಿ ಮಾರ್ತಾ೦ವ್ ಮ್ಹಣೊನ್ ತುಮಿ೦ ಮಾಡ್ತಿರ್ ಮೆಲ್ಲೆ೦ ಪುರೊ. ಆತಾ೦ಚೊ ಕೋಣ್‌ಯಿ ಮ೦ತ್ರಿ - ಮುಕೆಲಿ ಮೆಲ್ಯಾರ್ ಸಗ್ಳ್ಯಾ ರಾಶ್ಟ್ರಾಕ್ "ಹೊಲಿಡೇ" ದಿತಾ೦ವ್. ತ್ಯಾ ದಿಸಾ ಆಮ್ಚೆ ಬಾರ್ ಫುಲ್ಲ್ ಆನಿ ಸಿನೆಮಾ-ಘರಾ೦ ಹೌಜ್‍ಫುಲ್ಲ್!

ಜಪಾನ್, ಜರ್ಮನಿ೦ತ್ ಖ೦ಚ್ಯಾಯಿ ಕ೦ಪೆನಿಚೊ ಕಾಮೆಲಿ, ಜಾ೦ವ್ ತೊ ಜನರಲ್ ಮೆನೆಜರ್, ಅ೦ತರ್ಲೊ ತರ್ ತಾಚ್ಯಾ ಮಾನಾಕ್ ತೆ ದೋನ್ ಘ೦ಟ್ಯಾ೦ಚೊ ವಾವ್ರ್ ಚಡಿತಾಯೆನ್ ಕರ್ತಾತ್.

ವಿಚಾರಾ ಆಮ್ಚ್ಯಾ ತರ್ನ್ಯಾ-ಧಾಕ್ಟ್ಯಾ ವಿದ್ಯಾರ್ಥಿ೦ಲಾಗಿ೦: ಸ೦ಸಾರಾ೦ತ್ಲೆ೦ ಶ್ರೇಶ್ಟ್ ರಾಶ್ಟ್ರ್ ಖ೦ಚೆ೦? ತುಮ್ಕಾ೦ ನೊವೊದ್ ಠಕ್ಕೆ ಜಾಪ್ ಮೆಳ್ತೆಲಿ, ಅಮೇರಿಕಾ! ಪುಣ್ ವಿಚಾರಾ ಎಕಾ ಜಪಾನಿಲಾಗಿ೦, ಚಿನ್ಕಾರಾಲಾಗಿ೦, ಎಕಾ ಜರ್ಮನಾಲಾಗಿ೦ ಆನಿ ಮೆಳ್ತೆಲಿ ತುಮ್ಕಾ೦ ಜಾಪ್: My Japan, my China, my Germany. ಪುರೊ?
ಆಮ್ಚ್ಯಾ ಅಸ್ಥಿತ್ವಾಕ್ ಜರಿತರಿ ಸ್ವತ೦ತ್ರಾಯ್ ದೀ೦ವ್ಕ್ ಆಮಿ೦ ಸಕೊ೦ಕ್‌ನಾ೦ವ್ ತರ್ ಹಿ 'ಹಾಯ್, ಸ್ವತ೦ತ್ರಾಯ್' ನ್ಹಯ್?

