From around the world
ಸನ್ನು ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಟೋನಿ ನಿಡ್ಡೋಡಿ
ಸಿಜ್ಯೆಸ್ ತಾಕೊಡೆ
ಪಿ.ಜೆ.ಕರುಗಳ್ನಡೆ,
ಬಾರ್ಕುರ್
ಬಾ| ಮೈಕೇಲ್
ಮಿನೇಜಸ್
ಸಿಜ್ಯೆಸ್ ತಾಕೊಡೆ
ಸಿಜ್ಯೆಸ್ ತಾಕೊಡೆ
ಬಾ| ಎಮ್. ಮಿನೆಜ್, ಕಾಪುಚಿನ್
ಟೋನಿ ನಿಡ್ಡೋಡಿ
ಸನ್ನು ನಿಡ್ಡೋಡಿ
ದೊ| ಜೆರಾಲ್ಡ್ ಪಿಂಟೊ
ಸನ್ನು ನಿಡ್ಡೋಡಿ
ಸ್ಟೇನ್ ಅಗೇರಾ, ಮುಲ್ಕಿ
ವಲ್ಲಿ ಕ್ವಾಡ್ರಸ್
ವಿನ್ಸಿ ಪಿಂಟೊ
ಎಡ್ವಿನ್ ಜೆ.ಎಫ್. ಡಿಸೊಜಾ
ವೊಲ್ಟರ್ ಲಸ್ರಾದೊ
ಜೆಮ್ಮಾ ಪಡೀಲ್
ಟೊನಿ ಮೆಂಡೊನ್ಸಾ
ದೊ| ಎಡ್ವರ್ಡ್ ನಜ್ರೆತ್
ದೊ| ಎಡ್ವರ್ಡ್ ನಜ್ರೆತ್
ರೋಶು, ಬಜ್ಪೆ
ಎಡ್ವಿನ್ ಜೆ. ಎಫ್. ಡಿಸೋಜಾ
ಸ್ಟ್ಯಾನಿ ಕ್ರಾಸ್ತಾ, ಬೆಳಾ
ವೊಲ್ಟರ್ ಲಸ್ರಾದೊ
ವಿವಿಧ್ ಮುಳಾಂ ಥಾವ್ನ್
ಸ್ಟೇನ್ ಅಗೇರಾ
ಆಂಡ್ರ್ಯೂ ಎಲ್. ಡಿಕುನ್ಹಾ
+971 50 7554105
ತುಮ್ಚ್ಯಾ ಗಮನಾಕ್:
ನವೊ ಜಲ್ಮ್...
Friday, July 21, 2017ಬರಯ್ಣಾರಾ ವಿಶಿಂ ಜಾಣಾ ಜಾ...
ರಾತಿಚೆಂ ಜೆವಾಣ್ ಜಾಲ್ಲೆಂಚ್ ಸ್ಟ್ಯಾನಿ ಘರಾ ಥಾವ್ನ್ ಭಾಯ್ರ್ ವಾರೆಂ ಸೇಂವ್ಕ್ ಭಾಯ್ರ್ ಸರ್ಲೊ. 'ರೇಶ್ಮಾ, ತುಂ ಮ್ಹಕಾ ರಾಕಾನಾಕಾ ನಿದೆ, ಆನಿಂ ಸಕಾಳಿಂ ವೆಗ್ಗಿಂ ಉಟೊಂವ್ಕ್ ಆಸಾನೆ..' ಮ್ಹಣೊನ್ ಆಪ್ಲ್ಯಾ ಪತಿಣೆಕ್ ಸಾಂಗುನ್ ಪಾಂಯ್ ಭಾಯ್ರ್ ದವಾರ್ತಾನಾ ರಾತಿಚಿಂ ಇಕ್ರಾ ವರಾಂ ಜಾಲ್ಲಿಂ. ಕಿತ್ಯಾಕ್‍ಗೀ ಆಜ್ ತಾಚ್ಯಾ ಮತಿಕ್ ಸಮಾಧಾನ್ ನಾತ್‍ಲ್ಲೆಂ, ರಾಗ್‍ಯೀ ಯೆತಾಲೊ ಆನಿಂ ಸಾಂಗೊಂವ್ಕ್ ಜಾಯ್ನಾತ್‍ಲ್ಲೆಂ ಏಕ್ ತರ್ ಸಂಕಟ್.... ದಸೆಂಬರ್ ಮಹಿನೊ ತೊ ಜಾಲ್ಲ್ಯಾನ್ ದುಬಾಂಯ್ತ್ ಹಿಂವಾಳೆ ದೀಸ್ ಆಂಗ್ ಕಾಂಪ್ತೆ ಆಸ್ಲ್ಯಾರೀ, ಸ್ವೆಟ್ಟರ್ ಘಾಲ್ನ್ ಥಂಯ್ಚ್ ಲಾಗ್ಸಾರ್ ಆಸ್‍ಲ್ಲ್ಯಾ ದರ್ಯಾ ತಡಿಕ್ ವಚೊವ್ನ್ ಸಿಗ್ರೇಟಿ ಧುರೊ ಭಾಯ್ರ್ ಭಿತರ್ ವೊಡ್ತಾನಾ ಮತಿಕ್ ಸುಶೆಗ್ ಮೆಳ್ಳೊ ತರೀ ಕಾಳ್ಜಾಕ್ ಕಿತೆ೦ಗೀ ನಾ ಸಮಧಾನ್.