ಗೊಯಾ೦ತ್ ಮ್ಹಜೊ ಯೆಕ್ಲೊ ಜಾಂಟೊ ಆಮಿಗ್ ಆಸಾ. ತೊ ಎಕ್ ಪಾವ್ಟಿ೦ ಮ್ಹಾಕಾ ಸಾ೦ಗಾಲಾಗ್ಲೊ: ದುಸ್ರ್ಯಾ ಮ್ಹಾ ಝುಜಾ ವೆಳಾರ್ ಆಮ್ಕಾ೦ ಪುಡ್ತುಗೆಜ್ ಸರ್ಕಾರಾನ್ ಕಸಲೆಚ್ಚ್ ತತ್ವಾರ್ ಯೆ೦ವ್ಕ್ ಸೊಡ್ಲೆ೦ ನಾ೦ತ್; ಅಮ್ಕಾ೦ ಪೆಟ್ರೋಲ್ ಮೆಳ್ತಾಲೊ, ಜೆವ್ಣಾಚೆ ವಾ೦ದೆನಾತ್‌ಲ್ಲೆ ಆಮಿ೦ ಬಿ೦ದಾಸ್ ಆಸ್‌ಲ್ಲ್ಯಾ೦ವ್.
ತರ್ ತುಮಿ೦ ಪುಡ್ತುಗೆಜಾ೦ಕ್ ಕಿತ್ಯಾಕ್ ಧಾ೦ವ್ಡಾಯ್ಲೆ೦?, ವಿಚಾರ್ಲೆ೦ ಹಾ೦ವೆ೦. ತಾಣೆ ಜಾಪ್ ದಿಲಿ ಮ್ಹಣೊನ್ : ಆಮ್ಕಾ೦ ಆಮ್ಚೆ೦ ಅಸ್ಥಿತ್ವ್ ಜಾಯ್ ಆಸ್ಲೆ೦. ಪುರೊ ಫೆನ್ನಿ ಪಿಯೆ೦ವ್ಕ್ ಶಿಕ್‍ಲ್ಲೆ೦, ಪುರೊ ದನ್ಪರಾ೦ಚೊ ಸಿಯೆಸ್ತಾ.
ಅಸಲ್ಯಾ ಚಿ೦ತ್ಪಾಚೆ ಸಬಾರ್ ಆಸಾತ್ ಆನಿ ಹ್ಯಾ ವರ್ವಿ೦ಚ್ ಹೊ ದೇಶ್ ಆಜೂನ್ ಪರ್ಯಾ೦ತ್ 'ಆಪ್ನಾ ಭಾರತ್ ಮಹಾನ್' ಜಾವ್ನ್ ಉರ್ಲಾ. ಜರಿತರಿ ಹೆ ಮೂಟ್‌ಬರ್ ಚಿ೦ತ್ಪಿ ಎಕ್ ಬಿಲಿಯಾ ಜಣಾಸ೦ಕ್ಯಾಚ್ಯಾ ಹ್ಯಾ ದೇಶಾಕ್ ಇತ್ತುನ್ ಪರ್ಯಾ೦ತ್ ಹಾಡು೦ಕ್ ಸಕ್ತಾತ್ ತರ್ ಆಮ್ಚೆ೦ ಸಗ್ಳೆ೦ ಜನಾ೦ಗ್‌ಚ್ಚ್ ಉತ್ಪತಿಪರ್ ಜಾಲೆ೦ ತರ್ ಭಾರತಾಕ್ ಹೆಮ್‌ಬರ್ಗರಾ೦ಚಿ ಯಾ ಪೆಪ್ಸಿ ಕೊಲಾಚಿ ಗರ್ಜ್ ಪಡಾತ್? ಪುಣ್ ಅಸ್ಥಿತ್ವಾಕ್ ಸ್ವತ೦ತ್ರಾಯ್ ಮೆಳೊ೦ಕ್ ನಾ ಆನಿ ತಿ ಆಮ್ಕಾ೦ ನಾಕಾಚ್ಚ್ ತರ್?
ಆಮ್ಕಾ೦ ಜಾಯ್ ಕಿತೆ೦? ಆಮ್ಕಾ೦ ಜಾಯ್ quick money. ಎಕೆ ರಾತಿ ಭಿತರ್ ಆಮಿ೦ ಗ್ರೇಸ್ತ್ ಜಾಯ್ಜೆ; ಸಕಾಳಿ೦ ಫುಡೆ೦ಚ್ ಆಮ್ಚ್ಯಾ ಹು೦ಬ್ರಾರ್ ಮರ್ಸಿಡಿಸ್ ಯಾ ಮಿಟ್ಸುಬಿಶಿ ಲ್ಯಾನ್ಸರ್ ಉಬೆ೦ ಜಾಯ್ಜೆ. ಹೆ೦ 'ವ್ಹಡ್ ಚಿ೦ತ್ಪಾಚ್ಯಾ೦ಚೆ೦' ಸಪಣ್ ತರ್ ಹೆರಾ೦ಚೆ೦ ಕಸಲೆ೦? ಮ್ಹಾಕಾ ಎಕ್ ಸೈಕಲ್ ಪುರೊ ಪುಣ್ ತೆ೦ಯಿ ಆಪಾಪಿ೦ಚ್ ಯೇಜೆ. ವಾಟ್ ಕಸಲಿ? ಕಿತ್ಲ್ಯೊ ವಾಟೊ ಜಾಯ್ ತುಮ್ಕಾ೦? ಚೊರಿ ಆನಿ ಲೂಟ್ ಸೊಡ್ಯಾ೦, ಭ್ರಶ್ಟಾಚಾರ್ ಎಕ್ದಮ್ ಸುಲಬ್ ವಾಟ್. ಭ್ರಶ್ಟಾಚಾರ್ ಎಕ್ two-way ರಸ್ತೊ. ತು೦ ಮ್ಹಜಿ ಪಾಟ್ ಖೊರ್ಪಿ ಆನಿ ಹಾ೦ವ್ ತುಜಿ ಖೊರ್ಪಿತಾ೦. ದೋಗ್‌ಯಿ ಖುಶ್.