'ಘರಾ ನವೊ ಸಯ್ರೊ ಯೆಂವ್ಚ್ಯಾರ್ ಆಸಾ, ಆತಾ೦ ಪುಣಿ ತುಜಿ ಹಿ ಬಾಳ್‍ಬೂದ್ ಸೊಡ್ತಾಯ್‍ಗೀ ಸಾಯ್ಬಾ?' ಮ್ಹಣೊನ್ ರಾಗಾನ್ ಯೆಟ್ಚ್ಯೊ ಬಾಯ್ಲೆಚ್ಯೊ ಗಾಳಿ ಪರತ್ ಅನಿ ಪರತ್ ತಾಚ್ಯಾ ಕಾನಾಕ್ ಆಪ್ಟಾತೆಲೆ. ತಾಚ್ಯೆ ಸಂಗಿಂ ಗಾಂವಾಂ ಥಾವ್ನ್ ಪಯ್ಲೆ ಪಾವ್ಟಿಂ ದುಬೈಕ್ ಯೆಂವ್ಚಿ ಆವಯ್,... ಖಂಯ್ ಪುಣಿಂ ಪೂತ್ ಸಿಗ್ರೇಟಿಚೊ ಗುಲಾಮ್ ಜಾಲಾ ಮ್ಹಣ್ ತಿಕಾ ಕಳ್ಳೆಂ ಜಾಲ್ಯಾರ್? ಪಯ್ಲೆಂಚ್ ಜಿಣ್ಯೆಂತ್ ಬೆಜಾರಾಯೆನ್ ಜಿಯೆಂವ್ಚಿ ಆವಯ್ ಆನಿಂ ಹಾಂವ್ ಸಿಗ್ರೇಟ್ ವೊಡ್ತಾಂ ಮ್ಹಣ್ ಕಳ್ಳ್ಯಾರ್ ಆನೀಕೀ ತಿಚ್ಯಾ ಕಾಳ್ಜಾಕ್ ದುಕ್ಚಾಂತ್ ದೋನ್ ಉತ್ರಾಂ ನಾಂತ್. ಛೇ, ಮ್ಹಜೆಂಯ್ ಏಕ್ ಪಾಡಾರಿ ಜೀವಿತ್‍ಗೀ? ಕಿತೇಂಯ್ ಜಾಂವ್ದಿ ಆಜ್ ಥಾವ್ನ್ ಹಿ ಮಾರೆಕಾರ್ ಸಿಗ್ರೇಟ್ ಸೊಡ್ನ್ ಸೊಡಿಜೆ ಮ್ಹಣ್ ನಿಚೆವ್ ಕೆಲೊ ಸ್ಟ್ಯಾನಿನ್.
'ಆನಿಂ ಏಕ್ ವೋಡ್ನ್, ಮಾಗಿರ್ ಸೊಡ್ತಾಂ' ಮ್ಹಣ್ ಚಿಂತುನ್ ವೊಡ್ತಾನಾ ಆನಿಂ ಜಾಯ್ ಮ್ಹಣ್ ಭೊಗೊನ್ ಚಾರ್ - ಪಾಂಚ್ ಸಿಗ್ರೇಟಿ ಗೊಬೊರ್ ಜಾವ್ನ್ ದರ್ಯಾ ತಡಿಚ್ಯಾ ರೆಂವೆಂತ್ ಭರ್ಸುನ್ ಗೆಲ್ಲ್ಯೊ. ದಂಬು ಬಾಂಧುನ್ ಖೊಂಕ್ಲಿ ಆಯ್ಲ್ಯಾ ಬರಿಂ ಜಾಲೆಂ, ಬೆಜಾರಾಯೆನ್ ಸಿಗ್ರೇಟ್ ಪ್ಯಾಕೆಟ್ ಪಾಂಯಾಂ ಥಳಾ ಘಾಲ್ನ್ ಮಸ್ತಿತಾನಾ, ಮ್ಹಜಿ ಬಾಯ್ಲ್'ಚ್ ಮ್ಹಾಕಾ ಸೊಡ್ನ್ ಗೆಲಿ ಕೊಣ್ಣಾ ಮ್ಹಣ್ ಚಿಂತ್ಲೆಂ, ದುಃಖ್ ಭೊಗ್ಲೆಂ ಮ್ಹಕಾ ಆನಿಂ ದೊಳ್ಯಾಂನಿ ದುಃಖಾಂ ಆಯ್ಲಿಂ. ಸಿಗ್ರೇಟಿಚೊ ಆಕ್ರೇಚೊ ಧುರೊ ಸೊಡ್ತಾನಾ ತ್ಯಾ ಥಂಡಿಯೆಕ್ ತೊ ಎಕಾಚ್ಚಾಣೆ ಮುದೊ ಜಾವ್ನ್ ವಯ್ರ್ ಉಬ್ತಾನಾ ಮ್ಹಜ್ಯಾ ಮತಿಂತ್ ಯೆಂವ್ಚ್ಯಾ ಹಜಾರ್ ಚಿಂತ್ನಾಂನಿ ಬುಡೊನ್ ಗೆಲೊಂ.
ಆಟ್ ವರ್ಸಾಂ ಪಯ್ಲೆಂ ಕಾಮಾಕ್ ಲಾಗೊನ್ ಗಾಂವಾ ಥಾವ್ನ್ ದುಬೈಕ್ ಭಾಯ್ರ್ ಸರ್ತಾನಾ ಘರ್ಚಾಂಕ್ ಖಂಯ್ ನಾತ್‍ಲ್ಲೊ ಸಂತೊಸ್ ಆನಿಂ ಸಂಭ್ರಮ್. ಆಮ್ಚ್ಯಾ ಕುಟ್ಮಾಂತ್ ಎದೊಳ್ ಮ್ಹಣಾಸರ್ ಕೊಣೀ ದುಬೈ ವಸೊಂಕ್‍ನಾಂತ್, ಮ್ಹಜೊ ಪೂತ್ ವೆತೆ ಆಸಾ ಮ್ಹಣ್ ಬಾಪಾಯ್ನ್, 'ದೇವ್ ತುಕಾ ಧಾರಾಳ್ ಆಶೀರ್ವಾದಾಂ ಆನಿಂ ಬಳ್ ಭಲಾಯ್ಕಿ ದಿಂವ್ದಿ ಮ್ಹಣ್' ಬೆಸಾಂವ್ ದೀವ್ನ್, ಬೊಂಬಾಯ್ ಮ್ಹಣಾಸರ್ ಸಾಂಗಾತಾ ಯೇವ್ನ್ ವಿಮಾನಾರ್ ಚಡಯಿಲ್ಲೆ೦, ಆಜುನೀ ಉಡಾಸಾಚ್ಯಾ ಬುಕಾಂತ್ ಘಟ್ಟ್ ರೊಂಬ್ಲಾಂ. ಮ್ಹಕಾ ಎಕಾ ಕುಶಿನ್ ಸಂತೊಸ್ ಜಾಲ್ಯಾರ್ ಅನ್ಯೇಕಾ ಕುಶಿನ್ ಕೋಣಿ ಮ್ಹಜಿಂ ನಾತ್‍ಲ್ಲ್ಯಾ ಗಾಂವಾಂಕ್ ಕಶೆಂ ವೆಚೆಂ ಮ್ಹಣ್ ಖಂತ್... ಅಶೆಂ ಚಿಂತುನ್ ಚಿಂತುನ್ ಕಶೆಂಯೀ ದುಬೈ ಯೇವ್ನ್ ಪಾವ್ಲೊಂ.