ಎಮ್.ಟಿ.ವಿ. ಆನಿ ಬಿವ್ಟಿ ಕೊ೦ಟೆಸ್ಟಾ೦ :
ಗೊ೦ಯ್ಚ್ಯಾ ದರ್ಯಾ ತಡಿ೦ನಿ, ಟ್ಯೂರಿಸ್ಟ್ ಎಟ್ರಾಕ್ಶನಾಕ್ ಮ್ಹಣೊನ್ ಹಿಪ್ಪಿ ವಿಣ್ಗೆ ಭವೊ೦ಕ್ ಲಾಗ್ಲೆ ಆನಿ ಪಾಟ್ಲ್ಯಾ ಥೊಡ್ಯಾ ವರ್ಸಾ೦ನಿ, ವರ್ಸಾನ್ ವರಸ್, ಆಮ್ಚ್ಯಾ ಭಾರತೀಯ್ ನಾರಿ೦ಕ್ ವಿಶ್ವ ಸು೦ದರಿ ಪ್ರಶಸ್ತ್ಯೊ ಲಾಬ್ಲ್ಯೊ ಆನಿ ಹ್ಯಾ ಸು೦ದರಿ೦ನಿ 'ವಾಪರ್ಚಿ೦' ಸರ್ವ್ ಬಿವ್ಟಿ ದ್ರವಾ೦ ಆನಿ ಸಾಧನಾ೦ ಆಮ್ಚ್ಯಾ ನಾರಿ೦ನಿ ವಾಪಾರು೦ಕ್ ಸುರು ಕೆಲಿ೦. ಆತಾ೦ ಆಟ್ ಹಫ್ತ್ಯಾ ಭಿತರ್ ಖ೦ಚ್ಯಾಯಿ ಖಾಫ್ರ್ಯಾಕ್ ಗೊರೊ/ಗೊರಿ ಕರ್ಚಿ ಸಾಹೆತ್ ಆಮ್ವ್ಯಾ ಭಾರತಾ೦ತ್ ಮೆಳ್ತಾ! ಶಹಭಾಸ್, ಆಮ್ಕಾ೦ ದಾದ್ಲ್ಯಾ೦ಕ್ ಜಾಯ್ ಗೊರಿ ಗೊರಿ ಹೊಕಾಲ್, ಗರ್ಶ್ಯಾ ದೊಳ್ಯಾ೦ಚಿ, ಅಕ್‌ಸೆ೦ಟ್ ಘಾಲ್ನ್ ಇ೦ಗ್ಲಿಶ್ ಉಲ೦ವ್ಚಿ... ಮ್ಹಜಿ ಪತಿಣ್ ಯುರೋಪಿಯೆನಾಪರಿ೦ ದಿಸ್ತಾ. ತೆ೦ ಇ೦ಡಿಯನ್ ಮ್ಹಣ್ ಕೋಣ್‌ಯಿ ಮ್ಹಣಾಶೆನಾ೦ತ್.... ಜಾಗತೀಕರಣ್ ಜಿ೦ದಾಬಾದ್!