ಜನವರಿ ಮಹಿನೊ ಯೆತಾನಾ ಆಮ್ಚ್ಯಾ ಕೊಡಿಯಾಲಾಂತ್ ಥಂಡ್ ಆನಿಂ ಕುಲ್ಕುಲೊ ಸಾಂಗಾತಾ ಯೆತಾ. ದುಬೈ ತಶೆಂಚ್ ಆಸೊಂಕ್ ಪುರೋಗಿ ಮ್ಹಣ್ ಚಿಂತುನ್ ಆಸ್ತಾನಾ ವಿಮಾನ್ ಯೇವ್ನ್ ದುಬಾಯ್ ಎರ್ ಪೊರ್ಟಾಕ್ ಪಾವ್ಲೆಂ ಆನಿಂ ಎರ್ ಪೊರ್ಟಾ ಥಾವ್ನ್ ಭಾಯ್ರ್ ಯೆತಾನಾ ಫ್ರಿಜ್ಯಾ ಭಿತರ್ ಕುಡಾಯಿಲ್ಲೊ ಅನ್ಭೊಗ್ ಜಾಲೊ. ಹ್ಯಾ ಥಂಡಿಯೆಂತ್ ಕೋಣಿ ಮೆಲ್ಯಾರ್ ಐಸಾಂತ್ ದವರ್ಚಿ ಗರ್ಜ್ ನಾ ಕೊಣ್ಣಾ... ತ್ಯಾ ನಮುನ್ಯೆಚಿ ಥಂಡಿ ಹಾಂಗಾಸರ್! ಭಾಯ್ರ್ ಮ್ಹಜೆ ಖಾತಿರ್ ಕಂಪೆನಿಚಿ ಟ್ಯಾಕ್ಸಿ ರಾಕೊನ್ ಆಸ್‍ಲ್ಲಿ, ಕಂಪೆನಿನ್ ಬುಕ್ ಕೆಲ್ಲ್ಯಾ ಹೋಟೆಲಾಕ್ ಯೇವ್ನ್ ಹಾ೦ವ್ ಪಾವ್ಲೊಂ. ಗಾಂವಾಂ ಥಾವ್ನ್ ಯೆತಾನಾ ಮಮ್ಮಿಕ್ ಕಳಾನಾತ್‍ಲ್ಲ್ಯಾ ಬರಿ ಪ್ಯಾಕ್ ಕರ್ನ್ ಹಾಡ್‍ಲ್ಲ್ಯೊ ಸಿಗ್ರೇಟಿ ಪ್ಯಾಕೇಟ್ಸ್ ಚಿಂತಾನಾ ಗೆಲ್ಲೊ ಜೀವ್ ಆಯ್ಲೊ ಆನಿಂ ಆಂಗಾಂತ್ ಏಕ್ ತರ್ ಊಬ್ ಚಡ್ಲಿ. ಸಕ್ಡಾಂ ಭಾಯ್ಲ್ಯಾ ಗಾಂವಾಂಕ್ ಯೆತಾನಾ ಖಾಂವ್ಕ್ ಹಾಡ್ನ್ ಆಯ್ಲ್ಯಾರ್ ಹಾಂವ್ ಎಕ್ಲೊ ಸಿಗ್ರೇಟಿ ಪ್ಯಾಕೆಟ್ಸ್ ಹಾಡ್ನ್ ಆಯಿಲ್ಲೊ೦!
ಹ್ಯಾ ಥಂಡಿಯೆಕ್ ಯೇವ್ನ್ ಎಕಾ ಮಹಿನ್ಯಾ ಭಿತರ್ ಹಾಡ್‍ಲ್ಲ್ಯೊ ಸಿಗ್ರೇಟಿ ಪ್ಯಾಕೇಟ್ಸ್ ಪುರಾ ಖಾಲಿ ಕೆಲ್ಲ್ಯೊ. ಗಾಂವಾಂತ್ ಪಪ್ಪಾನ್ ಸಿಗ್ರೇಟಿ ವೋಡ್ನ್ ತಾಕಾ ಪಿಡಾ ಸುರು ಜಾವ್ನ್ ಸೊಸ್ಚೆ ಕಷ್ಟ್ ಉಡಾಸಾಕ್ ಆಯ್ಲ್ಯಾರೀ, ಕೊಲೇಜಿಂತ್ ಇಷ್ಟಾಂನಿ ಶಿಕಯಿಲ್ಲಿ ಸಂವೊಯ್ ಸೊಡುಂಕ್ ಜಾಯ್ನಾಸ್ತಾಂ ಚಡ್ ಜಾವ್ನ್ ಆತಾಂ ಸಿಗ್ರೇಟಿಚ್ ಮ್ಹಕಾ ಮ್ಹಜ್ಯಾ ಜೀವನಾಚೊ ಸಾಂಗಾತಿ ಜಾಲ್ಲ್ಯೊ.
ಏಕ್ ದೀಸ್ ಅಚಾನಾಕ್ ಗಾಂವಾಂ ಥಾವ್ನ್ ಫೋನ್ ಆಯ್ಲೊ, 'ಪಪ್ಪಾ ಹೊ ಸಂಸಾರ್ ಸಾಂಡುನ್ ಗೆಲಾ, ವೆಗ್ಗಿಂ ಯೆ...' ಮ್ಹಣ್. ಧನಿಯಾಕ್ ಸಾಂಗೊನ್ ಎಮರ್ಜೆನ್ಸಿ ರಜೆರ್ ಗಾಂವಾಂಕ್ ಪಾವ್ಲೊಂ. ಮರ್ಣಾಚ್ಯೊ ರೀತಿ ಸಂಪವ್ನ್ ಹಪ್ತ್ಯಾಚೆಂ ಆನಿಂ ಮಹಿನ್ಯಾಚೆಂ ಮೀಸ್ ಮುಗ್ದಾವ್ನ್ ಪಾಟಿಂ ದುಬೈ ಯೇಂವ್ಕ್ ಭಾಯ್ರ್ ಸರ್ಲೊಂ. ಜಾಲ್ಯಾರೀ ಗಾಂವಾಂತ್ ಮ್ಹಜ್ಯಾ ಸಾಂಗಾಂತಿ ಸಿಗ್ರೇಟಿಕ್ ವಿಸ್ರೊಂಕ್ ನಾತ್‍ಲ್ಲೊ.
ಮಮ್ಮಿಕ್ ಕಶೆಂಯ್ ಸಮಾಧಾನ್ ಕರ್ನ್ ಹಾಂವ್ ಪಾಟಿಂ ದುಬೈ ಪಾವ್ಲೊಂ. ಎಕಾ ವಾಟೆನ್ ಮಮ್ಮಿ ಎಕ್ಸುರಿ ಮ್ಹಣ್ ಚಿಂತುನ್ ಆನಿಂ ಸರ್'ಲ್ಲ್ಯಾ ಪಪ್ಪಾಕ್ ಚಿಂತುನ್ ಹಿ ಸಿಗ್ರೇಟ್ ವೊಡುಂಕ್ ಮ್ಹಕಾ ಚಡ್ ಆನಿ ಚಡ್ ನಾಡ್ತಾಲಿ. ಆತಾಂತಾಂ ಹಾಂವ್ ಲೆಕಾಚ್ಯಾಕೀ ಚಡ್‍ಚ್ ಹ್ಯಾ ಸಿಗ್ರೇಟಿಚೊ ಗುಲಾಮ್ ಜಾವ್ನ್ ಗೆಲ್ಲೊ ಮ್ಹಣ್ ಭೊಗ್ತಾಲೆಂ ಮ್ಹಕಾ. ಪಪ್ಪಾ ಸರೊನ್ ಏಕ್ ವರ್ಸ್ ಸಂಪ್ಲೆಂ ಆನಿಂ ವರ್ಸಾಚ್ಯಾ ಮಿಸಾಕ್ ವಚೊಂಕ್ ಜಾವ್ನಾ ಜಾಲ್ಲ್ಯಾನ್ ಹಾಂಗಾ ಥಾವ್ನ್ಂಚ್ ತಾಚ್ಯಾ ಅತ್ಮಾಕ್ ಶಾಂತಿ ಮಾಗ್ಲಿ. ಅಶೆಂ ಏಕ್ ದೀಸ್ ಮಮ್ಮಿಲಾಗಿಂ ಉಲೊವ್ನ್ ಆಸ್ತಾನಾ ಮ್ಹಣಾಲಿ, 'ಪಪ್ಪಾ ಸರೊನ್ ವರ್ಸ್ ಉತ್ರಾಲೆಂ, ತುಂ ಘರಾಂತ್ ವಡ್ಲೊ ಪೂತ್. ಎಕ್ ಮಹಿನೊ ರಜಾ ಘಾಲ್ನ್ ಯೆ! ಚೆಡುಂ ಪಳೆಯ್ಲಾಂ... ಮುದಿಯೆಚೆಂ ಕಾರ್ಯೆಂ ಮುಗ್ದಿಯಾಂ...' ಮ್ಹಣ್ ಸಾಂಗ್ತಾನಾ, ನಾಂ ಮ್ಹಣಾನಾಸ್ತಾನಾ ಗಾಂವಾಂಕ್ ಪಾವ್ಲೊಂ. ಮುದಿಯೆಚೆಂ ಕಾರ್ಯೆಂ ಬರೆಂ ಕರ್ನ್ ಮುಗ್ದಾವ್ನ್ ಪಾಟಿಂ ಕಾಮಾಕ್ ಆಯ್ಲೊಂ.
ಆಮ್ಸೊರಾನ್ ಗಾಂವಾಂಕ್ ವಚೊವ್ನ್ ಆಯಿಲ್ಲ್ಯಾಕ್ ಸಮಾ ಕರ್ನ್ ಚೆಡ್ವಾಲಾಗಿಂ ಉಲೊಂವ್ಕಿ ಜಾವ್ನಾತ್ಲೆಂ. ತೆದಾಳಾ ಫೇಸ್ ಬುಕ್, ಟ್ವಿಟ್ಟರ್, ವಾಟ್ಸಾಪ್ ತಸಲೆ ಜಾಳಿಜಾಗೆ ನಾತ್‍ಲ್ಲೊ ಕಾಳ್ ಆನಿಂ ಸ್ಮಾರ್ಟ್ ಫೋನ್ ತೆದಾಳಾ ಮಸ್ತ್ ಮಾರೋಗ್. ಕಾಲಿಂಗ್ ಕಾರ್ಡ್ ಕಾಣ್ಘೆವ್ನ್ ಫೋನ್ ಕರುಂಕ್ ಗೆಲ್ಯಾರ್ ಮಹಿನ್ಯಾಚೊ ಸಾಂಬಾಳ್ ತಾಕಾಚ್ ಘಾಲಿಜಾಯ್ ಪಡ್ತಾಲೊ. ತಶೆಂ ಜಾಲ್ಲ್ಯಾನ್ ಪಂದ್ರಾ ದಿಸಾಂಕ್ ಏಕ್ ಪಾವ್ಟಿಂ ಫೋನ್ ಕರ್ನ್ ಚೆಡ್ವಾಲಾಗಿಂ ಉಲಯ್ತಾಲೊಂ. ಮ್ಹಜ್ಯಾ ಹ್ಯಾ ಬಾಳ್‍ಬುದಿ ವಿಶ್ಯಾಂತ್ ತಾಕಾ ಸಾಂಗೊಂವ್ನ್ ಸೊಡ್ಲೆಂ. ಫಟಿಂ ಮಾರ್ನ್ ಲೋಫರ್ ಮ್ಹಣ್ ಸಾಂಗೊವ್ನ್ ಕಾಣ್ಘೆಂವ್ಚಾಕೀ ಸತ್ ಸಾಂಗೊನ್ ಇಲ್ಲೆ ದೀಸ್ ಸಮಾಧಾನೆನ್ ವಾಂಚ್ತಾ ಮ್ಹಣ್ ಚಿಂತುನ್ ಸಾಂಗೊನ್ ಸೊಡ್ಲೆಂ. ರೇಶ್ಮಾನ್ 'ಆನೀಕೀ ಕಾಜಾರಾಕ್ ಸ ಮಹಿನೆ ಮ್ಹಣಾಸರ್ ವೇಳ್ ಆಸಾ... ಸೊಡುಂಕ್ ಪ್ರಯತನ್ ಕರ್..,' ಮ್ಹಣ್ ಲೋವ್ ಫೋನಾರ್ ಫುಸ್ಪಸ್ಲೆಂ.