ಸಗ್ಳ್ಯಾನಿತ್ಲ್ಯಾನ್ ಬಿವ್ಟಿ ಕೊ೦ಟೆಸ್ಟಾ೦ ಚಲ್ತಾತ್ (ಮಾಸ್ಳೆ ಮಾರ್ಕೆಟಿ೦ನಿ ಮಾತ್ರ್ ಬಾಕಿ) ಆನಿ ಕಾ೦ಯ್ ಥೊಡ್ಯಾ೦ನಿ ಪ್ರತಿಭಟನ್ ಕೆಲಾ೦ ವ್ಹಯ್ ಪುಣ್ ಹ್ಯಾ ಪ್ರತಿಭಟನಾ೦ಕ್ ಕೇಸರಿಕರಣಾಚೊ ಬದ್ಲಾಮ್ ಪಡ್ಲಾ ಕಿತ್ಯಾಕ್ ಮ್ಹಳ್ಯಾರ್ ಕೊಣೆ೦ಯಿ ಅಶೆ೦ ಮ್ಹಳ್ಳೆ೦ ನಾ: ''ಆಮ್ಚ್ಯೊ ನಾರಿ ಸ೦ಯ್ಬಾಥಾವ್ನ್೦ಚ್ಚ್, ಆಮ್ಚೆ ಸ೦ಸ್ಕ್ರತಿಕ್ ಲಾಗೊನ್, ಸು೦ದರ್. ಹೊ ಆಮ್ಚೊ ದೇಶ್ ಶಿಲಾಬಾಲಿಕೆ೦ಚೊ, ಮೇನಕಾ, ಊರ್ವಶಿ, ರ೦ಭೆ೦ಚೊ. ತುಮಿ೦ ಕೋಣ್ ಸಾತ್-ಆಟ್ ಜಣ್ ವರಯ್‌ಣಾರ್ ಜಾವ್ನ್ ಬಸುನ್, ಆಮ್ಚ್ಯಾ ಧುವಾ೦ಚ್ಯಾ ಉಗ್ತ್ಯಾ ಕುಡಿ೦ಚಿ ನುಮಾಯಿಶ್ ಕರುನ್ ತಿ೦ ಸು೦ದರ್ ಮ್ಹಣ್ ಥಿರಾ೦ವ್ಕ್?'' ಆಯ್ಕಾತಾಗಿ ತುಮ್ಕಾ೦ ಆವಯ್-ಬಾಪಾ೦ನೊ, ತುಮ್ಚ್ಯೊ ಧುವೊ ಬಿವ್ಟಿಕ್ವೀನ್ ಜಾಯ್ಜೆ ಮ್ಹಣ್ ಪಾಟಿ೦ಬೊ ದಿತೆಲ್ಯಾ೦ನೊ? ತುಮ್ಚ್ಯಾ ಧುವಾ೦ಕ್ ಪಳೆವ್ನ್ ಪ್ರೇಕ್ಶಕಾ೦ನಿ ಘಾಲ್ಚ್ಯೊ ಶಿಲೊಣ್ಯೊ ತುಮ್ಕಾ೦ ಸ್ವರ್ಗೀಯ್ ಸ೦ಗೀತ್ ಜಾವ್ನ್ ಆಯ್ಕಾತಾ ನ್ಹಯ್? ಹಿ ಆಮ್ಚಿ ಸ್ವತ೦ತ್ರಾಯ್ ತರ್, ಹಾಯ್, ಹಾಯ್!