ಕಾಜಾರಾಕ್ ಸಗ್ಳೆಂ ತಯಾರ್ ಜಾಲ್ಲೆಂ ಆನಿಂ ಮ್ಹಕಾ ಖಾಲಿ ಪಂದ್ರಾ ದಿಸಾಂಚಿ ರಜಾ ಮೆಳ್ಳಿ. ಪುಣ್ ಹಿ ಬಾಳ್‍ಬೂದ್ ಅನೀಕೀ ಸೊಡುಂಕ್ ಜಾಂವ್ಕ್ ನಾತ್‍ಲ್ಲಿ. ಕಶೆಂಯ್ ಗಾಂವಾಂಕ್ ಪಾವ್ಲೊಂ. ಚೊರ್ಯಾಂ ಸಿಗ್ರೇಟಿ ವೊಡ್ತಾಲೊಂ. ರೆಸ್ಪೆರ್ ಜಾತಾನಾ ಮ್ಹಾಕಾ ಸಿಗ್ರೇಟ್ ಜಾಯ್ ಮ್ಹಣ್ ಭೊಗ್ತಾಲೆಂ. ಕಸೊಯ್ ತಡ್ವೊನ್ ರಾವ್ಲೊಂ. ಸಾಡೊ ನ್ಹೆಸೊಂಕ್ ವೆತಾನಾ ಇಷ್ಟಾ ಸಾಂಗಾತಾ ವಚೊವ್ನ್ ಪಾಂಚ್ ಸಿಗ್ರೇಟಿ ವೊಡ್ನ್ ಆಯಿಲ್ಲೆ೦ ಆಜುನೀ ಮ್ಹಾಕಾ ಸಮಾ ಉಡಾಸ್ ಆಸಾ. ರೇಶ್ಮಾಕ್ ಹಾಂವ್ ಸಿಗ್ರೇಟ್ ವೊಡ್ನ್ ಆಯ್ಲಾಂ ಮ್ಹಣ್ ಕರಿಯಾಮಣಿ ಬಾಂಧುನ್ ಕೀಸ್ ದಿತಾನಾ ಸಮಾ ಕಳ್ಳೆಂ ಆನಿಂ ತಾಚೆಂ ತೊಂಡ್ ಬೆಜಾರಾಯೆನ್ ಬಾವ್ಲೆಂ. ವೆಗಿಂ ವೆಗಿಂ ಸಗ್ಳಿಂ ಕಾರ್ಯಿ೦ ಮುಗ್ದಾವ್ನ್ ಹನಿಮೂನ್ ಕರುಂಕೀ ಪುರ್ಸೊತ್ ನಾಸ್ತಾನಾ ಪಾಟಿಂ ಯೆತಾನಾ ತಾಕಾಯೀ ವಿಸಿಟಿಂಗ್ ವಿಸಾರ್ ಅಪವ್ನ್ ಹಾಡ್ನ್ ಆಯಿಲ್ಲೊಂ. ಕೆದಾಳಾ ಪಳೆಲ್ಲ್ಯಾರೀ ಸಿಗ್ರೇಟ್ ವೊಡ್ಚಾ ಮ್ಹಕಾ ಪಳೆವ್ನ್ ರೇಶ್ಮಾಕ್ ಪುರೊ ಜಾವ್ನ್ ಗೆಲ್ಲೆಂ ಆನಿಂ ತೆ ಮ್ಹಣ್ತಾಲೆಂ, 'ಎಕ್‍ಚ್ ಪಾವ್ಟಿಂ ನ್ಹಂಯ್ ಜಾಲ್ಲ್ಯಾರೀ ಇಲ್ಲೆಶಿ, ಇಲ್ಲೆಶಿ ಕರ್ನ್ ಸಿಗ್ರೇಟ್ ಉಣೆಂ ಕರ್... ಜೀವಾಕ್ ಬರಿ ನ್ಹಂಯ್...' ಮ್ಹಣ್. ದೋನ್ ವರ್ಸಾಂ ಸಂಪ್ಲ್ಯಾರೀ ಮ್ಹಜೆಲಾಗಿಂ ಬದ್ಲಾವಣ್ ಜಾವ್ನಾತ್‍ಲ್ಲಿ ಪಳೆವ್ನ್ ತೆಂ ಮೊನೆ೦ಚ್ ಜಾಲ್ಲೆಂ, ಸದಾಂಯ್ ಮ್ಹಜಿ ಪರಿಸ್ಥಿತಿ ಚಿಂತುನ್ ಗುಪಿತ್ ರಡ್ತಾಲೆ೦. 'ಘರಾ ಏಕ್ ಭುರ್ಗೆಂ ಯೆತೆ ಆಸಾ ಆತಾಂ ಪುಣೀ ತಿ ಸಿಗ್ರೇಟ್ ಸೊಡುಂಕ್ ನಜೊಗೀ ತುಕಾ. ಪಾಪ್ ತ್ಯಾ ಭುರ್ಗ್ಯಾಚೆರೀ ತುಜೊ ಪ್ರಭಾವ್ ಪಡ್ತಾ...' ಮ್ಹಣ್ ರೇಶ್ಮಾನ್ ಸಾಂಗ್ತಾನಾ, ವ್ಹಯ್ ಆತಾಂ ಮ್ಹಣಿಂ ಹಾಂವೆಂ ಸಿಗ್ರೇಟಿ ಸೊಡಿಜೆ ಮ್ಹಣ್ ಚಿಂತ್ಲೆಂ. ಇಲ್ಲೆ ದೀಸ್ ಕಶೆಂಯ್ ಘಟ್ ನಿಚೆವ್ ಕರ್ನ್ ಸಿಗ್ರೇಟ್ ನಾಸ್ತಾನಾ ರಾವೊಂಕ್ ಪ್ರಯತ್ನ್ ಕೆಲೆಂ.
'ಉಟ್ತಾಯ್ಗೀ... ಪುರೊ ಸ್ವಪಣ್ ಪಳಯ್ಲೆಂ... ಎರ್ ಪೋರ್ಟಾಕ್ ವಚೊಂಕ್ ಆಸಾ, ಮಮ್ಮಿ ಯೆತೆ ಆಸಾ ಆಜ್... ತೆಂಯ್ ಪಯ್ಲೆ ಪಾವ್ಟಿಂ....' ಮ್ಹಣ್ ಮ್ಹಾಕಾ ಹಾಲೊವ್ನ್ ಉಟಯ್ತಾನಾ. ಸ್ವಪ್ಣಾಂತ್ ಆಟ್ ವರ್ಸಾಂ ಪಾಟಿಂ ಗೆಲ್ಲ್ಯಾ ಮ್ಹಕಾ ಜಾಗ್ ಜಾಲ್ಲಿ. 'ನವ್ಯಾ ಸಯ್ರ್ಯಾಕ್ ಸ್ವಾಗತ್ ಕರುಂಕ್ ಮಮ್ಮಿ ಗಾಂವಾಂ ಥಾವ್ನ್ ಹಾಂಗಾಸರ್ ಯೆತಾನಾ ಆತಾಂ ಪುಣೀ ತುಜಿ ಸಿಗ್ರೇಟ್ ರಾವೊವ್ನ್ ಬರೊ ಮನಿಸ್ ಜಾ. ಮಮ್ಮಿಕ್ ಮ್ಹಣಿಂ ಕಳಾತ್ ತರ್? ಇಲ್ಲೆಶೆಂ ಚಿಂತುನ್ ಪಳೆ...' ಮ್ಹಣಾಲೆಂ ರೇಶ್ಮಾ.
'ನಾಂ, ಕಾಲ್ ರಾತಿಂಚ್ ಸಗ್ಳ್ಯೊ ಸಿಗ್ರೇಟಿ ದರ್ಯಾ ದೆಗೆರ್ ಉಡೊವ್ನ್ ಆಯ್ಲಾಂ ಆನಿಂ ವೊಡಿನಾ ಮ್ಹಣ್ ನಿಚೆವ್ ಕೆಲಾ ಮ್ಹಣ್..' ಸಾಂಗ್ಲೆಂ. ತಾಕಾ ತೆಂ ಆಯ್ಕೊನ್ ಕಾಂಯ್ ವಿಶೇಸ್ ಮ್ಹಣ್ ಭೊಗುಂಕ್ ನಾಂ. 'ತುಂವೆಂ ಅಶೆಂ ಹಜಾರ್ ಪಾವ್ಟಿಂ ಸಾಂಗ್ಲಾಂಯ್ ಮ್ಹಕಾ ಸಗ್ಳೆಂ ಗೊತ್ತಾಸಾ, ಸುಣ್ಯಾಚಿ ಶಿಮ್ಟಿ ನಳಿಯೆಂತ್ ಘಾಲ್ಲ್ಯಾರ್ ನೀಟ್ ಜಾಯ್ನಾಂ...' ಮ್ಹಣೊನ್ ರಾಂದ್ಚ್ಯಾ ಕುಡಾ ಸರ್ಶಿಂ ಮೆಟಾಂ ಕಾಡಿಲಾಗ್ಲೆಂ. ಗೆಲೆತ್ಯಾ ಮಹಿನ್ಯಾಂತ್ ಖೊಂಕ್ಲಿ ಕಾಡ್ತಾನಾ ತೊಂಡಾ ಥಾವ್ನ್ ರಗಾತ್ ಆಯಿಲ್ಲೆಂ... ಪಪ್ಪಾಕ್‍ಯೀ ಆಖ್ರೇಚ್ಯಾ ದಿಸಾಂನಿ ಅಶೆಂಚ್ ಜಾತಾಲೆಂ. , ಹೆಂ ಬಾಯ್ಲೆ ಕಡೆಂ ಸಾಂಗಿನಾಸ್ತಾನಾ ಮ್ಹಜೆ ಭಿತರ್'ಚ್ ಹಾಂವ್ ಮೊರ್ತಾಂ ಕೊಣ್ಣಾ ಮ್ಹಣ್ ಭೊಗ್ತಾನಾ. ಮತಿಂತ್ ಘಟ್ ನಿಚೆವ್ ಕರ್ನ್ ಜಾಲ್ಲೊ, ಆನಿಂ ಸಿಗ್ರೇಟ್ ನಾಕಾ ಮ್ಹಣ್.
ಏರ್ ಇಂಡಿಯಾ ವಿಮಾನಾರ್ ಮಮ್ಮಿ ದುಬೈ ಯೇವ್ನ್ ಪಾವ್ಲಿ ಆನಿಂ ತಿಕಾ ಘರಾ ಆಪವ್ನ್ ಹಾಡ್ನ್ ಆಯ್ಲೊಂ. ಘರಾ ಯೆತಾನಾ ಹ್ಯಾ ದುಬಾಯ್ಚಿ ಸೊಭಾಯ್ ತಿಕಾ ದಾಕೊಂವ್ಕ್ ಹಾಂವ್ ವಿಸ್ರಾಲೊನಾಂ. ತಿಕಾಯೀ ದುಬೈ ಪಳೆವ್ನ್ ಮಸ್ತ್ ಖುಷಿ ಜಾಲಿ. ಇತ್ಲ್ಯಾರ್ ಘರಾ ನವೊ ಸಯ್ರೊ ಯೇವ್ನ್ ಪಾವ್ಲೊ. ಪುಣ್ ಮ್ಹಕಾ ಹಿ ಸಿಗ್ರೇಟ್ ಸೊಡ್ನ್ ಮತಿಕ್ ಕಿತೆಂಗೀ ಸಮಾಧಾನ್ ನಾತ್‍ಲ್ಲೆಂ. ಸಗ್ಳ್ಯಾಂ ಕಡೆನ್ ಉಲಯ್ತಾನಾ ರಾಗಾನ್ ಪೆಟ್ತಾಲೊ, ತಕ್ಲಿ ಫಡಾಫಡ್, ಆಂಗ್ ಪಾಂಗ್ ದುಕ್ತಾಲೆಂ. ತೆದ್ನಾಂ ಹಾಂವೆಂ ಚಿಂತ್‍ಲ್ಲೆ೦ಯ್ ಆಸಾಕೀ, ಬಾಯ್ಲೆಕ್ ಜಾಯ್ ತರ್ ಸಲೀಸಾಯೆನ್ ಸೊಡ್ಯೆತ್ ಪುಣ್ ಹಿ ಬಾಳ್‍ಬೂದ್ ಸೊಡುಂಕ್ ತಿತ್ಲಿ ಸುಲಭ್ ನಾಂ ಮ್ಹಣ್. ಸಿಗ್ರೇಟ್ ನಾಸ್ತಾನಾ ಏಕ್ ಮಹಿನೊ ಸಂಪ್‍ಲ್ಲೊ, ಪುಣ್ ಮ್ಹಜ್ಯಾ ಮತಿಕ್ ಸಮಾಧಾನ್ ನಾತ್‍ಲ್ಲೆಂ, ಆತಾಂಯ್ ಸಗ್ಳ್ಯಾಂ ಕಡೆನ್ ರಾಗ್ ಕರ್ಚೊ, ತಕ್ಲಿ ಫೊಡಾಫಡ್. ಭುರ್ಗೊ ಜಲ್ಮೊನ್ ದೋನ್ ಮಹಿನೆ ಜಾಲ್ಲೆ ಪುಣ್ ಮ್ಹಜಿ ಮಮ್ಮಿ ಮ್ಹಕಾ ಪಳೆವ್ನ್ಂಚ್ ಆಸ್‍ಲ್ಲಿ. ಮ್ಹಜೊ ಪೂತ್ ದುಬೈ ಆಯ್ಲ್ಯಾ ಮಾಗಿರ್ ಕಿತ್ಯಾಕ್ ಗೀ ಸಮಾ ಉಲಯ್ನಾಂ, ಉತ್ರಾಂ ಉತ್ರಾಂಕ್ ರಾಗಾರ್ ಜಾತಾ ಮ್ಹಣ್ ತಿಣೆಂ ಘರಾ ಪಾಟಿಂ ವೆಚೊ ನಿರ್ಧಾರ್ ಕೆಲ್ಲೊ ಆನಿಂ ಮಾಮಾಲಾಗಿಂ ಸಾಂಗೊವ್ನ್ ಪಾಟಿಂ ಗಾಂವಾಂಕ್ ವೆಚಿ ಟಿಕೇಟ್ ಬುಕ್ ಕೆಲ್ಲಿ.