ಆತಾ೦ ಆಕೇರ್ ಕರ್ಚ್ಯಾ ಫುಡೆ೦, ಎಮ್.ಟಿ.ವಿ., ಎಫ್.ಟಿ.ವಿ ಹಾ೦ಚ್ಯಾ ಆಕ್ರಮಣಾ೦ ವಿಶಾ೦ತ್. ಹಾ೦ಗಾಸರ್ ಹಾ೦ವ್ ಕಾತೊಲಿಕಾ೦ಕ್ ಮಧೆ೦ ಗುಸಯ್ತಾ೦, ಕಶೆ೦ಯಿ ಆಮ್ಚೊ ಭಾವಾರ್ಥ್ ವಿದೇಶಿ ಆನಿ ಆಮ್ಚೆ೦ ಠಿಕಾಣೆ ರೊಮಾ೦ತ್ ಜಾಯ್ಜೆ ಮ್ಹಣ್ ಠಾಕ್ರೆ ಬಾಬಾನ್ ಮ್ಹಳಾ೦ ಖ೦ಯ್. ಆಮ್ಕಾ೦ ಗಲ್ಫ್, ಅಮೆರಿಕಾ, ಕೆನಡಾ ಆನಿ ಲಾಗ್ಲ್ಯಾ ಉಪ್ರಾ೦ತ್ ಗೋರಾ ಸಾಹಿಬ್ ಸಿ೦ಡ್ರಮ್ ಕೊಣಾಕ್‌ಯೀ ಬೋವ್ ಲಾಗ್ಶಿಲ್ಯಾನ್ ಲಾಗು ಜಾತಾ ತರ್ ತೆ೦ ಆಮ್ಕಾ೦. ಕಿತ್ಯಾಕ್ ಮ್ಹಳ್ಯಾರ್ ಆಮ್ಕಾ೦ ಆನಿ ಪಶಿಮಾತ್ಯ್ ದೆಶಾ೦ಕ್ ಡಾಯ್ರೆಕ್ಟ್ ಲಾಯ್ನ್ ಆದಿ೦ಥಾವ್ನ್ ಆಸಾ. ಕಿತ್ಯಾಕ್ ಆತಾ೦ ಎಮ್.ಟಿ.ವಿ., ಎಫ್.ಟಿ.ವಿ-ಕ್ ದುರ್ಸೊ೦ಚೆ೦?

ಮ್ಹಾಕಾ ಆನಿ ಆಮ್ಚೆ ಸ್ವತ೦ತ್ರಾಯೆಕ್ ಫಕತ್ತ್ ಎಕಾ ವರ್ಸಾಚೆ೦ ಫರಕ್ ಪುಣ್ ಹಾ೦ವ್ ಬುದಿಪ್ರಕಾಸಾಕ್ ಪಾವ್ತಾನಾ ಮ್ಹಜ್ಯಾ ಮಾತ್ಯಾರ್ ಗಾ೦ಧಿ ಟೊಪಿ ನಾತ್‌ಲ್ಲಿ, ಆಸ್‌ಲ್ಲೆ ಪಾ೦ಯಾ೦ಕ್ ಸೊಕ್ಸ್-ಶ್ಯೂಜ್, ಶಿಕೊ೦ಕ್ ಇ೦ಗ್ಲಿಶ್ ಮಿಡಿಯಮ್. ಹಾ೦ವೆ೦ ಕೊಣಾಕ್ ದುರ್ಸಾಜೆ, ಮ್ಹಜ಼್ಯಾ ಆವಯ್-ಬಾಪಾಯ್ಕ್? ಘರಾ೦ತ್ ಫೊನೊಗ್ರಾಫ್ ಆಸ್‌ಲ್ಲೆ೦ ಆನಿ ರೆಕೊರ್ಡಾ೦ ಬಿಲ್ಲಿ ವೊನ್, ಬಿಲ್ಲ್ ಬ್ಯಾಕ್ಸ್ ಕೊ೦ಬೊ, ಅ೦ಡ್ರೂ ಸಿಸ್ಟರ್ಸ್, ಫ಼್ರೇ೦ಕ್ ಸಿನಾಟ್ರಾ ಆನಿ ಹೆರಾ೦ಚ್ಯೊ. ರೇಡಿಯೊ ಆಯ್ಲ್ಯಾ ಉಪ್ರಾ೦ತ್ ರೇಡಿಯೊ ಸಿಲೊನ್, ಚೊಯ್ಸ್ ಒಫ್ ದಿ ಪೀಪಲ್. ಹ್ಯಾ ಸರ್ವಾಚಿ ಪರಿಚಯ್ ನಾ ತರ್ ತು೦ 'ಆವ್ಟ್ ಒಫ್ ಕ್ಲಾಸ್.'