ದುಸ್ರ್ಯಾ ಸಕಾಳಿಂ ಉಟೊನ್ ಕಾಮಾಕ್ ಭಾಯ್ರ್ ಸರ್ತಾನಾ ಮ್ಹಜಿ ತಕ್ಲಿ ದುಕ್ತಾಲಿ. ಮೆಟಾಂ ದೆಂವೊನ್ ಸಕ್ಲಾ ಯೆತಾನಾ ಸಗ್ಳೊ ಸಂಸಾರ್ ಘುಂವ್ತಾ ತಶೆಂ ಭೊಗ್ಲೆಂ. ದೊಳೆ ಉಘಡ್ತಾನಾ ಹಾಂವ್ ಆಸ್ಪತ್ರೆಚ್ಯಾ ಖಟ್ಲ್ಯಾರ್ ನಿಧೊನ್ ಆಸ್‌ಲ್ಲೊಂ ಆನಿ ಮಮ್ಮಿ ಬಗ್ಲೆಕ್ ಬಸೊವ್ನ್ ಮ್ಹಜೆಂ ಮಾತೆಂ ಪೊಶೆತಾಲಿ. ಥೊಡ್ಯಾ ವೆಳಾನ್ ಸಮ್ಜಲೊಂಗಿ ಏಕ್ ಹಫ್ತ್ಯಾ ಉಪ್ರಾಂತ್ ಮ್ಹಜಿ ಮತ್ ಪಾಟಿಂ ಆಯಿಲ್ಲಿ ಆನಿ ಹಾಂವ್ ಮರ್ಣಾಂತ್ ಜೀಕ್ ಆಪ್ಣಾವ್ನ್ ದುಸ್ರ್ಯಾ ಪಾವ್ಟಿಂ ಪಾಟಿಂ ಸಂಸಾರಾಕ್ ಪರ್ತಾಲ್ಲೊಂ. ದಾಕ್ತೆರಾಂನಿ ಮ್ಹಜ್ಯಾ ಜಿವಾಚಿ ಆಶಾ ಸಾಂಡ್‌ಲ್ಲಿ ತರ್‌ಯೀ ಮ್ಹಜ್ಯಾ ಆವಯ್ನ್ ದೆವಾಚೆರ್ ಪಾತ್ಯೆಣಿ ಸಾಂಡಿನಾಸ್ತಾಂ ಮ್ಹಜಿ ಚಾಕ್ರಿ ಕರ್ಚಿ ರಾಂವುಕ್‌ನಾ. ಆವಯ್ಚ್ಯಾ ಮಾಗ್ಣ್ಯಾಚೊ ಫಳ್ ಜಾವ್ನ್ ಮ್ಹಜ್ಯಾ ಕುಡಿಕ್ ಪರತ್ ಜೀವ್ ಆಯಿಲ್ಲೊ. ದಾಕ್ತೆರಾಂಕ್ ಸಯ್ತ್ ಅಜ್ಯಾಪ್ ಜಾಲ್ಲೆಂ. ಭಲಾಯ್ಕೆಂತ್ ಸುದ್ರಾಪ್ ಜಾಲ್ಲೊ ಆನಿ ಕುಡಿಂತ್ ಸಕತ್ ಪರತ್ ಆಯಿಲ್ಲಿ. ಸಬಾರ್ ದಿಸಾಂಚ್ಯಾ ಚಿಕೆತ್ಸೆ ಉಪ್ರಾಂತ್ ಆಸ್ಪತ್ರೆ ಥಾವ್ನ್ ಘರಾ ಪಾಟಿಂ ಪರ್ತಾಲ್ಲೊಂ. ಮ್ಹಜ್ಯಾ ಬಗ್ಲೆಕ್ ಮ್ಹಾಕಾ ವೆಂಗುನ್ ಬಸ್‌ಲ್ಲಿ ಮ್ಹಜಿ ಆವಯ್, ಮ್ಹಜ್ಯೆ ಕುಡಿಕ್ ಬಳ್ ಜಾಲ್ಲಿ ತರ್, ಮ್ಹಜೆರ್ ಪಾತ್ಯೆವ್ನ್ ಆಸ್‍ಲ್ಲ್ಯಾ ಮ್ಹಜಿ ಪತಿಣ್ ಆನಿ ಲ್ಹಾನ್ ಬಾಳಾಕ್ ಹಾಂವೆಂ ಬಳ್ ದೀಂವ್ಕ್ ಆಸ್‍ಲ್ಲೆಂ. ವ್ಹಡಿಲಾಂಚೊ ಮೋಗ್, ತಾಂಚೊ ಸಾಕ್ರಿಫಿಸ್ ಕಿತೆಂ ಮ್ಹಣ್ ಮ್ಹಾಕಾ ಮ್ಹಜ್ಯಾ ಆವಯ್ನ್ ಸಮ್ಜಾಯಿಲ್ಲೆಂ. ತೊಚ್ ಮೋಗ್ ಆನಿ ಸಾಕ್ರಿಫಿಸ್ ಹಾಂವೆಂ ಆತಾಂ ಮ್ಹಜ್ಯಾ ಭುರ್ಗ್ಯಾಕ್ ದೀಂವ್ಕ್ ಆಸ್‍ಲ್ಲೆ. ಮ್ಹಜ್ಯಾ ಆವಯ್ನ್ ಆಮ್ಕಾಂ ವ್ಹಡ್ ಕರುಂಕ್ ಕಾಡ್‍ಲ್ಲೆ ಸರ್ವ್ ಕಷ್ಟ್, ತ್ಯಾಗ್ ಮ್ಹಜ್ಯಾ ದೊಳ್ಯಾಂ ಹುಜ್ರಿಂ ಏಕ್ ಘಡ್ಯೆ ಆಶಾರ್ ಪಾಶಾರ್ ಜಾಲೆ... ತಾಂಚ್ಯಾ ಕಷ್ಟಾಂ ಮುಕಾರ್, ತ್ಯಾಗಾ ಮುಕಾರ್ ಸಿಗ್ರೇಟ್ ಕಾಂಯ್‍ಚ್ ನ್ಹಂಯ್ ಮ್ಹಣ್ ಮ್ಹಾಕಾ ಭೊಗ್ಲೆಂ. ಹಾಂವ್‍ಯೀ ಎಕಾ ನವ್ಯಾ ಹುರುಪಾನ್ ಭರ್ಲೊ... ಮ್ಹಜ್ಯಾ ಪತಿಣೆಕ್ ಆನಿ ಲ್ಹಾನ್ ಬಾಳಾಕ್ ಹಾಂವೆಂ ಪಳೆಲೆಂ... ಮ್ಹಜ್ಯಾ ಪತಿಣೆಚೊ ಹಾತ್ ಮ್ಹಜ್ಯಾ ಹಾತಾಂತ್ ಆಸೊನ್, 'ಹಾಂವ್ ತುಕಾ ಸದಾಂಚ್ ಸಾಂಗಾತ್ ದಿತೆಲಿಂ..' ಮ್ಹಳ್ಳೊ ಅರ್ಥ್ ದಿತಲೊ ತರ್, ಮ್ಹಜ್ಯಾ ಭುರ್ಗ್ಯಾನ್ ಮ್ಹಜೆಂ ಏಕ್ ಬೋಟ್ ಧರುನ್ ಮ್ಹಾಕಾಚ್ ಪಳೆಂವ್ಚ್ಯಾ ಬರಿಂ ಮ್ಹಾಕಾ ದಿಸ್ಲೆಂ... ಹಾಂವ್ ನಿಜಾಕ್‍ಯೀ ಬದಲ್ಲೊಂ.... ನವೊ ಜಲ್ಮ್ ಮ್ಹಾಕಾ ದೆವಾನ್ ಫಾವೊ ಕೆಲಾ, ಮ್ಹಜ್ಯಾ ಆವಯ್ಕ್ ಆನಿ ಮ್ಹಜ್ಯಾ ಕುಟ್ಮಾಕ್ ಸಾಂಬಾಳುಂಕ್ ಮ್ಹಣ್ ಹಾಂವೆಂ ಚಿಂತ್ಲೆಂ. ಮ್ಹಜ್ಯಾ ದೀಷ್ಟಿಂತ್ ಏಕ್ ನವೊ ನಿಚೆವ್ ಉದೆಲಾ ಮ್ಹಳ್ಳೆಂ ಸತ್ ಮ್ಹಜ್ಯಾ ಪತಿಣೆಕ್ ಸಮ್ಜಾಲ್ಲೆಂ... ಏಕ್ ನವೆಂ ಜಿವಿತ್ ಪರತ್ ಆರಂಭ್ ಜಾಲೆಂ. ಹಾಚ್ಯೆ ಉಪ್ರಾಂತ್ ಪರತ್ ಕೆನ್ನಾಂಯ್ ಮಾರೆಕಾರ್ ಸಿಗ್ರೆಟ್ ಮ್ಹಜ್ಯಾ ವೊಂಠಾಚೆರ್ ಜಳ್ಳಿ ನಾ.... ಮ್ಹಜ್ಯಾ ಆವಯ್ ಬಾಪಾಯ್ನ್ ಮ್ಹಾಕಾ ದಿಲ್ಲೊ ಮೋಗ್ ಆನಿ ತ್ಯಾಗ್, ಮ್ಹಜ್ಯಾ ಭುರ್ಗ್ಯಾಕ್ ದೀಂವ್ಕ್ ಹಾಂವ್ ಫುಡೆಂ ಸರ್ಲೊ....
Tags:
Robin, New Life, Konkani, Mangalore, Mangalorean, Mother Tongue
Post your comments
Your email address will not be published. Required fields are marked *|
|
-
12/24/2020 ಉದೆಂತಿಚೆಂ ನೆಕೆತ್ರ್...
-
11/28/2020 ಚೂಕಿ ತಿದ್ವಿನಾ ಜಾಲ್ಯಾರ್!...
-
11/4/2020 ಅನಿವಾಸಿ ರಾಯ್...
-
10/23/2020 ಘಾಣ್...
-
-
9/13/2020 ರಾತ್ ಪಾಳಿ...
-
6/18/2018 ವೆಚಿಕ್ ಪುತಾಚೊ ದಾಟ್ಟು...
-
11/12/2017 ನ್ಯೂ ಐನ್‌ಸ್ಟೀನ್...
-
9/7/2017 ಮ್ಹಜ್ಯಾ ಮೊಗಾಚೆಂ ಮೆಲ್ಬಾ...
-
8/29/2017 ಕೊಲ್‍ಗರ್ಲ್...
-
12/18/2021 ಕೆನಡಾಂತ್ 'ನವೊ ಭರ್‍ವಸೊ' ನವೆಂ ಪದ್...
-
-
-
4/26/2020 ಹೆಲಿಕಾಪ್ಟರ್ ಮನಿ...
-
2/5/2020 ಕಾಜಾರ್ ಕೆದಾಳಾ..?...
-
9/30/2018 ಕಾಜಾರಾಕ್ 'ವೊಜೆಂ ಬಾಂದ್ಚೆಂ'...
-
9/12/2018 'ವಾಟ್ಸ್ಯಾಪ್ ಹಿಂಸಾ' ಥಾವ್ನ್ ಬಚಾವ್ ಕರಾ!...
-
7/29/2018 ಪ್ರಾಯೆಸ್ತಾಂಚೊ ಸಾಂಗಾತಿ - ಸ್ಮಾರ್ಟ್ ಫೋನ್...
-
6/25/2018 ಪಾತ್ತ್ಯಾ ಪಾತ್ತ್ಯಾಂಚೆ ಜೀನ್ಸ್...
-
5/6/2018 ಟೆನ್ಶನ್ ಉಣೆ ಜಾಂವ್ಕ್ ಆಟ್ ಉಪಾಯ್...
9 Comment/s.
ಕಾಣಿ ಪ‌ಸಂದ್ ಜಾಲಿ. ತಾಚ್ಯೆ ವ‌ರ್ನಿ ಚಡ್ ತುವೆಂ ವಿಂಚ್ಲಲೊ ವಿಶ‌ಯ್. ವಾಚ್ಲ‌ಲ್ಯಾಂಕ್ ಚಿಂತುಂಕ್ ಲಾಂವ್ದಿ ಮ್ಹಣೊನ್ ಆಶೆತಾಂ.
Its awesome Robin, such a nice story with great message. Konkani maibhaas need more young tallents like you.Keep it up.
Beautiful story.Nicely written.God bless you
Bov bori arthaborith kaani. jinyedekiborith aasa. Thank you for sharing such wonderful story dear Robin.
Nice story Robin keep it up.
Nice story... Having good moral in the story. very beautifully written. keep writing.
superb very nice story.thanks Robin.
very interesting story. really very nice.nicely written by Robin. god bless you and we are expecting many more stories from you.
ಕಾಣಿ ಪ‌ಸಂದ್ ಜಾಲಿ. ತಾಚ್ಯೆ ವ‌ರ್ನಿ ಚಡ್ ತುವೆಂ ವಿಂಚ್ಲಲೊ ವಿಶ‌ಯ್. ವಾಚ್ಲ‌ಲ್ಯಾಂಕ್ ಚಿಂತುಂಕ್ ಲಾಂವ್ದಿ ಮ್ಹಣೊನ್ ಆಶೆತಾಂ.