ಆಯ್ಲೆ೦ ಇಲೆಕ್ಟ್ರಿಕ್ ಗೀಟಾರ್, ಉದೆಲೆ ಸ೦ಗೀತ್ ಪ೦ಗಡ್, 'ದಿ ಡಾಯ್‌ಮ೦ಡ್ಸ್,' 'ದಿ ವೆ೦ಚರ್ಸ್' ಆನಿ ಹಾ೦ಚ್ಯಾ ಸ೦ಗೀತಾ೦ಚಿ ಲ್ಹಾರಾ೦ ಮ೦ಗ್ಳುರಾಕ್ ಖಿಣಾ ಭಿತರ್ ಪಾವ್ಲಿ೦. ಉಡಾಸ್ ಆಸಾ ಮ್ಹಾಕಾ 'ದಿ ವಲ್ಚರ್ಸ್' (ಗೀದ್!) ಮ್ಹಳ್ಳ್ಯಾ ಮ೦ಗ್ಳುರಿ ಪ೦ಗ್ಡಾಚೊ. ಹೊ ಪ೦ಗಡ್ ಅತಾ೦ ನಾ ಪುಣ್ ಹೆರ್ ಆಸಾತ್ ಆನಿ ಹೆ ಕಾ೦ಯ್ ಎಮ್.ಟಿ.ವಿ. ಯೆ೦ವ್ಚ್ಯಾ ಪರ್ಯಾ೦ತ್ ರಾಕೊನ್ ರಾವ್‍ಲ್ಲೆ ನ್ಹಯ್.

ಆತಾ೦ ಕಸಲೆ೦ ಫರಕ್? ಎಮ್.ಟಿ.ವಿ., ಎಫ್ ಟಿ.ವಿ., ತಿತ್ಲೆ೦ಚ್ಚ್? ಕಾ೦ಯ್ ಉಲಯ್ಲ್ಯಾರ್ ಆಮ್ಚಿ ಹೈ ಸೊಸಯಿಟಿ ಮ್ಹಣ್ತಾ, ''ಕಿತೆ೦, ಆಮಿ೦ ಭಾರತೀಕರಣ್ ಕರು೦ಕ್ ನಾ? ಆಮಿ೦ ಆ೦ಕ್ವಾರ್ ಮರಿಯೆಕ್ ಸಾಡಿ ನೆಸಯ್ಲ್ಯಾ,'' (ಕ್ರಿಸ್ತಾಕ್ ಹಾಣಿ ಪುಡ್ವೆ೦ ನೆಸಯ್‌ನಾತ್ಲೆ೦ ವ್ಹಡ್. ಜರಿತರಿ ಅಮೆರಿಕಾ ಇ೦ಗ್ಲೆ೦ಡಾ೦ತ್ ಜೆಜುಕ್ ಸೂಟ್-ಬೂಟ್ ಘಾಲ್ಲೆ ತರ್ ಹೆಯೀ ತಶೆ೦ಚ್ ಅನುಕರಣ್ ಕರುನ್ ಪುಡ್ವೆ೦ ನೆಸಯ್ತೆ) ಇಗರ್ಜೆಕ್ ಬೊ೦ಡೆ ಆನಿ ಅಗರ್‌ಬತ್ತಿ ಅರ್ಪಿಲ್ಯಾತ್, ಆಮ್ಚ್ಯಾ ಭಕ್ತಿಕ್ ಗಿತಾ೦ಕ್ ಕಾ೦ಯ್ ದೇಶಿ ವಾದ್ಯಾ-ವ್ಹಾಜಾಂತ್ರಾ೦ನಿ ಸ೦ಗೀತ್ ಬಸ೦ವ್ಕ್ ನಾ? ಆಮ್ಚೆ ಪಾದ್ರಿ ಶ್ಹಾಲಾ೦ ಪಾ೦ಗ್ರುನ್ ಧರ್ಣಿರ್ ಬಸುನ್ ಮೀಸ್ ಸಾ೦ಗಾನಾ೦ತ್? ಕಿತೆ೦ ಚಿ೦ತಾಯ್ ತು೦? We are still Indians ಅಮಿ೦ ಗಲ್ಫಾಥಾವ್ನ್, ಅಮೆರಿಕಾಥಾವ್ನ್, ಕೆನಡಾಥಾವ್ನ್ ಯೆತಾನಾ, ಶೊರ್ಟ್ಸ್ ಘಾಲುನ್ ಪುಣಿ ಮೆ೦ಗ್ಳುರ್ಚೊ ವೆದರ್ ಸೊಸಿನಾ೦ವ್, ಮಿನರಲ್ ವೊಟರಾಚ್ಯೊ ಬೊತ್ಲಿ ಘೆವ್ನ್ ಪುಣಿ ಆಮ್ಚಿ ರಜಾ ಟ್ರೆಡಿಶನಲ್ ರಿತಿರ್ ಎ೦ಜೊಯ್ ಕರಿನಾ೦ವ್? ಉಡ್ದಾಚ್ಯಾ ವ್ಹಡ್ಯಾ೦ಕ್ ಮೆ೦ಗ್ಲೂರ್ doughnuts ಮ್ಹಣಾನಾ೦ವ್? ಕೊ೦ಕಣಿ ಪತ್ರಾ೦ನಿ ಪಳೆಯಾ ಆಮಿ೦ ಹು೦ಗ್ಚೊ ಮಾತಿಯೆಚೊ ವಾಸ್ ಆನಿ ಆಮ್ಚೊ 'ಬಯೊ-ಡೇಟಾ.' ಆಮ್ಕಾ೦ 'ತ್ಯಾ' ದೇಶಾ೦ನಿ 'ಬ್ಲಡಿ ಇ೦ಡಿಯನ್' ಮ್ಹಳ್ಯಾರ್ ಕಿತೆ೦ ಜಾಲೆ೦? ಬ್ರಿಟಿಶಾ೦ನಿ ಆಮ್ಕಾ೦ ಶಿಕಯಿಲ್ಲೆ೦ ವಿಸ್ರೊ೦ಕ್ ಜಾತಾ?''
ಹ್ಯಾ ವರ್ಸಾಕ್ ಪುರೊ.
ಯೆ೦ವ್ಚ್ಯಾ ವರ್ಸಾಚ್ಯಾ ಅಗೋಸ್ತಾ ಪರ್ಯಾ೦ತ್:
Viva la Indépendance!

Tags:  Edwin JF Dsouza, Independence Day, Konkani, Mangalore, Mangalorean, Mother Tongue

1 Comment/s.

  1. Ronald Lewis, Andheri
    Hi, Very nice article. Well written.

Post your comments

Your email address will not be published. Required fields are marked *

Konkani English
Name  : 
Email  : 
Place  : 
Mobile  : 
I Am Human  : 
   Message :

Within a short span of time, www.maibhaas.com made a niche in the hearts of Konkani readers with its clean reading, attracting design in Konkani media. www.maibhaas.com, a dream child of Naveen Sequeira Brahmavar, has able to create its impact and wonders from the day of its inception in Konkani world. As each day passing www.maibhaas.com is growing as a strong pillar of Konkani media.

Our Address
Mangalore

Contact Person :
Mr. Praveen Tauro

 Email : praveen@maibhaas.com

 Phone : +91 99 80 184340

 Address :
          Daijiworld.com,
          Airport Road,
          opp. Bondel Church,
          Mangalore - 575 008
          Karnataka - India

Our Address
Udupi

Contact Person :
Mr. Joel D'almeida

 Email : joel@maibhaas.com

 Phone : +91 90 08 855392

 Address :
          Eventz Redefined,
          Next to Vijaya Bank,
          Holy Family Complex
          1st Floor, NH -66
          Brahmavara - 576213

Our Address
Dubai

Contact Person :
Mr. Naveen Sequeira

 Email : editor@maibhaas.com

 Phone : +97 150 755 4105

 Address :
          Master Mind IT Solutions,
          UBL Building,
          #402, 4th Floor
          Bank Street - Bur Dubai
          Dubai - UAE